Timfanelo Ta Timbhoni Ta Yehovha Leti Xanisiweke Ti Lweriwile

HI May 3, 2007, Huvo ya le Yuropa ya Timfanelo ta Vanhu leyi nga edorobeni ra Strasbourg, le Furwa, yi endle xiboho lexi yimaka ni Timbhoni ta Yehovha ta le Rhiphabliki ra Georgia. Huvo leyi yi kume leswaku Timbhoni ta kwalaho ti khomiwe hi ndlela ya tihanyi ni leswaku mfanelo ya tona ya ku gandzela hi ku ntshunxeka a yi xiximiwanga. Huvo yi tlhele yi sola khale ka mfumo wa Georgia hileswi wu nga tekangiki goza ro tengisa vanhu lava xaniseke Timbhoni. I yini lexi endleke leswaku ku tekiwa xiboho lexi?

Hi October 17, 1999, Timbhoni ta Yehovha ta 120 ta le Vandlheni ra Gldani, edorobeni ra Tbilisi leri nga ntsindza wa tiko, a ti khome minhlangano ya tona. Hi xitshuketa, ntshungu wa vapfukeri lowu a wu rhangeriwe hi Vasili Mkalavishvili, khale ka mufundhisi wa kereke ya Orthodox loyi a tekeriweke vufundhisi byakwe hikwalaho ka mahanyelo yo biha, u nghene laha Timbhoni a ti khomele kona minhlangano ya tona. Ntshungu lowu, lowu a wu khome swigombo ni swihambano swa nsimbi wu hlasele lava a va hlangane kwalaho, laha vo tala va vavisiweke swinene. Hikwalaho ka nhlaselo lowu, wansati un’wana u vavisiwe tihlo lerova a ra ha voni. Vanhu lava ringanaka 16 va yisiwe exibedlhele. Loko Timbhoni tin’wana ti ye exitichini xa maphorisa leswaku ti ya kombela mpfuno, ti kume murhangeri wa maphorisa loyi a ti byeleke leswaku leswi ti endliweke swona a hi nchumu, yena a a ta va a ti kombe xa ncila wa bulubulu! Un’wana wa vapfukeri volavo u rhekhode nhlaselo wolowo eka vhidiyo leyi endzhakunyana yi kombisiweke eka switichi swa thelevhixini swa le tikweni rero, leyi va kombiseke kahle vahlaseri volavo. *

Timbhoni leti hlaseriweke ti mangarile, kambe ku hava nhlanga leyi humeke ngati. Phorisa leri averiweke ku lavisisa mhaka leyi, ri vule leswaku hambileswi ri nga xirho xa kereke ya Orthodox, a ri ta endla vulavisisi handle ko ya hi nghohe. Leswi maphorisa ni vatirhela-mfumo va nga endlangiki nchumu hi mhaka leyi, sweswo swi khutaze swifamona swa vukhongeri leswaku swi ya emahlweni swi endla minhlaselo leyi fanaka yo tlula dzana.

Kutani hi June 29, 2001, Timbhoni ta Yehovha ti endle xikombelo eka Huvo ya le Yuropa ya Timfanelo ta Vanhu. * Huvo leyi yi endle xiboho xo hetelela hi May 3, 2007, laha yi wu hlamuseleke hi ku helela nhlaselo wolowo kutani yi sola vatirhela-mfumo va le Georgia hileswi va nga endlangiki nchumu hi mhaka ya kona. Huvo leyi yi te: “Vatirhela-mfumo . . . a va fanele va kambisise mhaka hi ku hatlisa” malunghana ni nhlaselo wolowo. Eka xiboho lexi Huvo leyi yi xi tekeke yi te: “Ku va vatirhela-mfumo va nga tekanga goza eka swiendlo swo tano, swi endla leswaku vanhu va nga ha tshembi loko Tiko ri ta swi kota ku va sirhelela.”

Huvo leyi yi gimete hi ku vula leswi: “Ku hlaseriwa ka vamangali hi October 17, 1999 a ku ri xiendlo xo sungula xa ku hlaseriwa ka Timbhoni ta Yehovha hi ndlela ya tihanyi. Kutani leswi mfumo wu honiseke ku lavisisa nhlaselo wo sungula ni ku xupula vahlaseri volavo swi endle leswaku ku va ni madzolonga yo tala ya vukhongeri etikweni hinkwaro ra Georgia lama vangiwaka hi ntlawa lowu fanaka wa vahlaseri.”

Hikwalaho, timfanelo ta Timbhoni ta Yehovha leti xanisiweke ti lweriwile naswona mfumo wa Georgia wu lerisiwe leswaku wu hakela swilo leswi onhiweke swin’we ni ku humesa mali yo riha swirho swa Vandlha ra Gldani. Hambileswi Timbhoni ta Yehovha ta le Georgia ti tsakeke hileswi ku xanisiwa hi ndlela ya tihanyi ku heleke, kambe lexi ti tsakisaka ngopfu hileswi xiboho lexi humesiweke hi Huvo yoleyo xi vulaka leswaku ti ni mfanelo ya ku gandzela hi ku ntshunxeka. Hikwalaho ka sweswo, ti n’wi nkhensa ngopfu Yehovha Xikwembu, Tata wa tona wa le tilweni, loyi a ti kongomiseke ni ku ti sirhelela enkarhini wolowo wa mangava.—Pisalema 23:4.

[Tinhlamuselo ta le hansi]