1, 2. Hi yihi pakani ya Mukreste un’wana ni un’wana? Vula xikombiso.

I YINI lexi manana wa muti a xi langutaka loko a hlawula mihandzu emakete? A swi kanakanisi leswaku a nga languti mihandzu leyikulu kumbe leyi chipeke ngopfu. Kambe, u languta mihandzu leyi nun’hwelaka kahle yi tlhela yi langutekaka yi ri yinene naswona yi lunghekeleke ku dyiwa. U lava mihandzu leyi wupfeke.

² Endzhaku ka loko munhu a dyondze hi Yehovha ivi a endla xiboho xo khuvuriwa, vuxaka bya yena ni Xikwembu byi ya emahlweni byi kula. Pakani ya yena i ku va Mukreste la wupfeke. Ku wupfa koloko a swi vuli ku va la dyuhaleke. Swi vula ku kula hi tlhelo ra moya, ku nga ku va ni vuxaka lebyikulu na Yehovha. Muapostola Pawulo a a lava leswaku Vakreste va le Efesa va va lava wupfeke. U va khutaze ku va ni vun’we eripfumelweni ni ku ya emahlweni va dyondza hi Yesu leswaku va va “vanhu lava kuleke hi ku helela, hi mpimo wa vukulu lebyi nga bya ku tala ka Kreste.”—Vaefesa 4:13.

3. Vandlha ra le Efesa ri fana njhani ni vanhu va Yehovha namuntlha?

 ³ Vandlha ra le Efesa se a ri ri ni malembe yo hlayanyana ri ri kona loko Pawulo a ri tsalela papila. Vo tala evandlheni rolero se a va ri Vakreste lava nga ni ntokoto naswona va wupfeke. Kambe van’wana va vona a va ha fanele va tiyisa vuxaka bya vona na Yehovha. Ninamuntlha, vamakwerhu vo tala va ni nkarhi wo leha va tirhela Yehovha naswona i Vakreste lava wupfeke. Hambiswiritano, van’wana emavandlheni a va si wupfa. Hi xikombiso, vanhu va magidi va khuvuriwa lembe ni lembe, hikwalaho van’wana va ha fanele va tikarhatela ku va lava wupfeke. Ku vuriwa yini hi wena?—Vakolosa 2:6, 7.

4, 5. Vakreste lava wupfeke va hambana njhani, kambe hi wihi nchumu lowu hinkwavo va nga na wona? (Vona xifaniso lexi nga eku sunguleni ka xihloko lexi.)

⁴ Loko u languta mihandzu leyi wupfeke emakete, wa swi xiya leswaku a yi ringani. Hambiswiritano, ku ni swilo swo karhi leswi endlaka yi tikomba leswaku yi wupfile. Swi tano ni hi Vakreste lava wupfeke. A va fani. Va huma ematikweni yo hambanahambana naswona a va kurisiwanga hi ndlela leyi fanaka. A va ringani hi malembe naswona leswi va swi rhandzaka ni leswi va nga swi rhandziki a swi fani. Nilokoswiritano, Vakreste hinkwavo lava wupfeke va ni timfanelo to karhi leti kombisaka leswaku va wupfile. Hi tihi tin’wana ta timfanelo teto?

⁵ Mukreste la wupfeke u tekelela Yesu naswona u “landzelerisisa mikondzo yakwe.” (1 Petro 2:21) Yesu u vule leswaku i swa nkoka ngopfu leswaku munhu a rhandza Yehovha hi mbilu ya yena hinkwayo, hi moya-xiviri wa yena hinkwawo ni hi mianakanyo ya yena hinkwayo ni ku rhandza warikwavo kukota loko a tirhandza. (Matewu 22:37-39) Mukreste la wupfeke u ringeta hi matimba ku yingisa xileriso xolexo. Ndlela leyi a hanyaka ha yona yi kombisa leswaku u teka vuxaka bya yena na Yehovha byi ri bya nkoka swinene swin’we ni ndlela leyikulu leyi a rhandzaka van’wana ha yona.

6, 7. (a) Hi tihi timfanelo tin’wana leti kombisaka leswaku Mukreste u wupfile? (b) Hi swihi swivutiso leswi hi faneleke hi tivutisa swona?

⁶ Rirhandzu i yin’wana ya timfanelo to tala leti Mukreste la wupfeke a ti kombisaka. (Vagalatiya 5:22, 23) U tlhela a kombisa ku olova, ku tikhoma ni ku lehisa mbilu. Timfanelo leti ti nga n’wi pfuna leswaku a tiyisela swiyimo swo tika handle ko hlundzuka a tlhela a tiyisela loko a hetiwa matimba kambe a nga heleriwi hi ntshembo. Eka dyondzo ya yena n’wini, Mukreste la wupfeke u tshama a ri karhi  a lavisisa milawu leyi kongomisaka ya Bibele, leyi n’wi pfunaka ku tiva leswinene ni leswi hoxeke. Kutani loko a tirhisa ripfalo ra yena leri leteriweke hi Bibele u ta kota ku endla swiboho swa vutlhari. Mukreste la wupfeke wa titsongahata, hikwalaho wa khorwiseka leswaku minkarhi hinkwayo nkongomiso ni milawu ya Yehovha i swa nkoka ku tlula ndlela leyi yena a anakanyaka ha yona. * (Vona nhlamuselo ya le hansi.) U chumayela mahungu lamanene hi ku hiseka naswona u endla leswi a nga swi kotaka ku pfuna vandlha leswaku ri tshama ri ri ni vun’we.

⁷ Ku nga khathariseki leswaku hi ni nkarhi wo tanihi kwihi hi ri karhi hi tirhela Yehovha, un’wana ni un’wana wa hina a nga ha tivutisa: ‘Xana ku ni ku cinca loku ndzi nga ku endlaka leswaku ndzi tekelela Yesu swinene? Xana swi kona leswi ndzi nga swi antswisaka?’

8. Yesu a a yi tiva ni ku yi twisisa ku fikela kwihi Bibele?

⁸ Yesu Kreste a a ma tiva kahle Matsalwa a tlhela a ma twisisa. Loko a ri ni malembe ya 12, u tirhise Matsalwa loko a vulavula ni vadyondzisi etempeleni. “Hinkwavo lava a va  n’wi yingisile a va hlamala va nga heti hikwalaho ka ku twisisa kakwe ni tinhlamulo takwe.” (Luka 2:46, 47) Siku rin’wana, loko a ri karhi a chumayela, u tirhise Rito ra Xikwembu hi ndlela leyinene leswaku a miyeta valala vakwe.—Matewu 22:41-46.

9. (a) Hi xihi xiyimiso xo hlaya lexi Mukreste la wupfeke a nga na xona? (b) Ha yini hi hlaya Bibele?

⁹ Munhu loyi a lavaka ku va Mukreste la wupfeke u tekelela xikombiso xa Yesu naswona u lava ku twisisa Bibele hilaha a nga kotaka hakona. U tshamela ku lavisisa ntiyiso lowu enteke wa le Matsalweni hikuva wa swi tiva leswaku “swakudya leswi tiyeke i swa vanhu lava wupfeke.” (Vaheveru 5:14) Mukreste la wupfeke u lava ku va ni “vutivi lebyi kongomeke” bya Bibele. (Vaefesa 4:13) Hikwalaho tivutise: ‘Xana ndzi hlaya Bibele siku ni siku? Xana ndzi na xona xiyimiso xa dyondzo ya munhu hi yexe? Xana ndza byi endla vugandzeri bya ndyangu vhiki ni vhiki?’ Loko u ri karhi u hlaya Bibele, lavisisa milawu leyi kongomisaka leyi nga ta ku pfuna ku tiva ndlela leyi Yehovha a anakanyaka ni ku titwa ha yona. Endzhaku ka sweswo tirhisa milawu yoleyo loko u endla swiboho. Sweswo swi ta ku pfuna leswaku u tshinela eka Yehovha.

10. Mukreste la wupfeke u titwa njhani hi swileriso ni milawu leyi kongomisaka ya Xikwembu?

¹⁰ Mukreste la wupfeke a nga fanelanga a tiva leswi Bibele yi swi vulaka ntsena. U fanele a rhandza swileriso ni milawu leyi kongomisaka ya Xikwembu. Rirhandzu rolero u ta ri kombisa hi ku navela ku endla ku rhandza ka Yehovha ku ri ni ku endla ku rhandza ka yena. U cinca ni ndlela leyi a hanyaka ha yona, ndlela leyi a anakanyaka ha yona ni ndlela leyi a endlaka swilo ha yona. Hi xikombiso, u tekelela Yesu a tlhela a ambala vumunhu lebyintshwa lebyi “tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Hlaya Vaefesa 4:22-24.) I swa nkoka ku tsundzuka leswaku Xikwembu xi tirhise moya wa xona lowo kwetsima ku kongomisa vatsari va Bibele. Hikwalaho loko Mukreste a dyondza Bibele, moya lowo kwetsima wa Xikwembu wa n’wi pfuna leswaku vutivi byakwe byi kula, ndlela leyi a rhandzaka milawu ya Bibele ha yona yi kula ku katsa ni vuxaka bya yena na Yehovha.

11. I yini leswi Yesu a langutaneke na swona loko a ha ri laha misaveni?

¹¹ Yesu a a ri munhu la hetisekeke. Hambiswiritano, loko a ri laha misaveni, Yesu a a hanya ni vanhu lava nga hetisekangiki. Vatswari vakwe ni vamakwavo vakwe va xinuna ni va xisati a va nga hetisekanga. Hambi ku ri valandzeri va Yesu lavakulu va kombise timfanelo to tanihi ku tikukumuxa ni ku khathala hi vona vini ntsena. Hi xikombiso, hi vusiku byo hetelela a nga si dlayiwa, vadyondzisiwa vakwe va kanetanile “malunghana ni loyi a vonakaka a ri lonkulu eka hinkwavo.” (Luka 22:24) Ku nga khathariseki miehleketo ya vona leyi hoxeke, Yesu a a swi tiva leswaku ku nga ri khale valandzeri va yena a va ta va Vakreste lava wupfeke va tlhela va vumba vandlha leri nga ni vun’we. Hi vusiku byolebyo, Yesu u va khongelerile leswaku va va ni vun’we. U kombele Tata wakwe wa le tilweni leswaku hinkwavo va va ni vun’we, a ku: “Tanihi leswi wena, Tatana, u nga ni vun’we na mina ni leswi na mina ndzi nga ni vun’we na wena.” U ye emahlweni a ku: “Leswaku va va un’we tanihi leswi hina hi nga un’we.”—Yohane 17:21, 22.

12, 13. (a) Hi yihi pakani ya hina Vakreste? (b) I yini leswi makwerhu un’wana wa xinuna a swi endleke leswaku a dyondza ku kondletela vun’we?

 ¹² Mukreste la wupfeke u kondletela vun’we evandlheni. (Hlaya Vaefesa 4:1-6, 15, 16.) Pakani ya hina Vakreste i ku “hlanganisiwa swin’we hi vun’we,” hileswaku hi tirha swin’we hi vun’we. Leswaku ku va ni vun’we byolebyo, Mukreste ha un’we u fanele a titsongahata. Hambiloko Mukreste la wupfeke a karhatiwa hi swihoxo swa van’wana, u tikarhatela ku hlayisa vun’we bya le vandlheni byi ri lebyi tiyeke. Hikwalaho, tivutise: ‘Xana ndzi endla yini loko makwerhu a endla xihoxo? Ndzi titwa njhani loko un’wana a ndzi twise ku vava? Xana a ndza ha n’wi vulavurisi? Kumbe ndzi ringeta hi matimba ku lunghisa vuxaka bya hina?’ Mukreste la wupfeke u fanele a hlula xiphiqo ematshan’weni ya leswaku yena a va xiphiqo eka van’wana.

¹³ Anakanya hi xikombiso xa Uwe. Enkarhini lowu hundzeke, a a pfumela ku hlundzukisiwa hi swihoxo swa vamakwerhu. Kutani u endle xiboho xa ku tirhisa Bibele ni buku leyi nge Insight on the Scriptures, a hlaya hi vutomi bya Davhida. Ha yini a hlawule Davhida? Hikuva malandza man’wana ya Xikwembu ma vangele Davhida swiphiqo swo karhi. Hi xikombiso, Hosi Sawulo u ringete ku dlaya Davhida, vanhu van’wana a va lava ku n’wi khandla hi maribye, hambi ku ri nsati wakwe u n’wi hlekurile. (1 Samuwele 19:9-11; 30:1-6; 2 Samuwele 6:14-22) Kambe ku nga khathariseki leswi vanhu van’wana va n’wi endleke swona, Davhida a a rhandza Yehovha a tlhela a n’wi tshemba. Davhida u tlhele a kombisa musa. Uwe wa pfumela leswaku na yena a a fanele a endla leswi fanaka. Loko a ri karhi a dyondza Bibele, u xiye leswaku u fanele a cinca ndlela leyi a titwaka ha yona hi swihoxo swa vamakwavo va le vandlheni. A a fanele a tshika ku tsundzuka swihoxo swa vona kutani a kondletela vun’we evandlheni. Xana na wena u tiyimisele ku endla leswi fanaka?

14. Yesu u hlawule vanhu va njhani leswaku va va vanghana vakwe?

¹⁴ Yesu Kreste a a ri ni xinghana eka vanhu. Vavanuna ni vavasati, vanhu lavakulu ni lavatsongo, hambi ku ri vana a va titwa va ntshunxekile loko va ri na Yesu. Kambe u hlawule vanghana va yena lavakulu hi vukheta. U byele vaapostola vakwe a ku: “Mi vanakulorhi va mina loko mi endla leswi ndzi mi lerisaka swona.” (Yohane 15:14) Yesu u hlawule vanghana va yena lavakulu exikarhi ka valandzeri vakwe vo tshembeka, lava a va tirhela Yehovha va tlhela va N’wi rhandza. Xana na wena u hlawula vanghana lava rhandzaka Yehovha hi timbilu ta vona hinkwato? Ha yini swi ri swa nkoka ku endla tano?

15. Vantshwa va nga vuyeriwa njhani loko va va vanghana va Vakreste lava wupfeke?

¹⁵ Mihandzu yo tala yi wupfa kahle loko ku ri ni masana. Hi ndlela leyi fanaka, rirhandzu ra vamakwerhu va xinuna ni va xisati ri nga ku pfuna leswaku u va Mukreste la wupfeke. Xana u muntshwa loyi a ringetaka ku endla xiboho xa leswi u nga ta swi endla hi vutomi  bya wena? Loko swi ri tano, u ta va u tlharihile loko u hlawula vanghana lava se va nga ni nkarhi wo leha va tirhela Yehovha naswona va kondletelaka vun’we evandlheni. Va nga ha va va ve ni swiphiqo evuton’wini naswona va nga ha va va tiyisele miringo yo karhi loko va ri karhi va tirhela Yehovha. Va nga ku pfuna leswaku u hlawula ndlela leyinene ya vutomi. Loko u heta nkarhi u ri na vona, va nga ku pfuna leswaku u endla swiboho swa vutlhari u tlhela u va Mukreste la wupfeke.—Hlaya Vaheveru 5:14.

16. Vamakwerhu lava kuleke va n’wi pfune njhani makwerhu un’wana wa xisati loko a ha ri muntshwa?

¹⁶ Helga u vula leswaku hi lembe leri a heteke ha rona xikolo, vo tala va vana lava a a nghena na vona xikolo a va vulavula hi tipakani ta vona ta le nkarhini lowu taka. Vo tala va vona a va lava ku ya eyunivhesiti leswaku va ta kuma mintirho leyi hakelaka. Hambiswiritano, Helga u vulavule ni vanghana vakwe lava wupfeke va le vandlheni. U ri: “Vo tala va vona a va ri vakulu eka mina naswona va ndzi pfunile swinene. Va ndzi khutaze ku teka vuphayona. Endzhaku ka sweswo, ndzi hete malembe ya ntlhanu ndzi ri karhi ndzi phayona. Sweswi, endzhaku ka malembe yo tala, ndzi tsakile hileswi ndzi tirhiseke malembe ya vuntshwa bya mina ndzi tirhela Yehovha. A ndzi tisoli hileswi ndzi endleke tano.”

17, 18. Hi nga n’wi tirhela njhani Yehovha hi ndlela leyinene?

¹⁷ Loko hi tekelela Yesu, hi ta va Vakreste lava wupfeke. Hi ta tshinela eka Yehovha naswona ku navela ka hina ko n’wi tirhela na kona ku ta kula. Munhu u tirhela Yehovha hi ndlela leyinene loko a wupfile. Yesu u khutaze valandzeri vakwe a ku: “Ku voninga ka n’wina a ku vonakale emahlweni ka vanhu, leswaku va ta vona mintirho ya n’wina leyinene kutani va vangamisa Tata wa n’wina la nge matilweni.”—Matewu 5:16.

¹⁸ Hi dyondze hi ndlela leyi Mukreste la wupfeke a nga vaka xikhutazo lexikulu ha yona evandlheni. Ndlela leyi Mukreste a tirhisaka ripfalo ra yena ha yona yi tlhela yi kombisa leswaku u wupfile. Mapfalo ya hina ma nga hi pfuna njhani leswaku hi endla swiboho swa vutlhari? Naswona hi nga ma xixima njhani mapfalo ya vanhu van’wana? Swivutiso leswi hi ta swi hlamula exihlokweni lexi landzelaka.