Tshinela Eka Xikwembu

Tatana La Nga Ni Rirhandzu Lerikulu Ngopfu

Matewu 3:16, 17

“TATANA.” Leri i rin’wana ra marito lama ti khumbaka swinene timbilu ta vanhu. Tatana loyi a va rhandzaka hakunene vana vakwe u va pfuna leswaku va kula kahle. Swa fanela leswi Bibele yi kombetelaka eka Yehovha Xikwembu tanihi ‘Tatana.’ (Matewu 6:9) Xana Yehovha i Tatana wa njhani? Leswaku hi hlamula xivutiso lexi, a hi kambisiseni marito lawa Yehovha a ma vuleke malunghana na Yesu loko a khuvuriwa. Phela ndlela leyi tatana a vulavulaka ha yona ni vana vakwe yi kombisa swo tala malunghana nileswaku i mutswari wa njhani.

Kwalomu ka October 29 C.E., Yesu u ye eNambyeni wa Yordani leswaku a ya khuvuriwa. Bibele yi vika leswi humeleleke: “Loko Yesu a khuvuriwile, a huma hi ku hatlisa ematini; kutani waswivo, matilo ma pfuleka, a vona moya wa Xikwembu wu xika ku fana ni tuva wu ta ehenhla ka yena. Waswivo! Nakambe, ku huma rito ematilweni, ri ku: ‘Loyi i N’wananga, la rhandzekaka, loyi ndzi n’wi amukeleke.’” * (Matewu 3:16, 17) Marito wolawo ya rirhandzu lama vuriweke hi Yehovha hi byakwe ma hi byela swo tala malunghana nileswaku i Tatana wa njhani. Xiya swilo swinharhu leswi Yehovha a swi phofuleke malunghana ni N’wana wakwe.

Xo sungula, loko Yehovha a tirhisa marito lama nge, “loyi i N’wananga,” entiyisweni a a vula leswaku ‘Ndza tinyungubyisa hileswi ndzi nga Tata wa wena.’ Tatana la nga ni ku twisisa u enerisa ku navela ka vana vakwe ko va bumabumela ni ku va kombisa rirhandzu. Vana va lava ku tiyisekisiwa leswaku va tekiwa va ri swirho swa nkoka endyangwini. Ehleketa ndlela leyi Yesu a faneleke a titwe ha yona​—hambileswi se a a ri nkulu—​ku va Tata wakwe a n’wi bumabumele hi ndlela yoleyo!

Xa vumbirhi, ku va Yehovha a vule leswaku N’wana wakwe hi “la rhandzekaka,” a a vula leswaku wa n’wi rhandza Yesu. Hi ndlela yo karhi Yehovha a a vula leswaku ‘Ndza ku rhandza.’ Tatana lonene wa va byela vana vakwe leswaku u va rhandza hi mbilu hinkwayo. Marito yo tano swin’we ni ku kombisa rirhandzu hi tindlela ta xiviri swi pfuna vana leswaku va kula kahle. Hakunene ku va Yesu a twe Tata wakwe a vula leswaku wa n’wi rhandza swi fanele swi yi khumbe swinene mbilu yakwe!

Xa vunharhu, hi ku vula marito lama nge “loyi ndzi n’wi amukeleke,” Yehovha u kombise leswaku a a n’wi amukela N’wana wakwe. A swi fana ni loko Yehovha a vula leswaku, ‘N’wananga ndzi tsakisiwe hi leswi u swi endleke.’ Tatana la nga ni rirhandzu u lava tindlela to byela vana vakwe leswaku u tsakisiwa hi swilo leswinene leswi va swi vulaka kumbe leswi va swi endlaka. Loko vatswari va byela vana va vona leswaku va va tsakela, sweswo swa va tiyisa. Hakunene sweswo swi fanele swi n’wi khutazile Yesu ku twa leswaku Tata wakwe wa n’wi amukela!

Ina, Yehovha i Tatana la nga ni rirhandzu lerikulu ngopfu. Xana wa swi navela ku va ni tatana wo tano? Kutani loko swi ri tano, swi nga ku chavelela ku tiva leswaku swa koteka ku va ni vuxaka na Yehovha. Loko hi ripfumelo u dyondza hi yena kutani u endla ku rhandza ka yena hi mbilu hinkwayo, u ta ku hlamula. Bibele yi ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Hakunene ku hava nchumu lowu nga ku endlaka u titwa u sirhelelekile handle ko va ni vuxaka lebyikulu na Yehovha Xikwembu, Tatana lonene!

[Nhlamuselo ya le hansi]