Papila Leri Humaka eTikweni Ra Dominican Republic

“A Ndzi Nga Si Tshama Ndzi Rhandziwa Hi Ndlela Leyi”

NIURKA u nyikele nkulumo ya Bibele ro sungula evandlheni ra hina vhiki leri. U lunghiselele nkulumo yakwe hi ku tsala leswi a nga ta swi vula eka Braille kutani a swi nhlokohata. A ndzi ri na yena exitejini, ndzi tiendla munhu loyi a lavaka ku dyondza ntiyiso wa Bibele. A ndzi vulavula eka xikurisa-rito kutani yena a twa rito ra mina eka swipikara swa yena swo tlhoma etindleveni. Loko hi heta, vayingiseri lava a va tsakile va phokotele swinene lerova a kala a va twa. Ku n’wayitela ka yena ku kombise leswaku a a tsakile ni ku eneriseka. Na mina a ndzi tsakile. Hakunene swa tsakisa ku va entirhweni wa vurhumiwa!

Ndzi tsundzuka loko ndzi hlangana na Niurka ro sungula eka malembe mambirhi lama hundzeke. Ndzi n’wi vone ro sungula endzhaku ka loko ndzi chayele movha ku ringana hafu ya awara egondzweni ra le makaya leri nga ni ritshuri. A a tshame erikupakupeni ra yindlu leyi nga nyawuriki ya le makaya, leyi akiweke hi timhandzi ni switina swa semendhe, yi fuleriwe hi mazenge yo kurha. A ku ri ni huwa ni risema ra timbuti, mimpfundla ni timbyana. A a korhamise nhloko, a vonaka a ri ni xivundza ni gome. A a languteka a kurile swinene ku hundza malembe yakwe ya 34.

Ndzi n’wi khwenute ekatleni, kutani a tlakusa nhloko, hambileswi se a a ri ni malembe ya 11 a ri bofu. Ndzi huwelele etindleveni takwe ndzi n’wi byela vito ra mina ni ra loyi a ndzi chumayela na yena. Endzhakunyana hi kume leswaku Niurka u khomiwe hi vuvabyi lebyi vuriwaka Marfan syndrome, ku nga vuvabyi bya xitekela lebyi a byi n’wi xanisa swinene. Nakambe Niurka a a ri ni vuvabyi bya chukele lebyi a byi lava leswaku a tshama a byi veke tihlo hileswi mpimo wa chukele engatini yakwe a wu cinca hi xitshuketa.

Loko ndzi n’wi khomise Bibele, u swi xiyile leswaku hi yona kutani a vula leswaku loko a nga si fa mahlo a a swi rhandza ku hlaya Matsalwa. Kambe, xana munhu loyi, loyi a nga ni xivundza, loyi a titsongahateke a tlhela a tsana a ndzi ta n’wi dyondzisa njhani ntiyiso lowu phyuphyisaka lowu nga eRitweni ra Xikwembu? Leswi a a tiva maletere, ndzi sungule ku n’wi khomisa maletere ya tipulasitiki emavokweni. Hi ku hatlisa u sungule ku ma tiva. Endzhaku ka sweswo, hi ku va a khumba mavoko ya mina loko ndzi ri karhi ndzi vulavula hi ririmi ra mavoko, u dyondze letere ha rin’we leri fambisanaka ni maletere ya Ririmi ra Mavoko ra le Amerika. Hakatsongo-tsongo u dyondze maletere man’wana ya ririmi ra mavoko. Leswi a ndza ha ku sungula ku dyondza ririmi ra mavoko, dyondzo yin’wana ni yin’wana a yi lava leswaku ndzi heta tiawara ndzi ri karhi ndzi yi lunghiselela. Hambiswiritano, mina na Niurka a hi tiyimiserile ku dyondza ririmi ra mavoko, kutani hi ri twisise hi ku hatlisa.

Niurka u kote ku endla nhluvuko lowukulu loko nhlangano wo pfuna swisiwana wu n’wi nyike  swilo swo pfuneta ku twa. Hambileswi a swi nga ri swa manguva lawa swi n’wi pfune swinene. Endzhaku ko hanya malembe yo tlula khume a nga voni naswona a ri ni xivundza, u ti hambanise ni vanhu van’wana. Kambe moya wa Yehovha wu endle leswaku a kuma vutivi, a va ni ntshembo ni rirhandzu. Hi ku hatlisa, Niurka u tirhise nxongotelo leswaku a ya eka vaakelani va yena a ya va chumayela ntiyiso wa Bibele.

Niurka u dyondza Bibele ni mhani-ntsongo wa yena ni vazala vakwe vambirhi. U lunghiselela kahle, a nhlokohata dyondzo ha yin’we ka ha ri emahlweni. Swichudeni swa yena swi hlaya ndzimana kutani Niurka a hlaya xivutiso eka buku ya yena ya Braille. Munhu loyi a fambaka na yena loko va ya chumayela u byela Niurka tinhlamulo hi ku vulavulela etindleveni takwe hi rito leri tlakukeke kumbe hi ku khumba mavoko yakwe loko a ri karhi a vulavula hi ririmi ra mavoko.

Vandlha hinkwaro ri pfuna Niurka ri tlhela ri n’wi khutaza. Vamakwerhu vo hlayanyana lava nga Vakreste va n’wi pfuna leswaku a va kona eminhlanganweni ni le tinhlengeletanweni. Van’wana va famba na yena entirhweni wo chumayela. Sweswinyana Niurka u ndzi byele leswi: “A ndzi nga si tshama ndzi rhandziwa hi ndlela leyi.” U lava ku khuvuriwa entsombanweni wa hina wa muganga lowu landzelaka.

Loko hi hundza laha Niurka a tshamaka kona, hi n’wi vona a tshame erikupakupeni a ri karhi a orha masana a ololoxe nhloko naswona a ri karhi a n’wayitela. Ndzi n’wi vutise leswaku hikwalaho ka yini a n’wayitela. U te: “A ndzi anakanya hi vumundzuku loko misava yi ta va paradeyisi. Naswona a ndzi tivona se ndzi ri eka yona.”

[Xifaniso eka tluka 25]

Niurka swin’we ni swirho swin’wana swa vandlha ra hina emahlweni ka Holo ya Mfumo

[Xifaniso eka tluka 25]

Niurka u byela van’wana leswi a swi dyondzeke