Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

Yesu u yi ‘chumayele rini mimoya leyi nga ekhotsweni’? (1 Pet. 3:19)

Swi tikomba onge endzhaku ka loko Yesu a pfuxiwile eku feni, u tivise mimoya yoleyo yo homboloka leswaku yi ta xupuriwa.—6/15, tluka 23.

Hi swihi swilo swinharhu leswi u faneleke u swi xiya leswaku swi nga vangi swiphiqo evukatini bya wena bya vumbirhi?

Ku pfumelela vukati bya wena byo sungula leswaku byi onha lebyi u nga eka byona sweswi; ku endzelana ni vanghana va khale lava nga n’wi tiviki nkataku lontshwa; ku tshemba nkataku lontshwa hambileswi nkataku lowo sungula a a nga tshembekanga.—7/1, matluka 9-10.

Yesu u ta va avanyisa rini vanhu tanihi tinyimpfu kumbe timbuti? (Mat. 25:32)

Yesu u ta swi endla loko a ta ku ta avanyisa vanhu hi nkarhi wa nhlomulo lowukulu, endzhaku ka ku lovisiwa ka vukhongeri bya mavunwa.—7/15, tluka 6.

Xana lava endlaka leswo kala nawu lava ku vulavuriwaka ha vona exifanisweni xa koroni ni mfava va ta rila ni ku getsela meno rini? (Mat. 13:36, 41, 42)

Sweswo va ta swi endla hi nkarhi wa nhlomulo lowukulu loko va xiya leswaku a va nge wu balekeli ndzoviso.—7/15, tluka 13.

Marito ya Yesu ya hlonga ro tshembeka ni ro tlhariha ma hetiseke rini? (Mat. 24:45-47)

Ma sungule ku hetiseka endzhaku ka lembe ra 1914, ku nga ri hi Pentekosta ya 33 C.E. Hi 1919, hlonga ri vekiwe ehenhla ka va yindlu, lava katsaka Vakreste hinkwavo lava phameriwaka hi tlhelo ra moya.—7/15, matluka 21-23.

Yesu u ta ri veka rini hlonga ro tshembeka ehenhla ka swilo hinkwaswo swa yena?

Sweswo u ta swi endla enkarhini lowu taka, hi nkarhi wa nhlomulo lowukulu loko hlonga ro tshembeka ri kuma hakelo ya rona ya le tilweni.—7/15, tluka 25.

Xana mavito ya vanhu van’wana a ma boxiwanga eBibeleni hileswi a va ri vo homboloka kumbe a va nga ri va nkoka?

A hi fanelanga hi fikelela xiboho xolexo. Bibele a yi ma boxi mavito ya vanhu van’wana lava endleke leswinene ni lava endleke leswo biha. (Rhu. 4:1-3; Mat. 26:18) Hi byeriwe mavito ya tintsumi timbirhi ntsena to tshembeka.—8/1, tluka 10.

Handle ka matimba lama humaka eka Xikwembu, i yini lexi pfuneke Timbhoni ta 230 leswaku ti kota ku tiyisela riendzo ro leha ro suka ekampeni ya nxaniso ya Sachsenhausen?

Hambileswi a ti tsanile hikwalaho ka ndlala ni mavabyi, ti ye emahlweni ti khutazana leswaku ti tiyisela.—8/15, tluka 18.

Ha yini rungula leri vulavulaka hi ku tsemakanya ka Vaisrayele eNambyeni wa Yordani va ya eTikweni leri Tshembisiweke ri hi khutaza?

Hambileswi nambu lowu a wu khapa-khapa, Yehovha u endle leswaku mati ma yima leswaku vanhu vakwe va kota ku tsemakanya. Sweswo swi fanele swi tiyise ripfumelo ra vona swi tlhela swi endla va n’wi tshemba, na hina ri nga hi khutaza rungula rero.—9/15, tluka 16.

I yini leswi kombisiwaka hi ku va Bibele yi tshamela ku boxa muhlovo?

Leswi Bibele yi tirhiseke muhlovo swi kombisa leswaku Xikwembu xa swi twisisa leswaku muhlovo wu nga khumba mintlhaveko ya vanhu ni leswaku wu nga hi pfuna ku tsundzuka swilo.—10/1, matluka 14-15.

Vuprofeta lebyi nga eka Mikiya 5:5 lebyi vulavulaka hi tinghanakana ni varisi byi hetiseka njhani namuntlha?

Hi twisisa leswaku ‘varisi va nkombo ni tinghanakana ta nhungu’ lava ku vulavuriwaka ha vona eka Mikiya 5:5 i vakulu lava vekiweke evandlheni, lava tiyisaka vanhu va Xikwembu leswaku va ta swi kota ku langutana ni nhlaselo lowu nga ta va wela enkarhini lowu taka.—11/15, tluka 20.

Hi swihi swivangelo swin’wana leswi endlaka leswaku hi lava mpfuno wa Xikwembu?

Hi lava nkongomiso lowunene ni tinhlamulo eka swiphiqo leswi hi langutanaka na swona evuton’wini, leti hi nga ti kumaka eka Xikwembu. Xi hi nyika mpfuno leswaku hi hanya vutomi lebyinene hi tlhela hi tsaka, naswona leswaku sweswo swi koteka, xi ta hetisisa switshembiso leswi nga eRitweni ra xona.—12/1, matluka 4-6.