Loko Charlotte White, muchumayeri wa nkarhi hinkwawo, a fike edorobeni ra Louisville, eKentucky, le U.S.A., a ri karhi a chova putumende leyi nga ni mavhilwa, vanhu vo tala va n’wi langute hi ku hlamala.

HI 1908, Makwerhu wa xisati White u hlamarise vanhu va le dorobeni rero hikwalaho ka xigolonyana lexintshwa lexi vitaniwaka Dawn-Mobile. U te: “Vanhu vo tala va vulavule ha xona naswona xi endle leswaku va ndzi honolela hi ku hlamala.”

Swichudeni swa Bibele, hilaha Timbhoni ta Yehovha a ti vitaniwa hakona enkarhini wolowo, swi swi vone swi fanerile ku chumayela tidyondzo ta risima leti swi ti kumeke eka dyondzo leyi enteke ya Matsalwa. Vanhu vo tala va kume vutivi bya Bibele hi ku dyondza ntlhandlamano wa tibuku leti a ti ri ni nhloko-mhaka leyi nge Millennial Dawn (leti endzhaku ka nkarhi ti vitaniweke Studies in the Scriptures). Vakreste lava a va tiyimiserile naswona a va swi kota, va fambe etindhawini to tala—emadorobeni, eswimitanini ni le tindhawini ta le makaya—va nyika vanhu van’wana lava rhandza ku hlaya tibuku teto leti a ti vitaniwa hi vito leri nge “Helping Hands for Bible Students.”

Hi 1908, Makwerhu wa xisati White swin’we ni vahuweleri lava hisekaka va Mfumo a va ti xavisa hi mali leyi endlaka $1.65 (U.S.) tibuku teto ta tsevu, leti xifunengeto xa tona a xi phutseriwe hi lapi. Ematshan’weni yo va va ti nyika vini va miti hi nkarhi wolowo, a va tsala oda kutani va tlhelela eka vona endzhaku ka nkarhi—hakanyingi hi siku leri a va hola ha rona—leswaku va va tisela tona ni ku landza mali ya kona leyi nga nyawuriki, leyi a yo kota ku hakelela swikoxo swo ti gandlisa ntsena. Wanuna un’wana loyi a a kaneta ntirho wa hina, u vilerisiwe hi leswi vanhu a va nyikela mali leyi nga nyawuriki loko va nyikiwa tibuku teto.

Malinda Keefer u tsundzuka leswaku u tshame a tsarisa tioda ta madzana mambirhi ku ya eka madzana  manharhu ya tibuku teto hi vhiki. Kambe ku ve ni xiphiqo hileswi vanhu vo tala a va tsakela tibuku leti ta Dawns. Phela tibuku teto ta tsevu a ti ri ni matluka ya 740! Xihondzo xo Rindza xi vule leswaku “tibuku ta 50 a ti tika tikhilogiramu ta 18,” kutani “a swi karharisa swinene” ku yisela vanhu tioda ta vona, ngopfu-ngopfu eka vamakwerhu va xisati.

Leswaku ku lulamisiwa xiphiqo lexi xo yisela vanhu tioda, Makwerhu James Cole u endle rimba leri petsiwaka leri nga ni mavhilwa mambirhi, leri eka rona a ku ta fasiwa putumende hi mabawuti. Leswi makwerhu loyi a a nga ha boheki ku rhwala mabokisi yo tika lawa a ma tele hi tibuku, u te: “A ndza ha tivavisi makatla.” U kombe vayingiseri xigolonyana lexintshwa entsombanweni wa Swichudeni swa Bibele wa hi 1908, lowu a wu khomeriwe edorobeni ra Cincinnati, le Ohio. Eka swikurufu leswi a swi fasiwa ematlhelo hamambirhi ya nsimbi leyi nga ehansi ka putumendhe, a ku kovotliwe vito leri nge Dawn-Mobile, tanihi leswi a xi tala ku rhwala tibuku ta Millennial Dawn. A swi olova ku xi fambisa hi voko rin’we hambiloko putumende ya xona yi tele hi tibuku, loko u rhange hi ku titoloveta xona katsongo. A swi koteka ku xi endla xi tlakuka kumbe xi ya ehansi naswona mavhilwa ya xona a ma kota ku famba eswitarateni leswi nga ni xikontiri ni leswi nga riki na xona. Loko muhuweleri a chayisa ensin’wini, a a kota ku petsa mavhilwa ya xona ya rhaba ma tshama etlhelo ka putumende kutani a xi khoma hi voko a tlhelela ekaya hi milenge kumbe hi treme.

Vamakwerhu va xisati lava nga entirhweni wa nkarhi hinkwawo a va nyikiwa xigolonyana xa Dawn-Mobile mahala. Kambe lavan’wana a va xi xava hi $2.50 (U.S.). Makwerhu wa xisati Keefer, loyi ku nga ni xifaniso xakwe laha, a a ri ni vuswikoti byo xi fambisa hi voko rin’we xi tele hi tibuku a tlhela a khoma bege ya tibuku hi voko lerin’wana. Leswi a kumeke vanhu vo tala lava tsakeleke eka doroba rin’wana leri nga ni migodi ePennsylvania, le U.S.A., u tsemakanye nambu wa Allegheny ku ringana kanharhu kumbe ka mune hi siku ro yisa tibuku leti odiweke.

Eku heleni ka va-1980, muhahisi wa xihaha-mpfhuka u endle xikhwama lexi nga ni mavhilwa lexi sweswi xi talaka ku tirhisiwa etimbaleni ta swihaha-mpfhuka ni le switichini swa tibazi. Kambe emalembeni ya kwalomu ka dzana lama hundzeke, vanhu a va hlamala loko va vona Swichudeni swa Bibele leswi hisekaka swi fambisa swigolonyana swa swona swa Dawn-Mobile swi ri karhi swi famba-famba swi haxa mbewu ya Mfumo.

[Marito lama tshahiweke exihlokweni lama nga eka tluka 32]

Makwerhu wa xisati Keefer u tsemakanye nambu wa Allegheny ku ringana kanharhu kumbe ka mune hi siku ro yisa tibuku leti odiweke

[Marito lama tshahiweke exihlokweni lama nga eka tluka 32]

Xi lulamise xiphiqo xo yisela vanhu tibuku ta “Dawn”