Vahlayi Va Hina Va Vutisa

Xana Mfumo Wa Xikwembu Wu Le Mbilwini Ya Wena?

Vanhu vo tala namuntlha va pfumela leswaku nhlamulo ya xivutiso lexi nga laha henhla i ina. Hi xikombiso, buku yin’wana ya vukhongeri yi ri: “Mfumo wa Xikwembu wu vula . . . ndlela leyi Xikwembu xi lawulaka timbilu ta hina ha yona.” (The Catholic Encyclopedia) Hakanyingi vafundhisi va dyondzisa dyondzo leyi. Xana hakunene Bibele yi dyondzisa leswaku Mfumo wa Xikwembu wu le timbilwini ta vanhu?

Van’wana va ehleketa leswaku Yesu hi yena a sunguleke dyondzo ya leswaku Mfumo wa Xikwembu wu le timbilwini ta vanhu. Yesu u tshame a ku: “Maswivo, mfumo wa Xikwembu wu le xikarhi ka n’wina.” (Luka 17:21) Tibibele tin’wana ti hundzuluxela marito lawa ti ku: “Mfumo wa Xikwembu wu le ndzeni ka wena.” Xana Tibibele teto ta pakanisa loko ti hundzuluxela marito ya Yesu hi ndlela leyi? Xana hakunene a a vula leswaku Mfumo wa Xikwembu wu le timbilwini ta vanhu?

Xo sungula, kambisisa leswaku mbilu ya munhu i yini. Loko Bibele yi hlamusela leswi mbilu yo fanekisela yi vulaka swona, yi vula leswaku i munhu wa le ndzeni, xihlovo xa mianakanyo ya munhu, langutelo rakwe ni ndlela leyi a titwaka ha yona. Dyondzo ya leswaku nchumu lowu tlakukeke wo tanihi Mfumo wa Xikwembu wu tshama embilwini ya munhu​—hi xikombiso, hi ndlela leyi wu n’wi hundzulaka ha yona ni ku n’wi endla a va ni mahanyelo lamanene—​yi nga ha twala yi tsakisa, kambe xana ya twisiseka?

Bibele yi hi byela leswi: “Mbilu yi kanganyisa ngopfu ku tlula hinkwaswo naswona yi ni khombo.” (Yeremiya 17:9) Yesu u te: “Endzeni, etimbilwini ta vanhu, hi kona laha ku humaka ku anakanya ko biha: vumbhisa, vukhamba, ku dlaya hi vomu, vuoswi, ku navela, swiendlo swa vuhomboloki.” (Marka 7:20-22) Ehleketa hi mhaka leyi: Xana maxangu yo tala lawa hi ma vonaka emisaveni namuntlha a ma sungulanga etimbilwini ta vanhu leti nga ni vudyoho? Kutani Mfumo wa Xikwembu lowu hetisekeke wu nga huma njhani endhawini yo tano? Entiyisweni, Mfumo wa Xikwembu a wu nge humi embilwini ya munhu tanihi leswi swigatlu swi nga tswaliki makuwa.​—Matewu 7:16.

Xa vumbirhi, anakanya hi vayingiseri lava Yesu a a vulavula na vona loko a vule marito lama kumekaka eka Luka 17:21. Ndzimana ya le mahlweni ka yoleyo yi ri: “Loko Vafarisi va n’wi vutisa leswaku mfumo wa Xikwembu wu ta ta rini, a va hlamula.” (Luka 17:20) Vafarisi a va ri valala va Yesu. Yesu u vule leswaku vakanganyisi volavo a va nga ta nghena eMfun’weni wa Xikwembu. (Matewu 23:13) Kutani loko ku ri leswaku Vafarisi a va nga ta nghena eMfun’weni wa Xikwembu, xana Mfumo a wu ta va etimbilwini ta vona? Doo! Kutani xana Yesu a a vula yini?

Tibibele to tala leti pakanisaka ti hundzuluxele marito lawa ya Yesu hi ndlela leyi fanaka ni leyi nga eka Vuhundzuluxeri Bya Misava Leyintshwa. Tin’wana ti vula leswaku Mfumo “wu le xikarhi ka n’wina” kumbe “wu le ka n’wina.” Xana Mfumo wa Xikwembu a wu ri exikarhi ka vanhu volavo hi nkarhi wolowo hi ndlela yihi, ku katsa ni Vafarisi? Yesu hi yena loyi Yehovha Xikwembu a n’wi vekeke ku va Hosi ya Mfumo. Leswi Yesu a nga Hosi leyi Hlawuriweke, a a ri exikarhi ka vanhu volavo. U dyondzise hi Mfumo wa Xikwembu a tlhela a endla masingita, a kombisa leswi Mfumo a wu ta swi endla. Hakunene Mfumo a wu ri exikarhi ka vona.

Swi le rivaleni leswaku Matsalwa a ma yi seketeli dyondzo ya leswaku Mfumo wa Xikwembu wu le timbilwini ta vanhu. Ku hambana ni sweswo, i hulumendhe ya xiviri, leyi nga ta tisa ku cinca lokukulu emisaveni hilaha vaprofeta va profeteke hakona.​—Esaya 9:6, 7; Daniyele 2:44.