1. Ntirho wo chumayela a wu ri wa nkoka hi ndlela yihi eka Yesu? Hlamusela.

YESU a a rhandza ku vulavula hi Mfumo wa Xikwembu. Loko a ha ri laha misaveni, u vulavule hi Mfumo ku tlula rungula rihi ni rihi. U vulavule hi Mfumo ku tlula minkarhi ya 100 hi nkarhi wa vutirheli byakwe. Hakunene Mfumo a wu ri wa nkoka eka Yesu.—Hlaya Matewu 12:34.

2. I vanhu vangani lava tweke xileriso lexi nga eka Matewu 28:19, 20 naswona ha yini hi vula tano?

² Endzhakunyana ka loko Yesu a pfuxiwile eku feni, u hlangane ni ntlawa wa vanhu vo tlula 500 lava a va ta fanelekela ku va vadyondzisiwa. (1 Vakorinto 15:6) Kumbexana a ku ri nkarhi lowu Yesu a humeseke xileriso xo chumayela “vanhu va matiko hinkwawo.” Ntirho lowu a wu nga ta olova. * (Vona nhlamuselo ya le hansi.) U  va byele leswaku ntirho wo chumayela a wu ta teka nkarhi wo leha, ku fikela “emakumu ka mafambiselo ya swilo.” Loko u chumayela mahungu lamanene namuntlha, u pfuneta leswaku vuprofeta byebyo byi hetiseka.—Matewu 28:19, 20.

3. Hi swihi swilo swinharhu leswi hi pfunaka ku chumayela mahungu lamanene?

³ Endzhaku ka loko Yesu a lerise leswaku va chumayela, u te: “Ndzi na n’wina.” (Matewu 28:20) Kutani Yesu u tshembise valandzeri vakwe leswaku u ta kongomisa ntirho wo chumayela ni leswaku a a ta va pfuna leswaku va chumayela emisaveni hinkwayo. Yehovha u na hina hilaha ku fanaka. U hi nyika “xin’wana ni xin’wana lexinene” ku hi pfuna leswaku hi chumayela. (Vaheveru 13:20, 21) Exihlokweni lexi, hi ta tlhuvutsa swilo swinharhu leswinene: (1) switirhisiwa leswi hi nyikiweke swona, (2) tindlela leti hi ti tirhiseke ni (3) ndzetelo lowu hi nyikiweke wona. Xo sungula, a hi kambisiseni switirhisiwa swin’wana leswi tirhisiweke eka malembe ya 100 lama hundzeke.

4. Switirhisiwa swo hambanahambana swi hi pfune njhani entirhweni wa hina wo chumayela?

⁴ Yesu u fanise rungula ra Mfumo ni mbewu leyi byariweke emisaveni yo hambanahambana. (Matewu 13:18, 19) Leswaku murimi a lunghiselela misava, u tirhisa switirhisiwa swo hambanahambana. Hilaha ku fanaka, Hosi ya hina yi hi nyike switirhisiwa leswi hi nga swi tirhisaka ku pfuna vanhu va amukela rungula ra hina. Switirhisiwa swin’wana swi pfunile swa xinkarhana, kasi swin’wana swa ha tirhisiwa ninamuntlha. Kambe switirhisiwa hinkwaswo swi hi pfunile leswaku hi antswisa vuswikoti bya hina byo chumayela.

5. A ku ri yini khadi ro chumayela naswona a ri tirhisiwa njhani?

⁵ Hi 1933, vahuweleri va sungule ku tirhisa khadi ro chumayela, leri pfuneke vo tala leswaku va sungula ku chumayela. A ku ri khadi leritsongo leri a ri ri ni rungula ra Bibele ro koma ni leri olovaka. Minkarhi yin’wana khadi lerintshwa a ri kandziyisiwa ri ri ni rungula lerintshwa. Makwerhu Erlenmeyer a ri ni malembe ya kwalomu ka khume loko a sungula ku tirhisa khadi ro chumayela. Wa hlamusela: “A hi tirhisa xingheniso lexi nge, ‘Hi kombela u hlaya khadi leri.’ Endzhaku ka loko n’wini wa muti a hlaye khadi rolero, a hi n’wi nyika nkandziyiso kutani hi famba.”

6. Khadi ro chumayela ri pfune hi ndlela yihi?

⁶ Khadi ro chumayela ri pfune vahuweleri hi tindlela to hambanahambana. Hi xikombiso, vahuweleri van’wana a va ri ni tingana hambileswi a va swi lava hi mbilu hinkwayo ku chumayela, a va nga swi tivi leswi a va fanele va swi vula. Vahuweleri van’wana a va ri ni xivindzi. A va ta byela n’wini wa muti hinkwaswo leswi a va swi tiva hi timinete ti nga ri tingani, kambe leswi a va swi vula minkarhi yin’wana a swi nga twisiseki. Khadi ro chumayela ri pfune vahuweleri hinkwavo leswaku va hundzisa rungula leri twisisekaka ni leri olovaka.

7. Hi yihi mintlhontlho yin’wana leyi a yi va kona loko ku tirhisiwa khadi ro chumayela?

⁷ A ku tlhela ku va ni mintlhontlho. Makwerhu wa xisati la vuriwaka Grace Estep u te: “Minkarhi yin’wana, n’wini wa muti a ku, ‘Ri ri yini khadi rolero? Ndzi byele leswi ri vulavulaka hi swona.’” Nakambe van’wana a va nga swi  koti ku hlaya leswi a swi ri eka khadi rolero. Van’wana a va ri teka ivi va pfala nyangwa. Van’wana a va nga ri rhandzi rungula ra hina, kutani a va teka khadi va ri tsemelela. Hambiswiritano, khadi ro chumayela ri pfune vahuweleri ku chumayela vaakelani va vona ni ku tiviwa tanihi vachumayeri va Mfumo.

8. Gramafoni leyi khomekaka a yi tirhisiwa njhani? (Vona xifaniso lexi nga eku sunguleni ka xihloko lexi.)

⁸ Xitirhisiwa xin’wana lexi tirhisiweke endzhaku ka 1930 a ku ri gramafoni leyi khomekaka. Timbhoni tin’wana ti vule leswaku vito ra yona i Aroni hikuva a yi va vulavulela. (Hlaya Eksoda 4:14-16.) Loko n’wini wa muti a pfumela ku yingisa, muhuweleri a ta tlanga nkulumo yo koma ya le Bibeleni kutani a n’wi nyika nkandziyiso wo karhi. Minkarhi yin’wana, mindyangu hinkwayo a yi hlengeletana leswaku yi ta yingisela nkulumo! Hi 1934, Sosayiti ya Watch Tower yi sungule ku endla tigramafoni leti khomekaka leti a ti endleriwe ku chumayela. Hi ku famba ka nkarhi, vamakwerhu va rhekhode tinkulumo to hambanahambana ta 92.

9. Gramafoni leyi khomekaka yi pfune hi ndlela yihi?

⁹ Loko Hillary Goslin a twe yin’wana ya tinkulumo teto, u lombe gramafoni ku ringana vhiki leswaku a ta byela vaakelani vakwe hi rungula rolero ra le Bibeleni. Hikwalaho ka sweswo, vanhu vo hlayanyana va tsakele ntiyiso naswona va khuvuriwile. Hi ku famba ka nkarhi, vana vambirhi va vanhwanyana va Makwerhu Goslin va ye exikolweni xa Giliyadi naswona va ve varhumiwa. Ku fana ni khadi ro chumayela, gramafoni leyi khomekaka yi pfune vahuweleri vo tala leswaku va sungula ku chumayela. Hi ku famba ka nkarhi, hi ku tirhisa Xikolo xa Vutirheli bya le Tilweni, Hosi a yi ta dyondzisa vanhu va yona ndlela yo chumayela hi ndlela leyi humelelaka.

10, 11. Maphephahungu ni xiyanimoya swi tirhisiwe njhani leswaku ku chumayeriwa mahungu lamanene naswona ha yini tindlela teto to chumayela a ti pfuna?

¹⁰ Ehansi ka nkongomiso wa Hosi ya hina, vanhu va Xikwembu va tirhise tindlela to hambanahambana leswaku va fikelela vanhu vo tala hilaha va nga kotaka hakona entirhweni wo chumayela. Tindlela toleto a ti ri ta nkoka swinene ngopfungopfu leswi vatirhi va kona a va ri vatsongo. (Hlaya Matewu 9:37.) Hi xikombiso, emalembeni yo tala lama hundzuke a ku tirhisiwa maphephahungu leswaku ku chumayeriwa mahungu lamanene. Vhiki rin’wana ni rin’wana Makwerhu Russell a a rhumela nkulumo leyi sekeriweke eBibeleni eka vaviki va mahungu. Kutani vona va rhumela nkulumo yoleyo eka maphephahungu ya le Canada, Yuropa ni le United States. Hi 1913, tinkulumo ta Makwerhu Russell a ti kandziyisiwa eka maphephahungu lama ringanaka 2 000 naswona a ti hlayiwa hi vanhu va kwalomu ka 15 000 000!

¹¹ Xiyanimoya na xona xi tirhisiwe hi ndlela leyi vuyerisaka ku chumayela mahungu lamanene. Hi April 16, 1922, Makwerhu Rutherford u nyikele yin’wana ya tinkulumo takwe to sungula eka xiyanimoya, naswona yi yingisele hi vanhu va kwalomu ka 50 000. Swi nga si ya  kwihi, hi sungule ku tirhisa xitichi xa hina xa xiyanimoya lexi vitaniwaka WBBR, naswona nongonoko wo sungula wu yingiseriwe hi February 24, 1924. Xihondzo xo Rindza xa December 1, 1924, xi te: “Hi tshemba leswaku xiyanimoya i xitirhisiwa lexi nga durhiki ni lexi pfunaka ku chumayela rungula ra ntiyiso lexi nga si tshamaka xi tirhisiwa.” Ku fana ni maphephahungu, xiyanimoya xi hi pfune ku fikelela vanhu vo tala etindhawini leti a ku ri ni vahuweleri va nga ri vangani ntsena.

12. (a) Hi tihi tindlela to chumayela etindhawini ta mani na mani leti u ti tsakelaka ngopfu? (b) I yini leswi nga ta hi pfuna leswaku hi hlula ku chava kun’wana ni kun’wana loku hi nga ha vaka na kona mayelana ni ku chumayela etindhawini ta mani na mani?

¹² Ku chumayela etindhawini ta mani na mani i ndlela yin’wana leyi pfunaka leyi tirhisiwaka ku fikelela vanhu namuntlha. Ku endliwe matshalatshala yo tala ku fikelela vanhu eswitichini swa tibazi, swa switimela ni laha ku pakiwaka kona timovha ku katsa ni le mintsendzeleni ni le tindhawini ta vuxaviselo. Xana ku chumayela etindhawini ta mani na mani swa ku chavisa? Loko swi ri tano, khongela u kombela mpfuno u tlhela u kambisisa leswi Makwerhu Manera, loyi a nga mulanguteri wa muganga a swi vuleke, u te: “Ndlela yin’wana ni yin’wana leyintshwa yo chumayela hi yi languta tanihi ndlela yin’wana yo tirhela Yehovha, tanihi ndlela yo kombisa leswaku ha tshembeka eka yena, tanihi ndlela yo kambela ndlela leyi hi tshembekaka ha yona naswona hi tiyimisele  ku kombisa leswaku hi lava ku n’wi tirhela hi ndlela leyi a yi lavaka.” Loko hi hlula ku chava ka hina hi tlhela hi tirhisa tindlela letintshwa to chumayela hi tiyisa ndlela leyi hi n’wi tshembaka ha yona Yehovha naswona hi va vachumayeri vo antswa.—Hlaya 2 Vakorinto 12:9, 10.

13. Ha yini ku tirhisa website ya hina ensin’wini ku ri ndlela leyi pfunaka yo chumayela, naswona hi yihi mintokoto leyi u yi kumeke loko u yi tirhisa?

¹³ Vahuweleri vo tala va tsakela ku byela van’wana hi website, ya hina ya jw.org, laha va nga hlayaka va tlhela va kopa minkandziyiso leyi sekeriweke eBibeleni hi tindzimi to tlula 700. Siku ni siku, vanhu vo tlula 1,6 wa timiliyoni va nghena eka website ya hina. Enkarhini lowu hundzeke, xiyanimoya xi fikelele vanhu lava tshamaka etindhawini leti nga le kule hi mahungu lamanene. Namuntlha, website ya hina yi endla leswi fanaka.

14. Hi wihi ndzetelo lowu vahuweleri va wu lavaka, naswona hi xihi xikolo lexi va pfuneke leswaku va va vadyondzisi lava humelelaka?

¹⁴ Switirhisiwa ni tindlela to chumayela leti hi buleke ha tona ti pfunile swinene. Hambiswiritano, vahuweleri va le nkarhini wa khale a va fanele va leteriwa ndlela leyi a va ta chumayela ha yona. Hi xikombiso, minkarhi yin’wana n’wini wa muti a a nga pfumelelani na swona leswi a swi twa eka gramafoni. Nkarhi wun’wana n’wini wa muti a a yingisela a tlhela a lava ku tiva swo tala. Vahuweleri va lava ku tiva ndlela yo hlula ku kanetiwa hi ndlela ya vutlhari ni yo va vadyondzisi lavanene. A swi kanakanisi leswaku hi ku pfuniwa hi moya lowo kwetsima wa Xikwembu Makwerhu Knorr u vone swi ri swa nkoka leswaku vahuweleri va dyondza ndlela yo vulavula loko va ri ensin’wini. Hikwalaho ku sukela hi 1943, mavandlha ma sungule ku hlela leswaku ku va ni Xikolo xa Vutirheli bya le Tilweni. Xikolo lexi xi pfune hinkwavo leswaku va va vadyondzisi lava humelelaka.

15. (a) Van’wana va humeleriwe hi yini loko va nyikela nkulumo eka Xikolo xa Vutirheli bya le Tilweni? (b) Xitshembiso xa Yehovha lexi nga eka Pisalema 32:8 xi tikombise xi ri ntiyiso eka wena hi ndlela yihi?

¹⁵ Vamakwerhu vo tala va xinuna a va nga swi tolovelanga ku vulavula emahlweni ka vayingiseri. Makwerhu Ramu u tsundzuka nkulumo yakwe yo sungula leyi a yi nyikeleke hi 1944. Nkulumo yoleyo a yi vulavula hi munhu wa le Bibeleni loyi a vuriwaka Dowege. U te: “Matsolo ya mina a ma gudlagudla, mavoko ni meno a swi rhurhumela.” U tlhele a ku: “Sweswo a ku ri leswi ndzi humeleleke loko ndzi vulavula ndzi ri exitejini ro sungula, kambe a ndzi tshikanga.” Hambileswi a swi nga olovi, vana na vona a va nyikela tinkulumo exikolweni. Makwerhu Manera u tsundzuka leswi humeleleke loko xifanyetana xin’wana xi nyikele nkulumo ya xona yo sungula: “A xi chuhile lerova loko xi sungula nkulumo ya xona, xi sungule ku rila.  Kambe a xi tiyimisele ku yi nyikela, xi rile kukondza xi heta.” Kumbexana a wu hlamuli eminhlanganweni kumbe ku hoxa xandla eka yona hileswi u nga ni tingana kumbe u anakanya leswaku a wu nge swi koti. Loko swi ri tano, kombela mpfuno eka Yehovha leswaku u hlula ku chava. U ta ku pfuna ku fana ni swichudeni swo sungula swa Xikolo xa Vutirheli bya le Tilweni.—Hlaya Pisalema 32:8.

16. A ku ri xihi xikongomelo xa Xikolo xa Giliyadi (a) enkarhini lowu hundzuke ni (b) ku sukela hi 2011?

¹⁶ Nhlengeletano ya Xikwembu yi tlhele yi letela swichudeni hi ku tirhisa Xikolo xa Giliyadi. Xikongomelo xin’wana xa xikolo lexi, i ku pfuna swichudeni ku tiyisa ku navela ka swona ku chumayela mahungu lamanene. Xikolo xa Giliyadi xi sungule hi 1943, naswona ku sukela kwalaho ku leteriwe swichudeni swa 8 500 swi tlhela swi rhumeriwa ematikweni ya 170. Ku sukela hi 2011, lava rhambiweke exikolweni lexi a va ri maphayona yo hlawuleka, valanguteri va miganga, vatirhi va le Bethele kumbe varhumiwa lava nga ensin’wini lava a va nga si ya exikolweni xa Giliyadi.

17. Xikolo xa Giliyadi xi pfune hi ndlela yihi?

¹⁷ Xana Xikolo xa Giliyadi xi pfunile? Ina. Xiya leswi humeleleke eJapani. Hi August 1949, a ku ri ni vahuweleri lava a va ri ehansi ka khume etikweni rero. Eku heleni ka lembe rero, varhumiwa va 13 a va chumayela ni vahuweleri va kwalaho. Namuntlha, ku ni vahuweleri va kwalomu ka 216 000 eJapani naswona kwalomu ka hafu ya vona i maphayona!

18. Hi swihi swikolo swin’wana leswi hi nga na swona?

¹⁸ Hi ni swikolo swin’wana swo tala, swo tanihi Xikolo xa Vutirheli bya le Tilweni, Xikolo xa Ntirho wa Vuphayona, Xikolo xa Vachumayeri va Mfumo, Xikolo xa Valanguteri va Miganga ni Vasati va Vona ni Xikolo xa Swirho swa Komiti ya Rhavi ni Vasati va Swona. Swikolo leswi swi letele vamakwerhu hi ndlela leyi humelelaka naswona swi tiyise ripfumelo ra vona. Swi le rivaleni leswaku Yesu u ya emahlweni a letela vanhu vo tala.

19. Makwerhu Russell u vule yini hi ntirho wo chumayela naswona sweswo swi hetiseke njhani?

¹⁹ Mfumo wa Xikwembu wu ni malembe yo tlula 100 wu ri karhi wu fuma. Hi nkarhi wolowo, Hosi ya hina, Yesu Kreste a ri eku kongomiseni ka ntirho wo chumayela. Hi 1916, Makwerhu Russell a a pfumela leswaku ku chumayeriwa ka mahungu lamanene a ku ta andza emisaveni hinkwayo. U te: “Ntirho wu andza hi ku hatlisa, naswona wu ta hambeta wu andza, hikuva ku ni ntirho wa misava hinkwayo lowu faneleke wu endliwa, wo chumayela ‘evhangeli ya mfumo’ ematikweni hinkwawo.” (Faith on the March, hi A. H. Macmillan, tluka 69) Ntirho wolowo wu le ku endliweni namuntlha! Hi khensa Yehovha, Xikwembu xa ku rhula, lexi hi nyikaka hinkwaswo leswi hi swi lavaka leswaku hi endla ku rhandza ka xona!