MUVUMBI wa hina u nyike vanhu nyiko ya risima ya ntshunxeko wa ku tihlawulela. Ku tlula kwalaho, u va katekisa swinene vanhu lava tirhisaka ntshunxeko wa vona wa ku tihlawulela handle ka vutianakanyi, leswaku va pfuna vanhu vo tala ku va vagandzeri va Yehovha ni ku kwetsimisa vito rakwe ro kwetsima va tlhela va seketela xikongomelo xa yena lexikulu. Yehovha a nga swi lavi leswaku vanhu va yingisa milawu ya yena leswaku va hetisa nawu. Ematshan’weni ya sweswo, u va teka va ri va nkoka swinene lava tinyiketelaka hi ku swi rhandza hikwalaho ka leswi va n’wi rhandzaka hi mbilu hinkwayo ni hi leswi va n’wi tlangelaka swinene.

Hi xikombiso, loko Vaisrayele va ri emananga ya Sinayi, Yehovha u va lerise leswaku va aka ndhawu yo n’wi gandzela eka yona. U te: “Hlengeletelani Yehovha munyikelo exikarhi ka n’wina. Un’wana ni un’wana la nga ni mbilu leyi swi rhandzaka a a wu tise wu ri munyikelo wa Yehovha.” (Eks. 35:5) Muisrayele un’wana ni un’wana a a ta nyikela hi leswi a swi kotaka naswona munyikelo wun’wana ni wun’wana wa ku tirhandzela—ku nga khathariseki leswaku i yini kumbe wu fika kwihi—a wu ta tirhisiwa hi ndlela leyi faneleke leswaku ku hetisisiwa xikongomelo xa Xikwembu. Va angule njhani?

“Un’wana ni un’wana loyi mbilu yakwe yi n’wi susumeteke, ni un’wana ni un’wana loyi moya wakwe wu n’wi hlohloteleke” u nyikele hi ku tirhandzela, ‘un’wana ni un’wana loyi mbilu yakwe yi swi rhandzaka.’ Vavanuna ni vavasati va tise swilo swo endla ntirho wa Yehovha hi ku swi rhandza: swikhaviso swa swipereta, swingwavila swa tindleve, swingwavila, nsuku, silivhere, koporo, harani ya wasi, voya lebyi pendiweke byi va bya xivunguvungu, nguvu ya ribungwana, ntsembyana wo vevuka, voya bya mbuti, madzovo ya makhuna lama pendiweke ma va yo tshwuka, madzovo ya tintini, ntsandza wa munga, maribye lama tirhisiwaka eka swin’wetsin’wetsi, mafurha ya balsama ni mafurha. Hi ku famba ka nkarhi, “swilo a swi ringene ntirho hinkwawo lowu nga ta endliwa, a swi tale ku tlurisa.”—Eks. 35:21-24, 27-29; 36:7.

Leswi tsakiseke Yehovha swinene a hi swilo leswi nyikeriweke, kambe hi leswi vanhu va nyikeleke hi ku swi rhandza leswaku va seketela vugandzeri byo tenga. Va tlhele va susumeteleka ku nyikela hi nkarhi wa vona va tlhela va tirha. Rungula ra kona ri ri: “Hinkwavo vavasati va timbilu to tlhariha va swula hi mavoko.” “Vavasati hinkwavo lava timbilu ta vona a ti va susumeta hi vutlhari va swula voya bya mbuti.” Ku tlula kwalaho, Yehovha u nyike Bezalele ‘vutlhari, ku twisisa ni vutivi bya muxaka wun’wana ni wun’wana wa ntirho wa mavoko.’ Entiyisweni, Xikwembu xi nyike Bezalele na Oholiyabu vuswikoti lebyi faneleke byo endla ntirho hinkwawo lowu a va lerisiwe ku wu endla.—Eks. 35:25, 26, 30-35.

Loko Yehovha a kombele Vaisrayele leswaku va nyikela, a a tiyiseka swinene leswaku “un’wana ni un’wana la nga ni mbilu leyi swi rhandzaka” u ta seketela vugandzeri bya ntiyiso. Na yena u va katekise swinene vanhu lava nyikeleke hi ku swi rhandza hi ku va nyika nkongomiso ni ntsako lowukulu. Xisweswo, Yehovha u kombise leswaku loko a katekisa malandza yakwe lama nyikelaka hi ku swi rhandza, a nga tiyiseka leswaku a ku kayiveli swilo kumbe vuswikoti byo endla ku rhandza ka yena. (Ps. 34:9) Loko u ri karhi u tirhela Yehovha handle ka vutianakanyi, u ta ku katekisa hikwalaho ko nyikela hi ku swi rhandza.