KATHERINE u kulele eUnited States naswona loko a ri ni malembe ya 16 u khuvuriwile a va Mbhoni ya Yehovha. A a tirha hi matimba ensin’wini kambe vanhu va le ndhawini leyi a a chumayela eka yona a va nga ri tsakeli rungula ra Mfumo. U ri: “Ndzi hlaye mintokoto ya vanhu lava khongeleke eka Xikwembu leswaku xi va rhumelela munhu loyi a nga ta va pfuna leswaku va xi tiva. Minkarhi yo tala a ndzi navela onge ndzi nga kuma munhu wo tano, kambe a ndzi n’wi kumanga.”

Endzhaku ko chumayela malembe yo tala endhawini yoleyo, Katherine u sungule ku anakanya hi ku rhurhela endhawini leyi vanhu va nga ta ri tsakela swinene rungula ra Mfumo. Hambiswiritano, u tivutisile loko swi nga ta n’wi tikela. A ko va kan’we ntsena evuton’wini byakwe laha a tshameke a nga vi ni ndyangu wa ka vona ku ringana mavhiki mambirhi ntsena—naswona hi nkarhi wolowo siku ni siku a a tshamela ku tsundzuka ekaya. Kambe, ku navela ka yena lokukulu ko kuma ntsako hi ku pfuna vanhu lava lavaka Yehovha ku hetisekile. Endzhaku ka loko a kambisise tindhawu to hlayanyana leti a nga rhurhelaka eka tona, u tsalele rhavi ra le Guam kutani a rhumeriwa rungula leri a a ri lava. Hi July 2007, loko Katherine a ri ni malembe ya 26, u rhurhele eSaipan, exihlaleni lexi nga eLwandle ra Pacific, kwalomu ka 10 000 wa tikhilomitara ku suka ekaya ka vona. Xana swi n’wi fambele njhani?

Endzhakunyana ka loko a fike evandlheni lerintshwa, Katherine u hlangane na Doris, wansati loyi a nga ni malembe ya va-40, loyi a pfumeleke ku dyondzeriwa Bibele. Endzhaku ka loko va hlaye tindzima tinharhu to sungula ta buku leyi nge Leswi Bibele Yi Swi Dyondzisaka, Katherine u sungule ku karhateka. U ri: “Doris a a ri xichudeni lexinene naswona a ndzi nga swi lavi ku onha dyondzo leyi. A ndzi nga si tshama ndzi fambisa dyondzo ya Bibele ya nkarhi na nkarhi naswona a ndzi vona onge Doris a a fanele a dyondza ni makwerhu wa xisati la nga ni ntokoto swinene, kumbexana loyi a ringanaka na yena hi malembe.” Katherine u kombele Yehovha hi xikhongelo leswaku a n’wi pfuna a kuma makwerhu wa xisati loyi a fanelekaka loyi a a ta n’wi nyika xichudeni xakwe xa Bibele. Kutani u endle xiboho xo byela Doris leswaku u ta n’wi nyika munhu un’wana a n’wi dyondzela.

Katherine u ri: “Emahlweni ko va ndzi n’wi byela hi mhaka yoleyo, Doris u vule leswaku u lava ku vulavula na mina hi xiphiqo xo karhi. Endzhaku ka loko ndzi n’wi yingiserile, ndzi n’wi hlamusele hi ndlela leyi Yehovha a ndzi pfuneke ha yona leswaku ndzi langutana ni xiyimo xo fana ni lexi a a ri eka xona. U ndzi nkhensile.” Kutani Doris u byele Katherine a ku: “Yehovha u tirhisa wena leswaku u ndzi pfuna. Siku ro sungula leri u teke ekaya ka  mina ha rona, a ndzi hete tiawara to tala ndzi ri eku hlayeni ka Bibele. A ndzi ri karhi ndzi rila ndzi kombela Xikwembu leswaku xi ndzi rhumelela munhu loyi a nga ta ndzi pfuna leswaku ndzi twisisa Bibele. Kutani wena u gongondze enyangweni wa mina. Yehovha u hlamule xikhongelo xa mina!” Mahlo ya Katherine a ma tenga-tenga mihloti loko a ri karhi a hlamusela malunghana ni nkarhi wolowo lowu khumbaka mbilu. U ri: “Marito lama vuriweke hi Doris a ma ri nhlamulo ya xikhongelo xa mina. Yehovha u ndzi kombile leswaku a ndzi ta swi kota ku ya emahlweni ndzi fambisa dyondzo yoleyo.”

Doris u khuvuriwe hi 2010 naswona namuntlha u fambisa tidyondzo ta Bibele to hlayanyana. Katherine u ri: “Ndza tsaka swinene leswi ku navela loku a ku ri khale ndzi ri na kona, ko pfuna munhu loyi a nga ni mbilu leyinene leswaku a va nandza wa Yehovha ku hetisekeke!” Namuntlha, Katherine i phayona ro hlawuleka leri tsakeke exihlaleni xa Kosrae lexi nga le Pacific.

Vamakwerhu va xinuna ni va xisati vo tlula dzana lava humaka ematikweni man’wana (lava nga ni malembe lama sukelaka eka 19 ku ya eka 79) va tirhe laha ku nga ni xilaveko lexikulu le Micronesia. Ndlela leyi vatirhi volavo lava hisekaka va titwaka ha yona yi hlamuseriwe kahle hi Erica loyi a rhurheleke eGuam hi 2006 a ri ni malembe ya 19. U ri: “Swi tsakisa ngopfu ku phayona ensin’wini leyi vanhu va kona va nga ni torha ra ntiyiso. Ndza swi tlangela swinene leswi Yehovha a ndzi pfuneke leswaku ndzi phayona. I ndlela leyinene yo hanya ha yona!” Namuntlha, Erica i phayona ro hlawuleka le Ebeye le Swihlaleni swa Marshall. Entiyisweni, ku chumayela etikweni rimbe na swona swi tisa mintlhontlho. A hi kambisiseni yinharhu ya yona kutani hi vona ndlela leyi lava rhurheleke eMicronesia va langutanaka na yona ha yona.

Vutomi bya kona. Endzhaku ka loko Simon loyi a a ri ni malembe ya 22 a fike exihlaleni xa Palau hi 2007, u hatle a xiya leswaku u ta hola mali leyitsongo swinene eka leyi a a yi hola etikweni ra rikwavo le Nghilandhi. U ri: “Ndzi boheke ku dyondza ku nga xavi xin’wana ni xin’wana lexi a ndzi xi lava. Sweswi ndzi swi hlawula hi vukheta swakudya leswi ndzi nga ta swi xava naswona ndzi rhendzeleka ni switolo hinkwaswo ndzi lava leswi xavekaka. Loko ndzi tshovekeriwa hi nchumu wo karhi, ndzi xava swilo leswi rhangeke swi tirhisiwa swo wu lunghisa ivi ndzi lava munhu la nga ndzi pfunaka ku wu lunghisa.” Ku hanya vutomi byo olova swi n’wi khumbe njhani? Simon u ri: “Swi ndzi pfune ku dyondza leswaku hi swihi swilo swa nkoka swinene evuton’wini ni ndlela leyi ndzi nga swi kotaka ha yona ku hanya hi mali yitsongo ni nhundzu yitsongo. Ndzi swi vone minkarhi yo tala leswaku Yehovha wa ndzi khathalela. Eka malembe ya nkombo lawa ndzi ma heteke ndzi tirha laha, a ndzi si tshama ndzi pfumala swakudya ni ndhawu yo etlela.” Hakunene Yehovha u seketela lava hanyaka vutomi byo olova hileswi va lavaka ku rhangisa Mfumo.—Mat. 6:32, 33.

Ku tsundzuka ekaya. Erica u ri: “A ndzi tolovelane swinene ni ndyangu wa ka hina naswona a ndzi vilerisiwa hileswaku ku tsundzuka ekaya swi ta kavanyeta ntirho wa mina wo chumayela.” U endle yini leswaku a tilunghiselela? U ri: “Loko ndzi nga si rhurha, ndzi hlaye swihloko swa le ka Xihondzo xo Rindza leswi vulavulaka hi ku tsundzuka ekaya. Swi endle leswaku mbilu ya mina yi lunghekela ku langutana ni ntlhontlho wolowo. Eka xihloko xin’wana, manana un’wana u tiyisekise n’wana wakwe wa  nhwanyana hi ndlela leyi Yehovha a khathalelanaka ha yona a ku, ‘Yehovha u ta ku khathalela ku tlula mina.’ Xitiyisekiso xexo xi ndzi tiyisile hakunene.” Hannah ni nuna wakwe Patrick, va tirha eMajuro le Swihlaleni swa Marshall. Hannah u kota ku langutana ni ntlhontlho wo tsundzuka ekaya hi ku tshama a ri karhi a anakanya hi vamakwerhu va xinuna ni va xisati lava nga evandlheni ra vona. U ri: “Nkarhi na nkarhi ndzi nkhensa Yehovha hikwalaho ka vamakwerhu va hina emisaveni hinkwayo hikuva na vona i ndyangu wa ka hina. A ndzi ta va ndzi nga swi kotanga ku tirha laha ku nga ni xilaveko lexikulu loko a va nga ndzi seketelanga hi ndlela ya rirhandzu.”

Ku va ni vanghana. Simon u ri: “Loko u fika etikweni rin’wana, swilo hinkwaswo swi va swi hambanile ni leswi u swi toloveleke. Minkarhi yin’wana ndzi kumbuka ku vula mafenya lawa vanhu va ma twisisaka.” Erica u ri: “Eku sunguleni a ndzi titwa ndzi lahlekile, kambe sweswo swi ndzi pfunile leswaku ndzi anakanyisisa hi xikongomelo xa ku rhurha ka mina. A ndzi rhurhanga hi xikongomelo xo lava ku tivuyerisa kambe ndzi lava ku tirhela Yehovha hi xitalo.” U ya emahlweni a ku: “Hi ku famba ka nkarhi, ndzi ve ni vanghana lavanene lava ndza ha va tekaka va ri va nkoka.” Simon u tirhe hi matimba leswaku a dyondza Xipalau, leswi n’wi pfuleleke ndlela yo ‘ndlandlamuka’ a tolovelana ni vamakwerhu va xinuna ni va xisati. (2 Kor. 6:13) Matshalatshala lawa a ma endleke yo dyondza ririmi rolero ma endle leswaku a rhandziwa hi vamakwerhu. Loko vamakwerhu lava ha ku fikaka ni vamakwerhu va kwalaho va tirhisana, hinkwavo ka vona va vuyeriwa hi ku va ni vanghana lavakulu evandlheni. Hi byihi vuyelo byin’wana lebyi kumiwaka hi lava tinyikelaka hi ku tirhandzela leswaku va ya tirha laha ku nga ni xilaveko lexikulu?

Muapostola Pawulo u te: “Loyi a byalaka hi xitalo, u ta tlhela a tshovela hi xitalo.” (2 Kor. 9:6) Nawu lowu kongomisaka lowu hlamuseriweke eka marito lawa wu tirha eka lava endlaka leswi engetelekeke entirhweni wa vona wa nsimu. Hi byihi vuyelo lebyinene lebyi va byi ‘tshoveleke hi xitalo’ le Micronesia?

Le Micronesia, ka ha ri ni tindlela to tala to sungula tidyondzo ta Bibele ni ku tivonela hi wexe ndlela leyi vanhu lava dyondzaka va tlhela va tirhisa ntiyiso wa le Ritweni ra Xikwembu va endlaka nhluvuko ha yona hi tlhelo ra moya. Patrick na Hannah va tlhele va chumayela eAngaur, ku nga xihlala lexitsongo ngopfu lexi nga ni vaaki va 320. Endzhaku ko chumayela kwalaho tin’hweti timbirhi, va hlangane ni manana la nga mutswari la nga yexe. U nambe a pfumela ku dyondzeriwa Bibele, a amukela ntiyiso hi mapfundza a tlhela a endla ku cinca lokukulu evuton’wini byakwe. Hannah u ri: “Endzhaku ka dyondzo yin’wana ni yin’wana, loko hi suka ekaya ka yena hi swikanyakanya swa hina, a hi langutana ivi hi ku: ‘Ha nkhensa Yehovha!’” Hannah u ya emahlweni a ku: “Ndza swi tiva leswaku Yehovha a a ta va a tirhise tindlela to hambana leswaku a kokela wansati loyi eka yena, kambe leswi hi tirhaka laha ku nga ni xilaveko lexikulu, hi kote ku kuma ni ku pfuna munhu loyi, la fanaka ni nyimpfu leswaku a tiva Yehovha. Lowu i wun’wana wa mintokoto leyi tsakisaka swinene evuton’wini bya hina hinkwabyo!” Hilaha Erica a vulaka hakona, “loko u pfuna munhu leswaku a tiva Yehovha, u va ni ntsako lowukulu!”

Ematikweni yo tala, ku ni xilaveko xa vahuweleri lava engetelekeke va Mfumo. Xana na wena u nga rhurhela etindhawini leti ku lavekaka mpfuno eka tona? Kombela Yehovha hi xikhongelo leswaku a tiyisa ku navela ka wena ku endla leswi engetelekeke entirhweni wa nsimu. Bula hi mhaka leyi ni vakulu evandlheni, mulanguteri wa xifundzha kumbe ni lava tshameke va va ni lunghelo ro ya tirha endhawini leyi ku lavekaka mpfuno. Loko u sungula ku kunguhata, tsalela rhavi leri khathalelaka nsimu leyi u lavaka ku ya tirha eka yona ivi u kombela rungula leri engetelekeke. * Kumbexana na wena u nga joyina magidi ya vamakwerhu va xinuna ni va xisati—lavatsongo ni lavakulu, lava nga nghenelangiki vukati kumbe lava byi ngheneleke—lava tinyikeleke hi ku tirhandzela kutani va nantswa ntsako lowu tisiwaka hi ku “tshovela hi xitalo.”