Tikhomeni Tanihi Vanhu Lava Nga Ta Hanya eMfun’weni Wa Xikwembu!
Tikhomeni Tanihi Vanhu Lava Nga Ta Hanya eMfun’weni Wa Xikwembu!
“Tikhomeni hi mukhuva lowu fanelaka mahungu lamanene.”—FILP. 1:27.
U NGA HLAMULA NJHANI?
I vamani lava nga hanyaka eMfun’weni wa Xikwembu?
Swi vula yini ku dyondza ririmi, matimu ni milawu ya Mfumo wa Xikwembu?
Lava nga ta hanya eMfun’weni wa Xikwembu va swi kombisa njhani leswaku va yi rhandza milawu ya xona?
1, 2. Ha yini ndzayo leyi Pawulo a yi tsaleleke vandlha ra le Filipiya a yi ri ni nhlamuselo ya nkoka?
MUAPOSTOLA PAWULO u khutaze vandlha ra le Filipiya leswaku ri ‘tikhoma hi mukhuva lowu fanelaka mahungu lamanene.’ (Hlaya Vafilipiya 1:27.) Xiga xa Xigriki lexi Pawulo a xi tirhiseke eka rito leri nge, “tikhomeni” xi nga ha tlhela xi hundzuluxeriwa xi va “ku hlanganyela emintirhweni leyi endliwaka hi vaaka-tiko.” Xiga xexo a xi ri ni nhlamuselo ya nkoka eka vandlha ra le Filipiya. Ha yini? Hikuva swi tikomba onge Mfumo wa Rhoma a wu pfumelele Vafilipiya leswaku va va vaaka-tiko va Rhoma ni leswaku va sirheleriwa hi milawu ya kona. Vafilipiya a va tinyungubyisa hi ku va vaaka-tiko va Rhoma hikuva leswi a swi endla va vuyeriwa ku tlula vanhu van’wana hi nkarhi wolowo.
2 Swirho swa vandlha ra le Filipiya a swi ri ni xivangelo lexi twalaka xo tinyungubyisa. Pawulo u swi tsundzuxe leswaku leswi swi nga Vakreste lava totiweke a swi ri vaaka-tiko va le “matilweni.” (Filp. 3:20) A swi ri vaaka-tiko eMfun’weni wa Xikwembu, ku nga ri emfun’weni wa vanhu. Hikwalaho, swi tsakele nsirhelelo ni vuyelo lebyikulu.—Efe. 2:19-22.
3. (a) I vamani lava nga ni lunghelo ra ku va vaaka-tiko eMfun’weni wa Xikwembu? (b) Hi ta kambisisa yini exihlokweni lexi?
3 Ndzayo ya Pawulo ya ku ‘tikhoma hi mukhuva lowu fanelaka mahungu lamanene,’ yi tirha ngopfu eka lava nga ta fuma na Kreste etilweni. (Filp. 3:20) Kambe yi nga tlhela yi tirha eka lava nga ta hanya laha misaveni lava nga ta fumiwa hi Mfumo wa Xikwembu. Ha yini? Hikuva Vakreste hinkwavo lava tinyiketeleke va tirhela Hosi yin’we ku nga Yehovha naswona va fanele va hanya hi milawu yin’we. (Efe. 4:4-6) Namuntlha, vanhu vo tala va tikarhatela ku fanelekela ku va vaaka-tiko va tiko leri fuweke. Kambe hi fanele hi ri teka ri ri ra nkoka ngopfu lunghelo ra ku va vaaka-tiko eMfun’weni wa Xikwembu. Leswaku hi ri tlangela swinene lunghelo rero, a hi kambisiseni ku fana loku nga kona eka swilaveko swo va muaka-tiko emfun’weni wa vanhu ni le Mfun’weni wa Xikwembu. Endzhaku hi ta kambisisa swilo swinharhu leswi hi faneleke hi swi endla leswaku hi hambeta hi ri vaaka-tiko eMfun’weni wa Xikwembu.
SWILAVEKO SWA KU VA MUAKA-TIKO
4. I yini ririmi leri tengeke naswona hi ri “vulavula” njhani?
4 Dyondza ririmi ra kona. Vafumi van’wana va lava leswaku lava va lavaka ku va vaaka-tiko va dyondza ku vulavula ririmi leri tirhisiwaka ngopfu etikweni. Hambiloko se va pfumeleriwe ku va vaaka-tiko, vanhu van’wana va nga ha tikarhata malembe yo tala leswaku va ri vulavula kahle ririmi lerintshwa. Va nga ha dyondza milawu ya ririmi hi xihatla kambe swi nga ha va tekela nkarhi ku dyondza ndlela leyinene leyi marito ma vitaniwaka ha yona. Hilaha ku fanaka, Mfumo wa Xikwembu wu lava leswaku lava va nga ta va vaaka-tiko va wona va dyondza leswi Bibele yi swi vulaka “ririmi leri tengeke.” (Hlaya Sofaniya 3:9.) I yini ririmi rero? I ntiyiso malunghana ni Xikwembu ni hi swikongomelo swa xona leswi kumekaka eBibeleni. Hi “vulavula” ririmi leri tengeke loko hi hanya hi ku pfumelelana ni milawu ya Xikwembu. Vaaka-tiko eMfun’weni wa Xikwembu va nga ha dyondza tidyondzo ta xisekelo leti nga eBibeleni hi xihatla kutani va khuvuriwa. Kambe, hambiloko se va khuvuriwile, va fanele va tikarhatela ku antswisa ndlela leyi va ‘vulavulaka’ ririmi leri tengeke ha yona. Hi ndlela yihi? Hinkwerhu ka hina hi fanele hi hambeta hi tikarhatela ku tirhisa leswi hi swi dyondzaka eBibeleni evuton’wini bya hina.
5. Ha yini hi fanele hi dyondza hinkwaswo leswi hi nga swi kotaka hi matimu ya nhlengeletano ya Yehovha?
5 Dyondza hi matimu ya tiko ra kona. Munhu la lavaka ku va muaka-tiko emfun’weni wa vanhu a nga ha boheka ku dyondza matimu ya mfumo wolowo. Hilaha ku fanaka, lava lavaka ku va vaaka-tiko eMfun’weni wa Xikwembu va fanele va dyondza hinkwaswo leswi va nga swi kotaka hi Mfumo wa Xikwembu. Xiya xikombiso lexi vekiweke hi vana va Kora, lava a va tirha eIsrayele wa khale. A va wu rhandza muti wa Yerusalema ni ndhawu ya wona yo gandzela eka yona naswona a va rhandza ku vulavula hi matimu ya wona. A va nga tsakisiwi ngopfu hi ku saseka ka wona kambe a va tsakisiwa hileswi muti ni ndhawu yo gandzela eka yona a swi yimela swona. Yerusalema a wu ri “muti wa Hosi Leyikulu,” ku nga Yehovha hikuva a wu ri ntsindza wa vugandzeri byo tenga. Nawu wa Yehovha a wu dyondzisiwa kwalaho. Lava a va fumiwa hi Hosi ya le Yerusalema a va ri vanhu lava a va tsakeriwa ni ku rhandziwa hi Yehovha. (Hlaya Pisalema 48:1, 2, 9, 12, 13.) Ku fana na vona, xana wa swi tsakela ku dyondza ni ku byela van’wana hi matimu ya xiphemu xa laha misaveni xa nhlengeletano ya Yehovha? Loko u ya u dyondza hi nhlengeletano ya Xikwembu ni hi ndlela leyi Yehovha a seketelaka vanhu va yena ha yona, Mfumo wa Xikwembu wu ta ya wu va wa xiviri eka wena. Leswi swi ta kurisa ku navela ka wena ko chumayela mahungu lamanene ya Mfumo.—Yer. 9:24; Luka 4:43.
6. Ha yini hi nga langutelaka leswaku Yehovha u lava leswaku hi dyondza ni ku yingisa milawu ya yena?
6 Tiva milawu ya kona. Mimfumo ya vanhu yi lava leswaku lava yi va fumaka va dyondza ni ku hanya hi milawu ya tiko ra yona. Hikwalaho hi nga langutela leswaku Yehovha u fanele a lava leswaku hi dyondza ni ku yingisa milawu leyi lawulaka vaaka-tiko hinkwavo eMfun’weni wa yena. (Esa. 2:3; Yoh. 15:10; 1 Yoh. 5:3) Milawu ya vanhu a yi hetisekanga naswona minkarhi yin’wana a yi twisiseki. Ku hambana ni sweswo, “nawu wa Yehovha wu hetisekile.” (Ps. 19:7) Xana ha wu tsakela nawu wa Xikwembu naswona hi dyondza Rito ra xona siku ni siku? (Ps. 1:1, 2) Hinkwerhu ka hina hi fanele hi endla matshalatshala yo dyondza milawu ya Xikwembu. A nga kona la nga hi endlelaka sweswo.
LAVA NGA TA HANYA EMFUN’WENI WA XIKWEMBU VA RHANDZA MILAWU YA XONA
7. Ha yini lava nga ta hanya eMfun’weni wa Xikwembu va yingisa milawu ya xona?
7 Leswaku hi hambeta hi ri vaaka-tiko eMfun’weni wa Xikwembu, a hi fanelanga hi tiva milawu ya Xikwembu ntsena kambe hi fanele hi tlhela hi yi rhandza. Vaaka-tiko vo tala emimfun’weni ya vanhu va vula leswaku va pfumelelana ni milawu ya le tikweni leri va tshamaka eka rona. Kambe loko va nga wu rhandzi nawu wo karhi naswona va xiya leswaku a ku na munhu la va vonaka, va wu tlula. Hakanyingi, vanhu lava va lava ku ‘tsakisa vanhu.’ (Kol. 3:22) Lava nga ta hanya eMfun’weni wa Xikwembu va hanya hi milawu leyi tlakukeke. Hi yingisa milawu ya Xikwembu hi ntsako, hambiloko ku nga ri na munhu la hi vonaka. Ha yini? Hikuva hi rhandza Yehovha.—Esa. 33:22; hlaya Luka 10:27.
8, 9. U nga swi tiva njhani loko hakunene u rhandza milawu ya Xikwembu?
8 U nga swi tiva njhani loko hakunene u rhandza milawu ya Xikwembu? Xiya ndlela leyi u angulaka ha yona loko u tshinyiwa hi swilo leswi u anakanyaka leswaku swi siyeriwa ripfalo ra munhu—hi xikombiso, eka mhaka ya maambalelo ni ku tilunghisa. Loko u nga si dyondza ntiyiso, swi nga ha endleka leswaku a wu nga ri na mhaka ni ndlela leyi u langutekaka ha yona, kumbexana a wu ambala swiambalo leswi pfuxaka nyanyuko wa rimbewu. Loko ndlela leyi u rhandzaka Xikwembu ha yona yi ya yi kula, u dyondze ku ambala hi ndlela leyi xi dzunisaka. (1 Tim. 2:9, 10; 1 Pet. 3:3, 4) U nga ha anakanya leswaku sweswi u ambala hi ndlela leyinene. Kambe loko nkulu wo karhi a ku byela leswaku ndlela leyi u ambalaka ha yona yi khunguvanyisa vanhu vo tala evandlheni, u ta angula njhani? Xana u ta tiyimelela, u hlundzuka kumbe u ala ku endla mindzulamiso? Nawu wa nkoka swinene lowu lava nga ta hanya eMfun’weni wa Xikwembu va faneleke va wu yingisa i ku va va tekelela Kreste. (1 Pet. 2:21) Malunghana ni xikombiso xa Yesu, muapostola Pawulo u tsale a ku: “Un’wana ni un’wana wa hina a a tsakise warikwavo eka leswi nga swinene leswaku swi n’wi aka. Hikuva hambi a ri Kreste a nga titsakisanga.” (Rhom. 15:2, 3) Leswaku a hlayisa ku rhula evandlheni, Mukreste la wupfeke u fanele minkarhi hinkwayo a papalata ku endla swilo leswi khunguvanyisaka mapfalo ya van’wana.—Rhom. 14:19-21.
9 Anakanya hi timhaka timbirhi leti nga ta nkoka swinene: langutelo ra hina hi rimbewu ni ndlela leyi hi byi tekaka ha yona vukati. Lava nga ta ka va nga hanyi eMfun’weni wa Xikwembu va nga ha anakanya leswaku a swi hoxanga ku endla vusodoma, ku hlalela swifaniso leswi pfuxaka ku navela ka rimbewu, ku endla vuoswi ni ku dlaya vukati. Kambe lava nga ta hanya eMfun’weni wa Xikwembu va dyondze ku anakanyisisa hi vuyelo bya swiendlo swa vona ni ndlela leyi swiendlo swa vona swi nga ta va khumba ha yona van’wana. Hambileswi Vakreste vo tala va tshameke va tikhoma hi ndlela yo biha, kambe sweswi va teka rimbewu ni vukati tanihi tinyiko leti humaka eka Xikwembu. Va rhandza milawu ya Yehovha naswona va swi tiva leswaku lava nga yingisiki milawu ya Xikwembu malunghana ni rimbewu ni vukati a va faneleki ku hanya eMfun’weni wa Xikwembu. (1 Kor. 6:9-11) Kambe va swi tiva ni leswaku mbilu ya kanganyisa. (Yer. 17:9) Hikwalaho va swi tsakela ku kuma swilemukiso swo karhi leswi va pfunaka ku hambeta va yingisa milawu ya Xikwembu.
LAVA NGA TA HANYA EMFUN’WENI WA XIKWEMBU VA SWI TSAKELA SWILEMUKISO
10, 11. Hi swihi swilemukiso swa nkoka leswi Mfumo wa Xikwembu wu hi nyikaka swona naswona u titwa njhani ha swona?
10 Mimfumo ya vanhu yi nga ha lemukisa vaaka-tiko malunghana ni swakudya ni mirhi yo karhi leswi nga ni khombo. I ntiyiso leswaku a hi swakudya ni mirhi hinkwayo leswi nga ni khombo. Kambe loko swilo swo karhi swi ri ni khombo, mfumo wu nga ha sirhelela vaaka-tiko va wona hi ku va lemukisa hi khombo ra kona. I vutihlamuleri bya mfumo ku va lemukisa. Hilaha ku fanaka, Mfumo wa Xikwembu wa hi lemukisa hi swilo leswi nga endlaka leswaku hi nga yingisi milawu ya xona kutani hi onha vuxaka bya hina na xona. Hi xikombiso, vanhu vo tala va tirhisa Internet leswaku va vulavurisana, va dyondza ni ku tihungasa. Nhlengeletano ya Xikwembu yi tirhisa Internet leswaku yi endla swilo swo tala leswinene. Kambe tindhawu to tala eka Internet ti ni khombo eka lava lavaka ku tshama va ri karhi va endla leswinene. Ti-Web site leti kombisaka swifaniso leswi navetisaka rimbewu ti ni khombo. Ntlawa wa hlonga ro tshembeka se wu ni malembe yo tala wu hi lemukisa hi ti-Web site leti. Ha swi tsakela swinene swilemukiso leswi!
11 Emalembeni ya sweswinyana, vanhu vo tala va tirhisa Web site yin’wana leyi dumeke swinene, ya ku endla vanghana eka yona. Yi nga ha pfuna kambe yi nga tlhela yi va ni khombo lerikulu, hikwalaho hi fanele hi va ni vuxiyaxiya loko hi hlawula ku yi tirhisa. Yi nga endla hi vulavula ni vanhu lava nga vanghana vo biha. (1 Kor. 15:33) Hi yona mhaka leyi nhlengeletano ya Xikwembu yi hi nyikaka swilemukiso leswi nga ta hi pfuna leswaku hi va ni langutelo lerinene malunghana na yona. Xana se u ri hlayile rungula hinkwaro lera ha ku kandziyisiwaka hi hlonga ro tshembeka malunghana ni ti-Web site leti? Swi ni khombo ku tirhisa ti-Web site leti hi nga ri hlayanga rungula leri. * Sweswo swi nga fana ni ku nwa murhi lowu nga vaka ni khombo u nga hlayanga xilemukiso lexi nga ebodlheleni.
12. Ha yini ku ri vuphukuphuku ku honisa swilemukiso?
12 Lava va honisaka swilemukiso leswi humesiwaka hi hlonga ro tshembeka va tivavisa swin’we ni varhandziwa va vona. Van’wana va godzomberiwe hi ku hlalela swifaniso leswi navetisaka rimbewu kumbe va tikhome hi ndlela yo biha hi tlhelo ra rimbewu kutani va anakanya leswaku Yehovha a nga swi voni leswi va swi endlaka. I vuphukuphuku ku anakanya leswaku hi nga tumbetela Yehovha leswi hi swi endlaka. (Swiv. 15:3; hlaya Vaheveru 4:13.) Xikwembu xi lava ku pfuna vanhu vo tano naswona xi tirhisa vayimeri va xona va laha misaveni leswaku va ringeta ku va pfuna. (Gal. 6:1) Tanihi leswi mimfumo ya vanhu yi hlongolaka vanhu lava hanyaka hi ndlela yo biha, Yehovha na yena a nga va pfumeleli vanhu leswaku va hambeta va ri lava nga ta hanya eMfun’weni wa yena loko va tlula milawu ya yena va nga hundzuki. * (1 Kor. 5:11-13) Nilokoswiritano, u ni tintswalo. Lava va hundzukaka va tlhela va cinca ndlela leyi va hanyaka ha yona va nga tlhela va va ni vuxaka lebyinene na Yehovha naswona va hambeta va ri lava nga ta hanya eMfun’weni wa yena. (2 Kor. 2:5-8) Mawaku lunghelo leri hi nga na rona ro tirhela Hosi yo tano leyi nga ni rirhandzu!
LAVA NGA TA HANYA EMFUN’WENI WA XIKWEMBU VA TEKA DYONDZO YI RI YA NKOKA
13. Lava nga ta hanya eMfun’weni wa Xikwembu va swi kombisa njhani leswaku va yi tlangela dyondzo?
13 Mimfumo yo tala ya vanhu yi tikarhatela ku dyondzisa vaaka-tiko va yona. Yi aka swikolo laha vanhu va nga ta kuma dyondzo ya xisekelo kona. Lava nga ta hanya eMfun’weni wa Xikwembu va swi tlangela swikolo sweswo laha va dyondzaka ku hlaya ni ku tsala swin’we ni ku dyondza vutshila lebyi va nga ta byi lava entirhweni. Kambe va yi tlangela swinene dyondzo leyi Yehovha a va nyikaka yona hi ku tirhisa nhlengeletano ya yena. Hi xikombiso, nhlengeletano ya yena yi hi khutaza ku hlaya. Vatswari va khutaziwa ku hlayela vana va vona lava ha riki vatsongo. N’hweti yin’wana ni yin’wana, hlonga ro tshembeka ri kandziyisa Xihondzo xo Rindza ni Xalamuka! Loko u hlaya matluka yo hlayanyana ya swona siku ni siku u ta swi heta hi n’hweti kutani u ta hambeta u vuyeriwa eka dyondzo leyi Yehovha a hi nyikaka yona.
14. (a) I ndzetelo wihi lowu hi wu kumaka? (b) I swiringanyeto swihi swa Vugandzeri bya Ndyangu bya nimadyambu leswi u swi kumeke swi tsakisa loko u swi tirhisa?
14 Lava nga ta hanya eMfun’weni wa Xikwembu va kuma ndzetelo eminhlanganweni ya vona ya vandlha vhiki na vhiki. Hi xikombiso, Xikolo xa Vutirheli bya le Tilweni lexi se xi nga ni malembe yo tlula 60 xi ri kona xi pfune swichudeni leswaku swi va vadyondzisi lava humelelaka va Rito ra Xikwembu. Xana u tsarisile exikolweni lexi? Emalembeni ya sweswinyana hlonga ro tshembeka ri kandziyise nkoka wo va ni Vugandzeri bya Ndyangu bya nimadyambu vhiki ni vhiki. Lunghiselelo leri ri pfuna ndyangu leswaku wu va ni vun’we swinene. Xana wa swi tirhisa swiringanyeto leswi nga eka minkandziyiso ya hina? *
15. Hi rihi rin’wana ra malunghelo lamakulu lawa hi nga na wona?
15 Vaaka-tiko vo tala va mimfumo ya vanhu va ringeta ku kucetela vanhu leswaku va seketela mintlawa ya tipolitiki, va tlhela va famba ni hi yindlu ni yindlu leswaku va va gangisa. Emisaveni hinkwayo, lava nga ta hanya eMfun’weni wa Xikwembu va kombisa leswaku va wu seketela hi ku chumayela vanhu eswitarateni ni hi yindlu ni yindlu. Entiyisweni, hilaha swi boxiweke hakona exihlokweni xo sungula, Xihondzo xo Rindza, lexi huwelelaka Mfumo wa Yehovha, i magazini lowu sweswi wu fambisiwaka swinene emisaveni! Rin’wana ra malunghelo lamakulu lawa hi nga na wona i ku byela van’wana hi Mfumo wa Xikwembu. Xana u hlanganyela hi ku hiseka entirhweni wo chumayela?—Mat. 28:19, 20.
16. U nga swi kombisa njhani leswaku u muaka-tiko lonene wa Mfumo wa Xikwembu?
16 Ku nga ri khale Mfumo wa Xikwembu wu ta va yona ntsena hulumendhe leyi fumaka misava. Milawu ya Mfumo wa Xikwembu yi ta va yona ntsena leyi lawulaka vanhu. Xana u ta va muaka-tiko lonene wa Mfumo wa Xikwembu hi nkarhi wolowo? Sweswi i nkarhi wa ku swi kombisa hi swiendlo. Eka swiboho hinkwaswo leswi u swi endlaka siku ni siku, endla swilo hinkwaswo leswaku u vangamisa Yehovha xisweswo u kombisa leswaku u tikhoma tanihi muaka-tiko lonene wa Mfumo wa Xikwembu.—1 Kor. 10:31.
[Tinhlamuselo ta le hansi]
^ par. 11 Hi xikombiso, vona Xalamuka! ya July 2011, matluka 24-27; August 2011, matluka 10-13; ni ya February 2012, matluka 3-9.
^ par. 14 Vona Xihondzo xo Rindza xa August 15, 2011, matluka 6-7 ni Vutirheli Bya Hina Bya Mfumo bya January 2011, matluka 3-6.
[Swivutiso Swa Dyondzo]
[Marito lama tshahiweke exihlokweni lama nga eka tluka 14]
Xana wa swi yingisa swilemukiso leswi sekeriweke eBibeleni malunghana ni ku tirhisa Internet?
[Xifaniso lexi nga eka tluka 12]
Ku fana ni vana va Kora, xana wa byi tsakela vugandzeri byo tenga ni matimu ya byona?
[Xifaniso lexi nga eka tluka 15]
Vugandzeri bya n’wina bya Ndyangu bya nimadyambu byi nga endla leswaku wena ni varhandziwa va wena mi va vaaka-tiko lavanene va Mfumo wa Xikwembu
