Swivutiso Swa Vahlayi

Ku fa ka malandza ya Xikwembu yo tshembeka “i ka risima ematihlweni ya Yehovha” hi ndlela yihi?

▪ Mupisalema u huhuteriwe ku yimbelela a ku: “I ka risima ematihlweni ya Yehovha ku fa ka lavo tshembeka vakwe.” (Ps. 116:15) Vutomi bya mugandzeri un’wana ni un’wana wa Yehovha i bya nkoka swinene eka yena. Hambiswiritano, marito lama tshahiweke eka Pisalema 116 a ma kombeteli eka rifu ra mugandzeri un’wana ni un’wana.

Loko ku nyikeriwa nkulumo ya xilahlo, swi hoxile ku tirhisa Pisalema 116:15 ku kombetela eka mufi hambiloko a fe a tshembekile eka Yehovha. Ha yini? Hikuva marito ya mupisalema ma ni nhlamuselo leyi anameke. Ma vula leswaku Xikwembu a xi nge pfumeleli leswaku ntlawa hinkwawo wa malandza ya xona yo tshembeka ma fa hikuva xi ma teka ma ri ya risima.—Hlaya Pisalema 72:14; 116:8.

Pisalema 116:15 ya hi tiyisekisa leswaku Yehovha a nge swi pfumeleli leswaku malandza yakwe hinkwawo ma herisiwa hi ku helela emisaveni. Entiyisweni, matimu ya hina ya manguva lawa ma kombisa leswaku se hi tiyiselele miringo ni minxaniso yo vava swinene, xisweswo ma nyikela vumbhoni bya leswaku Xikwembu a xi nge swi pfumeleli nikatsongo leswaku hi herisiwa.

Leswi Yehovha a nga ni matimba hinkwawo naswona a nga ta hetisisa xikongomelo xakwe hambi ko ba lexi dumaka, a nge swi pfumeleli leswaku hi herisiwa tanihi ntlawa. Loko o swi pfumelela sweswo, swi nga tikomba onge valala vakwe va ni matimba ku n’wi tlula, ku nga nchumu lowu nga ta ka wu nga endleki nikatsongo. Nakambe sweswo a swi ta endla leswaku xikongomelo xakwe xa leswaku misava leyi yi akiwa hi vanhu lava tshembekaka eka yena xi nga hetiseki, ku nga nchumu lowu nga ta ka wu nga endleki nikatsongo. (Esa. 45:18; 55:10, 11) Phela hambi ku ri ntirho wo kwetsima lowu Yehovha a endleriwaka wona a wu nga ha ta endliwa emisaveni loko ko dlayiwa vanhu hinkwavo lava n’wi gandzelaka eswivaveni swa tempele yakwe leyikulu ya moya ya laha misaveni. A va nga ta va kona vanhu lava nga ta vumba “misava leyintshwa,” ku nga vanhu vo lulama lava nga ta hanya emisaveni leyi nga ta va ehansi ka “matilo lamantshwa.” (Nhlav. 21:1) Nakambe Mfumo wa Kreste wa Gidi ra Malembe a wu nga ta fika loko vanhu lava nga ta fumiwa hi wona laha misaveni va nga ri kona.—Nhlav. 20:4, 5.

Xikhundlha ni ndhuma leswi Xikwembu xi nga na swona a swi ta tlhontlhiwa loko a xo pfumelela valala va xona leswaku va herisa ntlawa hinkwawo wa vanhu va xona laha misaveni. Sweswo a swi ta endla leswaku xikhundlha xa Yehovha xa ku va Hosi leyi Lawulaka xi tekeriwa ehansi. Ku tlula kwalaho, Yehovha a nge swi pfumeleli leswaku malandza yakwe yo tshembeka ma lovisiwa tanihi ntlawa hikwalaho ka leswi a tixiximaka yena n’wini swin’we ni vito rakwe ro kwetsima. Nakambe xiya mhaka leyi: Tanihi leswi Xikwembu xi “nga riki na vuhomboloki,” a xi nge pfuki xi tsandzekile ku sirhelela vanhu lava va xi tirhelaka hi ku tshembeka. (Det. 32:4; Gen. 18:25) Ku engetela kwalaho, loko Xikwembu xo pfumelela leswaku malandza ya xona ma herisiwa tanihi ntlawa, a swi ta lwisana ni leswi vuriweke hi Rito ra xona: “Yehovha a nge va tshiki vanhu vakwe hikwalaho ka vito rakwe lerikulu.” (1 Sam. 12:22) Hakunene “Yehovha a nge va fularheli vanhu vakwe, hambi ku ri ku siya ndzhaka yakwe.”—Ps. 94:14.

Hakunene swa chavelela ku tiva leswaku vanhu va Yehovha a va nge pfuki va lovisiwile emisaveni! Hikwalaho, a hi tshameni hi tshembekile eka Xikwembu naswona hi tshemba xitshembiso xa xona lexi nge: “Tlhari rihi ni rihi leri nga ta endleriwa ku ku hlasela a ri nge humeleli, ni ririmi rihi ni rihi leri nga ta kanetana na wena ehubyeni u ta ri gweva. Leyi i ndzhaka ya malandza ya Yehovha, naswona ku lulama ka wona ku huma eka mina.”—Esa. 54:17.

[Marito lama tshahiweke exihlokweni lama nga eka tluka 22]

Xikwembu a xi nge pfuki xi pfumelele leswaku vanhu va xona va lovisiwa