1. Ha yini ku tekelela Yesu swi hi tshineta eka Yehovha?

HAKANYINGI hi ringeta ku tekelela munhu loyi hi rhandzaka vumunhu byakwe. Eka vanhu hinkwavo lava tshameke va hanya, hi fanele hi tekelela Yesu Kreste. Ha yini? Yesu u tshame a ku: “Loyi a ndzi voneke u vone na Tatana.” (Yohane 14:9) Yesu u vule leswi hikwalaho ka leswi a tekelelaka vumunhu bya Tata wakwe hi ku helela. Hikwalaho loko hi dyondza hi Yesu, hi dyondza hi Yehovha. Naswona loko hi tekelela Yesu, hi tshinela eka Yehovha, Munhu la tlakukeke swinene evuakweni hinkwabyo. Mawaku lunghelo ronghasi!

2, 3. (a) Ha yini Yehovha a hi hlamusele hi vuenti hi vutomi bya Yesu naswona i yini leswi Xikwembu xa hina xi languteleke leswaku hi swi endla? (b) Hi ta bula hi yini exihlokweni lexi ni lexi landzelaka?

² EBibeleni, Yehovha u hi hlamusele hi vuenti hi vutomi bya Yesu. Ha yini? Hikuva Xikwembu xa hina xi lava hi tiva N’wana wa xona leswaku hi ta n’wi tekelela swinene. (Hlaya 1 Petro 2:21.) EBibeleni, xikombiso lexi Yesu a hi vekeleke xona xi fanisiwa ni mikondzo. Xana sweswo swi vula yini? Yehovha u lava leswaku  hi landzela mikondzo ya N’wana wakwe, leswi vulaka ku tekelela hinkwaswo leswi Yesu a swi endleke. Entiyisweni, Yesu a a hetisekile, kutani Yehovha a nga langutelanga leswaku hi tekelela N’wana wakwe hi ku hetiseka. Ku ri na sweswo, Xikwembu xi lava leswaku hi endla leswi hi nga swi kotaka leswaku hi tekelela Yesu.

³ A hi kambisiseni timfanelo tin’wana ta Yesu letinene. Exihlokweni lexi, hi ta bula hi ku titsongahata ni ntwela-vusiwana wakwe. Exihlokweni lexi landzelaka, hi ta bula hi xivindzi ni ku twisisa kakwe. Hi ta hlamula swivutiso swinharhu malunghana ni mfanelo ha yin’we: Xana yi vula yini? Yesu u yi kombise njhani mfanelo yoleyo? Hi nga n’wi tekelela njhani?

4. Xana swi vula yini ku titsongahata?

⁴ I yini ku titsongahata? Vanhu vo tala lava titlakusaka va anakanya leswaku ku titsongahata i xikombiso xa ku tsana kumbe ku nga titshembi. Kambe xana sweswo i ntiyiso? Entiyisweni, leswaku hi titsongahata swi lava leswaku hi titshemba hi tlhela hi va ni xivindzi. Ku titsongahata i rito-fularha ra ku tikukumuxa ni ku tikurisa. Leswaku hi titsongahata, hi fanele hi rhanga hi va ni langutelo lerinene hi hina vini. Hi xikombiso, xihlamusela-marito xin’wana xa Bibele xi ri: “Ku titsongahata i ku tiva ndlela leyi hi nga va xiyimo xa le hansi ha yona emahlweni ka Xikwembu.” Nakambe, loko hi titsongahata, a hi nge titeki hi antswa ku tlula vanhu van’wana. (Varhoma 12:3) A swi olovi ku kombisa mfanelo leyi tanihi leswi hi nga hetisekangiki. Kambe hi nga dyondza ku titsongahata loko hi anakanyisisa hi vukulu bya Yehovha hi tlhela hi tekelela xikombiso xa Yesu.

5, 6. (a) I mani Mikayele ntsumi leyikulu? (b) Mikayele u wu kombise njhani moya wa ku titsongahata?

⁵ Yesu u swi kombise njhani leswaku wa titsongahata? N’wana wa Xikwembu a a titsongahata minkarhi hinkwayo, loko a ha ri ntsumi leyi nga ni matimba etilweni ni loko a ri munhu la hetisekeke laha misaveni. A hi kambisiseni swikombiso swi nga ri swingani.

⁶ Langutelo rakwe. Ebukwini ya Bibele ya Yudha, hi hlaya hi vutomi bya Yesu loko a nga si ta laha misaveni. (Hlaya Yudha 9.) Mikayele ntsumi leyikulu, ku nga Yesu u “ve ni njhekanjhekisano na Diyavulosi” naswona ‘u kanetane’ ni munhu yoloye wo homboloka “hi ntsumbu wa Muxe.” Endzhaku ka loko Muxe a file, Yehovha u lahle ntsumbu wakwe endhawini leyi a wu nga ta kuma hi munhu. (Deteronoma 34:5, 6) Kumbexana Diyavulosi a a lava ku ringa Vaisrayele leswaku va tirhisa ntsumbu wa Muxe evugandzerini bya mavunwa. Ku nga khathariseki xikongomelo xo biha lexi Diyavulosi a a ri na xona, hi xivindzi Mikayele u n’wi siverile. Buku yin’wana ya tinhlamuselo yi vula leswaku marito lama nge u “ve ni njhekanjhekisano” ni leri nge u ‘kanetane,’ ma tlhela ma tirhisiwa ku hlamusela ku “tenga” naswona ma nga ha vula leswaku “Mikayele ‘a nga n’wi pfumelelanga Diyavulosi’ ku teka ntsumbu wa Muxe.” Kambe, ntsumi leyi leyikulu a yi swi tiva leswaku a yi nga ri na vulawuri hinkwabyo. Kutani mhaka leyi yi yi siyele Yehovha, Muavanyisi  la Tlakukeke, loyi ku nga yena ntsena a nga ni mfanelo yo avanyisa Sathana. Hakunene Yesu u kombise moya wa ku titsongahata!

7. Yesu u swi kombise njhani leswaku wa titsongahata hi mavulavulelo ni hi swiendlo swakwe?

⁷ Loko Yesu a ha ri laha misaveni, u tlhele a kombisa ku titsongahata hi ndlela leyi a a vulavula ha yona ni hi swilo leswi a a swi endla. Mavulavulelo yakwe. Yesu a a nga lavi ku tikokela mahlo swi nga fanelanga. Ematshan’weni ya sweswo, a a lava leswaku ku vangama hinkwako ku ya eka Tata wakwe. (Marka 10:17, 18; Yohane 7:16) Yesu a nga si tshama a vulavula ni vadyondzisiwa vakwe hi ndlela leyi va endleke va titwa va ri swiphukuphuku kumbe va ri va xiyimo xa le hansi. Ku ri na sweswo, u va xiximile a tlhela a kombisa leswaku wa va tshemba hi ku va bumabumela hikwalaho ka timfanelo ta vona letinene. (Luka 22:31, 32;Yohane 1:47) Swiendlo swakwe. Yesu u hlawule ku hanya vutomi byo olova, a a nga ri na swilo swo tala leswi vonakaka. (Matewu 8:20) A a tiyimiserile ku endla ntirho wa xiyimo xa le hansi lowu van’wana a va nga swi lavi ku wu endla. (Yohane 13:3-15) U tlhele a veka xikombiso lexi hetisekeke xa ku titsongahata hi ku yingisa. (Hlaya Vafilipiya 2:5-8.) Ku hambana ni vanhu lava titlakusaka lava nga swi laviki ku yingisa van’wana, Yesu hi ku titsongahata u endle hinkwaswo leswi Yehovha a n’wi byeleke leswaku a swi endla, “ku ya fika eku feni.” Swi le rivaleni leswaku Yesu, N’wana wa munhu, a a ri ni “mbilu yo titsongahata.”—Matewu 11:29.

8, 9. Hi nga swi kombisa njhani leswaku ha titsongahata?

⁸ Hi nga ku tekelela njhani ku titsongahata ka Yesu? Langutelo ra hina. Loko hi titsongahata, hi kombisa leswaku ha swi tiva leswaku a hi na vulawuri hinkwabyo. Hikwalaho, ha swi tiva leswaku a hi na yona mfanelo yo avanyisa vanhu van’wana. A hi nge va xopaxopi kumbe hi kanakana swikongomelo swa vona. (Luka 6:37; Yakobo 4:12) Ku titsongahata ku hi pfuna leswaku hi papalata ku va lava “lulameke ku tlula mpimo.” Leswi swi vula leswaku a hi nge titeki hi antswa ku tlula lava nga riki na vuswikoti kumbe malunghelo yo fana ni lawa hi nga na wona. (Eklesiasta 7:16) Vakulu lava titsongahataka a va titeki va antswa ku tlula vamakwavo va vona va xinuna ni va xisati. Ematshan’weni ya sweswo, varisi lava lava nga ni rirhandzu va “teka van’wana va ri lava tlakukeke,” leswi vulaka leswaku va teka van’wana va ri va nkoka swinene ku va tlula.—Vafilipiya 2:3; Luka 9:48.

⁹ Anakanya hi W. J. Thorn, loyi a a ri mulanguteri la famba-fambaka ku sukela hi 1894. Endzhaku ka malembe yo tala, u nyikiwe ntirho wo khathalela tihuku le Kingdom Farm en’walungwini wa New York. Loko Makwerhu Thorn a vona onge a a fanele a endla ntirho wa nkoka swinene, a a tibyela a ku: “Wena ntshurinyana wa misava. Xana u na yini xo tinyungubyisa ha xona ke?” (Hlaya Esaya 40:12-15.) Hakunene a a titsongahata!

10. Hi nga swi kombisa njhani leswaku ha titsongahata hi mavulavulelo ni hi swiendlo swa hina?

 ¹⁰ Mavulavulelo ya hina. Loko hi titsongahata hakunene, swi ta vonaka hi ndlela leyi hi vulavulaka ha yona ni vanhu van’wana. (Luka 6:45) Loko hi vulavula na vona, a hi nge dzikisi mianakanyo eka malunghelo ya hina ni le ka swilo leswi hi swi endleke. (Swivuriso 27:2) Ematshan’weni ya sweswo, hi ta bumabumela vamakwerhu va xinuna ni va xisati hikwalaho ka swilo leswinene leswi va swi endlaka hi tlhela hi languta timfanelo letinene ni vuswikoti bya vona. (Swivuriso 15:23) Swiendlo swa hina. Vakreste lava titsongahataka a va ringeti ku va ni ndhuma kumbe ku va va nkoka emisaveni leyi. Ku ri na sweswo, va hlawula ku hanya vutomi byo olova, hambi ku ri ku endla ntirho wa xiyimo xa le hansi, leswaku va tirhela Yehovha hilaha va nga kotaka hakona. (1 Timotiya 6:6, 8) Xa nkoka swinene, hi nga kombisa leswaku ha titsongahata hi ku va lava yingisaka. Hi fanele hi titsongahata leswaku hi ta “[yingisa] lava rhangelaka” evandlheni hi tlhela hi amukela ni ku landzela nkongomiso wa nhlengeletano ya Yehovha.—Vaheveru 13:17.

11. Swi vula yini ku va ni ntwela-vusiwana?

¹¹ Ntwela-vusiwana wu fambisana ni rirhandzu. Matsalwa ma vula leswaku Yehovha na Yesu va kombisa ntwela-vusiwana lowukulu ni rirhandzu. (Luka 1:78; 2 Vakorinto 1:3; Vafilipiya 1:8) Malunghana ni leswi Matsalwa ma swi vulaka hi ntwela-vusiwana, buku yin’wana leyi hlamuselaka Bibele yi ri: “Ku kombisa ntwela-vusiwana a swi vuli ku twela lava lavaka ku pfuniwa ntsena. Kambe swi vula ku khathala swinene ni ku pfuneta hi ku teka goza leri nga ta antswisa vutomi bya vanhu van’wana.” Ntwela-vusiwana hi wona wu susumetaka munhu ku endla tano. Munhu loyi a nga ni ntwela-vusiwana u susumeteleka ku antswisa vutomi bya vanhu van’wana.

12. I yini leswi kombisaka leswaku Yesu u twele vanhu vusiwana naswona ntwela-vusiwana wakwe wu n’wi susumetele ku endla yini?

¹² Yesu u wu kombise njhani ntwela-vusiwana? Ku khumbeka ka yena ni swiendlo swa yena swa ntwela-vusiwana. Yesu u va twele vusiwana vanhu van’wana. Loko a vona munghana wakwe Mariya ni van’wana va ri karhi va rila hileswi Lazaro a a file, Yesu u rile na vona. (Hlaya Yohane 11:32-35.) Kutani, ntwela-vusiwana lowu endleke leswaku a pfuxa n’wana wa noni wa jaha wu n’wi susumetele ku pfuxa Lazaro. (Luka 7:11-15; Yohane 11:38-44) Ntwela-vusiwana lowu a wu kombiseke wu endle leswaku Lazaro a kuma lunghelo ro ya hanya etilweni. Emahlweninyana ka kwalaho, Yesu u wu ‘twele vusiwana’ ntshungu lowu wu teke eka yena. Ntwela-vusiwana wakwe wu n’wi susumetele “ku wu dyondzisa swilo swo tala.” (Marka 6:34) Sweswo swi endle leswaku vutomi bya lava landzeleke tidyondzo takwe byi cinca. Yesu a a nga tweli vanhu ntsena. Ntwela-vusiwana wakwe wu tlhele wu n’wi susumetela ku pfuna vanhu lava a va lava ku pfuniwa.—Matewu 15:32-38; 20:29-34; Marka 1:40-42.

13. Yesu u vulavule njhani ni van’wana hi ndlela ya ntwela-vusiwana? (Vona xifaniso lexi nga eku sunguleni ka xihloko lexi.)

¹³ Marito yakwe ya ntwela-vusiwana. Ntwela-vusiwana wa Yesu wu n’wi susumetele ku vulavula ni vanhu van’wana hi ndlela ya musa, ngopfu-ngopfu lava tshikileriweke. Muapostola Matewu u tshahe marito lawa Esaya a ma vuleke malunghana na Yesu. Esaya u te: “Ku hava rihlanga leri khinyekeke leri  a nga ta ri pfotlosa; naswona rivoni ra ngoti leri ketimelaka a nge ri timi.” (Esaya 42:3; Matewu 12:20) Xana marito wolawo a ma vula yini? Yesu a a nga va khomi hi ndlela yo biha vanhu van’wana kumbe ku va xanisa. Ku ri na sweswo, u vulavule na vona hi ndlela leyi va phyuphyiseke. U chumayele rungula leri nyikaka ntshembo eka “lava vavisekeke mbilu.” (Esaya 61:1) U rhambe vanhu lava a va ‘tirha hi matimba ni lava a va tikeriwa’ leswaku va ta eka yena va ta ‘phyuphyisiwa.’ (Matewu 11:28-30) U tshembise vadyondzisiwa vakwe leswaku Xikwembu xa khathala hi mugandzeri un’wana ni un’wana wa xona, ku katsa ni “lavatsongo” kumbe lava misava a yi va teka va nga ri va nkoka.—Matewu 18:12-14; Luka 12:6, 7.

14. Hi nga swi kombisa njhani leswaku ha khumbeka hi van’wana?

¹⁴ Hi nga wu tekelela njhani ntwela-vusiwana wa Yesu? Ku khumbeka ka hina. Bibele yi hi byela leswaku hi tikarhatela ku kombisa “xinakulobye lexikulu xa tintswalo,” hambiloko swi nga tiendlekeli hi ntumbuluko eka hina. Sweswo swi fambisana ni “vumunhu lebyintshwa” lebyi Yehovha a languteleke leswaku Vakreste hinkwavo va byi ambala. (Hlaya Vakolosa 3:9, 10, 12.) U nga swi kombisa njhani leswaku wa khumbeka? Bibele yi ri: “Ndlandlamukani.” (2 Vakorinto 6:11-13) Yingiserisisa loko munhu un’wana a ku byela ndlela leyi a titwaka ha yona ni leswi n’wi vilerisaka. (Yakobo 1:19) Anakanyisisa hi mhaka yoleyo kutani u tivutisa: ‘Loko a ndzi ri exiyin’weni lexi a nga eka xona, a ndzi ta titwa njhani? I yini leswi a ndzi ta swi lava?’—1 Petro 3:8.

15. I yini leswi hi nga swi endlaka leswaku hi pfuna lava nga ha vaka va feriwile kumbe lava xanisekaka?

¹⁵ Swiendlo swa hina swa ntwela-vusiwana. Ntwela-vusiwana wu hi susumetela ku pfuna van’wana, ngopfu-ngopfu lava feriweke kumbe lava xanisekaka. Hi nga va pfuna njhani? Varhoma 12:15 yi ri: “Mi rila ni vanhu lava rilaka.” Minkarhi yo tala, vanhu va lava ku chaveleriwa ku tlula ku tlhantlheriwa swiphiqo swa vona. Va lava munghana loyi a khathalaka hi vona ni loyi a va yingiselaka. Makwerhu un’wana wa xisati lo yi a chaveleriweke hi vamakwerhu va xinuna ni va xisati endzhaku ka loko n’wana wakwe wa nhwanyana a file u ri, “Ndzi swi tlangerile loko vamakwerhu va tile va ta rila na mina.” Hi nga tlhela hi kombisa ntwela-vusiwana  hi ku endla swilo leswi nga ta pfuna van’wana. Kumbexana ku ni noni leyi lavaka ku lunghiseriwa swo karhi endlwini ya yona. Kumbe swi nga ha endleka ku ri ni Mukreste la dyuhaleke loyi a lavaka ku yisiwa eminhlanganweni, ensin’wini kumbe eka dokodela. Hambi ku ri nchumu wutsongo lowu kombisaka musa wu nga antswisa vutomi bya munhu. (1 Yohane 3:17, 18) Xa nkoka swinene, hi nga kombisa van’wana ntwela-vusiwana hi ku endla leswi hi nga swi kotaka leswaku hi va chumayela mahungu lamanene. Leyi hi yona ndlela leyinene yo antswisa vutomi bya vanhu va timbilu letinene!

16. Hi nga va khutaza njhani vanhu lava karhatekeke?

¹⁶ Marito ya hina ya ntwela-vusiwana. Ku khumbeka ka hina ku ta hi susumetela ku “[vulavula] hi ku chavelela eka mimoya-xiviri leyi karhatekeke.” (1 Vatesalonika 5:14) Hi nga va khutaza njhani? Hi nga va byela ndlela leyi hi khathalaka ha yona ha vona. Hi nga va bumabumela hi tlhela hi va pfuna va vona timfanelo ta vona letinene ni vuswikoti bya vona. Hi nga va tsundzuxa leswaku Yehovha u va pfunile leswaku va kuma ntiyiso, kutani i va risima eka yena. (Yohane 6:44) Hi nga va tiyisekisa leswaku Yehovha wa khathala swinene hi malandza yakwe lama “tshovekeke mbilu” kumbe lama “pfotlokeke emoyeni.” (Pisalema 34:18) Marito ya hina ya ntwela-vusiwana ma nga va phyuphyisa swinene lava lavaka ku chaveleriwa.—Swivuriso 16:24.

17, 18. (a) Yehovha u langutele leswaku vakulu va ti khoma njhani tinyimpfu ta yena? (b) Hi ta bula hi yini exihlokweni lexi landzelaka?

¹⁷ Vakulu, Yehovha u langutele leswaku mi va ni ntwela-vusiwana eka tinyimpfu takwe. (Mintirho 20:28, 29) Tsundzukani leswaku i vutihlamuleri bya n’wina ku dyondzisa, ku khutaza ni ku phyuphyisa tinyimpfu takwe. (Esaya 32:1, 2; 1 Petro 5:2-4) Hikwalaho nkulu loyi a nga ni ntwela-vusiwana lowukulu a nge ringeti ku lawula vamakwavo, a va vekela milawu kumbe a va endla va titwa va ri ni nandzu loko va tsandzeka ku endla leswi engetelekeke. Ematshan’weni ya sweswo, nkulu u lava leswaku vamakwavo vakwe va xinuna ni va xisati va tsaka naswona wa tshemba leswaku ndlela leyi va rhandzaka Yehovha ha yona yi ta va susumetela ku n’wi tirhela hi mbilu hinkwayo.—Matewu 22:37.

¹⁸ Loko hi ri karhi hi anakanyisisa hi ku titsongahata ni ntwela-vusiwana wa Yesu, hi ta susumeteleka ku n’wi tekelela. Exihlokweni lexi landzelaka, hi ta bula hi ndlela leyi hi nga xi tekelelaka ha yona xivindzi ni ku twisisa ka Yesu.