EMALEMBENI lama hundzeke, Rúbia, makwerhu wa xisati loyi sweswi a nga ni malembe ya 30, u endzele Sandra, phayona leri a ri tirha evandlheni leritsongo edzongeni wa Brazil. Hi nkarhi wa riendzo ra yena, ku endleke swin’wana leswi nga tsakisa Rúbia swinene lerova a cinca vutomi bya yena. I yini swilo swa kona? A hi tweni loko Rúbia a hi byela.

“Sandra u fambe na mina eka wansati loyi a a dyondza na yena Bibele. Loko va ri karhi va dyondza, wansati loyi u te: ‘Sandra, vanhwanyana vanharhu laha ndzi tirhaka kona va lava ku dyondza Bibele, kambe ndzi va byele leswaku va fanele va rindza. Ndza swi tiva leswaku u khomekile swinene lembe leri.’ A ndzi nga swi tshembi leswi a ndzi swi twa. Vanhu lava a va lava ku tiva Yehovha a va fanele va rindza! Evandlheni ra le kaya, a swi  ndzi tikela hambi ku kuma dyondzo yin’we. Hi nkarhi wolowo, loko ndzi ri ekaya ra xichudeni xolexo xa Bibele, ndzi titwe ndzi swi navela hi mbilu hinkwayo ku pfuna vanhu va le xidorobanini xa laha xichudeni xolexo a xi tshama kona. Endzhakunyana ka kwalaho, ndzi sukile edorobeni lerikulu leri a ndzi tshama eka rona ndzi rhurhela edorobeni leri Sandra a a phayona eka rona.”

Rúbia u kume vuyelo byihi? U ri: “Ku nga si hela tin’hweti timbirhi ndzi rhurhele kwalaho, se a ndzi fambisa tidyondzo ta Bibele ta 15 naswona swi nga si ya kwihi, ku fana na Sandra, na mina a ndzi ri ni vanhu lava a va rindzele ku dyondzeriwa!”

Diego, makwerhu wa xinuna loyi sweswi a nga ni malembe ya va-20, u endzele maphayona lawa ma tirhelaka ePrudentópolis, ku nga xidorobana lexi nga edzongeni wa Brazil. Riendzo ra yena ri n’wi khumbe swinene; kahle-kahle ri n’wi susumetele ku tlhela a anakanyisisa hi ntirho wa yena wa nsimu. Wa hlamusela: “Evandlheni a ndzi heta tiawara titsongo entirhweni wo chumayela n’hweti na n’hweti. Kambe loko ndzi endzele maphayona wolawo ndzi tlhela ndzi yingisela mintokoto ya wona, a swi ri erivaleni leswaku ma kuma ntsako lowukulu ensin’wini ku tlula lowu a ndzi wu kuma. Loko ndzi vone ndlela leyi a ma tsake ha yona, a ndzi navela onge vutomi bya mina byi nga va ni xikongomelo ku fana ni bya wona.” Endzhaku ka riendzo rolero, Diego u sungule ku phayona.

Ku fana na Diego, xana u muntshwa la nga Mbhoni la yaka entirhweni wo chumayela a tlhela a ya eminhlanganweni ya Vukreste kambe hi nkarhi lowu fanaka u twa onge ntirho wa wena wa nsimu a wu tsakisi? Loko swi ri tano, xana u nga endla ku cinca evuton’wini bya wena leswaku u ta kuma ntsako hi ku tirha laha ku nga ni xilaveko lexikulu xa vahuweleri va Mfumo? I swa ntumbuluko ku chava ku sukela vutomi bya vulovolovo. Hambiswiritano, vantshwa vo tala va hlawule ku endla tano. Va ve ni xivindzi xa ku cinca tipakani ta vona ni ku navela ka vona leswaku va ta endla leswi engetelekeke entirhweni wa Yehovha. Xiya xikombiso xa Bruno.

Emalembeni lama hundzeke, Bruno, loyi sweswi a nga ni malembe ya 28, u dyondze exikolweni xa vuyimbeleri lexi dumeke naswona pakani ya yena a ku ri ku va mukongomisi  wa okhestra. Entiyisweni, u endle nhluvuko lowunene eka tidyondzo ta yena lerova u rhambiwe minkarhi yo tala leswaku a va mukongomisi eka vuyimbeleri bya okhestra. A swi tikomba leswaku a a ta va mukongomisi la humelelaka swinene wa okhestra. Kambe Bruno u ri: “A ndzi titwa ndzi kayivela xin’wana evuton’wini. A ndzi tinyiketerile eka Yehovha, kambe a ndzi swi tiva leswaku a ndzi nga n’wi tirheli hi moya-xiviri hinkwawo, kutani sweswo a swi ndzi karhata. Ndzi vulavule na Yehovha hi xikhongelo malunghana ni ndlela leyi ndzi titwaka ha yona naswona ndzi tlhele ndzi vulavula ni vamakwerhu lava nga ni ntokoto evandlheni. Endzhaku ko anakanyisisa swinene hi mhaka leyi, ndzi endle xiboho xo rhangisa ntirho wa mina wa nsimu ivi ndzi tshika exikolweni xa vuyimbeleri kutani ndzi rhurhela endhawini leyi a ku ri ni xilaveko lexikulu xa vahuweleri va Mfumo.” Byi ve byihi vuyelo bya xiboho xa yena?

Bruno u rhurhele edorobeni ra Guapiara (leri nga ni vaaka-tiko va kwalomu ka 7 000), leri nga tikhilomitara ta kwalomu ka 260 ku suka edorobeni ra São Paulo. A ku ri ku cinca lokukulu eka yena. U ri: “Ndzi rhurhele endlwini leyitsongo leyi a yi nga ri na xigwitsirisi, TV kumbe Internet. Nilokoswiritano, laha a ndzi tshama kona a ku ri ni swilo leswi a ndzi nga si tshama ndzi va na swona—ntanga wa matsavu ni misinya ya mihandzu!” Loko a ri karhi a tirha kwalaho evandlheni leritsongo, kan’we hi vhiki Bruno a a hoxa swakudya, mati ni minkandziyiso enkwameni wa yena kutani a famba hi xithuthuthu xa yena a ya chumayela etindhawini ta le makaya. Vanhu vo tala va le ndhawini yoleyo a va nga si tshama va ma twa mahungu lamanene. U ri: “A ndzi fambisa tidyondzo ta Bibele ta 18. Loko ndzi vona ndlela leyi swichudeni leswi swi endleke ku cinca ha yona evuton’wini bya swona swi endle leswaku ndzi tsaka swinene!” U ya emahlweni a ku: “Hi nkarhi wolowo, ndzi xiye leswaku ndzi kume leswi a swi kayivela evuton’wini bya mina—ku titwa ndzi enerisekile swinene hikwalaho ko rhangisa timhaka ta Mfumo. Loko a ndzi lo ya emahlweni ni pakani ya mina yo yimbelela a ndzi ta va ndzi nga wu kumanga ntsako lowu.” Kambe, xana Bruno a a tihanyisa njhani loko a ri eGuapiara? U hlamula a ri karhi a n’wayitela a ku: “Hi ku dyondzisa vanhu ku chaya katara.” Hi ndlela yo karhi, a ha ri mukongomisi wa okhestra.

Mariana, loyi sweswi a nga le hansinyana ka malembe ya 30, u tikume a ri exiyin’weni lexi fanaka ni xa Bruno. A a ri gqweta, kambe ku nga khathariseki ntirho wa yena lowu holelaka swinene, a a titwa a nga enerisekanga. U ri: “A ndzi titwa onge hi loko ndzi ‘hlongorisa mheho.’”  (Ekl. 1:17) Vamakwerhu va xinuna ni va xisati vo tala va n’wi khutaze leswaku a anakanyisisa hi ku phayona. Endzhaku ko anakanyisisa hi mhaka leyi, Mariana, swin’we ni vanghana va yena Bianca, Caroline na Juliana, va endle xiboho xo pfuna vandlha ra le Barra do Bugres, ku nga doroba leri nga roxe ekusuhi ni le Bolivia, laha ku nga tikhilomitara ta magidi ekule ni le kaya ka vona. Ku endleke yini endzhaku?

Mariana u ri: “Xikongomelo xa mina a ku ri ku tshama kwalaho tin’hweti tinharhu. Kambe loko tin’hweti toleto ti hela, se a ndzi fambisa tidyondzo ta Bibele ta 15! Swichudeni sweswo a swi lava mpfuno lowu engetelekeke leswaku swi endla nhluvuko entiyisweni. Hikokwalaho, a ndzi nga ri na xona xivindzi xo swi byela leswaku ndza famba. Ndzi boheke ku tshama.” Vamakwerhu lava va mune va xisati va tshamile. Xana ntirho wa Mariana lowuntshwa wu endle leswaku a titwa a ri ni xikongomelo evuton’wini? U ri: “Leswi Yehovha a ndzi tirhisaka ku pfuna vanhu leswaku va cinca va va ni mahanyelo lamanene, swi ndzi endla ndzi titwa ndzi enerisekile. I nkateko eka mina ku tiva leswaku sweswi ndzi tirhisa nkarhi wa mina ni matimba ya mina ndzi endla ntirho lowu vuyerisaka hakunene.” Caroline u katsakanya ndlela leyi yena swin’we ni vamakwerhu lavan’wana vanharhu va xisati va titwaka ha yona, u ri: “Loko ndzi etlela nivusiku ndzi titwa ndzi enerisekile swinene hikuva ndzi tirhe hi matimba leswaku ndzi rhangisa timhaka ta Mfumo. Vutomi bya mina byi dzike ngopfu eka ndlela leyi ndzi nga swi pfunaka ha yona swichudeni swa mina swa Bibele. Swa tsakisa ku swi vona swi endla nhluvuko. Ndzi vona ku hetiseka ka marito lama nge: ‘Nantswani mi vona leswaku Yehovha hi lonene.’”—Ps. 34:8.

Yehovha wa tsaka swinene loko a vona vantshwa va xinuna ni va xisati lava engetelekeke emisaveni hinkwayo va “tinyikela hi ku tirhandzela” leswaku va chumayela mahungu lamanene ya Mfumo wa yena etindhawini ta le kule! (Ps. 110:3; Swiv. 27:11) Yehovha u va katekisa swinene vatirhi vo tirhandzela lava fanaka ni lava.—Swiv. 10:22.