1, 2. (a) Ha yini u khorwiseka leswaku Yehovha wa va rhandza vanhu vakwe? (b) Vanhu va vumbiwe va ri ni xilaveko xihi?

HA YINI u khorwiseka leswaku Yehovha wa va rhandza vanhu vakwe? U nga si hlamula xivutiso xexo, anakanya hi swikombiso leswi: Ku ringana malembe yo hlayanyana, vamakwerhu va xinuna ni va xisati va khutaze makwerhu un’wana wa xisati la vuriwaka Taylene. Va n’wi byele leswaku a nga languteli ku endla swilo hi ndlela leyi hetisekeke. U ri: “Loko Yehovha a a nga ndzi rhandzi, a a nga ta ndzi nyika xitsundzuxo hi ku phindhaphindha.” Brigitte, loyi a kuriseke vana vambirhi a ri yexe endzhaku ka loko nuna wakwe a file, u ri: “Ku kurisa vana emafambiselweni lawa ya Sathana i wun’wana wa mintlhontlho leyi tikaka swinene, ngopfungopfu eka mutswari la nga yexe. Kambe ndza tiyiseka leswaku Yehovha wa ndzi rhandza hikuva u ndzi kongomisile hi nkarhi lowu a ndzi langutane ni xiyimo xo tika swinene, naswona a nga pfumelanga leswaku ndzi weriwa hi ndzingo lowu a ndzi nga ta kota ku wu tiyisela.” (1 Vakorinto 10:13) Sandra u khomiwe hi vuvabyi lebyi nga ni khombo lebyi nga tshungulekiki. Enhlengeletanweni  ya xifundzha, makwerhu un’wana wa xisati u pfune Sandra. Nuna wa Sandra u ri: “Hambileswi a hi nga n’wi tivi, ku khathala ka yena loku humaka embilwini ku hi tsakise ngopfu. Hambiloko vamakwerhu va ndzi kombisa rirhandzu hi tindlela leti nga nyawuliki, swi ndzi kombisa ndlela leyi Yehovha a hi rhandzaka ha yona.”

² Yehovha u vumbe vanhu va ri ni xilaveko xo rhandza vanhu van’wana ni ku lava ku rhandziwa. Hambiswiritano, hi nga hatla hi hela matimba loko hi vabya kumbe hi ri ni swiphiqo swa timali kumbe loko hi nga kumi vuyelo lebyinene ensin’wini. Loko hi sungula ku titwa onge Yehovha a nga ha hi rhandzi, hi fanele hi tsundzuka leswaku hi va risima eka yena ni leswaku u khoma voko ra hina ra xinene a tlhela a hi pfuna. A nge pfuki a hi rivarile loko hi tshembeka eka yena.—Esaya 41:13; 49:15.

3. I yini leswi nga hi khorwisaka swinene leswaku Yehovha u hi rhandza hi rirhandzu leri tiyeke?

³ Timbhoni leti se ku vulavuriweke ha tona a ti khorwiseka leswaku Xikwembu a xi ri na tona hi minkarhi yo tika. Na hina hi nga tiyiseka leswaku xi na hina. (Pisalema 118:6, 7) Exihlokweni lexi, hi ta bula hi tinyiko ta mune leti kombisaka leswaku Yehovha wa hi rhandza. Tinyiko ta kona i (1) leswi a swi tumbuluxeke, (2) Bibele, (3) xikhongelo ni (4) nkutsulo. Loko hi anakanyisisa hi swilo leswinene leswi Yehovha a swi endleke swi nga hi pfuna leswaku hi ri tlangela ngopfu rirhandzu rakwe leri tiyeke.—Hlaya Pisalema 77:11, 12.

4. Hi dyondza yini eka leswi Yehovha a swi tumbuluxeke?

⁴ Loko hi languta swilo leswi Yehovha a swi tumbuluxeke, hi xiya ndlela leyi a hi rhandzaka ha yona. (Varhoma 1:20) Hi xikombiso, Yehovha u vumbe misava leswaku hi kota ku hanya eka yona ni ku endla swilo swo tala. U hi nyike hinkwaswo leswi hi swi lavaka leswaku hi tsakela vutomi. Hi fanele hi dya, hikwalaho Yehovha u hi nyike swakudya swo hambanahambana leswaku hi tiphina hi ku swi dya! (Eklesiasta 9:7) Makwerhu un’wana wa xisati la vuriwaka Catherine wa swi tsakela leswi a swi vonaka eka ntumbuluko, ngopfungopfu hi nkarhi wa ximun’wana eCanada. U ri: “Hakunene ya hlamarisa ndlela leyi swilo hinkwaswo swi vaka swo saseka ha yona—swiluva leswi hi ntumbuluko swi balekaka emisaveni ni swinyenyana leswi vuyaka hi le ndhawini leyi a swi rhurhele eka yona, ku katsa ni xinyenyana lexitsongo lexi vuriwaka n’wabvuma, lexi taka xi ta dya swakudya leswi ndzi swi vekeleke swinyenyana ehandle ka fasitere ra mina ra le khixini. Yehovha wa hi rhandza hileswi a hi nyikaka swilo swo tala swo tsakisa.” Tata wa hina u rhandza swilo leswi a swi tumbuluxeke naswona u lava leswaku na hina hi swi tsakela.—Mintirho 14:16, 17.

5. Ndlela leyi vanhu va vumbiweke ha yona yi ri kombisa njhani rirhandzu ra Yehovha?

⁵ Yehovha u hi vumbe hi ri ni vuswikoti byo endla mintirho ya nkoka hi tlhela hi yi tsakela. (Eklesiasta 2:24) U nyike vanhu ntirho wo tata misava, va yi rima ni ku khathalela tinhlampfi, swinyenyana ni swilo leswin’wana leswi  hanyaka eka yona. (Genesa 1:26-28) Naswona u tlhele a hi vumba hi ri ni timfanelo letinene leswaku hi ta n’wi tekelela!—Vaefesa 5:1.

6. Ha yini hi fanele hi teka Rito ra Xikwembu ri ri ra risima swinene?

⁶ Yehovha u hi nyike Bibele hikwalaho ka leswi a hi rhandzaka swinene. Yi hi byela leswi hi faneleke hi swi tiva hi yena ni ndlela leyi a titwaka ha yona hi vanhu. Hi xikombiso, Bibele yi hi byela ndlela leyi Yehovha a titweke ha yona hi Vaisrayele, lava minkarhi yo tala a va nga n’wi yingisi. Pisalema 78:38 yi ri: “A xi ri ni tintswalo; a xi funengeta xidyoho, xi nga va lovisi. A xi tlherisa ku hlundzuka ka xona minkarhi yo tala, a xi nga byi pfuxi hinkwabyo vukarhi bya xona.” Ku anakanyisisa hi ndzimana leyi swi nga ku pfuna leswaku u vona ndlela leyi Yehovha a ku rhandzaka ni ku ku khathalela ha yona. Hi nga tiyiseka leswaku Yehovha wa khathala swinene hi hina.—Hlaya 1 Petro 5:6, 7.

7. Ha yini Bibele yi fanele yi va ya risima eka hina?

⁷ Bibele yi fanele yi va ya risima swinene eka  hina. Ha yini? Hikuva Yehovha u vulavula na hina hi ku tirhisa Rito rakwe. Loko mutswari ni n’wana va vulavurisana va ntshunxekile, va tiyisa ndlela leyi va rhandzanaka ha yona ni leyi va tshembanaka ha yona. Yehovha i Tata wa hina la nga ni rirhandzu. Naswona hambileswi hi nga si tshamaka hi n’wi vona kumbe ku twa rito rakwe, swi fana ni loko a vulavula na hina hi ku kongoma hi ku tirhisa Bibele. Hi fanele hi ya emahlweni hi n’wi yingisa! (Esaya 30:20, 21) Loko hi hlaya Rito ra Xikwembu, hi ya hi n’wi tiva ni ku n’wi tshemba Yehovha, loyi a hi kongomisaka a tlhela a hi sirhelela.—Hlaya Pisalema 19:7-11; Swivuriso 1:33.

8, 9. Yehovha u lava leswaku hi tiva yini? Vula xikombiso xa le Bibeleni.

⁸ Yehovha u lava hi swi tiva leswaku wa hi rhandza ni leswaku a nga voni ku tsana ka hina ntsena. U languta leswinene eka hina. (2 Tikronika 16:9) A hi kambisiseni ndlela leyi Yehovha a voneke leswinene ha yona eka Hosi Yehoxafati wa le Yuda. Yehoxafati u endle xiboho lexi nga riki xinene hi ku famba na Hosi Akabu wa le Israyele va ya lwa ni Vasiriya eRhamoti-giliyadi. Hambileswi vaprofeta va mavunwa va 400 va byeleke Akabu lowo homboloka leswaku u ta hlula enyimpini, Mikaya, muprofeta wa ntiyiso wa Yehovha u byele Yehoxafati na Akabu leswaku loko vo ya enyimpini va ta hluriwa. Hakunene va hluriwile. Akabu u fele enyimpini kasi Yehoxafati u pone ri ahlamile. Endzhaku ka nyimpi yoleyo, Yehovha u rhume Yehu leswaku a ya tshinya Yehoxafati hikwalaho ka xihoxo xa yena. Kambe, Yehu u tlhele a ku: “Ku ni swilo leswinene leswi kumiweke eka wena.”—2 Tikronika 18:4, 5, 18-22, 33, 34; 19:1-3.

⁹ Emalembeni ya le mahlweni ka kwalaho, Yehoxafati u byele tihosana, Valevhi ni vaprista leswaku va ya emitini hinkwayo ya Yuda va ya dyondzisa vanhu Nawu wa Yehovha. Ku ve ni vuyelo lebyinene lerova hambi ku ri vanhu vo huma eka matiko man’wana va tive Yehovha. (2 Tikronika 17:3-10) Hikwalaho, hambileswi Yehoxafati a heteleleke a endle xiboho lexi nga riki xinene, Yehovha a nga swi rivalanga swilo leswinene leswi a tshameke a swi endla. Xikombiso xexo xa hi chavelela swinene hikuva minkarhi yin’wana hi endla swihoxo. Hambiswiritano, loko hi endla leswi hi nga swi kotaka leswaku hi tirhela Yehovha, u ta ya emahlweni a hi rhandza naswona a nge swi rivali swilo leswinene leswi hi swi endleke.

10, 11. (a) Ha yini xikhongelo ku ri nyiko yo hlawuleka leyi humaka eka Yehovha? (b) Xikwembu xi nga ha swi hlamula njhani swikhongelo swa hina? (Vona xifaniso lexi nga eku sunguleni ka xihloko lexi.)

¹⁰ Tatana la nga ni rirhandzu u tinyika nkarhi wo yingisela vana vakwe loko va lava ku vulavula na yena. U lava ku tiva ndlela leyi va titwaka ha yona hikuva wa khathala ha vona swinene. Yehovha, Tata wa hina la nga ni rirhandzu u endla leswi fanaka. Wa hi yingisela loko hi khongela eka yena. I lunghelo ra risima ku vulavula ni Tata wa hina!

¹¹ Hi nga khongela eka Yehovha nkarhi wihi ni wihi. I Munghana wa hina naswona u tshama a lunghekele ku yingisa swikhongelo swa hina. Taylene, loyi se ku buriweke ha yena, u ri: “U nga n’wi byela xin’wana ni xin’wana ni hinkwaswo leswi u swi lavaka.” Loko hi tiphofula eka Yehovha, a nga ha hi hlamula hi ku tirhisa tsalwa ro karhi, xihloko lexi kumekaka eka minkandziyiso ya hina kumbe xikhutazo lexi humaka eka makwerhu wa xinuna kumbe wa xisati. Yehovha wa swi twa swikombelo swa hina leswi humaka embilwini naswona wa hi twisisa hambiloko van’wana va nga hi twisisi. Loko a hlamula swikhongelo swa hina swi kombisa  leswaku u hi rhandza hi rirhandzu leri tiyeke.

12. Ha yini hi fanele hi hlaya swikhongelo leswi kumekaka eBibeleni? Vula xikombiso.

¹² Hi nga dyondza swilo swa nkoka eka swikhongelo leswi kumekaka eBibeleni. Minkarhi yin’wana swa pfuna ku hlaya swin’wana swa swikhongelo leswi hi nkarhi wa vugandzeri bya ndyangu. Hi ta antswisa swikhongelo swa hina loko hi anakanyisisa hi swikhongelo leswi humaka embilwini swa malandza ya Xikwembu ya le nkarhini lowu hundzeke. Hi xikombiso, hlaya hi xikhongelo xo titsongahata xa Yonasi loko a ri ekhwirini ra nhlampfi leyikulu. (Yonasi 1:17–2:10) Kambisisa xikhongelo lexi humaka embilwini xa Solomoni lexi a xi kongomiseke eka Yehovha loko ku nyiketeriwa tempele. (1 Tihosi 8:22-53) Naswona anakanyisisa hi xikhongelo xa Yesu xa xikombiso. (Matewu 6:9-13) Xa nkoka swinene, minkarhi hinkwayo ‘tivisa Xikwembu swikombelo swa wena.’ Loko u endla tano, “ku rhula ka Xikwembu loku tlulaka miehleketo hinkwayo ku ta rindza [mbilu ya wena] ni matimba ya [wena] ya mianakanyo.” Ku tlangela ka hina rirhandzu ra Yehovha leri tiyeke ku ta ya ku kula.—Vafilipiya 4:6, 7.

13. Hi rihi lunghelo leri hi ri kumeke hikwalaho ka nkutsulo?

¹³ Yehovha u hi nyike nyiko ya nkutsulo leswaku “hi ta kuma vutomi.” (1 Yohane 4:9) Loko muapostola Pawulo a vulavula hi xikombiso lexi lexikulu xa rirhandzu ra Xikwembu u tsale a ku: “Kreste, u fele vanhu lava nga xiximiki Xikwembu hi nkarhi lowu vekiweke. Hikuva a nga kona loyi a nga felaka munhu la lulameke; kunene, kumbexana un’wana a nga ha xinyata a fela munhu lonene. Kambe Xikwembu xi tiyisekisa rirhandzu ra xona n’wini eka hina, hileswi Kreste a hi feleke, loko ha ha ri vadyohi.” (Varhoma 5:6-8) Nkutsulo i xikombiso lexikulu xa rirhandzu ra Xikwembu naswona wu nyika vanhu lunghelo ro va ni vuxaka lebyikulu na xona.

14, 15. Nkutsulo wu va vuyerisa njhani (a) Vakreste lava totiweke? (b) lava nga ni ntshembo wo hanya laha misaveni?

¹⁴ Ntlawa lowutsongo wa Vakreste wu kombisiwa rirhandzu ra Yehovha leri tiyeke hi ndlela yo hlawuleka. (Yohane 1:12, 13; 3:5-7) Xikwembu xi tote vanhu volavo hi moya lowo kwetsima naswona hikwalaho ka sweswo sweswi i vana va xona. (Varhoma 8:15, 16) Leswi van’wana va vona va ha riki laha misaveni, ha yini Pawulo a vule leswaku va tshame “swin’we etindhawini ta le tilweni evun’weni na Kreste Yesu”? (Vaefesa 2:6) Hi leswi Yehovha a va nyikeke ntshembo wo hanya hilaha ku nga heriki etilweni.—Vaefesa 1:13, 14; Vakolosa 1:5.

¹⁵ Hinkwavo lava nga riki vatotiwa va nga va vanghana va Xikwembu loko va kombisa ripfumelo eka nkutsulo. Na vona va nga amukeriwa tanihi vana va Xikwembu va tlhela va hanya hilaha ku nga heriki emisaveni leyi nga paradeyisi. Nkutsulo wu kombisa ndlela leyi Yehovha a va rhandzaka ha yona vanhu hinkwavo. (Yohane 3:16) Hakunene swa tsakisa  ku tiva leswaku loko hi tirhela Xikwembu hi ku tshembeka, xi ta hi nyika vutomi lebyi nga heriki emisaveni leyintshwa! Hikwalaho, a hi kombiseni leswaku hi wu teka wu ri wa nkoka nkutsulo, ku nga xikombiso lexikulu xa leswaku Xikwembu xi hi rhandza hi rirhandzu leri tiyeke.

16. I yini leswi hi nga ta swi endla endzhaku ko anakanyisisa hi ndlela leyi Xikwembu xi hi rhandzaka ha yona?

¹⁶ A swi koteki ku hlayela tindlela to tala leti Yehovha a kombisaka ha tona leswaku wa hi rhandza. Hosi Davhida u yimbelele a ku: “Miehleketo ya wena i ya risima swinene eka mina! Oho Xikwembu, hinkwaswo ka swona swi tele swinene! Loko a ndzo sungula ku swi hlaya, a swi ta tala ku tlula ni swiribyana swa sava.” (Pisalema 139:17, 18) Loko hi anakanyisisa hi tindlela to tala leti Yehovha a hi rhandzaka ha tona, hi ta susumeteleka ku n’wi rhandza hi tlhela hi n’wi tirhela hilaha hi nga kotaka hakona.

17, 18. Hi tihi tindlela tin’wana leti hi nga kombisaka Xikwembu ha tona leswaku ha xi rhandza?

¹⁷ Ku ni tindlela to tala to kombisa Yehovha leswaku ha n’wi rhandza. Hi xikombiso, hi nga kombisa ndlela leyi hi rhandzaka Yehovha ha yona hi ku chumayela van’wana mahungu lamanene ya Mfumo hi ku hiseka. (Matewu 24:14; 28:19, 20) Hi nga tlhela hi kombisa ndlela leyi hi xi rhandzaka ha yona Xikwembu hi ku yi tiyisela hi ku tshembeka miringo leyi ringaka ripfumelo ra hina. (Hlaya Pisalema 84:11; Yakobo 1:2-5.) Hambiloko miringo ya hina yi tika, hi nga tiyiseka leswaku Yehovha wa ku vona ku xaniseka ka hina naswona u ta hi pfuna hikuva hi va risima eka yena.—Pisalema 56:8.

¹⁸ Ndlela leyi hi rhandzaka Yehovha ha yona yi hi susumetela ku anakanyisisa hi swilo hinkwaswo swo hlamarisa leswi a swi vumbeke. Hi kombisa Yehovha leswaku ha n’wi rhandza swin’we ni Rito rakwe hi ku hisekela ku dyondza Bibele. Hi khongela eka Yehovha nkarhi ni nkarhi hikuva ha n’wi rhandza naswona hi lava ku tiyisa vuxaka bya hina na yena. Naswona loko hi anakanyisisa hi nyiko yakwe ya risima ya nkutsulo, ndlela leyi hi n’wi rhandzaka ha yona yi ya yi kula swinene. (1 Yohane 2:1, 2) Leti ko va tin’wana ta tindlela to tala leti hi kombisaka Yehovha ha tona leswaku hi yi teka yi ri ya nkoka ndlela leyi a hi kombisaka rirhandzu leri tiyeke ha yona.