Xikombelo Lexi Endliwaka eMisaveni Hinkwayo

EHLEKETA hi vanhu va madzana ya timiliyoni hambi ya tibiliyoni, hinkwavo ka vona va kombela nchumu lowu fanaka. Va kombela mulawuri lonkulu wa vuako hinkwabyo leswaku a hlamula xikombelo xo hlawuleka. Kambe eka vanhu volavo hinkwavo, i vatsongo lava xi tivaka kahle lexi va xi kombelaka. Xana nchumu wo tano wu nga endleka hakunene? Entiyisweni, wa endleka siku ni siku. I yini leswi vanhu lava hinkwavo va swi kombelaka? Va kombela leswaku Mfumo wa Xikwembu wu ta!

Ku ringanyetiwa leswaku ku ni vukhongeri bya kwalomu ka 37 000 lebyi tivulaka bya Vukreste, lebyi vulaka leswaku Yesu Kreste i Murhangeri wa byona. Ku ni vanhu lava tlulaka tibiliyoni timbirhi lava nga swirho swa vukhongeri byebyo. Vo tala va vanhu volavo va endla xikhongelo lexi hi ntolovelo xi vuriwaka Xikhongelo xa Hosi. Xana wa xi tiva xikhongelo xexo? Hilaha Yesu a xi dyondziseke valandzeri vakwe hakona, xi sungula hi ndlela leyi: “Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.”​—Matewu 6:9, 10.

Se ku hundze madzana ya malembe vagandzeri va ri karhi va phindha-phindha marito wolawo etikerekeni hi xichavo. Van’wana va tlhele va ma yimbelela va ri ndyangu ni loko va ri vona vini, eminkarhini leyi tsakisaka ni leyi nga tsakisiki. Marito lawa va ma vule hi timbilu ta vona hinkwato. Van’wana vo tala va ma hlokahatile naswona va ma vula handle ko anakanyisisa ngopfu ha wona kumbe va nga anakanyisisi nikatsongo hileswi ma swi vulaka. Swirho swa vukhongeri lebyi tivulaka bya Vukreste a hi swona ntsena leswi tshembelaka eka Mfumo wa Xikwembu ni ku wu khongelela leswaku wu ta.

Xikhongelo Lexi Fanaka Xa Endliwa Ni Le Ka Vukhongeri Lebyi Nga Riki Bya Vukreste

Xikhongelo xin’wana lexi dumeke hi lexi endliwaka hi Vayuda siku ni siku esinagogeni kumbe loko ku love xaka. Hambileswi xi nga vulavuriki hi rifu kumbe xirilo, hakanyingi xi endliwa loko ku love xaka. Xikhongelo lexi xi ri: “Onge yena [Xikwembu] a nga simeka Mfumo wakwe enkarhini wa ku hanya ka wena . . .  hi ku hatlisa.” * Xikhongelo xin’wana xa  khale xa le sinagogeni xi vulavula hileswaku ku ta va ni Mfumo wa Mesiya lowu humaka endlwini ya Davhida.

Van’wana lava nga pfumeriki eka Vukreste va tsakisiwe hi mhaka ya Mfumo wa Xikwembu. Hi ku ya hi phepha-hungu rin’wana, murhangeri un’wana wa vukhongeri bya le Indiya la dumeke wa lembe-xidzana ra vu-19, loyi a a tsakela ku hlanganisa vukhongeri bya Vuhindu, Vuislem ni Vukreste, u te: “Mfumo wa xiviri wa Xikwembu a wu nge fiki ntsendze loko vukhongeri bya le vuxeni ni bya le vupela-dyambu byi nga si hlangana.” (The Times of India) Nakambe mukongomisi wa kholichi ya vukhongeri bya Vuislem eStrathfield, le Australia, sweswinyana wa ha ku tsalela phepha-hungu a ku: “Ku fana ni Mamoslem hinkwawo, ndzi pfumela [leswaku] Yesu u ta vuya kutani a simeka Mfumo wa xiviri wa Xikwembu.”

A swi kanakanisi leswaku ku ni vanhu lava ringanaka tibiliyoni lava pfumelaka eka Mfumo wa Xikwembu ni ku wu khongelela. Kambe xiya yinhla leyi tsakisaka.

U nga ha va u swi tiva leswaku hina Timbhoni ta Yehovha, leti kandziyisaka magazini lowu, hi famba hi muti ni muti endhawini ya ka n’wina leswaku hi burisana ni vanhu hi Bibele. Hi ku tirhisa magazini lowu, hi endla ntirho lowu emisaveni hinkwayo, ematikweni ya 236 naswona hi chumayela hi tindzimi to tlula 400. Mhaka-nkulu leyi hi chumayelaka ha yona i Mfumo wa Xikwembu. Entiyisweni, xiya leswaku nhloko-mhaka hinkwayo ya magazini lowu yi ri, Xihondzo xo Rindza Xi Huwelela Mfumo Wa Yehovha. Hakanyingi hi vutisa vanhu loko va wu khongelela Mfumo wolowo. Vanhu vo tala va ri va wu khongelela. Hambiswiritano, loko va vutisiwa leswaku Mfumo wolowo i yini, entiyisweni vanhu vo tala va ri, “A ndzi swi tivi,” kumbe nhlamulo ya vona a yi twisiseki naswona a va tiyiseki ha yona.

Ha yini vanhu vo tala va kombela nchumu lowu va nga kotiki ku wu hlamusela? Xana hileswi Mfumo wa Xikwembu wu rharhanganeke naswona wu nga mhaka leyi nga twisisekiki? Doo! Mfumo wolowo wu hlamuseriwa hi vuenti ni hi ndlela leyi twisisekaka eBibeleni. Ku tlula kwalaho, rungula ra Bibele malunghana ni Mfumo ri nga ku nyika ntshembo wa xiviri eminkarhini leyi ya mangava. Eka xihloko lexi landzelaka hi ta vona ndlela leyi Bibele yi wu hlamuselaka ha yona ntshembo wolowo. Kutani hi ta vona leswaku xikhongelo xa Yesu xa leswaku Mfumo wu ta xi ta hlamuriwa rini.

[Nhlamuselo ya le hansi]