1. Ha yini hi fanele hi hlayisa vuxaka bya hina na Yehovha byi ri lebyi tiyeke?

LOKO u ri Mbhoni ya Yehovha leyi khuvuriweke, u ni nchumu wa nkoka swinene. U ni vuxaka na Yehovha. Kambe vuxaka byolebyo bya hlaseriwa hi misava ya Sathana naswona byi nga tlhela byi tsanisiwa hi ku nga hetiseki ka hina. Hi yona mhaka hinkwerhu hi faneleke hi hlayisa vuxaka bya hina na Yehovha byi ri lebyi tiyeke hilaha hi nga kotaka hakona.

2. (a) Swi vula yini ku va ni vuxaka ni munhu un’wana? (Vona nhlamuselo ya le hansi.) (b) Hi nga byi tiyisa njhani vuxaka bya hina na Yehovha?

² Xana Yehovha i wa xiviri eka wena? Xana u n’wi teka tanihi Munghana wa wena? Xana u nga tsakela leswaku vuxaka bya wena na yena byi va lebyi tiyeke? Yakobo 4:8 yi ku byela leswi u faneleke u swi endla: ‘Tshinela eka Xikwembu, kutani xi ta tshinela eka wena.’ Vuxaka bya wena na Yehovha byi khumba wena na Yehovha. * (Vona nhlamuselo ya le hansi.) Loko u tshinela eka  Yehovha na yena u ta tshinela eka wena. Loko u ya u endla tano, u ta ya a va wa xiviri eka wena naswona vuxaka bya wena na yena byi ta kula swinene, lerova u ta titwa hi ndlela leyi Yesu a titweke ha yona loko a ku: “Loyi a ndzi rhumeke i wa xiviri” a tlhela a ku, “mina ndza n’wi tiva.” (Yohane 7:28, 29) Kambe hi swihi swilo swin’wana leswi u nga swi endlaka leswaku u tshinela eka Yehovha?

3. Hi nga vulavurisana njhani na Yehovha?

³ Loko u lava ku tshinela eka Yehovha, i swa nkoka swinene leswaku wena na Yehovha mi vulavurisana nkarhi ni nkarhi. Kambe swi nga kotekisa ku yini sweswo? Anakanya hi ndlela leyi wena ni munghana wa wena loyi a tshamaka ekule mi nga vulavurisanaka ha yona. Mi nga tsalelana mi tlhela mi vulavurisana hi riqingho nkarhi ni nkarhi. U vulavula na Yehovha loko u khongela eka yena nkarhi ni nkarhi. (Hlaya Pisalema 142:2.) Kambe u nga n’wi pfumelela njhani Yehovha leswaku a vulavula na wena? Hi ku va nkarhi ni nkarhi u hlaya rito rakwe, ku nga Bibele u tlhela u anakanyisisa hi leswi u swi hlayeke. (Hlaya Esaya 30:20, 21.) A hi voneni ndlela leyi ku vulavurisana exikarhi ka wena na Yehovha ku nga tiyisaka vuxaka bya wena na yena ha yona ku tlhela ku endla leswaku a va Munghana wa wena wa xiviri.

4, 5. Yehovha u vulavula njhani na wena loko u dyondza Bibele? Nyika xikombiso.

⁴ Ha swi tiva leswaku Bibele i rungula leri humaka eka Xikwembu leri yaka eka vanhu hinkwavo. Kambe, xana Bibele yi nga ku pfuna leswaku u tshinela eka Yehovha? Ina! Loko nkarhi ni nkarhi u hlaya Bibele, dzikisa mianakanyo eka ndlela leyi u titwaka ha yona hi leswi u swi hlayaka. Nakambe anakanyisisa hi ndlela leyi u nga swi tirhisaka ha yona leswi u swi dyondzeke. Loko u endla tano, u pfumelela Yehovha leswaku a vulavula na wena. Yena u va Munghana lonkulu loyi a ku pfunaka naswona u ta tshinela swinene eka yena.—Vaheveru 4:12; Yakobo 1:23-25.

⁵ Hi xikombiso, u titwa njhani loko u hlaya marito ya Yesu lama nge: “Tshikani ku tihlayisela xuma emisaveni”? Loko u tikarhatela ku rhangisa Yehovha evuton’wini bya wena u ta swi vona leswaku wa tsaka hi wena. Kambe u nga ha hlaya marito ya Yesu ivi u xiya leswaku u fanele u olovisa vutomi bya wena kutani u dzikisa mianakanyo ya wena eka ku tirhela Xikwembu.  Loko u titwa hi ndlela yoleyo, Yehovha u le ku ku pfuneni leswaku u twisisa leswi u nga swi endlaka leswaku u tshinela eka yena.—Matewu 6:19, 20.

6, 7. (a) Loko hi dyondza Bibele, ku endleka yini hi ndlela leyi hi rhandzaka Yehovha ha yona ni ndlela leyi a hi rhandzaka ha yona? (b) Loko hi dyondza Bibele ku fanele ku va xihi xikongomelo xa hina lexikulu?

⁶ I ntiyiso leswaku loko hi dyondza Bibele, hi dyondza hi ku cinca loku hi nga ku endlaka leswaku hi tirhela Yehovha hi ndlela yo antswa. Kambe hi tlhela hi dyondza hi swilo leswinene leswi a swi endlaka ni hi vumunhu byakwe lebyi rhandzekaka, lebyi endlaka leswaku hi n’wi rhandza ngopfu. Nakambe loko ndlela leyi hi n’wi rhandzaka ha yona yi kula, na yena u ta ya a hi rhandza swinene naswona vuxaka bya hina na yena byi ta tiya.—Hlaya 1 Vakorinto 8:3.

⁷ Loko hi lava ku tshinela eka Yehovha, i swa nkoka leswaku hi dyondza Bibele hi xikongomelo lexinene. Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Hi nga dyondza swilo swo tala leswintshwa ni leswi tsakisaka loko hi hlaya Bibele, kambe xikongomelo xa hina lexikulu ku fanele ku va ku lava ku tiva Yehovha ku antswa tanihi Munhu.—Hlaya Eksoda 33:13; Pisalema 25:4.

8. (a) Van’wana va nga ha anakanya yini malunghana ni leswi Yehovha a swi endleke eka Hosi Azariya? (b) Loko u tiva Yehovha, u ta titwa njhani hi leswi a swi endlaka?

⁸ Loko hi tiva Yehovha tanihi Munghana wa hina lonkulu, a hi nge vileli loko Bibele minkarhi yin’wana yi nga hlamuseli leswi endleke a endla swilo hi ndlela yo karhi. Hi xikombiso, loko Azariya a ri hosi ya Yuda, vanhu a va gandzela swikwembu swa mavunwa. Azariya a nga swi gandzelanga. “U hambete a endla leswi lulameke ematihlweni ya Yehovha.” (2 Tihosi 15:1-5) Kambe Yehovha u xupule Azariya hi vuvabyi bya nhlokonho. Ha yini? Rungula leri a ri hlamuseli xivangelo xa kona. Xana u titwa njhani hi leswi Yehovha a swi endleke? Xana swa ku vilerisa swi tlhela swi ku endla u vona onge leswi Yehovha a swi endleke a hi swinene hileswi a xupuleke Azariya handle ka xivangelo lexi twalaka? Doo! Loko u n’wi tiva kahle Yehovha, wa swi tiva leswaku minkarhi hinkwayo u tshinya hi ndlela leyinene. Minkarhi hinkwayo u tshinya “hi mpimo lowu faneleke.” (Yeremiya 30:11) Hikwalaho, hambiloko u nga ha va u nga swi tivi leswaku ha yini Yehovha a xupule Azariya, u nga tiyiseka leswaku Yehovha u endle leswi a a fanele a swi endla.

9. Hi byihi vuxokoxoko lebyi hi pfunaka ku twisisa xivangelo lexi endleke Yehovha a xupula Azariya hi vuvabyi bya nhlokonho?

⁹ Bibele yi hi hlamusela vuxokoxoko lebyi engetelekeke malunghana ni vutomi bya Hosi Azariya, loyi nakambe a a tiviwa tanihi Hosi Uzhiya. (2 Tihosi 15:7, 32) Rungula leri nga eka 2 Tikronika 26:3-5, 16-21 ri vula leswaku u endle “leswi lulameke ematihlweni ya Yehovha.” Kambe ri tlhela ri vula leswaku hi ku famba ka nkarhi ‘mbilu yakwe yi titlakusile kukondza a vanga ku onhaka.’ Hosi leyi yi ringete ku endla ntirho lowu a wu fanele wu endliwa hi vaprista ntsena. Vaprista va 81 va yi byerile leswaku leswi a yi swi endla a swi hoxile naswona va ringete ku yi tshikisa. Yi angule njhani? Leswi se a yi tikukumuxa yi va hlundzukerile. Rungula leri leri engetelekeke ri hi pfuna ku twisisa xivangelo lexi endleke Yehovha a xupula hosi leyi hi vuvabyi bya nhlokonho.

10. Ha yini swi nga bohi leswaku hi tiva swivangelo swa swilo hinkwaswo leswi Yehovha a swi endlaka? I yini lexi nga endlaka hi swi tshemba swinene leswaku Yehovha nkarhi hinkwawo u endla leswi faneleke?

¹⁰ Hi yihi dyondzo ya nkoka leyi hi yi dyondzaka  emhakeni leyi? Emhakeni ya Hosi Azariya, hi hlamuseriwa vuxokoxoko lebyi eneleke lebyi hi pfunaka ku twisisa xivangelo lexi endleke Yehovha a n’wi xupula. Kambe u ta endla yini loko Bibele yi nga hlamuseli vuxokoxoko hinkwabyo? Xana u ta tivutisa loko Yehovha hakunene a endle leswi faneleke? Kumbe u ta tibyela leswaku Bibele yi ni rungula leri eneleke leri nga ku endlaka u tshemba leswaku nkarhi hinkwawo Xikwembu xi endla leswi faneleke? (Deteronoma 32:4) Loko u ya u tiva Yehovha tanihi Munhu, u ta ya u n’wi rhandza u tlhela u n’wi tshemba. Kutani a wu nge lavi ku tiva swivangelo swa swilo hinkwaswo leswi a swi endlaka. Loko u ri karhi u dyondza Bibele, Yehovha u ta ya a va wa xiviri eka wena naswona u ta tshinela eka yena.—Pisalema 77:12, 13.

11-13. U swi tivisa ku yini leswaku Yehovha wa swi yingisa swikhongelo? (Vona xifaniso lexi nga eku sunguleni ka xihloko lexi.)

¹¹ Loko hi khongela, hi tshinela eka Yehovha. Ha n’wi dzunisa, hi n’wi khensa hi tlhela hi kombela leswaku a hi pfuna. (Pisalema 32:8) Kambe loko u lava ku va ni vuxaka lebyikulu na Yehovha, u fanele u khorwiseka leswaku wa swi yingisa swikhongelo.

¹² Vanhu van’wana va vula leswaku Xikwembu a xi swi yingisi swikhongelo nileswaku ku khongela i nchumu lowu ku endlaka u titwa u antswa. Va tshemba leswaku xikhongelo xi ku pfuna leswaku u anakanyisisa hi swiphiqo swa wena ni leswaku u kuma tinhlamulo. I ntiyiso leswaku xikhongelo xi nga ha ku pfuna hi tindlela teto. Kambe loko u vulavula na Yehovha hi xikhongelo, wa ku yingisa  hakunene. I yini lexi nga ku tiyisekisaka leswaku wa ku yingisa?

¹³ Anakanya hi mhaka leyi: Loko Yesu a nga si ta laha misaveni, u swi vonile leswaku Yehovha wa swi hlamula swikhongelo swa malandza Yakwe lama nga vanhu. Loko Yesu a ri laha misaveni, u khongele eka Tata wakwe wa le matilweni hi leswi a a swi anakanya ni hi ndlela leyi a a titwa ha yona. Nkarhi wun’wana u khongele vusiku hinkwabyo. (Luka 6:12; 22:40-46) Xana Yesu a a ta va a swi endlile sweswo loko a a anakanya leswaku Yehovha a a nga ta n’wi yingisa? Yesu u tlhele a dyondzisa valandzeri vakwe ndlela yo khongela eka Yehovha. Xana a a ta va a swi endlile sweswo loko a a anakanya leswaku Yehovha a nga swi yingisi swikhongelo? Swi le rivaleni leswaku Yesu a a swi tiva leswaku hakunene Yehovha wa swi yingisa swikhongelo. U tshame a ku: “Tatana, ndza nkhensa hikuva u ndzi twile. I ntiyiso, a ndzi swi tiva leswaku wa ndzi twa nkarhi hinkwawo.” Na hina hi nga tiyiseka leswaku Yehovha wa swi yingisa swikhongelo swa hina.—Yohane 11:41, 42; Pisalema 65:2.

14, 15. (a) Hi vuyeriwa njhani loko hi boxa swilo leswi hi swi kombelaka loko hi khongela? (b) Swikhongelo swa Kathy swi n’wi pfune njhani leswaku a tshinela eka Yehovha?

¹⁴ A hi minkarhi hinkwayo hi nga ta vona swikhongelo swa hina swi hlamuriwa hi ku kongoma. Kambe loko u boxa leswi u swi kombelaka loko u khongela, u ta kota ku ti vona kahle tinhlamulo leti humaka eka Yehovha naswona u ta ya a va wa xiviri eka wena. Loko u byela Yehovha swilo hinkwaswo leswi ku vilerisaka, u ta tshinela eka wena.

¹⁵ Hi xikombiso, minkarhi yo tala Kathy a a ya ensin’wini kambe a a nga yi tsakeli. * (Vona nhlamuselo ya le hansi.) U te: “A ndzi nga wu tsakeli ntirho wa nsimu. A ndzi nga wu tsakeli  hi mbilu ya mina hinkwayo.” Loko se a hume penceni, nkulu un’wana u n’wi khutaze leswaku a teka vuphayona bya nkarhi hinkwawo. U te: “U ndzi nyike ni fomo yo endla xikombelo. Ndzi endle xiboho xa ku teka vuphayona, kambe ndzi tlhele ndzi sungula ku khongela siku ni siku leswaku Yehovha a ndzi pfuna ndzi tsakela ntirho wa nsimu.” Xana Yehovha u swi hlamurile swikhongelo swa yena? Endzhaku ka loko a phayone malembe manharhu, u te: “Hikwalaho ko heta nkarhi wo tala ndzi ri ensin’wini ndzi tlhela ndzi dyondza eka vamakwerhu van’wana va xisati, hakatsongotsongo sweswo swi antswise vuswikoti bya mina byo chumayela. Namuntlha, ndza wu rhandza swinene ntirho wa nsimu ematshan’weni yo wu tsakela ntsena. Ku tlula kwalaho, ndzi ni vuxaka lebyikulu na Yehovha ku tlula eku sunguleni.” Hakunene swikhongelo swa Kathy swi n’wi pfunile leswaku a tshinela eka Yehovha.

16, 17. (a) I yini leswi hi faneleke hi swi endla leswaku hi tshama hi ri karhi hi tiyisa vuxaka bya hina na Yehovha? (b) Hi ta bula hi yini exihlokweni lexi landzelaka?

¹⁶ Hi nga tshama hi ri karhi hi tshinela eka Yehovha hilaha ku nga heriki. A hi hambeteni hi n’wi yingisa hi ku va hi dyondza Bibele nkarhi ni nkarhi naswona a hi hambeteni hi vulavula na yena hi xikhongelo. Loko hi endla tano, vuxaka bya hina na Yehovha byi ta tiya naswona hi ta swi kota ku tiyisela miringo hikwalaho ko pfuniwa hi yena.

¹⁷ Kambe minkarhi yin’wana swiphiqo swa hina swa hi tikela, hambiloko hi ya emahlweni hi khongela eka Yehovha. Hi minkarhi yo tano, hi nga ha sungula ku nga ha n’wi tshembi Yehovha. Hi nga vona onge Yehovha a nga swi yingisi swikhongelo swa hina kutani hi nga ha tivutisa loko hakunene hi ri munghana wa yena. Loko u sungula ku titwa hi ndlela yoleyo, u nga endla yini? Xihloko lexi landzelaka xi ta ku pfuna emhakeni yoleyo.