Xivutiso lexi i xa nkoka, ngopfu-ngopfu eka lava feriweke hi vanghana va vona va vukati lava a va va rhandza. Vanhu vo tano va nga ha va va navela ku tlhela va hlanganisiwa ni vanghana va vona va vukati lava pfuxeriweke emisaveni leyintshwa. Wanuna un’wana la feriweke hi nsati u te: “Mina ni nsati wa mina a hi tihlawulelanga ku herisa vukati bya hina. A hi swi navela hi mbilu hinkwayo ku gandzela Yehovha swin’we tanihi nuna na nsati hilaha ku nga heriki. Ndza ha titwa hi ndlela yoleyo.” Xana ku ni xivangelo xo va ni ntshembo wa leswaku lava pfuxiweke eku feni va ta tlhela va kota ku nghenela vukati? Nhlamulo ya kona hileswaku a hi tiyiseki.

Ku ringana malembe yo tala, minkandziyiso ya hina yi vule leswaku marito ya Yesu malunghana ni ku pfuxiwa ka vafi ni ku nghenela vukati, swi nga ha endleka ma kombetela eku pfuxiweni ka vafi ka laha misaveni ni leswaku swi le rivaleni leswaku lava nga ta pfuxeriwa ku ya hanya emisaveni leyintshwa a va nge ngheneli vukati. * (Mat. 22:29, 30; Mar. 12:24, 25; Luka 20:34-36) Hambiswiritano, xana swi nga ha endleka leswaku Yesu a a vulavula hi ku pfuxeriwa etilweni? A hi kambisiseni leswi Yesu a swi vuleke.

Anakanya hi xiyimo xa kona. (Hlaya Luka 20:27-33.) Vasaduki, lava a va nga pfumeli eku pfuxiweni ka vafi, a va ringeta ku phasa Yesu hi xivutiso xa malunghana ni ku pfuxiwa ka vafi ni mhaka ya leswaku wansati la feriweke hi nuna a a fanele a tekiwa hi makwavo wa nuna wa yena. * Yesu u te: “Vana va mafambiselo lawa ya swilo va teka naswona va hlomisiwa, kambe lava hlayiweke leswaku va faneriwa hi ku kuma mafambiselo wolawo ya swilo ni ku pfuxiwa eka lava feke a va teki naswona a va hlomisiwi. Entiyisweni, a va nge he fi, hikuva va fana ni tintsumi, naswona i vana va Xikwembu hikwalaho ka leswi va nga vana va ku pfuxiwa eku feni.”—Luka 20:34-36.

Ha yini minkandziyiso ya hina yi vule leswaku swi nga ha endleka leswaku Yesu a a vulavula hi ku pfuxiwa ka vafi ka laha misaveni? Ku ni swivangelo swimbirhi leswikulu. Xo sungula, swi nga ha endleka leswaku Vasaduki a va anakanya hi ku pfuxiwa ka vafi ka laha misaveni, hikwalaho Yesu u va hlamule a vulavula hi ku pfuxiwa koloko. Xa vumbirhi, Yesu u gimete nhlamulo yakwe hi ku vulavula hi Abrahama, Isaka na Yakobe, ku nga vapatriyaka vo tshembeka lava nga ta pfuxeriwa ku hanya laha misaveni.—Luka 20:37, 38.

Hambiswiritano, swi nga endleka leswaku Yesu a a vulavula hi ku pfuxeriwa etilweni. Ha yini hi vula tano? A hi kambisiseni swiga swimbirhi swa nkoka.

“Lava hlayiweke leswaku va faneriwa hi ku kuma . . . ku pfuxiwa eka lava feke.” Vatotiwa vo tshembeka va “hlayiwa [va] ri lava faneriwaka hi mfumo wa Xikwembu.” (2 Tes. 1:5, 11) Va vuriwe lava lulameleke ku kuma vutomi exisekelweni xa nkutsulo; hikwalaho loko va fa a va fi va ri vadyohi lava gweviweke. (Rhom. 5:1, 18; 8:1) Vanhu volavo va vuriwa ‘lava tsakeke ni lava kwetsimaka’ naswona va tekiwa va ri lava faneriwaka hi ku pfuxeriwa etilweni. (Nhlav. 20:5, 6) Ku hambana ni sweswo, lava pfuxeriwaka ku hanya emisaveni va ta katsa ni “lava nga lulamangiki.” (Mint. 24:15) Xana vanhu volavo va nga vuriwa lava ‘hlayiweke va ri lava faneriwaka’ hi ku pfuxiwa eku feni?

“A va nge he fi.” Yesu a nga vulanga a ku: “A va nge he pfuki va file.” Ku ri na sweswo, u te: “A va nge he fi.” Vuhundzuluxeri byin’wana byi hundzuluxela xiga xolexo byi ku “a va nge he fi nikatsongo” ni  leswaku “rifu a ra ha ri na matimba eka vona.” Vatotiwa lava hetaka pfhumba ra vona ra laha misaveni va tshembekile va pfuxeriwa etilweni kutani va nyikiwa ku nga fi—vutomi lebyi nga heriki lebyi nga lovisekiki. (1 Kor. 15:53, 54) Rifu a ra ha ri na matimba eka lava pfuxeriwaka etilweni. *

Hi ku ya hi rungula leri se hi buleke ha rona, hi nga fikelela xiboho xihi? Swi nga ha endleka leswaku marito lawa Yesu a ma vuleke malunghana ni ku nghenela vukati ni ku pfuxiwa ka vafi ma tirha eka lava nga ta pfuxeriwa etilweni. Loko swi ri tano, leswi a swi vuleke swi hi hlamusela swilo swo hlayanyana malunghana ni lava nga ta pfuxeriwa ku ya hanya etilweni: A va ngheneli vukati, a va nge fi naswona hi tindlela to karhi va fana ni tintsumi—swivumbiwa swa moya leswi tshamaka exivandleni xa moya. Hambiswiritano, xiboho xolexo xi tlakusa swivutiso swo hlayanyana.

Xo sungula, ha yini Yesu a vulavule hi ku pfuxiwa ka le tilweni loko a hlamula Vasaduki, lava kumbexana a va anakanya hi ku pfuxiwa ka laha misaveni? Minkarhi yin’wana Yesu a a nga hlamuli vakaneti va yena hi ku pfumelelana ni leswi a va swi anakanya. Hi xikombiso, u byele Vayuda lava a va lava a va endlela singita a ku: “Mbundzumuxani tempele leyi, kutani ndzi ta yi pfuxa hi masiku manharhu.” A swi kanakanisi leswaku Yesu a a swi tiva leswaku a va anakanya hi muako wa tempele, “kambe a a vulavula hi tempele ya miri wakwe.” (Yoh. 2:18-21) Kumbexana Yesu a a vona swi nga bohi ku hlamula Vasaduki volavo a va ri vakanganyisi, lava a va nga pfumeli eku pfuxiweni ka vafi kumbe emhakeni ya leswaku tintsumi ti kona. (Swiv. 23:9; Mat. 7:6; Mint. 23:8) Ku ri na sweswo, swi nga ha endleka a a lava ku paluxa ntiyiso malunghana ni ku pfuxeriwa etilweni leswaku ku ta vuyeriwa vadyondzisiwa vakwe vo tshembeka, lava siku rin’wana na vona a va ta pfuxeriwa etilweni.

Xa vumbirhi, ha yini Yesu a gimete bulo rakwe hi ku vulavula hi Abrahama, Isaka na Yakobe lava nga ta pfuxeriwa ku hanya laha misaveni? (Hlaya Matewu 22:31, 32.) Xiya leswaku loko Yesu a nga si vulavula hi vavanuna volavo vo tshembeka u rhange a vula marito lama nge “loko ti ri ta ku pfuka ka lava feke.” Xiga xolexo xi nga endla leswaku swi koteka ku cinca bulo ra ku pfuxeriwa etilweni ivi ku vulavuriwa hi ku pfuxeriwa emisaveni. Endzhaku ka sweswo, Yesu u tshahe marito lama kumekaka ebukwini leyi tsariweke hi Muxe, loyi Vasaduki a va pfumela etibukwini leti tsariweke hi yena, a tirhisa marito lawa Yehovha a ma byeleke Muxe ekusuhi ni xihlahla lexi a xi ri eku tshweni leswaku a n’wi nyika vumbhoni lebyi engetelekeke bya leswaku ku pfuxiwa ka vafi—ka laha misaveni—i xikongomelo lexi tiyeke xa Xikwembu.—Eks. 3:1-6.

Xa vunharhu, loko marito lama vuriweke hi Yesu malunghana ni ku pfuxiwa ka vafi ni ku nghenela vukati ma tirha eka ku pfuxeriwa etilweni, xana leswi swi vula leswaku lava nga ta pfuxeriwa laha misaveni va ta kota ku tlhela va nghenela vukati? Rito ra Xikwembu a ri nyikeli nhlamulo leyi kongomeke eka xivutiso xolexo. Loko entiyisweni Yesu a a vulavula hi ku pfuxeriwa etilweni, kutani leswi a swi vuleke a swi kombisi loko lava nga ta pfuxeriwa laha misaveni va ta kota ku nghenela vukati emisaveni leyintshwa.

Ha swi tiva leswaku Rito ra Xikwembu ri vula leswaku rifu ri herisa xiboho xa vukati. Hikwalaho, wanuna la feriweke hi nsati kumbe wansati la feriweke hi nuna a nga fanelanga a tivona nandzu loko a endla xiboho xo tlhela a nghenela vukati. Xolexo i xiboho xa munhu hi yexe, naswona vanhu lava endlaka tano a va fanelanga va xopaxopiwa hileswi va lavaka xinakulobye lexikulu xa munghana wa vukati.—Rhom. 7:2, 3; 1 Kor. 7:39.

Hi nga ha va ni swivutiso swo tala malunghana ni ndlela leyi vutomi byi nga ta va ha yona emisaveni leyintshwa. Ematshan’weni yo mbambela tinhlamulo ta swivutiso swoleswo, hi fanele hi rindza hi vona leswi nga ta endleka. Kambe hi lowu nchumu lowu hi nga tiyisekaka ha wona: Vanhu lava yingisaka va ta va va tsakile, hikuva Yehovha u ta enerisa swilaveko ni ku navela ka vona hinkwako hi ndlela leyinene ngopfu.—Ps. 145:16.