LOKO Anita a va Mbhoni ya Yehovha, nuna wakwe a a hlundzuke swinene. * (Vona nhlamuselo ya le hansi.) U ringete ku n’wi sivela ku ya eminhlanganweni a tlhela a n’wi lerisa leswaku a nga pfuki a ri vurile vito ra Xikwembu. Loko a n’wi twa a vula vito leri nge Yehovha, a a hlundzuka swinene.

Ku engetela kwalaho, nuna wa Anita a a nga swi lavi leswaku nsati wakwe a dyondzisa vana va vona hi Yehovha kumbe a famba na vona eminhlanganweni. Xiyimo lexi a xi n’wi tikela swinene hikuva a a fanele a ringeta ku pfuna vana va vona nuna wa yena a nga swi tivi.

Hilaha mhaka ya Anita yi swi kombisaka hakona, un’wana endyangwini wa wena a nga ha ringeta ku ku sivela ku tirhela Yehovha. Kumbe u nga ha va u langutane ni xiyimo xin’wana xo tika. Kumbexana u ni nkarhi wo leha u ri karhi u vabya. Kumbexana n’wana wa wena, nuna wa wena kumbe nsati wa wena u file. Kumbe xirho xa ndyangu wa wena lexi u xi rhandzaka xi tshike ku tirhela Yehovha. I yini leswi u nga swi endlaka loko u ri eswiyin’weni swo tano leswaku u tshama u tshembekile eka Yehovha?

Muapostola Pawulo u te: “Ku laveka leswaku mi tiyisela.” (Vaheveru 10:36) Hikwalaho, i yini lexi nga ku pfunaka leswaku u tiyisela?

Tsundzuka leswaku u fanele u titshega hi Yehovha leswaku a ku pfuna u tiyisela loko u ri eku xanisekeni. Khongela eka yena u kombela mpfuno. Sweswo hi leswi Ana a swi endleke loko nuna wakwe a fe hi xitshuketa. A va ri ni malembe ya 30 va tekanile. Ana u ri: “A nga vuyanga entirhweni. A a ri ni malembe ya 52 ntsena.”

Ntirho wa Ana a wu endla leswaku a tshama a khomekile, kambe a wu nga herisi ku vava loku a ku twa. Xana u endle yini? U ri: “Ndzi chululele leswi a swi ri embilwini ya mina eka Yehovha kutani ndzi n’wi kombela leswaku a ndzi pfuna.” A a swi tiva leswaku Yehovha wa n’wi pfuna hikuva endzhaku ka loko a khongerile, a a titwa a ri ni ku rhula. Naswona u ri: “Ndza tiyiseka leswaku Yehovha u ta pfuxa nuna wa mina loko a pfuxa vafi.”—Vafilipiya 4:6, 7.

Yehovha u tshembisa malandza yakwe leswaku u ta yingisa swikhongelo swa wona. (Pisalema 65:2) Naswona u ta ma nyika hinkwaswo leswi ma swi pfumalaka leswaku ma ta ya emahlweni ma n’wi tirhela. Yehovha u ta ku pfuna leswaku u tshembeka eka yena hambiloko u langutane ni swiyimo swo tika.

Ku ni ndlela yin’wana leyi Yehovha a hi pfunaka ha yona leswaku hi tiyisela. U hi  lunghiselele vamakwerhu evandlheni. Hi nga dyondza swo karhi eka ndlela leyi vamakwerhu va le Tesalonika va pfunaneke ha yona loko va xanisiwa hi tihanyi. Hi nkarhi wolowo a va fanele va khutazana swinene. (1 Vatesalonika 2:14; 5:11) Va pfune vamakwavo leswaku va tshama va tshembekile eka Yehovha hi ku hlengeletana ni hi ku va vanghana lavakulu. I yini leswi hi nga swi endlaka leswaku hi tshama hi tshembekile ku fana ni Vatesalonika?

Hi fanele hi endla vamakwerhu va le vandlheni va va vanghana va hina lavakulu hi tlhela hi khutazana, ngopfungopfu loko swiyimo swi tika. (Varhoma 14:19) Muapostola Pawulo u xanisiwile naswona a a ri ni swiphiqo swin’wana, kambe Yehovha u n’wi nyike matimba yo tiyisela. Hi xikombiso, Yehovha u endle leswaku vamakwerhu va khutaza Pawulo. Muapostola loyi u vule leswi malunghana ni vamakwavo vakwe: “Vona lava va ve mpfuno lowu tiyisaka eka mina.” (Vakolosa 4:10, 11) Vamakwerhu lava a va n’wi rhandza Pawulo. Hikwalaho loko a lava mpfuno, va n’wi chavelerile va tlhela va n’wi khutaza. Kumbexana u nga anakanya hi minkarhi leyi vamakwenu va le vandlheni va vuleke swo karhi kumbe va endleke swo karhi leswi ku khutazeke.

Yehovha u tlhele a ku endlela lunghiselelo ra vakulu evandlheni. Vavanuna lava va nga ku khutaza va tlhela va ku nyika xitsundzuxo  lexinene lexi humaka eBibeleni. Va fana ni “ndhawu ya ku tifihla emhehweni ni vutumbelo exidzedzeni, ku fana ni swinambyana swa mati etikweni leri nga riki na mati, ku fana ni ndzhuti wa ribye lerikulu etikweni leri omeke.” (Esaya 32:2) Swa hi chavelela ku tiva leswaku vamakwerhu lava va lunghekele ku hi pfuna. Hikwalaho loko u langutane ni xiyimo xo tika, yana eka vakulu. Va nga ku pfuna leswaku u ya emahlweni u tirhela Yehovha.

I ntiyiso leswaku vakulu va nge ku tlhantlheli swiphiqo swa wena hinkwaswo. Naswona a va hetisekanga ku fana na wena. (Mintirho 14:15) Kambe u nga titwa u antswa swinene loko u ya eka nkulu kutani a khongela eka Yehovha a n’wi byela xiphiqo xa wena. (Yakobo 5:14, 15) Hi xikombiso, vakulu van’wana va khutaze makwerhu un’wana wa xinuna wa le Italy loyi a a ri ni malembe yo tala a vabya swinene. Entiyisweni u te: “Ndlela leyi vamakwerhu va ndzi kombiseke rirhandzu ha yona ni leswi a va tshama va ri karhi va ndzi endzela swi ndzi pfunile leswaku ndzi tiyisela.” Yehovha u lava leswaku u kombela vakulu leswaku va ku pfuna loko u ri eku xanisekeni.

Loko hi dzikisa mianakanyo ya hina eku tirheleni Yehovha, hi ta vona ndlela leyi a hi pfunaka ha yona. Sweswo hi leswi John a swi endleke. Loko a ri ni malembe ya 39, u kume leswaku u khome hi vuvabyi bya khensa leyi nga tolovelekangiki. A a vona swi nga fanelanga leswaku a khomiwa hi vuvabyi byo tano, ngopfungopfu leswi a a nga ri nkulu ngopfu. Naswona a a vilela hikwalaho ka nsati wakwe ni n’wana wa vona wa jaha loyi o va ni malembe manharhu ntsena. U ri: “Nsati wa mina a a fanele a khathalela n’wana wa hina loyi a ha ri ntsongo a tlhela a khathalela na mina, a tlhela a ndzi heleketa eka vaongori.” John a a titwa a karhele swinene naswona a a ri ni swiphiqo ekhwirini hikwalaho ka vutshunguri lebyi a a byi teka. Naswona a swi helelanga kwalaho. John u kume leswaku tata wakwe a a vabyela ku fa hikwalaho a a lava munhu loyi a a ta n’wi khathalela.

I yini leswi pfuneke John ni ndyangu wakwe hi nkarhi wolowo wo tika? Hambileswi John a a tshamela ku titwa a karhele, a a tiyiseka leswaku ndyangu wakwe wu tshama wu khomekile hi ku tirhela Yehovha. U ri: “A hi va kona eka minhlangano hinkwayo, a hi ya ensin’wini vhiki ni vhiki naswona a hi va ni vugandzeri bya ndyangu nkarhi ni nkarhi hambileswi a swi nga olovi.” John u dyondze ndlela leyi a swi ri swa nkoka ha yona ku tshama a ri ni vuxaka lebyi tiyeke na Yehovha. Hambileswi eku sunguleni a a tsemeke nhlana a tlhela a vilela, swi nga si ya kwihi u titwe a ri ni ku rhula. A a swi tiva leswaku Yehovha a a n’wi rhandza naswona a a n’wi nyika matimba lawa a a ma lava. Na wena Yehovha a nga ku pfuna hi ndlela leyi fanaka loko ku ri ni leswi swi ku vilerisaka kumbe leswi ku chavisaka. John u ri: “Yehovha a nga ku nyika matimba hilaha a ndzi nyikeke matimba hakona.”

Loko u ri eku xanisekeni, tsundzuka marito ya Pawulo lama nge: “Ku laveka leswaku [u] tiyisela.” Titshege hi Yehovha hi ku khongela eka yena. Tshama u ri ni vuxaka lebyikulu ni vamakwenu evandlheni, kombela mpfuno eka vakulu naswona dzikisa mianakanyo eku gandzeleni Yehovha. U ta ku pfuna leswaku u kota ku langutana ni xiphiqo xihi ni xihi lexi u nga ha vaka u ri na xona sweswi kumbe a ku pfuna hi xiphiqo xin’wana ni xin’wana lexi u nga ha vaka na xona enkarhini lowu taka.