Ku Va Un’wana Wa Vana Va Xikwembu

MALEMBE ya kwalomu ka 30 endzhaku ka Nyimpi exikarhi ka tiko ra North Korea ni ra South Korea, Nhlangano wa Swihaxa-mahungu swa le North ni le South Korea wu sungule nongonoko wo pfuna vanhu ku kuma swirho swa mindyangu ya swona leswi lahlekeke hi nkarhi wa nyimpi. Xana ku ve ni vuyelo byihi? Vanhu lava tlulaka 11 000 va tsake ngopfu lerova va khavaxela mihloti ya ntsako hileswi va tlheleke va hlangana ni varhandziwa va vona lava a ku ri khale va nga si va vona. Phepha-hungu rin’wana ri vike leswi: “Vanhu va le matikweni lawa mambirhi ya Korea a va nga si tshama va tsaka swinene hi ndlela leyi ematin’wini hinkwawo ya vona.”—Korea Times.

Le Brazil, ku nyikeriwe hi xihlangi lexi vitaniwaka Cézar leswaku ku hakeriwa xikweleti. Endzhaku ka malembe ya kwalomu ka khume, Cézar u tsake ngopfu leswi a kumeke mana wakwe lerova a siya vawundli vakwe lava fuweke leswaku a ya tshama ni mana wakwe.

Hakunene swirho swa ndyangu swa tsaka loko swi tlhela swi hlangana endzhaku ko lahlekelana! Bibele yi hlamusela ndlela leyi vanhu va hambanisiweke ha yona ni ndyangu wa Xikwembu hi ndlela yo vava. Yi tlhela yi hi byela ndlela leyi sweswi vanhu va nga le ku tlheleleni eka ndyangu wolowo hi ntsako. Xana leswi swi endleke hi ndlela yihi? Naswona u nga wu kuma njhani ntsako wolowo na wena?

Ndlela Leyi Ndyangu Wa Xikwembu Wu Hambanisiweke Ha Yona

Loko mupisalema a vulavula hi Muvumbi, ku nga Yehovha Xikwembu, u te: “Hi wena u nga ni xihlovo xa vutomi.” (Pisalema 36:9) Yehovha i Tatana wa ndyangu lowukulu wa swivumbiwa swo tlhariha leswi tshembekeke. Ndyangu wolowo wu vumbiwa hi xiphemu xa le tilweni xa vana vakwe va moya ku nga tintsumi ni xiphemu xa laha misaveni ku nga vanhu lava nga ta va vana vakwe va laha misaveni.

Hilaha swi hlamuseriweke hakona eka xihloko lexi hundzeke, loko Adamu n’wana wo sungula wa Xikwembu a xandzuka, vanhu hinkwavo va hambanisiwe hi ndlela yo vava ni Tatana tlhelo Muvumbi wa vona la nga ni rirhandzu. (Luka 3:38) Hikwalaho ka leswi Adamu a xandzukeke, u lahle lunghelo rakwe ni ra vana vakwe lava a va nga si velekiwa ra ku va vana va Xikwembu. Xikwembu xi tirhise nandza wa xona Muxe ku hlamusela vuyelo byo biha bya leswi Adamu a swi endleke: “Va  endle hi ndlela leyi onhakeke; a hi vana va [Xikwembu], xihoxo i xa vona vini.” “Xihoxo” kumbe xidyoho lexi vanhu va nga na xona xi va hambanise ni Xikwembu lexi kwetsimaka ni lexi hetisekeke hi ku helela. (Deteronoma 32:4, 5; Esaya 6:3) Kutani leswi swi vula leswaku vanhu hinkwavo va lahlekile naswona va pfumala tatana.—Vaefesa 2:12.

Loko Bibele yi kandziyisa ndlela leyi vanhu lava nga riki swirho swa ndyangu wa Xikwembu va tihambaniseke ha yona na xona, yi va vitana “valala.” (Varhoma 5:8, 10) Leswi vanhu va ti hambaniseke ni Xikwembu, va kayakayisiwa hi mfumo wa Sathana lowu nga ni nsele ni vuyelo bya xidyoho lexi va tswariweke na xona swin’we ni ku nga hetiseki ka vona. (Varhoma 5:12; 1 Yohane 5:19) Xana vanhu lava nga ni xidyoho va nga va swirho swa ndyangu wa Xikwembu? Xana vanhu lava nga hetisekangiki va nga va vana va Xikwembu hi ku helela, hilaha Adamu na Evha a va ri hakona loko va nga si dyoha?

Ku Hlengeleta Vana Lava Hambanisiweke Ni Xikwembu

Yehovha u endle malunghiselelo ya leswaku vanhu lava nga hetisekangiki lava n’wi rhandzaka va vuyeriwa hikwalaho ka leswi a va rhandzaka. (1 Vakorinto 2:9) Muapostola Pawulo u te: “Xikwembu ha Kreste xi endle leswaku misava yi vuyelelana na xona, a xi yi hlayeli swivi swa yona.” (2 Vakorinto 5:19) Hilaha swi hlamuseriweke hakona eka xihloko lexi hundzeke, Yehovha Xikwembu u nyikele hi Yesu Kreste leswaku a ta hi kutsula eka swidyoho swa hina. (Matewu 20:28; Yohane 3:16) Hikwalaho ko susumetiwa hi ku tlangela, muapostola Yohane u tsale a ku: “Vonani rirhandzu ronghasi leri Tatana a hi nyikeke rona, leswaku hi vuriwa vana va Xikwembu.” (1 Yohane 3:1) Hi ndlela yoleyo, vanhu lava yingisaka Yehovha va kote ku tlhela va va swirho swa ndyangu wakwe.

Hambileswi vanhu hinkwavo lava hlengeletiwaka ku va ndyangu wa Xikwembu va nga ta tsakela ku va ni vun’we ehansi ka nkhathalelo wa Tata wa vona wa le tilweni, Bibele yi vula leswaku va ta va mintlawa yimbirhi. Yi ri: “Swi fambisana ni leswi tsakeriwaka hi [Xikwembu] hi ku ya hi xikongomelo xa xona leswaku ku va ni vukongomisi eku heleni ka minkarhi leyi vekiweke, bya ku hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.” (Vaefesa 1:9, 10) Ha yini Xikwembu xi kongomisa swilo hi ndlela leyi?

Ndlela leyi Yehovha a hlelaka vana vakwe ha yona leswaku va va mintlawa yimbirhi yi endla leswaku ndyangu wakwe wu va ni vun’we. Mhaka leyi ya twisiseka. Ndyangu wa Xikwembu i wukulu lerova wu fanisiwa ni tiko. Eka tiko rin’wana ni rin’wana, ku hlawuriwa vanhu va nga ri vangani lava nga ta fuma leswaku lavan’wana hinkwavo va tshama etikweni leri nga ni nawu ni ku rhula. I ntiyiso leswaku ku hava mfumo wa vanhu lowu tshameke wu tisa ku rhula ka xiviri, kambe Xikwembu xi ta tisela ndyangu wa xona mfumo lowu hetisekeke. Ntlawa wo sungula, “swilo swa le tilweni,” wu vumbiwa hi vana va Xikwembu lava xi va hlawulaka ku va swirho swa Mfumo wa xona wa le tilweni. ‘Va ta fuma misava’ va ri etilweni.—Nhlavutelo 5:10, Bibele Ya Xitsonga.

Vana Va Xikwembu eMisaveni

Nakambe Yehovha u hlengeleta “swilo swa le misaveni,” ku nga vanhu va timiliyoni emisaveni hinkwayo leswaku eku heteleleni va va vana vakwe va laha misaveni. Leswi a nga Tatana la nga ni musa, u va dyondzisa tindlela takwe ta ku va ni rirhandzu leswaku va va ni vun’we hambileswi va humaka eka matiko yo tala. Hambi ku ri vanhu lava nga ni madzolonga, vutianakanyi, mahanyelo yo biha ni lava nga yingisiki Xikwembu va rhambiwa leswaku va ‘vuyelelana ni Xikwembu.’—2 Vakorinto 5:20.

Ku ta humelela yini hi lava alaka ku amukela xirhambo xa Xikwembu xa leswaku va vuyelelana na xona? Yehovha u ta tekela vanhu volavo goza leswaku ku va ni ku rhula ni ku hleleka endyangwini wakwe. Ku ta va ni “siku ra vuavanyisi ni ra ndzoviso wa vanhu lava va nga xi xiximiki Xikwembu.” (2 Petro 3:7) Xikwembu xi ta lovisa hinkwavo lava xi xandzukelaka. Lava xi yingisaka va ta tsaka swinene!—Pisalema 37:10, 11.

Endzhaku ka sweswo, ku ta va ni malembe ya gidi lama nga ni ku rhula, laha hinkwavo lava yingisaka Xikwembu va nga ta vuyeteriwa hakatsongo-tsongo evuton’wini lebyi hetisekeke lebyi Adamu a byi lahleke. Hambi ku ri lava feke va ta pfuxiwa. (Yohane 5:28, 29; Nhlavutelo 20:6; 21:3, 4) Xisweswo Xikwembu xi ta hetisisa xitshembiso xa xona lexi nge: “Swivumbiwa leswi [nga vanhu] swi ta ntshunxiwa na swona evuhlongeni  bya leswo bola, ku ta amukela ku ntshunxeka loko kwetsima loku nga ka vana va Xikwembu.”—Varhoma 8:21, Bibele—Mahungu Lamanene.

Ku Vuyela Eka Tata Wa Wena Wa Le Tilweni

Cézar ni vanhu va magidi va le Korea lava boxiweke eku sunguleni ka xihloko lexi, va boheke ku endla swo karhi leswaku va tlhela va hlangana ni swirho swa mindyangu ya vona. Vanhu va le Korea va boheke ku nghenela nongonoko lowu simekiweke kasi Cézar u boheke ku siya vawundli vakwe. Hilaha ku fanaka, u nga ha boheka ku endla swo karhi leswaku u vuyelelana na Yehovha Xikwembu, Tata wa wena wa le tilweni, kutani u tiphina hi ku va xirho xa ndyangu wakwe. I yini leswi u faneleke u swi endla?

Leswaku u tshinela eka Xikwembu tanihi Tata wa wena, u fanele u dyondza Rito ra xona ku nga Bibele, leswaku u ta va ni ripfumelo leri tiyeke eka xona ni le ka switshembiso swa xona. U ta tshemba leswaku leswi Xikwembu xi ku dyondzisaka swona swi pfuna wena. Nakambe swi ta lava leswaku u amukela ndzayo ya Xikwembu hikuva Bibele yi byela Vakreste yi ku: “Xikwembu xi mi khoma kukota vana. Hikuva hi wihi n’wana loyi tatana a nga n’wi tshinyiki?”—Vaheveru 12:7.

Ku endla tano swi ta cinca vutomi bya wena hinkwabyo. Bibele yi ri: “Mi va lavantshwa ematimbeni lama susumetaka mianakanyo ya n’wina, kutani mi fanele mi ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Vaefesa 4:23, 24) Kutani u fanele u yingisa xikhutazo xa muapostola Petro lexi nge: “Tanihi vana lava yingisaka, tshikani ku hanya hi ku ya hi ku navela loku a mi ri na kona eku sunguleni hi ku pfumala ka n’wina vutivi.”—1 Petro 1:14.

Ku Kuma Ndyangu Wa Wena Wa Xiviri

Loko Cézar a hlangane ni mana wakwe swi n’wi tsakise ngopfu ku tiva leswaku u ni vamakwavo. Hilaha ku fanaka, loko u tshinela eka Tata wa wena wa le tilweni, u ta kuma leswaku u ni vamakwavo vo tala evandlheni ra Vukreste. Loko u ri karhi u tolovelana na vona, u ta kuma leswaku va ku rhandza ngopfu ku tlula leswi swirho swa ndyangu wa wena swi ku rhandzisaka xiswona.—Mintirho 28:14, 15; Vaheveru 10:24, 25.

Wa rhambiwa leswaku u va ni vun’we ni Tata wa wena wa xiviri ni vamakwenu. Ntsako lowu u nga ta va na wona wu ta fana ni lowu Cézar ni vanhu va magidi va le Korea va veke na wona loko va tlhela va hlangana ni swirho swa mindyangu ya vona.

[Xifaniso eka tluka 8]

Cézar loko a ri ni malembe ya 19 ni mana wakwe

[Swifaniso eka tluka 10]

Teka magoza ya ku tshinela eka Xikwembu