U Swi Nyikela Njhani Switsundzuxo?

Xana u tshame u komberiwa ku nyika van’wana switsundzuxo? Hi xikombiso, xana u tshame u vutisiwa swivutiso swo fana ni leswi nge: ‘Xana ndzi fanele ndzi endla yini? Xana ndzi fanele ndzi ya exinkhubyanini lexi? Xana ndzi fanele ndzi wu amukela ntirho lowu? Xana ndzi fanele ndzi rhandzana ni munhu loyi hi xikongomelo xo va hi tekana?’

Vanhu va nga ha ku kombela leswaku u va pfuna ku endla swiboho leswi nga ha khumbaka vuxaka lebyi va nga na byona ni vanghana va vona, swirho swa ndyangu hambi ku ri Yehovha. Xana u ta nyikela switsundzuxo leswi sekeriweke eka mavonelo ya wena kumbe eBibeleni? U tala ku nyikela switsundzuxo hi ndlela yihi? Ku nga khathariseki leswaku xivutiso lexi u vutisiwaka xona xi tikomba xi ri xa nkoka kumbe e-e, Swivuriso 15:28 yi vula leswaku “mbilu ya lowo lulama ya anakanyisisa leswaku a ta hlamula.” Xiya ndlela leyi milawu ya ntlhanu ya Bibele yi nga hi pfunaka ha yona leswaku hi nyika van’wana switsundzuxo leswinene.

1 Xi Twisise Kahle Xiyimo Xakwe.

“Loko munhu a angula malunghana ni mhaka yo karhi kambe a nga si yi twa, sweswo i vuphukuphuku eka yena ni ku tsongahatiwa.”—SWIV. 18:13.

Leswaku hi kota ku nyikela xitsundzuxo lexinene, hi fanele hi twisisa swiyimo ni langutelo ra loyi a kombelaka mpfuno. Hi xikombiso: Loko munhu un’wana o ku bela riqingho a ku vutisa ndlela yo ya ekaya ra wena, i yini leswi u nga lavaka ku swi tiva leswaku u kota ku n’wi pfuna? Xana u nga swi kota ku n’wi pfuna handle ko rhanga hi ku tiva lomu a nga kona? Nikatsongo. Hilaha ku fanaka, leswaku u kota ku nyikela xitsundzuxo lexinene u fanele u twisisa swiyimo ni langutelo ra loyi a kombelaka xitsundzuxo. Xana ku ni swilo swin’wana leswi hi nga swi tiviki hi xiyimo xakwe leswi nga khumbaka xitsundzuxo xa hina? Loko hi nga xi twisisi kahle xiyimo xakwe, hi nga ha n’wi nyika xitsundzuxo lexi nga ha n’wi pfilunganyaka.—Luka 6:39.

Kumisisa Leswaku U Endle Ndzavisiso Wo Tanihi Kwihi. Nakambe swi nga ha va vutlhari ku vutisa loyi a lavaka xitsundzuxo swivutiso swo tanihi leswi: “Hi yihi milawu ya Bibele leyi u ehleketaka leswaku ya tirha emhakeni leyi?” “Hi byihi vuyelo lebyinene ni lebyo biha lebyi u nga byi kumaka eka xiboho ha xin’we lexi u nga xi hlawulaka?” “Hi wihi ndzavisiso lowu se u wu endleke?” “Hi wihi mpfuno lowu vanhu van’wana vo kota vakulu, vatswari va wena kumbe loyi a ku dyondzelaka Bibele se va ku nyikeke wona?”

Tinhlamulo takwe ta swivutiso leswi ti nga ha hi pfuna ku twisisa leswaku se u endle matshalatshala yo tanihi kwihi leswaku a kuma mpfuno. Nakambe switsundzuxo swa hina hi ta swi nyikela hi ri karhi hi ehleketa hi leswi van’wana se va n’wi byeleke swona. Hi nga tlhela hi xiya loko kahle-kahle a lava mutsundzuxi loyi a nga ta n’wi ‘nyangalata tindleve’ hi ku n’wi nyika xitsundzuxo lexi nga ta n’wi tsakisa.—2 Tim. 4:3.

  2 Papalata Ku Hatlisela Ku Hlamula.

“Munhu un’wana ni un’wana u fanele a hatlisa emhakeni yo twa, a nonoka emhakeni yo vulavula.”—YAK. 1:19.

Hi nga ha hatlisela ku hlamula hileswi hi lavaka ku pfuna loyi a lavaka xitsundzuxo. Kambe, xana ku ta va ku ri vutlhari ku hatlisela ku hlamula, ngopfu-ngopfu loko hi nga si endla ndzavisiso lowu enteke hi xivutiso lexi a hi vutisaka xona? Swivuriso 29:20 yi ri: “Xiphunta xa antswa, ku ri na munhu wo tsutsumela ku hlamula timhaka.”—Bibele—Mahungu Lamanene.

Tiyiseka leswaku xitsundzuxo xa wena xi sekeriwe eBibeleni. Tivutise: ‘Xana ndlela leyi ndzi anakanyaka ha yona yi kuceteriwa hi langutelo ni “moya wa misava”?’ (1 Kor. 2:12, 13) Tsundzuka leswaku ku tsakela ku pfuna ku ri koxe a ku ringananga. Loko Yesu a vule leswaku u fanele a xaniseka a tlhela a fa, muapostola Petro u n’wi tsundzuxe a ku: “Titsetselele, Hosi; khombo leri ri nga ka ri nga ku weli nikatsongo.” Hi nga dyondza yini eka nhlamulo ya Petro? Hi dyondza leswaku hambi ku ri munhu loyi a lavaka ku pfuna loko a nga tivoneli a nga vula ‘miehleketo leyi nga riki ya Xikwembu kambe yi nga ya vanhu.’ (Mat. 16:21-23) Hakunene i swa nkoka ku rhanga hi ku ehleketa hi nga si vulavula! Phela, ntokoto wa hina a wu nyawuli loko wu pimanisiwa ni vutlhari bya Xikwembu.—Yobo 38:1-4; Swiv. 11:2.

3 Titsongahate U Tlhela U Tirhisa Rito Ra Xikwembu.

“A ndzi endli nchumu hi ku tisungulela; kambe ndzi vulavula swilo leswi hilaha Tatana a ndzi dyondziseke hakona.”—YOH. 8:28.

Xana u nga vula u ku, “Loko a ndzi ri wena, a ndzi ta . . . ”? Hambiloko munhu a hi vutisa xivutiso lexi tikombaka xi olovile ku xi hlamula, swi ta va swinene ku tekelela xikombiso xa Yesu xo titsongahata. Hambileswi a a ri ni vutlhari ni ntokoto wo tala ku tlula vanhu hinkwavo, u te: “A ndzi vulavulanga hi ku tisungulela ka mina, kambe Tatana . . . u ndzi nyike xileriso xa leswi ndzi nga ta swi hlamusela ni ku swi vulavula.” (Yoh. 12:49, 50) Nkarhi hinkwawo tidyondzo ni switsundzuxo swa Yesu a swi fambisana ni ku rhandza ka Tata wakwe.

Hi xikombiso, eka Luka 22:49 hi hlaya leswaku vadyondzisiwa va Yesu va n’wi vutisile loko va fanele va lwa ni ntshungu loko a ri ekusuhi ni ku khomiwa. Mudyondzisiwa un’wana u khembe un’wana hi banga. Rungula leri fanaka leri nga eka Matewu 26:52-54 ri hi byela leswaku hambi ku ri exiyin’weni xexo, Yesu u tirhise nkarhi wolowo leswaku a pfuna mudyondzisiwa yoloye leswaku a twisisa ku rhandza ka Yehovha. Leswi Yesu a a tiva nawu lowu nga eka Genesa 9:6 ni vuprofeta lebyi nga eka Pisalema 22 na Esaya 53, u kote ku va nyika xileriso xa vutlhari lexi poniseke vutomi ni ku tsakisa Yehovha.

  4 Tirhisa Minkandziyiso Leyi Sekeriweke eBibeleni.

“Kahle-kahle i mani hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke?”—MAT. 24:45.

Yesu u veke ntlawa wa hlonga ro tshembeka ni ro tlhariha leswaku wu hi nyika swakudya swa moya. Loko u nyikela xitsundzuxo ni nkongomiso malunghana ni timhaka ta nkoka, xana u tinyika nkarhi wo endla ndzavisiso lowu enteke eminkandziyisweni leyi sekeriweke eBibeleni?

Hi nga kuma rungula ro tala hi ku languta ebukwini leyi nge Watch Tower Publications Index (Índice das Publicações da Torre de Vigia) ni le ka Watchtower Library (Biblioteca da Torre de Vigia). * Hakunene hi ta va hi hoxisa loko ho tshika ku tirhisa switirhisiwa leswi, leswi nga switlati leswikulu swa rungula! Swi xaxameta tinhloko-mhaka ta magidi swin’we ni swihloko swo tala leswaku swi pfuna munhu loyi a lavaka xitsundzuxo. Xana wa swi kota ku pfuna van’wana leswaku va tirhisa switirhisiwa leswi ku dyondza ni ku pimanisa milawu ya Bibele leswaku va endla xiboho lexinene? Ku fana ni mepe lowu nga pfunaka munhu leswaku a hlawula gondzo leri a nga fambaka ha rona leswaku a fika laha a yaka kona, switirhisiwa swo endla ndzavisiso swi nga pfuna munhu leswaku a endla swiboho leswi nga ta n’wi pfuna a kuma vutomi lebyi nga heriki.

Vakulu vo tala va kombe vahuweleri ndlela yo tirhisa Index kumbe Watchtower Library, kutani sweswo swi va pfuna ku kuma swihloko leswi va nga swi hlayaka ni ku pimanisa leswi Matsalwa ma swi vulaka loko va endla swiboho. Ku dyondza sweswo a swi pfuni vahuweleri ku tlhantlha swiphiqo leswi va vaka na swona ntsena kambe swi tlhela swi va pfuna leswaku va va ni mukhuva wo endla ndzavisiso ni ku titshega hi minkandziyiso leyi Yehovha a hi nyikaka yona. Hi ndlela yoleyo, va “[letela] matimba ya vona ya ku twisisa hi ku ma tirhisa leswaku va hambanisa leswi lulameke ni leswi hoxeke.”—Hev. 5:14.

5 Papalata Ku Endlela Van’wana Swiboho.

“Un’wana ni un’wana u ta rhwala ndzhwalo wakwe.”—GAL. 6:5.

Eku heteleleni, un’wana ni un’wana u fanele a tihlawulela leswaku hi yihi ndzayo ni xitsundzuxo lexi a nga ta xi tirhisa. Yehovha u nyike un’wana ni un’wana wa hina ntshunxeko wo tihlawulela loko a lava ku kongomisiwa hi milawu yakwe kumbe e-e. (Det. 30:19, 20) Munhu loyi a lavaka xitsundzuxo a nga ha kuma leswaku ku ni milawu yo hlayanyana ya Bibele leyi nga tirhaka exiyin’weni xakwe, kambe hi yena a faneleke a tiendlela xiboho. Loko swi ta etimhakeni tin’wana kumbe eka malembe ya munhu loyi a kombela xitsundzuxo eka hina, hi nga ha tivutisa: ‘Xana hakunene ndzi na yona mfanelo yo pfuna emhakeni leyi?’ Timhaka tin’wana swa antswa ti yisiwa eka vakulu kumbe eka vatswari, loko loyi a lavaka xitsundzuxo a ha ri muntshwa.

[Nhlamuselo ya le hansi]

[Bokisi/Xifaniso lexi nga eka tluka 8]

Ku Endla Ndzavisiso Hi Nkarhi Wa Vugandzeri Bya Ndyangu

Ha yini u nga tirhisi nkarhi wa vugandzeri bya ndyangu ku endla ndzavisiso leswaku u kuma tinhlamulo ta swivutiso leswi wa ha ku vutisiwaka swona? Hi swihi swihloko ni milawu ya Bibele leyi u nga yi kumaka leswaku u hlamula swivutiso sweswo? Hi xikombiso, a hi nge makwerhu un’wana u ku vutisa malunghana ni ku rhandzana ni munhu un’wana hi xikongomelo xo va a tekana na yena. Loko u tirhisa Index kumbe Watchtower Library, sungula hi ku lava tinhloko-mhaka leti fambisanaka hi ku kongoma ni mhaka yoleyo. Hi xikombiso, eka Index u nga ha lava nhloko-mhaka leyi nge “Dating” (“Namoro”) kumbe “Marriage” (“Casamento”). Kutani u lava swihlokwana leswi fambisanaka ni xivutiso lexi u vutisiweke xona. U nga ha kuma leswaku tinhloko-mhaka leti nga eka “See also” (“Veja também”) ti nga ku pfuna hikuva ti nga ha kombetela eka swihloko swin’wana leswi vulavulaka hi ku kongoma hi mhaka leyi u yi lavaka.

[Bokisi leri nga eka tluka 9]

Hi ku pfuniwa hi minkandziyiso leyi humaka enhlengeletanweni ya Yehovha, hi nga kuma ni ku nyika van’wana switsundzuxo leswinene. Eklesiasta 12:11 yi ri: “Marito ya lavo tlhariha ma fana ni tinsungunu ta havi, ni lava va nghenaka hi nhloko eku hlengeleteni ka marito va fana ni swipikiri leswi gongondzeriweke; va nyiketiwe va huma eka murisi un’we.” Ku fana ni “tinsungunu ta havi,” ku nga tinhonga to tontswa leti tirhiseriwaka ku kongomisa swifuwo leswi humaka endleleni, xitsundzuxo xa rirhandzu ni lexi twisisekaka xi kongomisa vanhu vo tshembeka leswaku va famba endleleni leyinene. “Swipikiri leswi gongondzeriweke” swi endla leswaku miako yi yima yi tiya. Hilaha ku fanaka, switsundzuxo leswinene swi nga pfuna munhu leswaku a endla swiboho leswinene ni leswi tiyeke. Lavo tlhariha ‘va nghene hi nhloko’ kumbe va kuma ntsako lowukulu hi ku ‘hlengeleta marito’ lama kombisaka vutlhari bya “murisi un’we” wa vona, ku nga Yehovha.

Hi fanele hi tekelela Murisi wa hina Yehovha loko hi nyika van’wana switsundzuxo. Hakunene i lunghelo ku yingisa lava kombelaka switsundzuxo eka hina ni ku va pfuna nkarhi wun’wana ni wun’wana! Loko hi nyikela switsundzuxo leswi sekeriweke eka milawu ya Bibele, swi ta vuyerisa van’wana swi tlhela swi va pfuna ku kuma vutomi lebyi nga heriki.