1, 2. Rito leri nge “vunavelo” ri vula yini eka Matsalwa ya Xiheveru?

YEHOVHA XIKWEMBU u te: “Matilo i xiluvelo xa mina, misava i vunavelo bya mina.” (Esaya 66:1) Nakambe Xikwembu a xi vulavula hi “vunavelo” bya xona loko xi ku: “Ndzi ta vangamisa ndhawu ya milenge ya mina.” (Esaya 60:13) Xi byi vangamisa kumbe ku byi sasekisa njhani vunavelo bya xona? Naswona leswi swi vula yini eka lava tshamaka eka vunavelo bya xona, ku nga misava?

² Eka Matsalwa ya Xiheveru, rito leri nge “vunavelo” ri tlhela ri tirhiseriwa ku hlamusela tempele ya khale ya le Israyele. (1 Tikronika 28:2; Pisalema 132:7) Tempele a yi saseke swinene eka Yehovha hikuva a yi ri ndhawu leyi a a gandzeriwa eka yona. Naswona a yi tirhiseriwa ku vangamisa Yehovha laha misaveni.

3. Hi yihi ndhawu leyi Yehovha a gandzeriwaka eka yona namuntlha, naswona yi sungule rini ku tirha?

³ Hi yihi ndhawu leyi Yehovha a gandzeriwaka eka yona  namuntlha? A nga gandzeriwi emuakweni lowu fanaka ni tempele. U gandzeriwa etempeleni ya moya naswona yi vangamisa Yehovha swinene ku tlula muako wihi ni wihi. I yini tempele ya moya? I lunghiselelo ra Xikwembu leri endlaka leswaku vanhu va kota ku va vanghana va xona va tlhela va xi gandzela. Lunghiselelo leri ri ve kona hikwalaho ka nkutsulo wa Yesu. Ri sungule ku tirha hi lembe ra 29 loko Yesu a khuvuriwa a tlhela a totiwa a va Muprista Lonkulu wa tempele ya Yehovha ya moya.—Vaheveru 9:11, 12.

4, 5. (a) Hi ku ya hi Pisalema 99, i yini leswi vagandzeri va Yehovha va ntiyiso va faneleke va swi endla? (b) Hi xihi xivutiso lexi hi faneleke hi tivutisa xona?

⁴ Ha ri tlangela swinene lunghiselelo ra Xikwembu ra vugandzeri bya ntiyiso. Hi kombisa ku tlangela ka hina hi ku byela van’wana hi vito ra Yehovha ni hi nyiko yakwe yo hlamarisa ya nkutsulo. Ha tsaka hi leswi ku nga ni Vakreste va ntiyiso vo tlula nhungu wa timiliyoni lava dzunisaka Yehovha siku ni siku! Hambileswi vanhu vo tala lava nghenaka kereke va anakanyaka leswaku va ta dzunisa Xikwembu etilweni endzhaku ka loko va file, vanhu va Yehovha va yi tiva ndlela leyi swi nga swa nkoka ha yona ku n’wi dzunisa sweswi kwala misaveni.

⁵ Loko hi dzunisa Yehovha, hi tekelela xikombiso xa malandza ya Xikwembu yo tshembeka lawa ku vulavuriweke ha wona eka Pisalema 99:1-3, 5. (Yi hlaye.) Vavanuna vo tshembeka vo tanihi Muxe, Aroni na Samuwele va ri seketele hi ku helela lunghiselelo ra Xikwembu ra vugandzeri bya ntiyiso enkarhini lowu hundzeke. (Pisalema 99:6, 7) Namuntlha, loko vatotiwa lava ha riki laha misaveni va nga si va vaprista na Yesu etilweni, va tirhela Yehovha hi ku tshembeka exiphen’wini xa laha misaveni xa tempele ya moya. “Tinyimpfu tin’wana” ta timiliyoni ti va seketela hi ku tshembeka. (Yohane 10:16) Mintlawa leyi hayimbirhi yi gandzela Yehovha hi vun’we. Hambiswiritano, un’wana ni un’wana wa hina u fanele a tivutisa xivutiso lexi nge, ‘Xana ndzi ri seketela hi ku helela lunghiselelo ra Yehovha ra vugandzeri bya ntiyiso?’

6, 7. Hi xihi xiphiqo lexi veke kona evandlheni ra Vakreste vo sungula, naswona i yini leswi endlekeke hi 1919?

⁶ Loko vandlha ra Vakreste ri nga si va ni malembe ya 100 ri ri kona, ku ve ni vugwinehi hilaha ku profetiweke hakona. (Mintirho 20:28-30; 2 Vatesalonika 2:3, 4) Endzhaku ka nkarhi wolowo, swi ye swi tika swinene ku tiva vagandzeri va Xikwembu va ntiyiso. Ku hundze madzana ya malembe Yehovha a nga si tirhisa Yesu ku hlamusela leswaku i vamani lava a va tirhela Xikwembu etempeleni ya xona ya moya.

⁷ Hi lembe ra 1919, lava amukelekaka eka Xikwembu va tlhela va tirha etempeleni ya xona ya moya va hlamuseriwe kahle. Va endle mindzulamiso leswaku ndlela leyi va gandzelaka ha yona yi ta amukeleka swinene eka Yehovha. (Esaya 4:2, 3; Malakiya 3:1-4) Hikwalaho, xivono lexi muapostola Pawulo  a xi voneke madzana ya malembe emahlweni ka lembe rero xi sungule ku hetiseka.

8, 9. I yini ‘paradeyisi’ leyi Pawulo a yi voneke exivonweni?

⁸ Xivono lexi Pawulo a xi voneke xi hlamuseriwe eka 2 Vakorinto 12:1-4. (Yi hlaye.) Eka xivono xexo, Yehovha u kombe Pawulo nchumu wo karhi lowu a wu ta endleka enkarhini lowu taka. I yini ‘paradeyisi’ leyi Pawulo a yi voneke? Pawulo a a vulavula hi swilo swinharhu leswi hambaneke. Xo sungula, i Paradeyisi ya xiviri leyi nga ta va kona laha misaveni ku nga ri khale. (Luka 23:43) Xa vumbirhi, i paradeyisi ya moya leyi hetisekeke leyi nga ta va kona emisaveni leyintshwa. Xa vunharhu, i swiyimo swo tsakisa swa le tilweni “eparadeyisini ya Xikwembu.”—Nhlavutelo 2:7.

⁹ Kambe, ha yini Pawulo a vule leswaku u “[twe] marito lama nga vuriwiki, lawa swi nga pfumeleriwiki leswaku munhu a ma vula”? Hikuva a wu nga si fika nkarhi wa leswaku a swi hlamusela hi vuenti swilo swo tsakisa leswi a swi voneke exivonweni. Kambe namuntlha Yehovha wa hi pfumelela ku byela van’wana hi mikateko leyi vanhu vakwe va yi kumaka sweswi!

10. Ha yini paradeyisi ya moya ni tempele ya moya ku nga ri nchumu wun’we?

¹⁰ I yini paradeyisi ya moya leyi hi talaka ku vulavula ha yona? I xiyimo xo hlawuleka xa ku rhula lexi Xikwembu xi xi nyikaka vanhu va xona. Hikwalaho, paradeyisi ya moya ni tempele ya moya a hi nchumu wun’we. Tempele ya moya i lunghiselelo ra Xikwembu ra vugandzeri bya ntiyiso. Paradeyisi ya moya yi va hlamusela kahle lava amukelekaka eka Xikwembu ni lava xi gandzelaka etempeleni ya xona ya moya.—Malakiya 3:18.

11. Hi rihi lunghelo leri hi nga na rona namuntlha?

¹¹ Swa tsakisa ku tiva leswaku ku sukela hi 1919, Yehovha u pfumelele vanhu lava nga hetisekangiki leswaku va tirha, va tiyisa ni ku ndlandlamuxa paradeyisi ya moya. Xana wa pfuneta eku endleni ka ntirho lowu wo tsakisa? Xana wa ri tlangela lunghelo ro tirha na Yehovha leswaku a vangamisiwa laha misaveni?

12. Hi swi tivisa ku yini leswaku Esaya 60:17 yi hetisekile? (Vona xifaniso lexi nga eku sunguleni ka xihloko lexi.)

¹² Muprofeta Esaya u profete leswaku ku ta va ni ku cinca ko tala loku tsakisaka ni mindzulamiso exiphen’wini xa laha misaveni xa nhlengeletano ya Xikwembu. (Hlaya Esaya 60:17.) Vantshwa lava nga Vakreste kumbe Vakreste lava ha riki vantshwa entiyisweni va lo hlaya ntsena kumbe ku twa hi ku cinca loku. Kambe ku ni vamakwerhu vo tala lava veke ni lunghelo ro vona mindzulamiso yoleyo leyi tsakisaka! Malandza wolawo yo tshembeka ma khorwiseka leswaku Xikwembu xi tirhisa Hosi ya hina Yesu leswaku a hlela ni ku kongomisa nhlengeletano ya xona! Loko hi yingisela mintokoto ya Vakreste volavo lava rhandzekaka,  ripfumelo ra hina ni ndlela leyi hi tshembaka Yehovha ha yona swi ta tiya.

13. Hi fanele hi endla yini hi ku ya hi Pisalema 48:12-14?

¹³ Vakreste hinkwavo va ntiyiso va fanele va byela van’wana hi nhlengeletano ya Yehovha. Swa hlamarisa leswaku hambileswi hi hanyaka emisaveni ya Sathana yo homboloka, hi ni ku rhula ni vun’we ni vamakwerhu! Hi fanele hi tsakela ku rungulela “xitukulwana xa nkarhi lowu taka” hi nhlengeletano ya Yehovha ni hi paradeyisi ya moya!—Hlaya Pisalema 48:12-14.

14, 15. Hi yihi mindzulamiso leyi endliweke endzhaku ka 1970, naswona nhlengeletano yi vuyeriwe njhani?

¹⁴ Vanhu vo tala lava kuleke emavandlheni ya hina va vone mindzulamiso leyi endleke leswaku xiphemu xa laha misaveni xa nhlengeletano ya Yehovha xi saseka swinene. Va ha tsundzuka loko mavandlha ma ha ri ni nandza wa vandlha ematshan’weni ya huvo ya vakulu, loko matiko ma ha ri ni nandza wa rhavi ematshan’weni ya Komiti ya Rhavi, kumbe loko nkongomiso wa ha huma eka muungameri wa Sosayiti ya Watch Tower ematshan’weni ya Huvo leyi Fumaka ya Timbhoni ta Yehovha. Hambileswi vamakwerhu lava hinkwavo a va pfuniwa hi vamakwerhu lava tshembekaka, entiyisweni i munhu un’we loyi a a ri ni vutihlamuleri byo endla swiboho emavandlheni, emarhavini ni le ntsindza wa misava hinkwayo. Endzhaku ka 1970, ku endliwe mindzulamiso leswaku mintlawa ya vakulu yi va ni vutihlamuleri byo endla swiboho ematshan’weni ya leswaku swi endliwa hi munhu un’we.

 ¹⁵ Ha yini mindzulamiso leyi yi vuyerise nhlengeletano? Hikuva a yi sekeriwe eka ndlela yo antswa leyi yi ma twisisaka ha yona Matsalwa. Ematshan’weni ya leswaku munhu un’we a endla swiboho hinkwaswo, nhlengeletano ya vuyeriwa eka timfanelo hinkwato letinene ta vakulu kumbe “tinyiko leti nga vanhu,” leti hi nyikiweke tona hi Yehovha.—Vaefesa 4:8; Swivuriso 24:6.

16, 17. Hi yihi mindzulamiso leya ha ku endliwaka leyi ku tsakiseke naswona ha yini?

¹⁶ Anakanya hi mindzulamiso yin’wana leya ha ku endliwaka eka minkandziyiso ya hina. Hi tsakela ku fambisa minkandziyiso leyi pfunaka ni leyi kokaka mahlo ensin’wini. Nakambe anakanya hi ndlela leyi hi tirhisaka thekinoloji leyintshwa ha yona leswaku hi chumayela mahungu lamanene. Hi xikombiso, website ya hina ya jw.org yi fikelela vanhu vo tala swinene leswaku va kuma mpfuno lowu va wu lavaka hakunene. Mindzulamiso leyi hinkwayo yi kombisa ndlela leyi Yehovha a khathalaka swinene ha yona hi vanhu ni ndlela leyi a va rhandzaka ha yona.

¹⁷ Nakambe hi tlangela ndzulamiso lowu endliweke eminhlanganweni ya hina leswaku hi ta va ni nkarhi wo endla vugandzeri bya ndyangu kumbe dyondzo ya munhu hi yexe. Naswona hi tlangela ku cinca loku endliweke eka minongonoko ya nhlengeletano ya hina ya muganga ni ya xifundzha. Ya antswisiwa lembe ni lembe! Hi tlhela hi tlangela ndzetelo lowu hi wu kumaka eka swikolo swa hina swo tala swa Bibele. Mindzulamiso leyi hinkwayo yi swi kombisa kahle leswaku  Yehovha u kongomisa nhlengeletano yakwe ni leswaku u ya emahlweni a endla leswaku paradeyisi ya moya yi saseka swinene!

18, 19. Hi nga pfuneta njhani eku yi sasekiseni ngopfu paradeyisi ya moya?

¹⁸ Yehovha u hi nyike lunghelo ro pfuneta ku yi sasekisa ngopfu paradeyisi ya hina ya moya. Kambe hi swi endlisa ku yini sweswo? Hi ku hisekela ku chumayela mahungu lamanene ya Mfumo ni ku endla vadyondzisiwa vo tala. Nkarhi wun’wana ni wun’wana loko hi pfuna munhu leswaku a va nandza wa Xikwembu, hi pfuneta leswaku paradeyisi ya moya yi kula.—Esaya 26:15; 54:2.

¹⁹ Hi tlhela hi pfuneta ku sasekisa paradeyisi ya moya loko hi tirha hi matimba leswaku hi antswisa vumunhu bya hina bya Vukreste. Leswi swi endla leswaku paradeyisi ya moya yi tsakeriwa swinene hi van’wana. Hakanyingi, lexi rhangaka xi kokela vanhu enhlengeletanweni ivi endzhaku xi va kokela eka Yehovha na Yesu, i mahanyelo ya hina lama baseke ni ku va lava rhuleke, ku nga ri leswi hi tivaka Bibele ntsena.

20. Hi ku ya hi Swivuriso 14:35, hi kwihi ku navela loku hi faneleke hi va na kona?

²⁰ Yehovha na Yesu va fanele va tsaka swinene loko va vona paradeyisi ya hina yo saseka ya moya namuntlha. Ntsako lowu hi vaka na wona sweswi loko hi yi sasekisa swinene ko va xikombiso ntsena xa ntsako lowu hi nga ta va na wona loko hi ta va hi endla misava leswaku yi va paradeyisi enkarhini lowu taka. Minkarhi hinkwayo hi fanele hi tsundzuka Swivuriso 14:35, leyi nge: “Ku tsaka ka hosi ku le ka nandza la endlaka hi ku twisisa.” A hi tlhariheni loko hi ri karhi hi tikarhatela ku sasekisa paradeyisi ya moya!