1, 2. (a) Hi swihi swifaniso leswi Yesu a swi byeleke vanghana vakwe lavakulu? (Vona xifaniso lexi nga eku sunguleni ka xihloko lexi.) (b) I yini leswi hi faneleke hi swi tiva hi xifaniso xa tinyimpfu ni timbuti?

YESU a a vulavula ni vanghana vakwe lavakulu, ku nga Petro, Andriya, Yakobo na Yohane malunghana ni nchumu lowu tsakisaka swinene. Endzhaku ka loko a va byele hi xifaniso xa hlonga ro tshembeka ni ro tlhariha, xa vanhwana va khume ni xa titalenta, Yesu u byele vanghana vakwe xifaniso xin’wana. Eka xona u vulavule hi nkarhi lowu “N’wana wa munhu” a nga ta avanyisa “matiko hinkwawo” ha wona. U vule leswaku “N’wana wa munhu” u ta hambanisa vanhu va va mintlawa yimbirhi, wun’wana wu va wa tinyimpfu kasi lowun’wana wu va wa timbuti. Nakambe u vulavule hi ntlawa wa vunharhu lowu nga wa nkoka, ku nga ‘vamakwavo’ va Hosi.—Hlaya Matewu 25:31-46.

² Ku fana ni vaapostola, malandza ya Yehovha ya le nkarhini wa hina na wona ma tsakisiwa hi xifaniso lexi hikuva xi khumba  vutomi bya vanhu. Yesu u vule leswaku van’wana va ta kuma vutomi lebyi nga heriki kasi van’wana va ta lovisiwa. Hi yona mhaka swi ri swa nkoka swinene ku tiva leswi xifaniso lexi xi vulaka swona ni leswi hi faneleke hi swi endla leswaku hi kuma vutomi lebyi nga heriki. Kutani exihlokweni lexi, hi ta hlamula swivutiso leswi landzelaka: Yehovha u hi pfune njhani leswaku hi twisisa xifaniso lexi? Hi swi tivisa ku yini leswaku xifaniso lexi xi vulavula ngopfu hi ntirho wo chumayela? I vamani lava faneleke va chumayela? Naswona ha yini swi ri swa nkoka leswaku vanhu va tshembeka eka “Hosi” ni le ka ‘vamakwavo’ va yona sweswi?

3, 4. (a) I yini leswi hi faneleke hi swi tiva leswaku hi kota ku twisisa xifaniso lexi? (b) Hi 1881, Xihondzo xo Rindza xi xi hlamusele njhani xifaniso lexi?

³ Leswaku hi twisisa leswi xifaniso xa tinyimpfu ni timbuti xi vulaka swona, hi fanele hi tiva leswaku (1) i mani “N’wana wa munhu” kumbe “Hosi,” i vamani tinyimpfu ni timbuti ni leswaku i vamani ‘vamakwavo’ va Hosi? (2) “N’wana wa munhu” u ta ti hambanisa kumbe ku ti avanyisa rini tinyimpfu ni timbuti? ni leswaku (3) ha yini van’wana va vitaniwa tinyimpfu kasi van’wana va vitaniwa timbuti?

⁴ Hi 1881, Xihondzo xo Rindza xi vule leswaku “N’wana wa munhu” kumbe “Hosi” i Yesu. Naswona xi hlamusele leswaku ‘vamakwavo’ va Hosi a ku nga ri lava nga ta fuma na Yesu etilweni ntsena kambe ni vanhu hinkwavo lava nga ta hanya laha misaveni loko se va hetisekile. Xihondzo xo Rindza xexo xi vule leswaku vanhu va ta hambanisiwa hi nkarhi wa Mfumo wa Kreste wa Gidi ra Malembe ni leswaku lava kombiseke rirhandzu ku fana ni Xikwembu eka hinkwaswo leswi va swi endleke va ta vitaniwa tinyimpfu.

5. Hi 1923, vanhu va Xikwembu a va xi twisisa njhani xifaniso xa tinyimpfu ni timbuti?

⁵ Endzhakunyana, Yehovha u pfune vanhu vakwe leswaku va xi twisisa kahle xifaniso lexi. Hi 1923, Xihondzo xo Rindza xa October 15, xi vule leswaku “N’wana wa munhu” i Yesu. Kambe xi tirhise tindzimana ta le Bibeleni ku hlamusela leswaku ‘vamakwavo’ lava ku vulavuriweke ha vona exifanisweni va yimela vanhu lava nga ta fuma na Yesu ntsena ni leswaku hinkwavo va ta va va ri etilweni hi nkarhi wa Mfumo wa Gidi ra Malembe. Xi tlhele xi vula leswaku tinyimpfu i vanhu lava nga ta hanya laha misaveni va fumiwa hi Yesu ni vamakwavo vakwe. Naswona leswi exifanisweni xexo ku vuriweke leswaku vanhu volavo va pfune vamakwavo va Hosi, ku hambanisa kumbe ku avanyisa ku fanele ku endleka loko vamakwavo volavo va Yesu lava totiweke va ha ri laha misaveni, Mfumo wa Gidi ra Malembe wu nga si sungula. Xihloko xexo xi tlhele xi vula leswaku tinyimpfu ku ta va lava pfumelaka eka Yesu ni lava tshembaka leswaku Mfumo wu ta tisa vutomi byo antswa.

6. Hi 1995, ndlela leyi a hi xi twisisa ha yona xifaniso xa tinyimpfu ni timbuti yi cince njhani?

⁶ Ku ringana malembe yo tala a hi anakanya leswaku vanhu a va avanyisiwa loko ku endliwa ntirho wo chumayela enkarhini lowu wa makumu. Loko va amukela rungula ra hina, a hi ku i tinyimpfu naswona loko va nga ri amukeli a hi ku i timbuti. Kambe hi 1995 ndlela leyi a hi xi twisisa ha yona xifaniso lexi yi cincile. Xihondzo xo Rindza xexo xi ringanise Matewu 24:29-31 (yi hlaye) na Matewu 25: 31, 32 (yi hlaye), kutani xi hlamusela leswaku Yesu u ta avanyisa vanhu hi nkarhi wa nhlomulo lowukulu loko N’wana wa munhu “a fika hi ku vangama kakwe.” *—Vona nhlamuselo ya le hansi.

7. Xi vula yini xifaniso xa tinyimpfu ni timbuti?

⁷ Sweswi hi xi twisisa kahle xifaniso xa tinyimpfu ni timbuti. Ha swi tiva leswaku “N’wana wa munhu” kumbe “Hosi” i Yesu. ‘Vamakwavo’ va Hosi hi lava totiweke hi moya lowo kwetsima naswona va nga ta fuma na Yesu etilweni. (Varhoma 8:16, 17) “Tinyimpfu” ni “timbuti” i vanhu lava humaka eka matiko hinkwawo. Va ta avanyisiwa loko nhlomulo lowukulu wu ri kusuhi ni ku hela, lowu nga ta sungula ku nga ri khale. Naswona ha swi tiva leswaku Yesu u ta avanyisa vanhu hi ku ya hi ndlela leyi va va khomeke ha yona vatotiwa lava ha riki kona laha misaveni. Ha tlangela swinene leswi Yehovha a hi pfuneke emalembeni lama hundzeke leswaku hi twisisa xifaniso lexi ni swin’wana leswi nga eka Matewu tindzima 24 na 25!

8, 9. Ha yini Yesu a hlamusele tinyimpfu tanihi leti “lulameke”?

⁸ Yesu a nga ma tirhisanga marito lama nge “chumayela” kumbe “ntirho wo chumayela” exifanisweni xa tinyimpfu ni timbuti. Kutani hi swi tivisa ku yini leswaku xifaniso lexi xi hi dyondzisa leswaku ntirho wo chumayela i wa nkoka swinene?

⁹ Leswaku hi kuma nhlamulo, hi fanele hi rhanga hi tsundzuka leswaku Yesu a a dyondzisa dyondzo yo karhi hi ku tirhisa xifaniso lexi. A a nga vulavuli hi tinyimpfu ni timbuti ta xiviri. Hilaha ku fanaka, a a nga vuli swona leswaku munhu un’wana ni un’wana loyi a nga ta avanyisiwa tanihi nyimpfu u fanele a nyika vatotiwa swakudya ni swiambalo, a va khathalela loko va vabya kumbe a va endzela ekhotsweni. Yesu u hlamusele tinyimpfu tanihi leti “lulameke” hikuva ti teka vatotiwa tanihi vamakwavo vakwe naswona ta tshembeka eka vatotiwa emasikwini lawa lama tikaka ya makumu.—Matewu 10:40-42; 25:40, 46; 2 Timotiya 3:1-5.

10. Tinyimpfu ti nga va pfuna njhani vamakwavo va Kreste?

¹⁰ Loko Yesu a vulavula hi xifaniso xa tinyimpfu ni timbuti, a a vulavula hi leswi a swi ta humelela enkarhini wa makumu. (Matewu 24:3) Hi xikombiso, u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke.” (Matewu 24:14) Naswona emahlweninyana ka ku va a vulavula hi tinyimpfu ni timbuti, u vulavule hi xifaniso xa titalenta. Yesu u vulavule hi xifaniso lexi leswaku a dyondzisa vatotiwa leswaku va fanele va tirha hi matimba entirhweni wo chumayela. Kambe i vatsongo lava saleke  laha misaveni naswona ku ni ntirho wo tala lowu faneleke wu endliwa! Vatotiwa va byeriwe leswaku va chumayela “ematikweni hinkwawo” makumu ma nga si fika. Hilaha hi swi xiyeke hakona exifanisweni xa tinyimpfu ni timbuti, “tinyimpfu” ti pfuna vamakwavo va Yesu. Naswona ndlela ya nkoka leyi va nga endlaka sweswo ha yona i ku pfuna vamakwavo va Yesu hi ntirho wo chumayela. Kambe xana swi enerile ku nyikela hi mali ntsena leswaku ti seketela ntirho lowu kumbe ku va khutaza leswaku va endla ntirho wo chumayela?

11. Hi xihi xivutiso lexi van’wana va nga ha xi vutisaka naswona ha yini?

¹¹ Namuntlha ku ni vadyondzisiwa va Yesu va 8 000 000 naswona vo tala va vona a hi vatotiwa. Yesu a nga va nyikanga titalenta. U ti nyike vamakwavo vakwe lava totiweke. (Matewu 25:14-18) Kutani van’wana va nga ha vutisa va ku, ‘Loko Yesu a nga va nyikanga titalenta, xana va fanele va chumayela?’ Ina. A hi voneni leswaku ha yini hi vula tano.

12. Hi dyondza yini eka marito ya Yesu lama kumekaka eka Matewu 28:19, 20?

¹² Yesu u lerise vadyondzisiwa vakwe hinkwavo leswaku va chumayela. Endzhaku ka loko Yesu a pfuxiwile, u byele valandzeri vakwe leswaku va “endla vanhu . . . vadyondzisiwa” va tlhela va va dyondzisa ku hlayisa “swilo hinkwaswo” leswi a swi leriseke. Kutani vadyondzisiwa lava na vona a va fanele va yingisa xileriso xa Yesu xo chumayela. (Hlaya Matewu 28:19, 20.) Swi le rivaleni leswaku hinkwerhu ka hina hi fanele hi chumayela, ku nga khathariseki leswaku hi ni ntshembo wo ya hanya etilweni kumbe laha misaveni.—Mintirho 10:42.

13. Hi dyondza yini eka xivono lexi Yohane a xi voneke?

¹³ Ebukwini ya Nhlavutelo, hi dyondza leswaku ntirho wo chumayela a wu ta endliwa hi vatotiwa ni vanhu van’wana. Yesu u kombe muapostola Yohane xivono xa “mutekiwa” loyi a rhambaka vanhu leswaku va ta va ta nwa mati lama nyikaka vutomi. Mutekiwa u yimela vatotiwa va 144 000 lava nga ta fuma na Yesu etilweni. (Nhlavutelo 14:1, 3; 22:17) Mati ma yimela gandzelo ra Yesu ra nkutsulo leri nga ta pfuna vanhu leswaku va hanya va nga ha dyohi naswona va nga ha fi. (Matewu 20:28; Yohane 3:16; 1 Yohane 4:9, 10) Vatotiwa va dyondzisa vanhu hi ku hiseka malunghana ni nkutsulo ni ndlela leyi wu nga va vuyerisaka ha yona. (1 Vakorinto 1:23) Kambe xivono xexo xi vulavula hi ntlawa wun’wana wa vanhu lava nga riki vatotiwa kambe lava nga ni ntshembo wo hanya laha misaveni. Na vona va lerisiwe ku byela vanhu va ku: “Tana!” Naswona va yingisa xileriso xexo hi ku dyondzisa van’wana mahungu lamanene. Kutani xivono lexi xi kombisa leswaku hinkwavo lava amukelaka rungula ra mahungu lamanene va fanele va chumayela van’wana.

14. Hi yihi ndlela leyi hi yingisaka “nawu wa Kreste” ha yona?

 ¹⁴ Hinkwavo lava yingisaka “nawu wa Kreste” va fanele va chumayela. (Vagalatiya 6:2) Yehovha u langutele leswaku hinkwavo lava n’wi gandzelaka va yingisa milawu leyi fanaka. Enkarhini lowu hundzeke, a a langutele leswaku Vaisrayele ni vanhu vambe lava a va tshama na vona va yingisa milawu yakwe. (Eksoda 12:49; Levhitika 24:22) Entiyisweni, namuntlha a hi boheki ku yingisa milawu hinkwayo leyi a yi nyikiwe Vaisrayele. Ematshan’weni ya sweswo, hi fanele hi yingisa “nawu wa Kreste” ku nga khathariseki leswaku hi vatotiwa kumbe a hi vatotiwa. Nchumu wun’wana wa nkoka swinene lowu Yesu a hi dyondziseke wona i ku va ni rirhandzu. (Yohane 13:35; Yakobo 2:8) Hi fanele hi rhandza Yehovha, Yesu ni vanhu. Naswona ndlela leyinene leyi hi nga kombisaka rirhandzu rolero ha yona i ku byela vanhu van’wana mahungu lamanene ya Mfumo.—Yohane 15:10; Mintirho 1:8.

15. Ha yini hi nga vulaka leswaku Yesu u lerise vadyondzisiwa vakwe hinkwavo leswaku va chumayela?

¹⁵ Leswi Yesu a swi vuleke eka vadyondzisiwa vakwe va nga ri vangani minkarhi yin’wana swi nga khumba vadyondzisiwa vo tala. Hi xikombiso, Yesu u endle ntwanano ni vadyondzisiwa vakwe va 11 a tlhela a va tshembisa leswaku va ta fuma eMfun’weni wakwe. Kambe i vanhu va 144 000 va nga ta fuma na yena. (Luka 22:29, 30; Nhlavutelo 5:10; 7:4-8) Naswona endzhaku ka loko Yesu a pfuxiwile eku feni, u lerise vadyondzisiwa vakwe va nga ri vangani ntsena leswaku va chumayela.  (Mintirho 10:40-42; 1 Vakorinto 15:6) Kambe vadyondzisiwa hinkwavo va Yesu va le nkarhini wakwe va yingise xileriso xexo. (Mintirho 8:4; 1 Petro 1:8) Ninamuntlha ha swi tiva leswaku hi fanele hi chumayela, hambiloko Yesu a nga byelanga un’wana ni un’wana wa hina hi ku kongoma leswaku hi endla ntirho lowu. Entiyisweni, hina hi endlaka ntirho lowu wo chumayela hi vanhu va 8 000 000. Ha swi tiva leswaku loko hi chumayela, hi kombisa leswaku hi ni ripfumelo hakunene eka Yesu.—Yakobo 2:18.

16-18. Hi nga va pfuna njhani vamakwavo va Kreste hi ku tshembeka naswona ha yini hi fanele hi endla tano sweswi?

¹⁶ Sathana u le ku lweni swinene ni vamakwavo va Kreste lava totiweke lava ha riki kona laha misaveni naswona wa swi tiva leswaku u salele hi “nkarhi wo koma.” (Nhlavutelo 12:9, 12, 17) Kambe ku nga khathariseki minhlaselo ya Sathana, vatotiwa va ya emahlweni va rhangela entirhweni wo chumayela naswona vanhu vo tala swinene va twa mahungu lamanene. Swi le rivaleni leswaku Yesu u ni vatotiwa naswona wa va kongomisa.—Matewu 28:20.

¹⁷ Hi swi teka ku ri lunghelo ku pfuna vamakwavo va Kreste hi ku chumayela. Hi tlhela hi va pfuna hi ku nyikela hi mali ni hi ku tirha hi matimba eku akeni ka Tiholo ta Mfumo, Tiholo ta Tinhlengeletano ni tihofisi ta marhavi. Loko hi va yingisa hi mbilu hinkwayo vakulu ni vamakwerhu van’wana lava vekiweke hi “hlonga ro tshembeka ni ro tlhariha,” hi kombisa leswaku hi lava ku pfuna vamakwavo va Kreste.—Matewu 24:45-47; Vaheveru 13:17.

¹⁸ Ku nga ri khale vatotiwa lava saleke va ta funghiwa ro hetelela. Endzhaku ka sweswo tintsumi ti ta tshika “tinhla ta mune ta misava” kutani nhlomulo lowukulu wu ta sungula. (Nhlavutelo 7:1-3) Emahlweni ko va Armagedoni yi sungula, Yesu u ta teka vatotiwa a va yisa etilweni. (Matewu 13:41-43) Hikwalaho loko hi lava ku avanyisiwa tanihi tinyimpfu loko Yesu a fika, lowu i nkarhi wa leswaku hi tshembeka eka vamakwavo va Kreste lava totiweke.