1. Vanhu vo tala va titsone yini, naswona ha yini?

VANHU va tiyimiserile ku titsona swo karhi hikwalaho ka swilo leswi nga swa nkoka eka vona. Vatswari va tirhisa nkarhi wa vona, mali ya vona ni matimba ya vona leswaku ku vuyeriwa vana va vona. Switsutsumi leswa ha riki vantshwa leswi lavaka ku yimela tiko ra rikwavo eka Tiolimpiki, swi heta tiawara to tala siku ni siku swi titoloveta swi tlhela swi endla vutiolori hi matimba loko tintangha ta swona ti ri karhi ti tlanga ti tlhela ti tiphina. Yesu na yena u titsone swo karhi hikwalaho ka swilo leswi a swi ri swa nkoka eka yena. A a nga lavi ku hanya emafurheni naswona a a nga ri na vana. Ku ri na sweswo, a a lava ku tirhisa matimba ya yena hinkwawo leswaku a seketela Mfumo. (Mat. 4:17; Luka 9:58) Ni valandzeri vakwe va titsone swo tala leswaku va seketela Mfumo wa Xikwembu. Ku yisiwa emahlweni ka ntirho wo chumayela hi Mfumo a ku ri ka nkoka swinene evuton’wini bya vona, hikwalaho va titsone swo karhi leswaku va ta seketela Mfumo wolowo hilaha va nga kotaka hakona. (Mat. 4:18-22; 19:27) Hikwalaho, hi fanele hi tivutisa xivutiso lexi nge, ‘I yini lexi nga xa nkoka evuton’wini bya mina?’

2. (a) Hi swihi swilo leswi Vakreste hinkwavo va ntiyiso va faneleke va titsona swona? (b) Hi swihi swilo swin’wana leswi van’wana va kotaka ku titsona swona?

² I swa nkoka leswaku Vakreste hinkwavo va ntiyiso va titsona swilo swo karhi leswaku va ta kota ku hlakulela vuxaka lebyinene na Yehovha ni ku byi hlayisa. Va titsona swilo sweswo leswaku va tinyika nkarhi wo khongela, wo hlaya Bibele, wo va ni vugandzeri bya ndyangu, wo ya eminhlanganweni ni le nsin’wini. * (Yox. 1:8; Mat. 28:19, 20; Hev. 10:24, 25) Ntirho wo chumayela wu endliwa hi xihatla naswona vo tala va khitikanela “[entshaveni] ya yindlu ya Yehovha” hikwalaho ka matshalatshala lawa hi ma endlaka ni hi leswi Yehovha a ma katekisaka. (Esa. 2:2) Leswaku va seketela Mfumo, vo tala  va titsona swo karhi leswaku va ya tirha eBethele, va pfuneta eku akiweni ka Tiholo ta Mfumo ni Tiholo ta Tinhlengeletano, va hlela mintsombano kumbe va pfuna lava hlaseriweke hi timhangu ta ntumbuluko. Munhu a nga boheki ku endla mintirho leyi leswaku a ta kuma vutomi lebyi nga heriki kambe i ya nkoka leswaku ku seketeriwa Mfumo.

3. (a) Hi vuyeriwa njhani loko hi endla leswi engetelekeke hikwalaho ka Mfumo? (b) Hi swihi swivutiso leswi hi faneleke hi tivutisa swona?

³ Namuntlha i swa nkoka swinene leswaku hi endla leswi hi nga swi kotaka ku seketela Mfumo. Swa tsakisa ku vona leswaku vanhu vo tala va titsona swo karhi hi ku tirhandzela leswaku va tirhela Yehovha. (Hlaya Pisalema 54:6.) Moya wolowo wo hanana wu hi tisela ntsako lowukulu loko ha ha rindzele Mfumo wa Xikwembu leswaku wu ta. (Det. 16:15; Mint. 20:35) Kambe, hinkwerhu ka hina hi fanele hi tikambisisa hi vukheta. Xana hi nga titsona leswi engetelekeke hikwalaho ka Mfumo? Hi wu tirhisa njhani nkarhi, mali, matimba ni vuswikoti bya hina? I yini leswi hi nga fanelangiki hi swi honisa loko hi ri karhi hi endla leswi engetelekeke? A hi buleni hi leswi hi nga swi dyondzaka eka swikombiso swin’wana swa ku endla magandzelo hi ku tirhandzela, xisweswo hi engetela ntsako wa hina.

4. Vaisrayele a va vuyeriwa njhani loko va endla magandzelo?

⁴ Leswaku vanhu va rivaleriwa swidyoho swa vona le Israyele wa khale a va fanele va endla magandzelo. Vanhu a va fanele va endla magandzelo leswaku va ta amukeleka eka Yehovha. Man’wana ya wona a ma boha; kasi man’wana a ma endliwa hi ku tirhandzela. (Lev. 23:37, 38) Magandzelo yo hisiwa lama heleleke a ma endliwa tanihi magandzelo ya ku tirhandzela, kumbe tinyiko leti nyikiwaka Yehovha. Xikombiso xin’wana xa ku nyikeriwa ka magandzelo hiloko ku nyiketeriwa tempele enkarhini wa Solomoni.—2 Tikr. 7:4-6.

5. I lunghiselelo rihi leri Yehovha a a ri endlele swisiwana?

⁵ Yehovha hi rirhandzu a a swi tiva leswaku vanhu a va nga ta swi kota ku nyikela hi ndlela leyi fanaka, kutani a a langutele leswaku munhu a nyikela leswi a swi kotaka. Nawu wa Yehovha a wu lerise leswaku ngati ya xiharhi yi halatiwa, ku nga nchumu lowu a wu ta va “ndzhuti wa swilo leswinene leswi nga ta ta” hi ku tirhisa N’wana wakwe, Yesu. (Hev. 10:1-4) Hambiswiritano, Yehovha a a wu tirhisa hi ndlela yo anakanyela nawu wolowo. Hi xikombiso, Xikwembu a xi ri amukela gandzelo ra magugurhwana loko munhu wa kona a a nga ta swi kota ku endla gandzelo hi xiharhi. Hikwalaho ni swisiwana a swi swi  kota ku endlela Yehovha magandzelo kutani swi tsaka. (Lev. 1:3, 10, 14; 5:7) Hambileswi swiharhi leswi a ku endliwa magandzelo ha swona a swi hambana, a ku ri ni swilo swimbirhi leswi a swi languteriwe eka munhu un’wana ni un’wana la endlaka magandzelo ya ku tirhandzela.

6. I yini leswi a swi languteriwile eka munhu un’wana ni un’wana la endlaka magandzelo, naswona a swi ri swa nkoka ku fikela kwihi ku landzela swilaveko sweswo?

⁶ Xo sungula, munhu a a fanele a nyikela hi swilo swa yena leswinene ngopfu. Yehovha u byele tiko rolero leswaku xiharhi xihi ni xihi lexi ku endliwaka gandzelo ha xona a xi fanele xi va xi hanye kahle leswaku ri “amukeleka.” (Lev. 22:18-20) Loko xiharhi xa kona xi ri ni vulema a xi nga ta va gandzelo leri amukelekaka eka Yehovha. Xa vumbirhi, munhu la endlaka gandzelo a a fanele a va a basile naswona a pfumala xisandzu. Loko ku ri hileswaku munhu wa kona a a nga basanga, a a fanele a endla gandzelo ra xidyoho kumbe ra nandzu leswaku a ta amukeleka eka Yehovha a nga si endla gandzelo ra ku tirhandzela. (Lev. 5:5, 6, 15) Leyi a yi ri mhaka ya nkoka swinene. Yehovha a a lerise leswaku loko munhu wihi na wihi o dya xitlhavelo xa xinakulobye lexi a xi katsa magandzelo ya ku tirhandzela kambe a nga basanga, a a ta dlayiwa. (Lev. 7:20, 21) Hi hala tlhelo, loko munhu la endlaka gandzelo a va a amukeleka eka Yehovha naswona gandzelo rakwe ri nga ri na vulema, loyi a ri endlaka a a ta tsaka a tlhela a eneriseka.—Hlaya 1 Tikronika 29:9.

7, 8. (a) Hi wihi ntsako lowu kumiweke hi vo tala lava titsoneke swo karhi hikwalaho ka Mfumo? (b) Hi swihi swilo leswi hi nga na swona leswi hi nga swi nyikaka Yehovha?

⁷ Namuntlha, vo tala va tiyimiserile ku endla leswi engetelekeke entirhweni wa Yehovha, naswona leswi swa n’wi tsakisa. Ku tirha hi matimba leswaku hi pfuna vamakwerhu swa hi vuyerisa. Makwerhu un’wana loyi a pfunetaka ku aka Tiholo ta Mfumo a tlhela a pfuna lava hlaseriweke hi timhangu ta ntumbuluko u vula leswaku swa tika ku hlamusela ndlela leyi a titwaka a eneriseke ha yona loko a pfune vamakwerhu. U ri: “Ku vona ntsako ni ku tlangela ka vamakwerhu endzhaku ka loko va yime eHolweni ya vona ya Mfumo leyintshwa kumbe loko va pfuniwile endzhaku ka mhangu ya ntumbuluko swi endla leswaku ntirho ni matshalatshala wolawo swi va swa nkoka.”

⁸ Nhlengeletano ya Yehovha ya manguva lawa minkarhi hinkwayo yi lava tindlela to seketela ntirho wa Yehovha. Hi 1904, Makwerhu C. T. Russell u tsale a ku: “Un’wana ni un’wana u  fanele a titeka tanihi loyi a vekiweke hi Hosi leswaku a tirhisa nkarhi wakwe, matimba yakwe, mali yakwe ni swin’wana, naswona un’wana ni un’wana u fanele a tirhisa vuswikoti bya yena hinkwabyo, leswaku ku dzunisiwa N’wini wa hina.” Hambileswi hi kumaka mikateko yo tala, swi hi koxa swo karhi ku titsona swin’wana hikwalaho ka Yehovha. (2 Sam. 24:21-24) Xana hi nga swi tirhisa kahle swilo leswi hi nga na swona?

9. Loko swi ta eku tirhiseni ka nkarhi wa hina, hi nga dyondza yini eka swileriso swa Yesu leswi nga eka Luka 10:2-4?

⁹ Nkarhi wa hina. Swi teka nkarhi wo tala swi tlhela swi lava matshalatshala lamakulu ku hundzuluxela ni ku kandziyisa minkandziyiso ya hina, ku aka tindhawu ta hina ta vugandzeri, ku hlela mintsombano, ku pfuneta eka ntirho wo phalala lava weriweke hi timhangu ni ku endla mintirho yin’wana yo tala ya nkoka. Hi na tiawara ta 24 ntsena hi siku. Yesu u hi kombisile leswaku hi nga wu tirhisa njhani nkarhi wa hina hi vutlhari. Loko Yesu a rhuma vadyondzisiwa vakwe leswaku va ya chumayela, u va byele leswaku loko va ‘xeweta munhu egondzweni va nga n’wi angarhi.’ (Luka 10:2-4) Ha yini Yesu a vule marito wolawo? Xidyondzi xin’wana xa Bibele xi ri: “Loko vanhu va le Vuxeni va xewetana, a va nga endli swo korhamanyana kumbe ku qhavulana, kambe a va angarhana ko hlayanyana, va korhama swinene ni ku nkhinsama. Leswi hinkwaswo a swi lava nkarhi.” Yesu a a nga khutazi valandzeri va yena leswaku va va ni nsele. Ku ri na sweswo, a a va pfuna ku vona leswaku a va nga ri na nkarhi wo tala ni leswaku a va fanele va wu tirhisa kahle nkarhi wa vona va endla swilo swa nkoka swinene. (Efe. 5:16) Xana hi nga ringeta ku tirhisa nkarhi wa hina hi vutlhari leswaku hi ta va ni nkarhi wo tala wo seketela ntirho wa Mfumo?

10, 11. (a) Hi tihi tindlela tin’wana leti minyikelo leyi hi yi nyikelaka eka ntirho wa misava hinkwayo yi tirhisiwaka ha tona? (b) Hi dyondza yini eka 1 Vakorinto 16:1, 2?

¹⁰ Mali ya hina. Ku laveka mali yo tala leswaku ku seketeriwa ntirho wa Mfumo. Lembe ni lembe ku tirhisiwa makume ya timiliyoni ta tirhandi leswaku ku seketeriwa ntirho wa valanguteri va miganga ni va swifundzha, maphayona yo hlawuleka ni varhumiwa. Ku sukela hi 1999, ku akiwe Tiholo ta Mfumo to tlula 24 500 ematikweni lama nga le vuswetini. Kambe ka ha laveka Tiholo ta Mfumo ta kwalomu ka 6 400. N’hweti na n’hweti ku kandziyisiwa timagazini ta kwalomu ka 100 wa timiliyoni ta Xihondzo xo Rindza ni Xalamuka! Ntirho lowu hinkwawo wu seketeriwa hi minyikelo ya n’wina ya ku tirhandzela.

¹¹ Muapostola Pawulo u hi kombise leswi hi nga swi endlaka loko hi nyikela. (Hlaya 1 Vakorinto 16:1, 2.) Loko a huhuteriwile, u khutaze Vakorinto leswaku eku sunguleni ka vhiki, va vekela etlhelo mali leyi va lavaka ku nyikela ha yona, va nga yimeli vhiki ri hela ivi eku heleni ka rona va nyikela hi leyi saleke. Ku fana ni hi lembe-xidzana ro sungula, vamakwerhu va xinuna ni va xisati va le nkarhini wa hina va kunguhata ka ha ri emahlweni leswaku va nyikela hi leswi va nga kotaka ku nyikela ha swona. (Luka 21:1-4; Mint. 4:32-35) Yehovha u wu teka wu ri wa nkoka moya wolowo wo nyika.

12, 13. I yini leswi nga ha endlaka van’wana va anakanya leswaku a va nge swi koti ku nyika Yehovha matimba ni vuswikoti bya vona, kambe Yehovha u ta va pfuna njhani?

¹² Matimba ni vuswikoti bya hina. Yehovha wa hi seketela loko hi endla matshalatshala yo tirhisa matimba ni vuswikoti bya hina entirhweni wa Mfumo. U tshembisa leswaku u ta hi pfuna loko hi karhala. (Esa. 40:29-31) Xana hi vona onge a hi na byona vuswikoti lebyi lavekaka eku seketeleni ka ntirho wa Mfumo? Xana hi anakanya leswaku ku ni van’wana lava nga endlaka ntirho wo antswa? Tsundzuka leswaku Yehovha a nga antswisa vuswikoti bya munhu wihi na wihi, hilaha a endleke hakona eka Bezalele na Oholiyabu.—Eks. 31:1-6; vona xifaniso lexi nga eku sunguleni ka xihloko lexi.

¹³ Yehovha u hi khutaza ku nyikela hi swilo swa hina swa nkoka, hi nga pfumeleli nchumu xi hi sivela ku endla tano. (Swiv. 3:27) Loko ku pfuxiwa tempele, Yehovha u byele Vayuda eYerusalema leswaku va anakanyisisa hi leswi a va swi  endla ku seketela ntirho wolowo. (Hag. 1:2-5) A va kavanyetekile naswona a va nga ha rhangisi ntirho wolowo evuton’wini bya vona. Hi fanele hi tikambela ku vona loko leswi hi swi rhangisaka swi fambisana ni ku rhandza ka Yehovha. Xana hi nga ‘veka timbilu ta hina etindleleni ta hina’ leswaku hi ta endla leswi engetelekeke entirhweni wa Mfumo emasikwini lawa ya makumu?

14, 15. (a) Xikombiso xa vamakwerhu lava pfumalaka xi hi khutaza njhani? (b) Hi fanele hi navela ku endla yini?

¹⁴ Vo tala va tshama etindhawini leti swi tikaka ku hanya eka tona kumbe leti nga evuswetini. Nhlengeletano ya hina yi tikarhatela ku “pfala” ku kayivela ka vamakwerhu lava tshamaka ematikweni yo tano. (2 Kor. 8:14) Kambe, ni vamakwerhu lava pfumalaka va ri teka ri ri ra nkoka lunghelo ro nyika. Yehovha wa tsaka loko vanhu lava pfumalaka va susumeteleka ku nyika va tsakile.—2 Kor. 9:7.

¹⁵ Etikweni rin’wana leri nga le vuswetini lebyikulu laha Afrika, vamakwerhu van’wana va vekela etlhelo xiphemu xo karhi entangeni wa vona kutani mali ya swilo leswi va swi xaviseke eka xiphemu xolexo va nyikela ha yona entirhweni wa Mfumo. Etikweni rolero, a ku hleriwe leswaku ku akiwa Holo ya Mfumo leyi a yi laveka swinene. Vamakwerhu va xinuna ni va xisati va kwalaho a va lava ku pfuneta. Hambiswiritano, ntirho wolowo a wu ta endliwa hi nkarhi lowu a va ta va va khomeke ngopfu hi ku byala emasin’wini. Nilokoswiritano, leswi a va tiyimisele ku hlanganyela entirhweni wolowo, a va tirha eHolweni ya Mfumo ninhlikanhi ivi nimadyambu va ya emasin’wini ya vona ku ya byala. Wa nga vona moya wo tano wo tinyikela! Leswi swi hi tsundzuxa hi vamakwerhu va le Makedoniya hi nkarhi wa vaapostola. A va ri ‘evusiwaneni lebyikulu,’ kambe va kombele ku nyikiwa lunghelo ra ku pfuneta hi ku nyika vamakwerhu. (2 Kor. 8:1-4) Onge un’wana ni un’wana wa hina a nga ‘nyika hi ku ringana ni nkateko lowu Yehovha a hi nyikeke wona.’—Hlaya Deteronoma 16:17.

16. Hi nga tiyiseka njhani leswaku leswi hi nyikelaka ha swona swa amukeleka eka Yehovha?

¹⁶ Hambiswiritano, hi fanele hi tivonela. Ku fana ni Vaisrayele va khale, hi fanele hi tiyiseka leswaku magandzelo ya hina ya ku tirhandzela ma amukeleka eka Xikwembu. Hi fanele hi ringanisela leswaku hi kota ku hetisisa vutihlamuleri bya hina bya nkoka emindyangwini ya hina ni loko hi gandzela Yehovha. Ku nyikela hi nkarhi wa hina ni hi mali ya hina leswaku hi pfuna van’wana a swi fanelanga swi hi endla hi nga khathaleli vumoya bya mindyangu ya hina kumbe swilaveko swa yona swa nyama. Entiyisweni, loko hi endla tano hi ta va hi nyikela hi swilo leswi hi nga riki na swona. (Hlaya 2 Vakorinto 8:12.) Ku engetela kwalaho, hi fanele hi tiyisa vuxaka bya hina ni Xikwembu. (1 Kor. 9:26, 27) Kambe, tiyiseka leswaku loko hi hanya hi ku landza leswi Bibele yi swi dyondzisaka, leswi hi nyikelaka ha swona swi ta hi tisela ntsako ni ku eneriseka, naswona swi ta “amukeleka hi ku hlawuleka” eka Yehovha.

17, 18. Hi titwa njhani hi vanhu hinkwavo lava endlaka leswi engetelekeke entirhweni wa Mfumo, naswona hinkwerhu ka hina hi fanele hi anakanya ha yini?

¹⁷ Vamakwerhu vo tala va xinuna ni va xisati ‘va tichulula ku fana ni magandzelo ya swakunwa’ hi ntirho lowu va wu endlaka leswaku va seketela Mfumo. (Filp. 2:17) Ha va tlangela swinene lava kombiseke moya wo tano wo nyika. Vasati ni vana va vamakwerhu lava rhangelaka entirhweni wa Mfumo na vona va bumabumeriwa hikwalaho ka moya wa vona wo hanana ni wo tinyikela.

¹⁸ Ku laveka matshalatshala lamakulu leswaku ku seketeriwa ntirho wa Mfumo. Onge hinkwerhu ka hina hi nga khongela hi tlhela hi anakanyisisa hi ndlela leyi hi nga nyikaka Yehovha ha yona leswi engetelekeke. Tiyiseka leswaku u ta kuma mikateko yo tala sweswi naswona u ta kuma leyi engetelekeke “emafambiselweni lama taka ya swilo.”—Mar. 10:28-30.