Wa Tsundzuka Xana?

Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

Xana misisi ya Samsoni a yi n’wi nyika matimba?

Misisi ya Samsoni a yi nga n’wi nyiki matimba. Misisi yakwe a yi fanekisela vuxaka byo hlawuleka lebyi yena tanihi Munaziri a ri na byona na Xikwembu. Vuxaka byolebyo byo hlawuleka byi khumbekile loko Delila a lerise leswaku misisi ya yena yi tsemiwa.—4/15, tluka 9.

Ku fana ni mbilu ya hina ya xiviri, hi swihi swilo swinharhu leswi nga vaka ni vuyelo lebyinene eka mbilu ya hina yo fanekisela?

(1) Swakudya. Tanihi leswi mbilu ya hina ya xiviri yi lavaka swakudya leswi nga ni rihanyo, hi fanele hi kuma swakudya swa moya leswi eneleke leswi nga ni rihanyo. (2) Vutiolori. Ku hlanganyela hi ku hiseka ensin’wini swi nga endla leswaku mbilu ya hina ya moya yi tshama yi ri exiyin’weni lexinene. (3) Ndhawu. Hi nga hunguta ntshikilelo hi ku va hi tihlanganisa ni vapfumeri-kulorhi lava va khathalaka hi hina.—4/15, tluka 16.

Endzhaku ka loko munghana un’we wa vukati a nga tshembekanga, xana vanghana havambirhi va vukati va nga endla yini leswaku va tlhela va tshembana?

Va fanele (1) va nga fihlelani nchumu; (2) va tirhisana; (3) va siva mikhuva ya khale hi leyintshwa; va tlhela (4) va tshika xikhomela, va lulamisa ku onhaka loku veke kona eka vuxaka bya vona.—5/1, matluka 12-15.

Ha yini xivulavuri lexi nyikelaka nkulumo ya xilahlo xi nga fanelanga xi tirhisa Pisalema 116:15 ku kombetela eka mufi?

Ndzimana leyi yi ri: “I ka risima ematihlweni ya Yehovha ku fa ka lavo tshembeka vakwe.” Marito lawa ma vula leswaku Xikwembu a xi nge pfumeleli leswaku malandza ya xona hinkwawo yo tshembeka ma fa hikuva xi ma teka ma ri ya risima. A xi nge swi pfumeleli leswaku malandza ya xona tanihi ntlawa ma lovisiwa emisaveni.—5/15, tluka 22.

A ku ri vamani makhalipotiya?

Emahlweni ka 1931, rito “makhalipotiya” a ri tirhisiwa eka vanhu lava sweswi va vitaniwaka maphayona.—5/15, tluka 31.

Hi swihi swilo swin’wana leswi kombisaka leswaku Bibele a ko va buku yin’wana leyi tsariweke hi vanhu?

Bibele yi ni vuprofeta byo tala lebyi hetisekeke. Yi ni matimu lama pakanisaka, ku nga ri ntsheketo. Yi pfumelelana ni sayense leyi pakanisaka naswona tibuku ta yona ta pfumelelana. Ya pfuna ninamuntlha.—6/1, matluka 4-8.

I vamani lava vumbaka “mimfumo leyi hinkwayo” leyi ku vulavuriweke ha yona eka Daniyele 2:44?

Ku vulavuriwa hi mimfumo, kumbe tihulumendhe leti fanekiseriwaka hi swiyenge swo hambana-hambana swa xifaniso xa nsimbi lexi hlamuseriweke hi Daniyele.—6/15, tluka 17.

Hi rini laha Mfumo wa Misava wa Manghezi ni Maamerika wu veke mfumo wa misava wa vunkombo lowu ku profetiweke ha wona eBibeleni?

Mfumo lowu wa misava lowu hlanganeke wu sungule ku va kona loko tiko ra Britain ni ra United States ma sungula ku tirhisana hi ndlela yo hlawuleka hi nkarhi wa Nyimpi yo Sungula ya Misava.—6/15, tluka 19.

Xikwembu xi rivalela xi tlhela xi rivala swidyoho swa vanhu lava hundzukeke hi ndlela yihi?

Yehovha u vula marito lawa malunghana ni vanhu lava a va tsakelaka: “Xidyoho xa vona a ndzi nge he xi tsundzuki.” (Yer. 31:34) A nga rivalela swidyoho exisekelweni xa nkutsulo. Loko Xikwembu xi rivalela, xa rivala hi leswi xi nga ta ka xi nga ha swi tsundzuki swidyoho swoleswo leswaku xi ta tlhela xi xupula vanhu lava dyoheke.—7/1, tluka 18.

Ha yini hi nga ma tshembaka masingita lawa ku vulavuriweke ha wona eBibeleni?

Hakanyingi a ma endliwa erivaleni, ku nga ri exihundleni. A ma endliwa hi ndlela yo olova naswona a ku nga tirhisiwi switirhisiwa swo hlawuleka. A ma endleriwa ku yisa ku dzuneka eka Xikwembu ku nga ri eka vanhu. Ku endliwe masingita yo hambana-hambana naswona vakaneti va le nkarhini wolowo a va kanakananga leswaku ma endliwile. Leswi i swivangelo leswi endlaka hi tshemba masingita lawa ku vulavuriweke ha wona eBibeleni.—8/1, matluka 7-8.