Anakanya hi xiyimo xin’wana: Mpatswa wa le vandlheni wu rhamba manana la nga yexe la nga ni vana vambirhi leswaku va ta hungasa na vona hi madyambu man’wana. Loko a byela vana vakwe hi xirhambo lexi, va xi tsakerile swinene. A va ri langutele hi mahlo-ngati siku rero. Hambiswiritano, loko ku sale siku rin’we leswaku va endza, mpatswa wolowo wu byela manana loyi leswaku ku ni mhaka leyi a yi nga languteriwanga leyi humeleleke naswona a swi nge he koteki leswaku va va endzela. Endzhakunyana ka nkarhi manana yoloye u swi twile leswi nga endla leswaku mpatswa wolowo wu vula leswaku a swi nge he koteki leswaku va va endzela. Endzhaku ka loko wu rhambe manana yoloye na wona wu rhambiwe hi vanghana va wona hi siku leri fanaka, ivi wu amukela xirhambo.

Entiyisweni, tanihi Vakreste hi fanele hi hetisisa switshembiso swa hina. A hi fanelanga hi tshembisa, ivi ‘ina wa hina a tlhela a va e-e.’ (2 Kor. 1:18) Hambiswiritano, hilaha swikombiso leswimbirhi swi kombisaka hakona, a hi swiyimo hinkwaswo swi fanaka. Minkarhi yin’wana swi nga ha tikomba ku nga ri na na lexi hi nga xi endlaka kutani hi boheka ku cinca leswi hi swi tshembiseke. Muapostola Pawulo u tshame a tikuma a ri exiyin’weni xo tano.

Hi 55 C.E., loko Pawulo a ri aEfesa hi nkarhi wa riendzo rakwe ra vunharhu ra vurhumiwa, a a tiyimisele ku tsemakanya Lwandle ra Aegea a ya eKorinto kutani loko a suka kwalaho a ya eMakedoniya. Loko a tlhelela eYerusalema, a a kunguhate ku endzela vandlha ra le Korinto ra vumbirhi, entiyisweni leswaku a ya teka nyiko ya vona ya musa a yi yisa eka vamakwerhu va le Yerusalema. (1 Kor. 16:3) Leswi swi vonaka kahle eka 2 Vakorinto 1:15, 16 leyi nge: “Hi ku tiyiseka loku, a ndzi kunguhate ku ta eka n’wina, leswaku mi ta va ni nkarhi wa vumbirhi wa ku tsaka, loko ndzi hundze hi le ka n’wina, ndzi  ya eMakedoniya, ndzi tlhela ndzi vuya eka n’wina ndzi huma eMakedoniya naswona mi ndzi heleketanyana ndzi ya eYudiya.”

Swi tikomba onge eka papila leri Pawulo a ri tsaleke enkarhini lowu hundzeke, a a byele vamakwerhu va le Korinto malunghana ni kungu rakwe. (1 Kor. 5:9) Hambiswiritano, endzhakunyana ka loko Pawulo a tsale papila rero, vandyangu wa ka Klowe va n’wi byele leswaku a ku ri ni timholovo letikulu evandlheni. (1 Kor. 1:10, 11) Pawulo u cince kungu rakwe naswona u tsale papila leri sweswi hi ri tivaka tanihi Vakorinto vo Sungula. Eka rona Pawulo u nyikele ndzayo ni ndzulamiso hi ndlela ya rirhandzu. U tlhele a vula leswaku u cince kungu ra riendzo rakwe, a va byela leswaku u ta rhanga a ya eMakedoniya kutani endzhaku a ya eKorinto.—1 Kor. 16:5, 6. *

Swi tikomba onge loko vamakwerhu va le Korinto va kume papila rakwe, van’wana va ‘vaapostola lavanene ngopfu’ va le vandlheni rero va n’wi hehle hi ku ka a nga tshembeki nileswaku a nga hetisisi switshembiso swakwe. Loko Pawulo a tihlamulela u vutise a ku: “Xisweswo, loko ndzi ri ni kungu ro tano, a ndzi nga tlangi nikatsongo, a hi swona ke? Kumbe loko ku ri ni swilo leswi ndzi kongomaka ku swi endla, xana ndzi kongoma ku swi endla hi tlhelo ra nyama, leswaku ndzi ku ‘Ina, ina’ na ‘E-e, e-e’?”—2 Kor. 1:17; 11:5.

Hi nga ha vutisa, Eka swiyimo leswi xana muapostola Pawulo a a ‘ri ku tlangeni’? Nikatsongo! Rito leri hundzuluxeriweke ri va ‘tlanga’ ri ni mongo wa ku nga tshembeki, onge hiloko munhu a a nga hetisisi leswi a swi tshembisaka. Xivutiso xa Pawulo lexi nge, “xana ndzi kongoma ku . . . endla [swilo] hi tlhelo ra nyama?” xi fanele xi swi veke erivaleni eka Vakreste va le Korinto leswaku leswi Pawulo a endleke xiboho xo cinca makungu yakwe a ku nga ri hi leswi a a nga tshembeki.

Pawulo u kanetane ni xihehlo xexo a tsala a ku: “Kambe ku nga tshembiwa Xikwembu leswaku mhaka leyi hi yi kongomisaka eka n’wina yi nga vi ‘Ina yi tlhela yi va E-e.’” (2 Kor. 1:18) Entiyisweni Pawulo a a va navelela leswinene vamakwavo va yena va le Korinto loko a cinca makungu yakwe. Eka 2 Vakorinto 1:23 hi hlaya leswaku a ‘ku ri ku va tsetselela’ leswi a cinceke makungu yakwe ya le ku sunguleni yo ya eKorinto. Entiyisweni, a a va nyike nkarhi wo lulamisa swilo loko a nga si hlangana na vona hi xiviri. Hilaha a a swi langutele hakona loko a ha ri eMakedoniya, Tito u byele Pawulo leswaku papila rakwe ri endle leswaku va va ni gome va tlhela va hundzuka, leswi n’wi tsakiseke swinene.—2 Kor. 6:11; 7:5-7.

Ku hehliwa ka Pawulo hi leswaku a nga tshembeki ku nga ha va ku vule leswaku switshembiso leswi a a swi endla masiku hinkwawo a swi ri vunwa, nileswaku leswi a a swi chumayela a swi nga fanelanga swi tshembiwa. Hambiswiritano, Pawulo u tsundzuxe Vakorinto leswaku u va chumayele malunghana na Yesu Kreste. “N’wana wa Xikwembu, Kreste Yesu, loyi hi chumayeleke ha yena exikarhi ka n’wina, ku nga mina na Silvhano na Timotiya, a a nga ri Ina a tlhela a va E-e, kambe eka yena Ina a a ri Ina.” (2 Kor. 1:19) Xana Yesu Kreste loyi Pawulo a a tekelela yena, a a nga tshembeki hi ndlela yo karhi? Doo! Yesu u vulavule ntiyiso vutomi byakwe hinkwabyo ni le vutirhelini byakwe. (Yoh. 14:6; 18:37) Loko ku ri leswaku leswi Yesu a swi chumayeleke a swi ri ntiyiso nileswaku Pawulo a a chumayela rungula leri fanaka, swi vula leswaku leswi muapostola loyi a a swi chumayela a swi tshembeka.

Entiyisweni Yehovha i “Xikwembu xa ntiyiso.” (Ps. 31:5) Sweswo hi swi vona eka leswi Pawulo a swi tsaleke, a ku: “Ku nga khathariseki leswaku switshembiso swa Xikwembu swi tarise ku yini, swi ve Ina ha yena” Kreste. Leswi Yesu a tshembekeke loko a ha ri laha misaveni swa hi tiyisekisa leswaku switshembiso swa Yehovha i ntiyiso. Pawulo u ye emahlweni a ku: “Hikokwalaho ha yena [Yesu] ku vuriwa leswaku ‘Amen’ eka Xikwembu leswaku xi vangamisiwa ha hina.” (2 Kor. 1:20) Yesu i xitiyisekiso xa Yehovha kumbe “Amen,” leswaku hinkwaswo leswi Yehovha Xikwembu a hi tshembisaka swona swi ta hetiseka.

Tanihi leswi Yehovha na Yesu va vulavulaka ntiyiso nkarhi hinkwawo, na Pawulo minkarhi  hinkwayo a a swi hetisisa leswi a a swi tshembisa. (2 Kor. 1:19) Pawulo a a tshembeka a a nga endli switshembiso “hi tlhelo ra nyama.” (2 Kor. 1:17) Ku ri na sweswo, a a “famba hi moya.” (Gal. 5:16) Loko a tirhisana ni van’wana a a va navelela leswinene. Ina wa yena a a ri Ina!

Masiku lawa, swi tolovelekile leswaku vanhu lava nga hanyiki hi milawu ya Bibele va endla switshembiso ivi va nga swi hetisisi loko ku va ni swiphiqo switsongo kumbe loko ku humelela swo karhi leswi va tsakisaka swinene. Etimhakeni ta mabindzu a hi minkarhi hinkwayo “ina” a vaka “ina” hambiloko ntwanano wa kona wu tiyisekisiwe hi ku tsariwa ehansi. Vanhu vo tala a va ha teki vukati, lebyi nga ntwanano exikarhi ka vanhu vambirhi, tanihi xiboho xa vutomi hinkwabyo. Ku ri na sweswo, nhlayo leyi kulaka swinene ya vanhu lava dlayaka vukati yi kombisa leswaku vo tala va teka vukati byi ri ntwanano wo hungasa lowu nga herisiwaka hi ku olova.—2 Tim. 3:1, 2.

Ku vuriwa yini hi wena? Xana Ina wa wena i Ina? Entiyisweni, hilaha hi swi voneke hakona eku sunguleni ka xihloko lexi, swi nga ha endleka leswaku u boheka ku nga xi hetisisi xitshembiso xo karhi, ku nga ri hi leswi u nga tshembekiki, kambe hikwalaho ka swiyimo leswi u nga kotiki ku swi lawula. Kambe loko wena Mukreste u endla xitshembiso kumbe xiboho xo karhi, u fanele u endla hinkwaswo leswi u nga swi kotaka leswaku u xi hetisisa. (Ps. 15:4; Mat. 5:37) Loko u endla tano, u ta tiviwa tanihi munhu la tshembekaka, la hetisisaka leswi a swi vuleke, la vulavulaka ntiyiso nkarhi hinkwawo. (Efe. 4:15, 25; Yak. 5:12) Loko vanhu va swi xiya leswaku wa tshembeka siku ni siku, va nga ha tsakela ku ku yingisela loko u bula na vona hi ntiyiso wa Mfumo wa Xikwembu. Hikwalaho, a hi tiyisekeni leswaku Ina wa hina i Ina hakunene!