Eku sunguleni ka lembe-xidzana ra vu-20, vanhu va tsakele ku hlalela filimi yo tsakisa leyi a yi nga ri na mpfumawulo leyi a yi ri ni nhloko-mhaka leyi nge, A Trip Down Market Street leyi a yi kombisa ndlela leyi vutomi a byi ri ha yona eSan Francisco, le U.S.A. hi nkarhi wolowo. Vateki va yona a va veke khamera leyi tirhisiwaka hi voko eka ximovhana xo teka tifilimi ivi va yi kombetela eswitarateni leswi a swi ri ni mphesamphesa. Eka filimi yoleyo a ku kombisiwa tigolonyi leti kokiwaka hi tihanci ni timovha ta le nkarhini wolowo swin’we ni vanhu va ri eku xaveni ni vafana lava xavisaka maphepha-hungu va ri karhi va tiendlela mintirho ya vona ya siku ni siku.

Lexi endlaka leswaku filimi leyi yi vanga gome loko hi yi hlalela namuntlha hileswi ku ehleketiwaka leswaku yi tekiwe hi April 1906, emahlweninyana ka ku tsekatseka ka misava ni ndzilo lowu veke kona hi April 18 leswi dlayeke magidi ya vanhu naswona a ku sale katsongo swi lovise xiphemu xexo xa doroba. Swi nga endleka leswaku vanhu van’wana lava kombisiweke eka filimi leyi a va salele hi masiku matsongo ya ku hanya. Scott Miles, ntukulu wa un’wana wa muteki wa filimi leyi u ri: “Eka yona ndzi vone vanhu lava a va nga swi tivi leswi a swi ta va humelela ku nga ri khale. Naswona a ku na nchumu lexi a wu ta va pfuna ha xona, handle ko va twela vusiwana.”

Ninamuntlha ku ta humelela nchumu lowu fanaka. Na hina a xi kona lexi hi nga xi endlaka handle ko va twela vusiwana vaakelani va hina. Va tiendlela mintirho ya vona ya siku ni siku kambe a va ri voni khombo leri nga ta va wela hi xitshuketa—ku lovisiwa ka misava leyi yo homboloka. Hambiswiritano, ku hambana ni ku tsekatseka ka misava loku humelelaka vanhu va nga swi rindzelanga, ka ha ri ni nkarhi wo koma wo lemuxa vaakelani va hina hi siku ra Yehovha ra ku avanyisa. Swi nga ha endleka leswaku u tivekele nkarhi vhiki ni vhiki leswaku u hlanganyela entirhweni wo chumayela hi yindlu ni yindlu, kambe xana u nga endla leswi engetelekeke leswaku u lemukisa van’wana?

Xikombiso xa Yesu i xa nkoka eka hina hi leswi a a tshama a lunghekele ku chumayela. U chumayele un’wana ni un’wana loyi a a hlangana na yena, ku katsa ni muluvisi loyi a n’wi kumeke endleleni ni wansati loyi a teke a ta ka mati exihlobyeni ninhlikanhi loko Yesu a tshame kwalaho. (Luka 19:1-5; Yoh. 4:5-10, 21-24) Hambiloko Yesu a tivekele nkarhi wo wisa, u tshike ku endla swilo swakwe leswaku a ta dyondzisa van’wana. Ntwela-vusiwana lowu a a ri na wona wu endle leswaku a endla hinkwaswo leswi nga ematimbeni yakwe leswaku a chumayela vaakelani vakwe. (Mar. 6:30-34) Ku va Yesu a tshama a lunghekele ku chumayela rungula ra xihatla swi nga tekeleriwa njhani namuntlha?

Melika u tshama etifuleteni leti swi tikaka ku nghena eka tona hileswi ti rindziwaka swinene. Vaakelani va yena  vo tala i swichudeni leswi humaka ematikweni man’wana leswi tinomboro ta tiselfoni ta swona ni mavito ya swona ma nga tsariwangiki eka nxaxamelo wa vanhu lava tshamaka kwalaho lowu kumekaka laha vaendzi va fikelaka kona. U tsakela ku tirhisa nkarhi wun’wana ni wun’wana lowu n’wi pfulekelaka leswaku a sungula mabulo lama sekeriweke eBibeleni ni vanhu lava a hlanganaka na vona laha vaendzi va fikelaka kona ni le ka khexe. U ri: “Hi ndlela yin’wana ndzi yi teka yi ri nsimu ya mina.” Melika u tshama a ri ni minkandziyiso ya tindzimi to hlayanyana naswona vo tala va amukela swiphephana ni timagazini. U tlhela a komba vanhu ndlela yo nghena eka Web site ya hina ya jw.org. U sungule ku dyondza Bibele ni vanhu vo hlayanyana.

Sonia na yena u tshama a lunghekele ku chumayela munhu un’wana ni un’wana. U tirha exibedlhele lexi nga riki xa mfumo naswona u tivekele pakani yo chumayela un’wana ni un’wana loyi a tirhaka na yena. U rhange a tinyika nkarhi wo dyondza hi swilaveko swa vona ni leswi va swi tsakelaka. Endzhaku, u tirhise nkarhi wakwe wo wisa leswaku a burisana ni munhu ha un’we hi Bibele. Sweswo swi endle leswaku Sonia a kota ku sungula tidyondzo timbirhi ta Bibele. Nakambe u kunguhate ku tirhisa nkarhi wun’wana wakwe wo wisa leswaku a ya laha vanhu lava va teke exibedlhele va rindzaka kona kutani a va chumayela.

Munhu un’wana loyi a poneke ku tsekatseka ka misava hi 1906 u vule leswaku a ku ri “mhangu yo chavisa swinene leyi tshameke yi humelela endhawini kumbe edorobeni rero.” Hambiswiritano, timhangu hinkwato a ti nge vi nchumu loko ti pimanisiwa ni siku ra ku rihisela leri nga ta wela hinkwavo “lava va nga xi tiviki Xikwembu.” (2 Tes. 1:8) Yehovha u navela leswaku vanhu va hundzula mianakanyo ni timbilu ta vona kutani va amukela rungula leri nga xilemukiso leri chumayeriwaka hi Timbhoni ta yena.—2 Pet. 3:9; Nhlav. 14:6, 7.

U ni lunghelo ro pfuna vanhu ku twisisa leswaku hi hanya eminkarhini ya mangava ni ku va pfuna va tshika ndlela ya vona ya vutianakanyi leswaku va lava Yehovha. (Sof. 2:2, 3) Xana u nga swi kota ku tirhisa nkarhi wun’wana ni wun’wana lowu ku pfulekelaka leswaku u chumayela vatirhi-kuloni, vaakelani va wena ni vanhu lava u hlanganaka na vona loko u ri karhi u endla mintirho ya wena ya siku ni siku? Xana u ta endla leswi engetelekeke leswaku u lemukisa van’wana?