Xana A Wu Swi Tiva?

Xana vangoma va swilo swa le mpfhukeni va n’wi endzele rini Yesu?

Eka Evhangeli ya Matewu, hi byeriwa leswaku “vangoma va swilo swa le mpfhukeni lava humaka etindhawini ta le vuxeni” va endzele Yesu, va n’wi yisela tinyiko. (Matewu 2:1-12) Nhlayo ya vangoma lava va swilo swa le mpfhukeni lava endzeleke Yesu loyi a ha ri ricece a yi boxiwanga, naswona ku hava xisekelo lexi tiyeke xa mhaka leyi tolovelekeke ya leswaku a va ri vanharhu; naswona mavito ya vona a ma boxiwanga eka xiviko xa le Bibeleni.

Buku yin’wana yi vula leswi malunghana na Matewu 2:11: “Ku hambana ni ndhavuko, vangoma va swilo swa le mpfhukeni a va endzelanga Yesu loko a ha ri exidyelweni hi vusiku lebyi a velekiweke ha byona hilaha varisi va endleke hakona. Va tile va ta n’wi endzela endzhaku ka tin’hweti to hlayanyana loko a ha ri ‘ricece endlwini’ ya ka vona.” (New International Version Study Bible) Mhaka leyi yi tiyisekisiwa hileswaku loko Heroda a lave ku dlaya n’wana loyi lontsongo, u lerise leswaku ku dlayiwa vafana hinkwavo lava sukelaka eka malembe mambirhi hi vukhale ku ya ehansi eBetlehema hinkwawo ni le migangeni hinkwayo ya wona. U hlawule vana va malembe wolawo hi ku hlayela “hi ku ya hi nkarhi lowu a nga wu kumisisa hi vukheta eka vangoma va swilo swa le mpfhukeni.”​—Matewu 2:16.

Vangoma va swilo swa le mpfhukeni a va endzelanga Yesu hi vusiku lebyi a velekiweke ha byona naswona a va n’wi yiselanga nsuku ni tinyiko tin’wana ta risima, hikuva Mariya a a nga ta va a nyikele hi swinyenyana swimbirhi endzhaku ka masiku ya 40 loko a yisa Yesu etempeleni ya le Yerusalema. (Luka 2:22-24) Leri a ku ri lunghiselelo ra Nawu eka swisiwana leswi a swi nga ta swi kota ku nyikela hi nyimpfu. (Levhitika 12:6-8) Hambiswiritano, tinyiko leti ta nkoka a ti ta va ti fike hi nkarhi naswona a ti ta va ti tirhiseriwe ku hakelela swilaveko swa vatswari va Yesu loko va ri aEgipta.​—Matewu 2:13-15.

Ha yini Yesu swi n’wi tekele masiku ya mune ku fika eka sirha-bakwa ra Lazaro?

Kahle-kahle swi tikomba onge Yesu a a hlele leswaku swilo swi famba hi ndlela yoleyo. Ha yini hi vula tano? Xiya xiviko lexi tsariweke eka Yohane ndzima 11.

Loko Lazaro loyi a a tshama eBetaniya loyi a a ri munghana wa Yesu, a sungule ku vabya swinene, vamakwavo vakwe va xisati va rhumele rito eka Yesu. (Tindzimana 1-3) Hi nkarhi wolowo, laha Yesu a a ri kona a ku ri mpfhuka lowu a wu teka kwalomu ka masiku mambirhi ku suka eBetaniya. (Yohane 10:40) Entiyisweni swi nga endleka leswaku Lazaro u fe loko rito leri va ri rhumeleke ri fika eka Yesu. I yini leswi Yesu a swi endleke? U “[tshame] masiku mambirhi endhawini leyi a a ri eka yona” kutani ku ri kona a yaka eBetaniya. (Tindzimana 6, 7) Hikwalaho, leswi a tshameke masiku mambirhi a tlhela a famba masiku mambirhi, u fike eka sirha-bakwa hi siku ra vumune endzhaku ka rifu ra Lazaro.​—Ndzimana 17.

Emahlweni ka kwalaho, Yesu a a pfuxe vanhu vambirhi eku feni—un’wana endzhaku ka loko a ha ku fa kasi loyi un’wana kumbexana endzhaku ka nkarhi se a file. (Luka 7:11-17; 8:49-55) Xana a a ta swi kota ku pfuxa munhu la nga ni masiku ya mune a file naswona miri wakwe se a wu sungule ku bola? (Ndzimana 39) Lexi tsakisaka, buku yin’wana ya tinhlamuselo ta Bibele yi vula leswaku Vayuda a va pfumela eka dyondzo ya leswaku a ku nga ri na ntshembo wa leswaku “munhu la nga ni masiku ya mune a file a nga pfuxiwa eku feni; hi nkarhi wolowo miri wu va se wu sungule ku bola naswona moya lowu ku vuriwaka leswaku wu va wu ri karhi wu haha-haha ehenhla ka miri ku ringana masiku manharhu wu va se wu fambile.”

Loko van’wana va lava a va hlengeletane eka sirha-bakwa a va kanakana leswaku Lazaro a nga pfuxiwa eku feni, a va ri ekusuhi ni ku vona matimba lawa Yesu a a ri na wona yo pfuxa vafi. Yesu loyi a a yime emahlweni ka sirha-bakwa leri pfulekeke, u huwelele a ku: “Lazaro, huma!” Hiloko “munhu loyi a a file a huma.” (Tindzimana 43, 44) Ku pfuxiwa ka vafi i ntshembo wa xiviri malunghana ni lava feke, ku nga ri dyondzo ya mavunwa leyi vanhu vo tala va pfumelaka eka yona ya leswaku moya wu ya emahlweni wu hanya endzhaku ka rifu.​—Ezekiyele 18:4; Yohane 11:25.