PETRO u rile hi xiviti endzhaku ka loko a landzurile leswaku u tiva Yesu. Hambileswi muapostola loyi a swi ta lava a tirha hi matimba leswaku a tlhela a va ni vuxaka lebyinene na Yehovha, Yesu a a lava ku n’wi tirhisa leswaku a pfuna van’wana. Hikwalaho, Yesu u n’wi byele marito lawa: “Loko wena se u vuyile, tiyisa vamakwenu.” (Luka 22:32, 54-62) Petro u ye emahlweni a ri yin’wana ya tiphuphu ta vandlha ra Vukreste ra le minkarhini ya vaapostola. (Gal. 2:9) Hilaha ku fanaka, wanuna la tshameke a va nkulu a nga swi kota ku tlhela a byarha vutihlamuleri byolebyo a tlhela a tsakela ku tiyisa vapfumeri-kulobye hi tlhelo ra moya.

Van’wana lava tshameke va va vakulu va tekeriwe lunghelo rero, naswona sweswo swi nga ha va swi va endle va titwa va tsandzekile. Julio, * loyi a veke nkulu eAmerika Dzonga malembe yo tlula 20, u te: “A ndzi tshama ndzi khomekile hi ku lunghiselela tinkulumo, ku endzela vamakwerhu ni ku endla maendzo ya vurisi eka swirho swa vandlha. Hi xitshuketa, lunghelo rolero ri tekiwile ivi ri siya vangwa evuton’wini bya mina. Lowu a wu ri nkarhi wo vava swinene.” Namuntlha, Julio i nkulu nakambe.

Mudyondzisiwa Yakobo u tsarile a ku: “Swi tekeni hinkwaswo swi ri ntsako, vamakwerhu, loko mi langutana ni miringo yo hambana-hambana.” (Yak. 1:2) Yakobo a a vulavula hi miringo leyi vangiwaka hi ku xanisiwa ni ku nga hetiseki ka hina. U vulavule hi ku navela ka vutianakanyi, swiendlo swa xihlawuhlawu ni swin’wana. (Yak. 1:14; 2:1; 4:1, 2, 11) Loko Yehovha a hi tshinya, swi nga ha vava. (Hev. 12:11) Kambe miringo yoleyo a yi fanelanga yi hi hetela ntsako.

Hambiloko hi tekeriwe lunghelo ra ku va ni vutihlamuleri byo karhi evandlheni, ha ha ri ni nkarhi wo kombisa ndlela leyi ripfumelo ra hina ri tiyeke ha yona ni ndlela leyi hi rhandzaka Yehovha ha yona. Hi nga tlhela hi anakanyisisa hi leswaku ha yini hi amukele lunghelo rolero. Xana a hi lava ku vuyeriwa, kumbe hi susumeteleke ku fanelekela lunghelo rolero hikwalaho  ka leswi hi rhandzaka Xikwembu ni leswi hi tiyisekaka leswaku vandlha i ra xona naswona ri fanele ri khomiwa hi ndlela ya rirhandzu? (Mint. 20:28-30) Vanhu lava tshameke va va vakulu lava yaka emahlweni va endla ntirho wo kwetsima va tsakile, va kombisa hinkwavo, ku katsa na Sathana leswaku va rhandza Yehovha hi mbilu hinkwayo.

Loko Hosi Davhida a tshinyiwile hikwalaho ko endla swidyoho leswikulu, u amukele ndzayo ivi a rivaleriwa. Davhida u yimbelerile a ku: “Wa tsaka loyi a rivaleriweke swiendlo swakwe swo pfukela, loyi xidyoho xakwe xi funengetiweke. Wa tsaka munhu loyi Yehovha a nga vekiki xidyoho evitweni rakwe, loyi ku nga riki na vuxisi emoyeni wakwe.” (Ps. 32:1, 2) Ku tshinyiwa ku antswise vumunhu bya Davhida naswona handle ko kanakana ku n’wi endle murisi wo antswa wa vanhu va Xikwembu.

Hakanyingi, vamakwerhu lava tlhelaka va va vakulu, va va varisi lavanene ku tlula eku sunguleni. Nkulu un’wana wo tano u te: “Sweswi ndzi yi twisisa ku antswa ndlela yo khathalela lava endlaka xihoxo.” Nkulu un’wana u te: “Sweswi ndzi ri teka ri ri ra nkoka swinene lunghelo ro tirhela vamakwerhu.”

Mupisalema u tsarile a ku: “[Yehovha] a nge tshameli ku kuma xihoxo nkarhi hinkwawo.” (Ps. 103:9) Hikwalaho a hi fanelanga hi anakanya leswaku Xikwembu a xi nge he pfuki xi n’wi tshembile munhu la endleke xihoxo lexikulu. Ricardo, loyi a tekeriweke lunghelo ra ku va nkulu endzhaku ko va nkulu ku ringana malembe yo tala u te: “Ndzi hetiwe matimba swinene hi ku tsandzeka ka mina. Ku titwa ka mina ndzi nga ri na vuswikoti swi ndzi sivele ku tlhela ndzi va mulanguteri ku ringana nkarhi wo leha. A ndzi nga titshembi leswaku ndzi nga tlhela ndzi swi kombisa leswaku ndza tshembeka. Kambe leswi ndzi tsakelaka ku pfuna van’wana, ndzi swi kotile ku fambisa tidyondzo ta Bibele, ku khutaza vamakwerhu eHolweni ya Mfumo ni ku tirha na vona ensin’wini. Sweswo swi ndzi pfunile leswaku ndzi tlhela ndzi titshemba naswona sweswi se ndzi nkulu nakambe.”

Ku va ni xikhomela swi nga sivela makwerhu wa xinuna leswaku a tlhela a va nkulu. Swi nga va swinene ngopfu ku fana na Davhida nandza wa Yehovha, loyi a bohekeke ku balekela Hosi Sawulo loyi a a ri ni  mavondzo! Davhida u arile ku tirihisela eka Sawulo, hambiloko a pfulekeriwa hi nkarhi wa ku tirihisela. (1 Sam. 24:4-7; 26:8-12) Loko Sawulo a file enyimpini, Davhida u rile rifu ra yena, a vula leswaku Sawulo ni n’wana wakwe Yonathani a va ri “vanhu lava rhandzekaka ni vanhu vo saseka.” (2 Sam. 1:21-23) Davhida a nga vanga na xikhomela.

Loko u vona onge a wu twisisiwanga kahle kumbe u khomiwe hi ndlela yo biha, u nga pfumeli ku lawuriwa hi xikhomela. Hi xikombiso, loko William a tekeriwe lunghelo ra ku va nkulu endzhaku ka malembe ya kwalomu ka 30 a ri nkulu eBritain, u ve ni xikhomela eka vakulu van’wana. I yini lexi n’wi pfuneke ku tlhela a va ni langutelo lerinene? U te: “Ku hlaya buku ya Yobo swi ndzi khutazile. Loko Yehovha a pfune Yobo leswaku a kondletela ku rhula ni vanakulobye vakwe vanharhu, na mina U ta ndzi pfuna leswaku ndzi kondletela ku rhula ni vakulu lava nga Vakreste!”—Yobo 42:7-9.

Loko u hlawule ku tshika ku va murisi wa ntlhambi wa Xikwembu, swi nga va swinene ku anakanyisisa hi leswaku ha yini u endle tano. Xana a wu ri ni swiphiqo swo tala? Xana swilo swin’wana swi ve swa nkoka swinene evuton’wini bya wena? Xana u hetiwe matimba hi swihoxo swa van’wana? Ku nga khathariseki xivangelo xa kona, tsundzuka leswaku a wu pfuna van’wana hi tindlela to tala loko wa ha ri nkulu. Tinkulumo ta wena a ti va tiyisa, xikombiso xa wena a xi va khutaza naswona maendzo ya wena ya vurisi ma va pfunile leswaku va tiyisela miringo ya vona. Ntirho wa wena tanihi nkulu la tshembekaka wu tsakise mbilu ya Yehovha, hilaha wu tsakiseke mbilu ya wena hakona.—Swiv. 27:11.

Yehovha u pfune vavanuna leswaku va tlhela va kuma ntsako ni ku hetisisa ku navela ka vona ko rhangela evandlheni. Loko u tshike ku va nkulu kumbe u tshikisiwile, u nga tlhela u “fikelela ntirho wa ku va mulanguteri.” (1 Tim. 3:1) Pawulo ‘a nga tshikanga ku khongelela’ leswaku Vakreste va le Kolosa va tala hi vutivi lebyi kongomeke bya ku rhandza ka Xikwembu “leswaku [va] famba hi mukhuva lowu fanelaka eka Yehovha leswaku [va] n’wi tsakisa hi ku helela.” (Kol. 1:9, 10) Loko u tlhele u kuma lunghelo ra ku va nkulu, khongela eka Yehovha u kombela matimba, mbilu yo leha ni ntsako. Emasikwini lawa yo hetelela, vanhu va Xikwembu va lava nseketelo wa moya wa varisi lava nga ni rirhandzu. Xana wa swi kota ku tiyisa vamakwenu naswona u tiyimiserile?