Mfumo Wa Xikwembu I Yini?

HI YIHI mhaka-nkulu leyi Yesu a a chumayela ha yona? Hi ku ya hi leswi Yesu a swi vuleke, a ku ri Mfumo wa Xikwembu. (Luka 4:43) Vanhu lava a va yingisela Yesu a va tshamela ku n’wi twa a vulavula hi Mfumo. Xana sweswo a swi va hlamarisa kumbe a swi va pfilunganya? Xana va n’wi vutisile leswaku Mfumo wolowo a ku ri yini? Doo! Tievhangeli a ti swi boxi swivutiso swo tano. Xana Mfumo wa Xikwembu a ku ri mhaka leyi tolovelekeke eka vanhu volavo?

Ntiyiso hileswaku Matsalwa ya khale lawa Vayuda a va ma xixima tanihi lama kwetsimaka, ma wu hlamusela hi ndlela leyi twisisekaka Mfumo wolowo leswaku i yini ni leswi wu nga ta swi endla. Namuntlha hi nga dyondza swo tala hi Mfumo eBibeleni hilaha Vayuda va dyondzeke hakona. A hi kambisiseni tinhla ta nkombo leti Bibele yi hi dyondzisaka tona hi Mfumo. Tinhla tinharhu to sungula a ti kumeka hi ku olova eka Vayuda va khale ni va le minkarhini ya Yesu. Kasi tinhla tinharhu leti landzelaka ti paluxiwe hi Kreste kumbe hi vaapostola vakwe hi lembe-xidzana ro sungula. Yinhla yo hetelela yi twisiseke kahle eminkarhini ya hina.

1. Mfumo wa Xikwembu i hulumendhe ya xiviri leyi nga ta tshama hilaha ku nga heriki. Vuprofeta byo sungula bya Bibele byi paluxe leswaku Xikwembu a xi ta rhumela muponisi eka vanhu vo tshembeka. Muponisi loyi, loyi a vuriwaka “mbewu” u ta herisa maxangu hinkwawo lama vangiweke hi ku xandzuka ka Adamu, Evha na Sathana. (Genesa 3:15) Endzhaku ka nkarhi wo leha, Hosi Davhida wo tshembeka u byeriwe mhaka yo tsakisa malunghana ni “mbewu” yoleyo kumbe Mesiya. U byeriwe leswaku a a ta va Hosi ya Mfumo. Mfumo wolowo a wu ta hambana ngopfu ni  mimfumo leyin’wana hinkwayo. Wona a wu ta tshama hilaha ku nga heriki.​—2 Samuwele 7:12-14.

2. Mfumo wa Xikwembu wu ta herisa tihulumendhe hinkwato ta vanhu. Muprofeta Daniyele u kombiwe xivono lexi eka xona a voneke mimfumo ya misava leyi tlhandlamaneke ku sukela eminkarhini ya khale ku fikela eminkarhini ya hina. Xiya ku chaputa loku tsakisaka ka xivono xexo: “Emasikwini ya tihosi teto [to hetelela leti nga vanhu] Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo leyi hinkwayo, kambe wona wu ta tshama hilaha ku nga riki na makumu.” Kutani mimfumo kumbe tihulumendhe hinkwato ta misava leyi ti ta herisiwa hilaha ku nga heriki swin’we ni tinyimpi, ku tshikilela ni vukanganyisi bya tona. Hilaha vuprofeta bya Daniyele byi kombisaka hakona, ku nga ri khale Mfumo wa Xikwembu wu ta fuma misava hinkwayo. (Daniyele 2:44, 45) Mhaka ya nkoka hileswaku Mfumo lowu wu ta va hulumendhe leyi nga ta fuma misava hinkwayo yi ri yoxe ntsena. *

3. Mfumo wa Xikwembu wu ta herisa tinyimpi, vuvabyi, ndlala hambi ku ri rifu hi roxe. Vuprofeta bya Bibele lebyi tsakisaka byi paluxa leswi Mfumo wa Xikwembu wu nga ta swi endla laha misaveni. Hulumendhe yoleyo yi ta hetisisa leswi tihulumendhe ta vanhu va nyama ti nga siki tshamaka ti swi endla kumbe leswi ti nga ta ka ti nga pfuki ti swi endlile. Ehleketa loko matlhari hinkwawo ya nyimpi ma ta va ma heriseriwe makumu! “U herisa tinyimpi ku ya fika emakumu ya misava.” (Pisalema 46:9) A ku nge he vi na madokodela, swibedlhele kumbe vuvabyi bya muxaka wihi na wihi. “Ku hava munhu la tshamaka kona la nga ta ku: ‘Ndza vabya.’” (Esaya 33:24) A ku nge he vi na ndlala, ku kayivela ka swakudya ni ku sika. “Ku ta va ni mavele yo tala emisaveni.” (Pisalema 72:16) A ku nge he vi na minkosi, mirindzelo, swilahlo, tindhawu to hlayisa mintsumbu kumbe swirilo leswi fambisanaka na swona. Rifu leri nga nala wa hina la nga riki na musa ri ta herisiwa eku heteleleni. “Entiyisweni [Yehovha] u ta mita rifu hi masiku, kunene . . . , Hosi leyi Lawulaka yi ta sula mihloti eswikandzeni hinkwaswo.”​—Esaya 25:8.

4. Mfumo wa Xikwembu wu ni Mufumi la hlawuriweke hi Xikwembu. Mesiya a nga tivekanga ku va Mufumi kumbe ku hlawuriwa hi vanhu lava nga hetisekangiki. Yehovha Xikwembu hi yena a n’wi hlawuleke. Xithopo lexi nge Mesiya ni lexi nge Kreste swi kombisa leswaku u vekiwe hi Xikwembu. Eka tindzimi to sungula, mavito lawa hamambirhi ka wona ma vula “Mutotiwa.” Kutani Hosi leyi yi totiwe kumbe ku hlawuriwa hi Yehovha entirhweni wa yona wo hlawuleka. Xikwembu xi vule leswi malunghana na yona: “Waswivo! Nandza wa mina, loyi ndzi n’wi khomaka swi tiya! Muhlawuriwa wa mina, loyi moya-xiviri wa mina wu n’wi amukeleke! Ndzi nghenise moya wa mina eka yena. U ta tisa vululami ematikweni.” (Esaya 42:1; Matewu 12:17, 18) Muvumbi wa hina hi yena ntsena a swi tivaka kahle leswaku hi lava Mufumi wa njhani.

5. Mufumi wa Mfumo wa Xikwembu u tikombise a ri la fanelekaka emahlweni ka vanhu hinkwavo. Yesu wa Nazareta u tikombise a ri Mesiya loyi a ku profetiwe ha yena. U velekiwe enxaxamelweni wa ndyangu lowu Xikwembu xi wu hlawuleke. (Genesa 22:18; 1 Tikronika 17:11; Matewu 1:1) Loko a ri laha misaveni u hetisise vuprofeta byo tala lebyi vulavulaka hi Mesiya lebyi tsariweke eka madzana ya malembe a nga si velekiwa. U tlhele a vuriwa Mesiya ku suka etilweni. Njhani? Xikwembu xi vulavule xi ri etilweni xi vula leswaku Yesu i N’wana wa xona; tintsumi ti vule leswaku Yesu i Mesiya loyi a ku profetiwe ha yena; naswona Yesu u endle masingita​—hakanyingi a ma endla a voniwa hi vanhu va madzana kumbe va magidi—lawa a swi ri erivaleni leswaku a a ma endla hi matimba ya Xikwembu. * Yesu u swi kombise hi ku phindha-phindha leswaku a a ta va Mufumi wa njhani. A a nga ri na matimba yo pfuna vanhu ntsena kambe a a swi tsakela ku endla tano. (Matewu 8:1-3) A a nga ri ni vutianakanyi kambe a a ri ni ntwela-vusiwana ni xivindzi naswona a a titsongahata. Leswi a swi endleke loko a ha ri emisaveni swi tsariwe eBibeleni leswaku vanhu hinkwavo va swi hlaya.

6. Mfumo wa Xikwembu wu ni vanhu va  144 000 lava nga ta fuma na Kreste. Yesu u vule leswaku van’wana ku katsa ni vaapostola vakwe, a va ta fuma etilweni na yena. Ntlawa lowu u wu vitane “ntlhambinyana.” (Luka 12:32) Endzhaku muapostola Yohane u byeriwe leswaku ntlawa lowu a wu ta va nhlayo ya 144 000. Va ta va ni ntirho lowu tsakisaka etilweni wa ku fuma tanihi tihosi ni ku tirha tanihi vaprista swin’we na Kreste.—Nhlavutelo 5:9, 10; 14:1, 3.

7. Mfumo wa Xikwembu wa karhi wa fuma sweswi etilweni, wu lunghekele ku fuma misava hinkwayo. Yinhla leyi ya vunkombo i yin’wana ya tinhla leti tsakisaka swinene leyi hi nga dyondzaka ha yona. Bibele yi nyikela vumbhoni byo tala bya leswaku Yesu u nyikiwe vulawuri tanihi Hosi etilweni. Wa karhi wa fuma etilweni sweswi, naswona ku nga ri khale u ta fuma ni misava hinkwayo kutani a hetisisa vuprofeta lebyi hlamarisaka lebyi se ku vulavuriweke ha byona. Kambe hi nga tiyiseka njhani leswaku Mfumo wa Xikwembu wa karhi wa fuma sweswi? Naswona wu ta sungula rini ku fuma misava?

[Tinhlamuselo ta le hansi]