LOKO ndzi va ni malembe ya kaye, a ndza ha lehanga. Sweswi ndzi ni malembe ya 43 naswona ndzi lehe mitara yin’we ntsena. Loko vatswari va mina va xiye leswaku a ndza ha lehi, va ndzi khutaze ku tirha hi matimba leswaku ndzi nga tshameli ku ehleketa hi ku koma ka mina. Leswaku ndzi tshama ndzi khomekile, ndzi paka mihandzu etafuleni leri nga emahlweni ka yindlu ya ka hina naswona ri tshama ri basile. Sweswo swi koke vaxavi vo tala.

Entiyisweni, ku tirha hi matimba a swi xi cincanga xiyimo xa mina. Ndza ha komile naswona swa ndzi tikela ku endla swilo hambi swi olova swo tanihi ku fikelela etafuleni ro hakela exitolo. Phela eka mina swilo hinkwaswo swi vonaka swi endleriwe vanhu vo leha ngopfu. A ndzi tshamela ku tiputa vusiwana, kambe loko ndzi ri ni malembe ya 14 vutomi bya mina byi cincile.

Siku rin’wana, vavasati vambirhi lava nga Timbhoni ta Yehovha va xave mihandzu kutani va kombela ku ndzi dyondzela Bibele. Swi nga si ya kule, ndzi xiye leswaku ku tiva Yehovha ni xikongomelo xa yena a swi ri swa nkoka ku tlula ku koma ka mina. Sweswo swi ndzi pfunile swinene. Pisalema 73:28 i tsalwa leri ndzi ri rhandzaka swinene. Xiphemu xo sungula xa ndzimana leyi xi ri: “Ku tshinela eka Xikwembu i swinene eka mina.”

Hi xitshuketa ndyangu wa ka hina wu rhurhe eCôte d’Ivoire wu ya eBurkina Faso naswona vutomi bya mina byi cince swinene. Laha a hi tshama kona khale, vanhu a va tolovele ku ndzi vona ndzi tshame etlhelo ka tafula ra mihandzu. Kambe laha hi rhurheleke kona, vanhu vo tala a va nga ndzi tivi naswona eka vo tala a ndzi nga tolovelekanga. Vanhu a va ndzi xondzolota, kutani ndzi tshame endlwini mavhiki yo tala. Ndzi tsundzuke leswaku a swi ri swinene eka mina ku tshinela eka Yehovha. Ndzi tsalele rhavi ra Timbhoni ta Yehovha kutani ri rhumele munhu loyi a fanelekaka. Nani loyi a nga murhumiwa, u ndzi endzerile hi xithuthuthu.

Sava ra le switarateni swa ndhawu leyi hi tshamaka eka yona ra rheta naswona hi nguva ya mpfula ku va ni ridaka. Nani u we ko tala hi xithuthuthu loko a ta eku dyondzeni na mina, kambe a nga helanga matimba. Siku rin’wana, u ndzi byele leswaku ndzi nga famba na yena eminhlanganweni. Ndzi xiye leswaku sweswo a swi ta vula leswaku ndzi fanele ndzi huma endlwini ndzi tlhela ndzi tiyiselela ku xondzolotiwa hi vanhu. Kasi ku va hi khandziya xithuthuthu hi ri va vambirhi a swi ta tikanyana ku xi lawula. Hambiswiritano, ndzi pfumerile hileswi ndzi tsundzukeke xiphemu xa vumbirhi xa tsalwa leri  ndzi ri rhandzaka lexi nge: “Ndzi veke vutumbelo bya mina eka Yehovha, Hosi leyi Lawulaka.”

Mina na Nani minkarhi yin’wana a hi wela eridakeni, kambe leswi a hi rhandza minhlangano a hi nga ri na mhaka na swona. Hakunene a ku ri ni ku hambana eka ndlela leyi vamakwerhu eHolweni ya Mfumo a va ndzi khoma ha yona ni ndlela leyi vanhu van’wana ehandle a va ndzi teka ha yona! Ndzi khuvuriwe endzhaku ka tin’hweti ta kaye.

“Ku vula mintirho ya wena hinkwayo” i xiphemu xa vunharhu xa tsalwa leri ndzi ri rhandzaka ngopfu. A ndzi swi tiva leswaku ku chumayela a swi ta va ntlhontlho lowukulu eka mina. Ndza ha ri tsundzuka siku ro sungula loko ndzi ya eku chumayeleni hi yindlu ni yindlu. Lavakulu ni lavatsongo a va ndzi xondzolota va ndzi landzelela naswona va endla xihlekiso hi ndlela leyi ndzi fambaka ha yona. Sweswo swi ndzi twise ku vava, kambe loko ndzi tsundzuke leswaku va lava Paradeyisi ku fana na mina, ndzi kote ku tiyisela.

Ku olovisa swilo, ndzi kume xikanyakanya xa mavhilwa manharhu lexi fambisiwaka hi mavoko. Loyi a ndzi famba na yena ensin’wini a a ndzi chovha exigangeni kutani loko hi rhelela a a khandziya. Hambileswi ku chumayela a ku ri ntlhontlho eku sunguleni, swi nga si ya kwihi swi ndzi endle ndzi tsaka swinene lerova hi 1998, ndzi ve phayona ra nkarhi hinkwawo.

Ndzi fambise tidyondzo to tala ta Bibele, naswona eka swichudeni swoleswo ku khuvuriwe mune wa swona. Ku engetela kwalaho, un’wana wa vasesi va mina u amukele ntiyiso! Ku twa ndlela leyi van’wana va endlaka nhluvuko ha yona minkarhi hinkwayo swa ndzi khutaza. Siku rin’wana loko ndzi khomiwe hi malariya, ndzi kume papila leri a ri huma eCôte d’Ivoire. A ndzi sungule dyondzo ya Bibele ndzi yime enyangweni ni xichudeni lexi nga le yunivhesiti ya le Burkina Faso naswona ndzi xi nyike makwerhu wa xinuna. Hi ku famba ka nkarhi, xichudeni xolexo xi rhurhele eCôte d’Ivoire. A ndzi tsakile loko ndzi twa leswaku i muhuweleri la nga khuvuriwangiki!

A ndzi ta tihanyisa njhani? Nhlangano lowu pfunaka vanhu lava lamaleke wu ndzi dyondzise ku rhunga. Mudyondzisi un’wana u xiye ndlela leyi a ndzi endla swilo ha yona kutani a ku, “Hi fanele hi ku dyondzisa ku endla xisibi.” Kutani va ndzi dyondzisile. Sweswi ndzi endla xisibi xo hlantswa ni xo xi tirhisa endlwini, ndzi ri ekaya. Vanhu a va xi rhandza xisibi xa mina naswona va byele van’wana hi xona. A ndzi va yisela xona, ndzi tirhisa xithuthuthu xa mavhilwa manharhu.

Lexi vavisaka, hi 2004, ndzi boheke ku tshika vuphayona hikwalaho ka switlhavi enhlaneni wa mina. Kambe ndza ha ya ensin’wini minkarhi hinkwayo.

Vanhu va vula leswaku ndzi tiveriwa ku n’wayitela. Ndza tsaka hikuva ku tshinela eka Xikwembu i swinene eka mina.—Hi ku vula ka Sarah Maiga.