Muvuyeteri Wa Vutomi
Tshinela Eka Xikwembu
Muvuyeteri Wa Vutomi
XANA u feriwe hi munhu loyi u n’wi rhandzaka? Loko swi ri tano, wa swi tiva leswaku swi vava njhani ku feriwa. Muvumbi wa hina wa ri twisisa gome leri u nga na rona. A ngo ri twisisa ntsena kambe a nga herisa gome rolero leri vangiwaka hi rifu. EBibeleni u hi byela hi vanhu lava pfuxiweke eku feni enkarhini lowu hundzeke leswaku a hi kombisa leswaku a ngo va Munyiki wa vutomi ntsena kambe i Muvuyeteri wa byona. A hi kambisiseni xiendlakalo xin’wana laha a nyikeke N’wana wakwe Yesu Kreste matimba yo pfuxa munhu loyi a a file. Xiendlakalo xa singita rero xi tsariwe eka Luka 7:11-15.
A ku ri hi lembe ra 31 C.E loko Yesu a teka riendzo ro ya emutini wa Nayini lowu nga eGaleliya. (Ndzimana 11) Swi nga ha endleka leswaku loko a fika ehandle ka muti wolowo se a ri ri ekusuhi ni ku pela. Bibele yi ri: “Loko a fika ekusuhi ni nyangwa ya muti, ina, waswivo, a ku humesiwa munhu la feke, a tlakuriwile, n’wana la tswariweke a ri swakwe eka mana wakwe. Ku tlhandlekela kwalaho, wansati loyi a a ri noni. Ntshungu lowukulu lowu humaka emutini a wu ri swin’we na yena.” (Ndzimana 12) Anakanya gome leri noni leyi a yi ri na rona! Loko n’wana wa yona loyi a tswariweke a ri swakwe a fa, swi endle leswaku yi feriwa ra vumbirhi hi munhu loyi a a ta yi khathalela ni ku yi sirhelela.
Yesu u kongome eka manana loyi a a ri eku rileni, loyi a a famba ekusuhi ni rihlaka leri a ri rhwale ntsumbu wa n’wana wakwe. Rungula ri ri: “Loko Hosi yi n’wi vona, yi n’wi twela vusiwana, yi ku eka yena: ‘Tshika ku rila.’” (Ndzimana 13) Yesu u khumbiwe swinene hi xiyimo lexi twerisaka vusiwana xa noni yoleyo. Kumbexana Yesu a a anakanya hi mana wakwe loyi swi nga ha endlekaka leswaku a a ri noni hi nkarhi wolowo, loyi nakambe a a ta n’wi rilela ku nga ri khale leswi a a ta dlayiwa.
Yesu u va tshinelerile—kambe a a nga yi eswilahlweni. U “khumb[e] rihlaka” hiloko ntshungu wolowo wu yima. Kutani hi rito leri kombisaka leswaku u nyikiwe matimba yo hlula rifu, u te: “‘Jaha, ndzi ri eka wena, Pfuka!’ Kutani munhu loyi a feke a pfuka a tshama, a sungula ku vulavula, ivi [hosi] yi n’wi nyika mana wa rona.” (Ndzimana 14, 15) Leswi jaha rolero a ri file a ri hambanisiwe ni mana wa rona. Kutani loko Yesu ‘a ri nyika mana wa rona’ va tlhele va va ndyangu. A swi kanakanisi leswaku mihloti ya noni yoleyo yi hundzuke mihloti ya ntsako.
Xana u swi languterile ku va ni ntsako wo tano, wo tlhela u hlangana ni varhandziwa va wena lava feke? Tiyiseka leswaku Xikwembu xa yi twisisa ndlela leyi u titwaka ha yona. Ntwela-vusiwana lowu Yesu a veke na wona eka noni leyi a yi rila wu kombisa ntwela-vusiwana wa Xikwembu, hikuva u byi tekelele hi ku helela vumunhu bya Tata wakwe. (Yohane 14:9) Bibele yi hi dyondzisa leswaku Xikwembu xi ta pfuxa vanhu lava feke lava hlayisiweke emianakanyweni ya xona. (Yobo 14:14, 15) Rito ra xona, ku nga Bibele, ri hi nyika ntshembo wo tsakisa, ku nga ntshembo wo hanya eparadeyisini laha misaveni ni ku vona ku pfuxiwa ka varhandziwa va hina lava feke. (Luka 23:43; Yohane 5:28, 29) Ha yini u nga dyondzi swo tala malunghana ni Muvuyeteri wa vutomi kutani u tiyiseka hi ku helela leswaku varhandziwa va wena lava feke va ta pfuxiwa?
[Xifaniso eka tluka 23]
“Munhu loyi a feke a pfuka a tshama, a sungula ku vulavula, ivi [hosi] yi n’wi nyika mana wa [yena]”