1, 2. Malandza ya Yehovha ma ni langutelo rihi?

MALANDZA ya Yehovha ma rindze handle ko hela mbilu leswaku vuprofeta byo karhi byi hetiseka. Hi xikombiso, Yeremiya a a langutele leswaku Vababilona va ta lovisa muti wa Yuda, kutani sweswo swi endlekile hi 607 B.C.E. (Yeremiya 25:8-11) Esaya u profete leswaku Yehovha a a ta va tlherisela eYuda Vayuda lava a va yisiwe evuhlongeni kutani a ku: “Va tsaka hinkwavo lava tshamaka va n’wi languterile.” (Esaya 30:18) Mikiya na yena a a langutele leswaku switshembiso swa Yehovha swi ta hetiseka kutani a ku: “Ndzi ta tshama ndzi rindzele Yehovha.” (Mikiya 7:7) Naswona ku ringana madzana ya malembe, malandza ya Xikwembu a ma tiyiseka leswaku Mesiya kumbe Kreste la tshembisiweke a a ta ta.—Luka 3:15; 1 Petro 1:10-12. * (Vona nhlamuselo ya le hansi.)

² Ninamuntlha, na hina hi rindzele ku hetiseka ka vuprofeta lebyi vulavulaka hi Mfumo wa Yehovha. Ku nga ri khale, Yesu, Hosi ya Mfumo wolowo u ta kutsula malandza ya Xikwembu emisaveni  leyi, leyi nga ni khombo. U ta lovisa vanhu vo homboloka a tlhela a herisa ku xaniseka hinkwako. (1 Yohane 5:19) Hikwalaho, hi fanele hi tshama hi langutele leswaku siku ra Yehovha ri ta fika nkarhi wun’wana ni wun’wana hi tlhela hi endla leswi hi nga swi kotaka leswaku hi va hi ri lunghekerile.

3. Loko se hi ri ni nkarhi wo leha hi rindzele makumu leswaku ma fika, i yini leswi hi nga ha tivutisaka swona?

³ Hi ri langutele hi mahlongati siku leri ku rhandza ka Xikwembu ku nga ta endliwa laha misaveni. (Matewu 6:10) Kambe loko se hi ri ni malembe yo tala hi rindzele leswaku makumu ma fika, hi nga ha sungula ku tivutisa hi ku, ‘Ha yini hi fanele hi tshama hi langutele leswaku makumu ma ta fika ku nga ri khale?’

4. Ha yini swi ri swa nkoka leswaku hi ‘tshama hi rindzile’?

⁴ Yesu u lerise valandzeri vakwe leswaku va ‘tshama va rindzile’ ni leswaku va “[hiteka] nkarhi hinkwawo.” Hi yona mhaka swi nga swa nkoka leswaku hi tshama hi langutele leswaku makumu ma ta fika ku nga ri khale. (Matewu 24:42; Luka 21:34-36) Nakambe, nhlengeletano ya Yehovha yi tshamela ku hi tsundzuxa leswaku hi “rindzela ni ku hamba [hi] tsundzuka vukona bya siku ra Yehovha” ni ku tshama hi ri karhi hi anakanya hi xitshembiso xa Yehovha xa misava leyintshwa.—Hlaya 2 Petro 3:11-13.

5. Hi xihi xivangelo xin’wana lexi hi nga na xona xo tshama hi langutele siku ra Yehovha?

⁵ Leswi valandzeri va Yesu enkarhini wa vaapostola a va fanele va tshama va langutele siku ra Yehovha, i swa nkoka swinene eka hina namuntlha ku endla tano. Ha yini? Hikuva xikombiso lexi Yesu a xi vuleke xi kombisa leswaku u ve Hosi ya Mfumo wa Xikwembu ku sukela hi 1914 ni leswaku hi hanya emasikwini yo hetelela, kumbe “[emakumu] ya mafambiselo ya swilo.” Hi xikombiso, hilaha Yesu a profeteke hakona, swiyimo swa misava swa nyanya naswona mahungu lamanene ya Mfumo ma chumayeriwa emisaveni hinkwayo. (Matewu 24:3, 7-14) Yesu a nga vulanga leswaku masiku yo hetelela ma ta leha ku fika kwihi, hikwalaho hi fanele hi va hi lunghekile hikuva makumu ma nga fika nkarhi wun’wana ni wun’wana.

6. Hi swi tivisa ku yini leswaku swiyimo swa misava swi ta nyanya ku biha loko makumu se ma ri kusuhi swinene?

⁶ Xana “makumu ya mafambiselo ya swilo” ku nga ha va ku ri nkarhi lowu wa ha taka, laha vuhomboloki emisaveni byi nga ta va byi nyanyile ku tlula sweswi? Bibele yi vula leswaku vanhu va ta nyanya ku homboloka “emasikwini yo hetelela.” (2 Timotiya 3:1, 13; Matewu 24:21; Nhlavutelo 12:12) Hikwalaho, hambileswi swilo swi nyanyeke ku biha sweswi, ha swi tiva leswaku swi ta ya emahlweni swi nyanya.

7. Matewu 24:37-39 yi hi dyondzisa yini malunghana ni swiyimo swa misava emasikwini yo hetelela?

⁷ Van’wana va nga ha anakanya leswaku ku ta va ni nyimpi etikweni rin’wana ni rin’wana loko ‘nhlomulo lowukulu’ wu nga si sungula, ni leswaku vanhu vo tala va ta khomiwa hi mavabyi kumbe va sika hi ndlala. (Nhlavutelo 7:14) Kambe loko a ko endleka sweswo, munhu un’wana ni un’wana a a ta swi vona leswaku vuprofeta bya le Bibeleni bya hetiseka. A swi ta va erivaleni ni le ka vanhu lava nga riki na mhaka ni leswi Bibele yi swi vulaka. Tsundzuka, Yesu u vule leswaku emasikwini yo hetelela, vanhu vo tala ‘a va nga ta lemuka nchumu.’ A va ta ya emahlweni ni vutomi bya vona bya siku ni siku naswona a va ta tsemeka nhlana loko siku ra Yehovha ri fika. (Hlaya Matewu 24:37-39.) Swi le rivaleni leswaku a hi fanelanga hi langutela leswaku swiyimo swa misava swi ta va swi  bihe ku tlula mpimo loko ‘nhlomulo lowukulu’ wu nga si sungula, lerova vanhu va kala va boheka ku pfumela leswaku makumu ma le kusuhi.—Luka 17:20; 2 Petro 3:3, 4.

8. I yini lexi hi khorwisekaka ha xona leswi hi xalamukeleke xikombiso xa Yesu?

⁸ Eka xikombiso lexi Yesu a vulavuleke ha xona, a a lava ku nyika valandzeri vakwe xitsundzuxo lexi nga erivaleni xa nkarhi lowu a va ta va va hanya eka wona. Valandzeri va Yesu a va xalamukile. (Matewu 24:27, 42) Swiyenge swo hambanahambana swa xikombiso xa Yesu a swi ri karhi swi hetiseka ku sukela hi 1914. Ha khorwiseka leswaku hi hanya emasikwini yo hetelela, ku nga “makumu ya mafambiselo ya swilo.” Yehovha se u ri vekile siku leri a nga ta lovisa misava yo homboloka ya Sathana ha rona.

9. Ha yini hi fanele hi tshama hi langutele leswaku makumu ma ta fika ku nga ri khale?

⁹ Hikwalaho ha yini hi fanele hi tshama hi langutele leswaku makumu ma ta fika ku nga ri khale? Hikuva hi yingisa Yesu Kreste. Nakambe, hi swi vona kahle leswaku xikombiso lexi Yesu a xi vuleke malunghana ni masiku yo hetelela xa hetiseka. Ha tshemba leswaku makumu ma tshinele, ku nga ri hileswi hi tshembaka swilo hinkwaswo leswi hi swi twaka, kambe hileswi hi khorwisekaka leswaku vuprofeta bya Bibele bya hetiseka. Hi fanele hi tshama hi xalamukile naswona hi lunghekele ku fika ka makumu.

10, 11. (a) Ha yini Yesu a byele vadyondzisiwa vakwe leswaku va ‘tshama va rindzile’? (b) Yesu u byele valandzeri vakwe leswaku va endla yini loko makumu ma nga fiki hi ku hatlisa hilaha a va anakanya hakona? (Vona xifaniso lexi nga eku sunguleni ka xihloko lexi.)

¹⁰ Vamakwerhu vo tala va ni malembe yo tala va ri karhi va tirhela Yehovha hi ku tshembeka naswona va rindzele leswaku siku ra yena ri fika. Ku nga khathariseki leswaku hi ni nkarhi wo tanihi kwihi hi rindzile, hi fanele hi langutela leswaku siku rolero ri ta fika ku nga ri khale. Hi fanele hi va hi lunghekile loko Yesu a tela ku ta lovisa misava ya Sathana. Tsundzuka leswi Yesu a swi byeleke valandzeri vakwe leswaku va swi endla: “Tshamani mi langutile, tshamani mi hitekile, hikuva a mi swi tivi leswaku nkarhi lowu vekiweke wu fika rini. Swi fana ni munhu la endzelaka etikweni ra le kule, a siya yindlu yakwe naswona a nyika mahlonga yakwe vulawuri, rin’wana ni rin’wana ntirho wa rona, kutani a lerisa mulanguteri wa nyangwa leswaku a tshama a rindzile. Hikokwalaho tshamani mi rindzile, hikuva a mi swi tivi leswaku n’wini wa yindlu u ta rini, kumbexana eku heleni ka siku kumbe exikarhi ka vusiku kumbe loko nkuku wu ringa kumbe nimixo swinene; leswaku loko a fika hi xitshuketa, a nga mi kumi mi etlele. Kambe leswi ndzi mi byelaka swona, ndzi swi byela hinkwavo, Tshamani mi rindzile.”—Marka 13:33-37.

¹¹ Loko valandzeri va Yesu va swi tivile leswaku u sungule ku fuma hi 1914, va swi xiyile leswaku makumu ma nga fika nkarhi wihi ni wihi. Hikwalaho va ma lunghekerile hi ku endla leswi engetelekeke entirhweni wo chumayela. Yesu u vule leswaku a nga ha fika eku heleni ka siku, “loko nkuku wu ringa kumbe nimixo swinene.” Loko sweswo swi humelela, xana valandzeri vakwe a va fanele va endla yini? Yesu u te: “Tshamani mi rindzile.” Hikwalaho  hambiloko hi vona onge se hi rindze nkarhi wo leha, sweswo a swi vuli swona leswaku makumu ma ha ri ekule kumbe leswaku a ma nge fiki enkarhini wa hina.

12. Habakuku u n’wi vutise yini Yehovha, naswona Xikwembu xi n’wi hlamule njhani?

¹² Muprofeta Habakuku u lehise mbilu a rindza loko a ri karhi a chumayela hi ku lovisiwa ka muti wa Yerusalema. Ni vaprofeta van’wana va le mahlweni ka yena a va chumayela rungula rolero ku ringana malembe yo tala. Habakuku u swi xiyile leswaku vuhomboloki ni ku pfumaleka ka vululami a swi tinyike matimba ku tlula emahlweni ka kwalaho. U kombele Yehovha leswaku a n’wi pfuna, kutani a vutisa a ku: “Oho Yehovha, xana ndzi ta kombela ku pfuniwa ku fikela rini?” Hambileswi Yehovha a nga n’wi byelangiki leswaku makumu ma ta fika rini, u tshembise Habakuku a ku: “A [ma] nge hlweli.” Yehovha u tlhele a byela Habakuku leswaku a “tshama [a ma] languterile.”—Hlaya Habakuku 1:1-4; 2:3.

13. I yini leswi Habakuku a a ta va a swi anakanyile, naswona ha yini sweswo a swi ta va ni khombo?

¹³ A hi nge Habakuku u karhale ku rindzela makumu ivi a ku: ‘Se ndzi ni malembe yo tala ndzi rindzele ku lovisiwa ka muti wa Yerusalema. Makumu ma ha ri ekule swinene. A swi bohi leswaku ndzi ya emahlweni ndzi chumayela malunghana na wona. Van’wana va nga wu endla ntirho lowu.’ Xana a ku ta va ku endleke yini loko a a lo anakanya hi ndlela yoleyo? A a ta va a nga ha amukeleki eka Yehovha. Naswona loko a a nga lunghekanga loko makumu ma fika, a a ta va a lovisiwile.

14. Ha yini hi ta swi tlangela leswi Yehovha a hi tsundzuxeke leswaku hi tshama hi langutele makumu?

¹⁴ Tianakanye u ri emisaveni leyintshwa. Swiendlakalo hinkwaswo leswi ku profetiweke ha swona malunghana ni masiku ya makumu swi endleke hilaha Yehovha a vuleke hakona. Se u n’wi tshemba swinene Yehovha, naswona wa khorwiseka swinene leswaku U ta swi endla swilo hinkwaswo leswi a swi tshembiseke. (Hlaya Yoxuwa 23:14.) Wa swi tlangela leswi Yehovha a vekeke nkarhi lowu faneleke wo tisa makumu ni leswi a tsundzuxeke vanhu vakwe leswaku va tshama va ma languterile.—Mintirho 1:7; 1 Petro 4:7.

15, 16. Ha yini hi fanele hi endla leswi hi nga swi kotaka entirhweni wo chumayela enkarhini lowu wa makumu?

¹⁵ Nhlengeletano ya Yehovha yi ta tshama yi ri karhi yi hi tsundzuxa leswaku hi tshama hi ri karhi hi anakanya hi ku tirhela Yehovha. Switsundzuxo leswi swi hi pfuna leswaku hi tshama hi khomekile hi ku tirhela Xikwembu ni ku  swi vona kahle leswaku rungula ra hina i ra xihatla. Ha khorwiseka leswaku xikombiso lexi Yesu a xi vuleke xa hetiseka sweswi ni leswaku makumu ma ta fika ku nga ri khale. Hikwalaho hi rhangisa Yehovha evuton’wini bya hina naswona hi ya emahlweni hi chumayela mahungu lamanene ya Mfumo.—Matewu 6:33; Marka 13:10.

¹⁶ Loko hi chumayela van’wana mahungu lamanene, hi va pfuna leswaku va nga lovisiwi loko misava ya Sathana yi lovisiwa ku nga ri khale. Khombo rin’wana lerikulu leri endlekeke elwandle ri humelele hi 1945 loko xikepe lexi vuriwaka Wilhelm Gustloff xi mbombomela. Vanhu va magidi va file. Makwerhu un’wana wa xisati ni nuna wakwe va ponisiwile exikepeni xolexo. U vula leswaku ni loko xikepe xolexo xi ri karhi xi mbombomela, wansati un’wana a a ri karhi a huwelela a ku: “Mindzhwalo ya mina! Mindzhwalo ya mina! Swin’wetsin’wetsi swa mina! Swin’wetsin’wetsi swa mina hinkwaswo swi laha ku vekiwaka kona mindzhwalo. Swi lovile hinkwaswo!” Kambe vakhandziyi van’wana a va swi tiva leswaku i yini lexi a xi ri xa nkoka swinene kutani va tirhe hi matimba leswaku va ponisa vanhu. Namuntlha vutomi byi le khombyeni. Na hina hi lava ku fana ni vakhandziyi volavo lava a va nga ri na vutianakanyi kutani hi anakanyisisa hi ndlela leyi ntirho wa hina wo chumayela wu nga wa xihatla ha yona. Hi fanele hi endla hinkwaswo leswi hi nga swi kotaka leswaku hi pfuna vanhu va pona loko mafambiselo lawa ma lovisiwa.

17. Ha yini hi fanele hi swi tshemba leswaku makumu ma nga fika nkarhi wihi ni wihi?

 ¹⁷ Hi swi vona kahle leswaku vuprofeta bya Bibele bya hetiseka ni leswaku makumu ya mafambiselo lawa yo homboloka ma le kusuhi swinene. Hi rindzele leswaku “timhondzo ta khume” ni “xivandzana” swi hlasela Babilona Lonkulu, ku nga vukhongeri bya mavunwa. (Nhlavutelo 17:16) A hi fanelanga hi anakanya leswaku ku ta hundza nkarhi wo leha sweswo swi nga si endleka. U nga rivali leswaku Xikwembu xi ta ‘swi nghenisa etimbilwini ta swona’ leswaku swi hlasela vukhongeri bya mavunwa naswona sweswo swi nga humelela hi ku hatlisa nkarhi wihi ni wihi! (Nhlavutelo 17:17) Misava yo homboloka ya Sathana yi ta lovisiwa ku nga ri khale. Hikwalaho hi fanele hi yingisa xitsundzuxo xa Yesu lexi nge: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi, kutani hi xitshuketa siku rero ri mi wela hi xihatla ku fana ni ntlhamu.” (Luka 21:34, 35; Nhlavutelo 16:15) A hi tshameni hi xalamukile naswona hi tshama hi khomekile entirhweni wa Yehovha, hi tiyiseka leswaku “[u endla] swo karhi a endlela loyi a tshamaka a n’wi languterile.”—Esaya 64:4.

18. Hi xihi xivutiso lexi nga ta hlamuriwa exihlokweni lexi landzelaka?

¹⁸ Loko ha ha rindzele makumu ya misava leyi yo homboloka, hi fanele hi yingisa ndzayo leyi humaka eka mudyondzisiwa Yudha, leyi nge: “Varhandziwa, hi ku tiaka eripfumelweni ra n’wina ro kwetsima swinene, mi khongela hi moya wo kwetsima, tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.” (Yudha 20, 21) Kambe hi nga swi kombisa njhani leswaku hi langutele leswaku misava leyintshwa ya Xikwembu yi ta fika ku nga ri khale ni leswaku hi yi langutele hi mahlongati? Mhaka yoleyo hi ta bula hi yona exihlokweni lexi landzelaka.