“Hi Kombela U Hi Teka Xifaniso”

Endzhaku ka siku ra vumbirhi ra ntsombano wa muganga, Josué, loyi a nga xirho xa ndyangu wa Bethele eMexico, u fambe a ya valanga doroba ra Querétaro. Javier na Maru, mpatswa lowu nga vafambi lava humaka eColombia, wu kombele Josué leswaku a wu teka xifaniso. Leswi yena ni vanghana vakwe lava nga Timbhoni a va ambale kahle va tlhela va vehela tibeji ta vona ta ntsombano, mpatswa wolowo wu va vutisile loko va huma enkhubyeni wo thwasa kumbe eka xiendlakalo xin’wana xo hlawuleka. Josué u wu byele leswaku va huma entsombanweni wa Timbhoni ta Yehovha naswona u wu rhambele eka nongonoko wa hi Sonto.

Mpatswa wolowo wu vule leswaku wu ta khomiwa hi tingana swinene ku ya entsombanweni wolowo hikuva a wu na swona swiambalo leswi fanelekaka swo ya ha swona eka xiendlakalo xexo. Hambiswiritano, Josué u wu nyike vito rakwe ni nomboro ya riqingho ra rhavi leri a tirhaka eka rona.

Endzhakunyana ka tin’hweti ta mune, Josué u hlamarisiwe hileswi a beriweke riqingho hi Javier. Mpatswa wolowo wu ye entsombanweni naswona se a wu lava ku endzeriwa hi Timbhoni ta Yehovha eDorobeni ra Mexico, laha a wu tshama kona hi nkarhi wolowo. Hi ku hatlisa Timbhoni ti sungule ku dyondzela Javier na Maru Bibele naswona va nambe va sungula ku ya eminhlanganweni. Endzhaku ka tin’hweti ta khume va ve vahuweleri. Hambileswi va bohekeke ku rhurhela eToronto, le Canada, va hambete va endla nhluvuko hi tlhelo ra moya naswona va khuvuriwile.

Endzhaku ka nkarhi, Josué u kume papila leri humaka eka Javier leri hlamuselaka leswaku i yini lexi n’wi susumeteleke ku amukela ntiyiso. U tsale a ku: “Loko hi nga si ya entsombanweni, mina ni nsati wa mina hi vulavule hileswaku hi lava nkongomiso wa Xikwembu. Loko hi vone ndlela leyi a mi ambale kahle ha yona, hi tibyele leswaku a mi huma enhlengeletanweni yo hlawuleka swinene. Entsombanweni, hi tsakisiwe hi ndlela ya rirhandzu leyi un’wana a hi kumeleke ndhawu yo tshama, ndlela leyi hi pfuniweke ha yona ku kuma matsalwa ya Bibele swin’we ni ndlela leyi lava a va ri kona va tikhomeke ha yona. A va nga ri na mhaka na swona leswi a hi ambale tanihi vafambi.”

Hakunene Josué u vone ku hetiseka ka marito ya Hosi Solomoni lama nge: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi, laha kumbe lahaya, kumbexana haswimbirhi swi ta va leswinene”! (Ekl. 11:6) Xana u nga byala mbewu ya wena hi ku tirhisa nkarhi lowu wu ku pfulekelaka leswaku u rhambela vanhu entsombanweni kumbe eka nkulumo ya le rivaleni leyi taka? Yehovha a nga ku tirhisa leswaku a koka vanhu lava nga ni ndlala ni torha ra moya, hilaha a endleke hakona eka Javier na Maru.—Esa. 55:1.

[Xifaniso lexi nga eka tluka 32]

Ku suka eximatsini ku ya exineneni: Alejandro Voeguelin, Maru Pineda, Alejandro Pineda, Javier Pineda na Josué Ramírez erhavini ra le Mexico