Musa Wu Herise Gome

MUKHEGULA un’wana loyi a vitaniwaka Rie a nga ti amukelanga hi musa Timbhoni timbirhi ta le Netherlands, George na Manon, loko va n’wi endzela leswaku va ta n’wi byela hi mahungu lamanene ya Mfumo. U va byele leswaku u feriwe hi n’wana wa jaha ni hi vavanuna vambirhi naswona a a karhatiwa hi vuvabyi bya mahlangano ya marhambu. Hambileswi a ehliseke moya loko va ri karhi va vulavula na yena, a nga vanga na xinghana nikatsongo.

Hambiswiritano, George u byele Manon leswaku va n’wi khomela swiluva loko va tlhelela eka yena hikuva a a tikomba a ri ni xivundza swinene naswona a khunguvanyekile. Rie u tsakile loko va n’wi tele ni swiluva hambileswi sweswo swi n’wi hlamariseke. Kambe a a khomekile kutani va veke siku rin’wana leri a va ta n’wi endzela ha rona. Loko George na Manon va tlhelele eka yena hi siku leri a va ri vekile, a a nga ri kona ekaya. Hambileswi va ringeteke ku n’wi endzela hi minkarhi leyi nga faniki, a va n’wi kumanga. Va kale va ehleketa leswaku a a nga lavi leswaku va n’wi endzela.

Siku rin’wana, George u hetelele a n’wi kumile ekaya naswona Rie u kombele ku khomeriwa hileswi a a nga ri kona hi siku leri a va ri vekile. U n’wi byele leswaku a a ri exibedlhele. U te: “Kambe a mi nge kholwi loko ndzo mi byela leswi ndzi saleke ndzi swi endla loko mi fambile. Ndzi sungule ku hlaya Bibele!” Va ve ni bulo ro tsakisa naswona va sungule dyondzo ya Bibele.

Loko Rie a ri karhi a dyondza Bibele, u hundzule vumunhu byakwe, a tshika ku tshama a hlundzukile kutani a tshama a tsakile ni ku va ni musa. Hambileswi a a nga ha swi koti ku huma endlwini, hi ku hatlisa u sungule ku byela vanhu lava a va n’wi endzela hi ta vupfumeri byakwe lebyintshwa. A a nga swi koti ku ya eminhlanganweni nkarhi ni nkarhi hikwalaho ka rihanyo rakwe kambe a a tsaka hileswi vamakwerhu a va n’wi endzela. Siku leri a hlanganiseke ha rona malembe ya 82, u ye enhlengeletanweni ya xifundzha naswona u kombise ku tinyiketela kakwe eka Xikwembu hi ku khuvuriwa.

Endzhaku ka tin’hweti ti nga ri tingani a file, ku kumiwe xitlhokovetselo lexi a xi tsaleke. Eka xona, u hlamusele ndlela leyi xivundza xi vavaka ha yona loko munhu a dyuharile naswona u kandziyise nkoka wa ku va ni musa. Manon u ri: “Ndzi khumbekile swinene loko ndzi hlaya xitlhokovetselo xexo naswona ndza tsaka swinene leswi Yehovha a hi pfuneke leswaku hi n’wi komba musa.”

Xikombiso xa Yehovha xi hi susumetela ku kombisa rirhandzu ni musa wo tano. (Efe. 5:1, 2) Ntirho wa hina wo chumayela wu ta tswala mihandzu loko “hi tibumabumela tanihi vatirheli va Xikwembu . . . hi musa.”—2 Kor. 6:4, 6.