Ntirho Wo Aka Tiholo Ta Mfumo Wu Dzunisa Yehovha

“A ndzi swi tshembi leswi voniwaka hi mahlo ya mina. A ndzi nga swi ehleketi leswaku hi nga va ni muako wo saseka wo fana ni lowu, lowu hi nga hlanganaka eka wona hi dzunisa Yehovha. Ku hava mali leyi nga xavaka ntsako lowu ndzi nga na wona!”—MARIA, wa le MEXICO.

TIMBHONI TA YEHOVHA ti rhandza ku hlangana swin’we leswaku ti dyondza Rito ra Xikwembu, ku nga Bibele. (Pisalema 27:4; Vaheveru 10:23-25) Naswona ti tsaka ngopfu loko ti hlangana emiakweni leyi xiximekaka yo gandzela eka yona. Eka malembe ma nga ri mangani lama hundzeke, ematikweni yo tala ti ake miako leyintshwa ya magidi yo gandzela eka yona leyi vuriwaka Tiholo ta Mfumo.

I yini lexi endleke leswaku ku va ni ntirho lowu wo aka? Ntirho lowu wu endliwa hi vamani? Naswona lava endlaka ntirho lowu va vuyeriwa njhani? Leswaku u kuma tinhlamulo ta swivutiso leswi, ehleketa hi leswi humeleleke etikweni ra Mexico ni ra le Belize.

Ku Laveka Tiholo Ta Mfumo Ta Magidi!

Enkarhini lowu hundzeke, Timbhoni ta Yehovha ta le Mexico a ti hlengeletana endhawini yin’wana ni yin’wana leyi ti yi kumaka leswaku ti gandzela eka yona—endzhaku ka tindlu, emakaya ya Timbhoni, evuhlayiselweni bya nhundzu, etigaraji kumbe etiholweni leti hirhiweke. Hi nkarhi wolowo, Timbhoni leti to tshembeka hakanyingi a ti ehleketa hi ndlela leyi a swi ta tsakisa ha yona loko to ti akela Tiholo ta tona ta Mfumo.

Hi 1994 a ku ri ni Timbhoni ta 388 000 eMexico. Nkambisiso lowu endliweke lembe rero wu kombisa leswaku loko Timbhoni leti hinkwato a to va ni miako ya tona yo gandzela eka yona, a swi ta lava leswaku ku akiwa Tiholo letintshwa ta Mfumo to ringana 3 300. Hakunene wolowo a wu ta va ntirho lowukulu!

Hi nkarhi wolowo mavandlha man’wana lawa a ma swi kota se a ma sungurile ku ti akela Tiholo ta wona ta Mfumo. Kambe eka malembe ya ntlhanu lama landzeleke, swi ve erivaleni leswaku a hi fanele hi aka tiholo to tala naswona hi ti aka hi ku hatlisa leswaku ku fikeleriwa xilaveko xa tiholo leti lavekaka. Ntirho lowu wo aka wu hetisisiwe njhani?

Mintlawa Leyi Famba-fambaka Ya Vatirhi Va Ku Tirhandzela Lava Nga Ni Vutshila

Hi 1999 ku sunguriwe tsima lerintshwa ro aka. Etikweni hinkwaro ra Mexico ku sunguriwe Mintlawa yo Aka Tiholo ta Mfumo. Timbhoni ta Yehovha to huma etikweni hinkwaro ra Mexico leti to tala ta tona a ti ri ni vutshila byo aka ti tinyiketele ku pfuna eka tsima leri ro tsakisa. Sweswi tiko ra Mexico ri ni mintlawa yo aka ya 35, naswona ku sunguriwe ntlawa wun’wana etikweni ra Belize.

Mintlawa leyi yo Aka Tiholo ta Mfumo hakanyingi yi vumbiwa hi vatirhi va ku tirhandzela va kwalomu ka nhungu, vavanuna ni vavasati, lava nga vatirhi va nkarhi hinkwawo lava nga holeriwiki. Ntlawa wun’wana ni wun’wana wa vatirhi lava va ku tirhandzela wu suka endhawini yin’wana wu ya eka yin’wana etikweni leswaku wu ya letela vatirhi van’wana va ku tirhandzela lava nga eka tsima leri ro aka. Mutirhi un’wana ni un’wana wa ku  tirhandzela u tirha tiawara ta nhungu hi siku, ku sukela hi Musumbhunuku ku ya fika hi Ravuntlhanu swin’we ni hi Mugqivela wun’wana ni wun’wana wa vhiki ra vumbirhi. Hi awara ya nkombo ni mixo va sungula siku ra vona hi ku dyondza ndzimana ya Bibele, kutani endzhaku va fihlula. Hinkwavo va tiyimisele ku endla xin’wana ni xin’wana lexi va komberiwaka ku xi endla. Hi xikombiso, vavasati va endla ntirho lowu fanaka ni lowu endliwaka hi vavanuna, wo fana ni ku phama, ku hoxa tithayilisi ni ku penda.

Vandlha leri akeriwaka holo ri pfuna vatirhi volavo va ku tirhandzela lava famba-fambaka hi byetlelo, ku va hlantswela swiambalo ni ku va lunghiselela swakudya. Handle ko va va tirha swin’we eku akeni ka tiholo, vatirhi va ku tirhandzela ni Timbhoni ta kwalaho va tlhela va tsakela ku va swin’we eminhlanganweni ya Vukreste ni ku famba swin’we entirhweni wo chumayela hi yindlu ni yindlu.

Mikateko Leyi Vaka Kona Loko U Va Mutirhi Wa Ku Tirhandzela

Xana vatirhi lava va ku tirhandzela va titwa njhani hi ntirho lowu va wu endlaka? Daniel loyi se a nga ni malembe yo tlula manharhu a ri mutirhi wa ku tirhandzela u ri: “I ntiyiso leswaku hi tirha etindhawini leti hisaka ni leti titimelaka, hi dya swakudya leswi hi nga swi tolovelangiki, hi tshama hi ri eku fambeni, hi va ekule ni mindyangu ya hina naswona hakanyingi a hi na swona switirhisiwa swo tala swa manguva lawa leswi olovisaka vutomi.” U ya emahlweni a ku: “Kambe swiphiqo leswi hi vaka na swona a hi nchumu loko hi swi pimanisa ni mikateko leyi hi yi kumaka.”

Hi yihi mikateko yin’wana leyi va yi kumaka? Vatirhi vo tala va ku tirhandzela va va ni vutshila lebyintshwa lebyi va byi dyondzaka eka van’wana. Kambe mutirhi un’wana wa ku tirhandzela la vuriwaka Carlos, loyi a rhangelaka un’wana wa mintlawa leyikulu u vule nchumu wun’wana lowu a wu tekaka wu ri wa nkoka swinene. U te: “Se hi hundzuke ndyangu lowu nga ni swirho swa 20. Hi dya swin’we, hi tirha swin’we, hi dyondza swin’we ni ku khongela swin’we. Hi vanghana lavakulu.”

Mintlawa leyi yo aka yi tlhela yi tolovelana swinene ni mavandlha lawa yi ma pfunaka. José loyi se a tirheke eka matsima yo aka yo tlula 100 u ri: “Swa tsakisa ku vona mihloti ya ntsako ni ku n’wayitela loku Timbhoni ta kwalaho ti vaka na kona loko ti tlangela leswi ti vonaka ku navela ka tona ka ku va ni Holo leyintshwa ya Mfumo ku hetiseka.” U engetela a ku: “Swa hi tsakisa ku tiva leswaku ripfumelo ra van’wana ri tiyisiwa hi matshalatshala ya hina lama nga nyawuriki loko yindlu yin’wana ya vugandzeri byo tenga yi heta ku akiwa.”

Ntirho Lowu Se Wu Endliweke Wa Hlamarisa!

Tindhawu leti to gandzela eka tona a hi ta manyunyu. Ematshan’weni ya sweswo, ndlela leyi Tiholo ta Mfumo ti akiweke ha yona yi olovile naswona sweswo swi endla leswaku ti akiwa hi ku hatlisa naswona a ti durhi ngopfu. Loko swi koteka ku tirhisiwa swilo swo aka ha swona swa le ndhawini yoleyo ni maakelo ya kwalaho. Hi ndlela yoleyo, holo leyintshwa yi nga akiwa hi nkarhi wutsongo wa kwalomu ka mavhiki ya tsevu!

Ku sukela hi 2007, mavandlha hinkwawo ya le tikweni ra Belize ma ve ni Tiholo letintshwa ta Mfumo ta 17. Le Mexico ku akiwe tiholo to tlula 1 400 ku sukela hi 1999 ntsena!

 Hambileswi se ku endliweke ntirho lowunene, ntirho wa ha ri wukulu. (Matewu 9:37) Sweswi nhlayo ya Timbhoni ta le Mexico se yi tlula 600 000, naswona hinkwato ka tona ti hlangana kanharhu hi vhiki leswaku ti ta dyondzisiwa Rito ra Xikwembu. Hikokwalaho, ka ha laveka tiholo letintshwa ta kwalomu ka 2 000. Loko ntirho lowu wo aka lowu endliwaka hi vatirhi va ku tirhandzela a wu lo titshega hi matshalatshala ya munhu, a swi nga ta koteka ku fikelela pakani yoleyo. Kambe leswi tiholo to tala ti hetiweke swi kombisa leswaku hi mpfuno wa Yehovha Xikwembu “swilo hinkwaswo swa koteka.”—Matewu 19:26.

[Bokisi/Xifaniso eka tluka 22]

“Leswi Ti Swi Vulaka Ta Swi Endla”

Timbhoni ta Yehovha ta laha ku akiwaka Holo ya Mfumo a hi tona ntsena leti vutomi bya tona byi khumbiwaka hi ntirho lowu wo aka. Hi xikombiso, hi nkarhi wa ku akiwa ka Holo ya Mfumo etikweni ra Belize, wanuna un’wana loyi nsati wakwe a nghenaka kereke ya Pentekosta u byele nsati wakwe leswaku loko Timbhoni ta Yehovha ti heta ku aka “kereke” ya tona, u ta ya nghena na tona. I yini lexi nga n’wi endla a navela ku ya hlanganyela na tona? U te: “Ndza swi vona leswaku Xikwembu xi na tona. A ti lwi loko ti ri karhi ti tirha swin’we. Naswona leswi ti swi vulaka ta swi endla.”

[Xifaniso]

Holo ya Mfumo ya le Orange Walk, eBelize

[Bokisi/Xifaniso eka tluka 23]

Ntirho Lowu Endliwaka eMatikweni Yo Tala

Ku simekiwe Mintlawa yo Aka Tiholo ta Mfumo ematikweni ya 120. Matiko ma nga ri mangani lama xaxametiweke laha hansi ma ve ni vatirhi va ku tirhandzela lava pfuneteke entirhweni lowu wo aka:

Angola, Bolivia, Croatia, Dominican Republic, Etiyopiya, Fiji, Ghana, Hong Kong, Indiya, Jamaica, Kazakhstan, Liberia, Moldova, Nigeria, Papua New Guinea, Rwanda, Tuvalu, Ukraine, Venezuela na Zambia.

[Swifaniso]

Holo ya Mfumo edorobeni ra Acapulco, eMexico

Swirho swa Ntlawa wo Aka Tiholo ta Mfumo eMexico

[Xifaniso eka tluka 23]

Holo ya Mfumo edorobeni ra Tlaxcala, eMexico