“Nyimpi Leyi Nga Ta Herisa Tinyimpi Hinkwato”

‘Ndza mi tshembisa leswaku nyimpi leyi yi ta va nyimpi yo hetelela—nyimpi leyi nga ta herisa tinyimpi hinkwato.’ —WOODROW WILSON, PRESIDENTE YA LE AMERIKA (1913-21).

SWESWO hi leswi un’wana wa varhangeri va misava a a swi langutele hi mahlo-ngati loko ku hela Nyimpi yo Sungula ya Misava kwalomu ka malembe ya 90 lama hundzeke. Nyimpi yoleyo ya misava hinkwayo a yi chavisa swinene lerova lava hluleke a va pfumela leswaku matshalatshala yo tala lawa va ma endleke a ma ta va tisela vuyelo lebyi tsakisaka hi masiku. Kambe a swi tolovelekanga leswaku tinyimpi ta vanhu ti tlhantlha swiphiqo, ngopfu-ngopfu ku herisa swiphiqo leswikulu leswi vangelaka tinyimpi.

Kwalomu ka malembe ya 20 endzhaku ka loko Presidente Wilson a vule xitshembiso xolexo, ku tlhekeke nyimpi ya vumbirhi ya misava. Yi dlaye vanhu vo tala swinene ku tlula lava dlayiweke eka nyimpi yo sungula ya misava. Swilo swa thekinoloji leswi sunguleke ku endliwa exikarhi ka Nyimpi yo Sungula ya Misava ni Nyimpi ya Vumbirhi ya Misava swi endle leswaku vanhu va va ni vuswikoti byo dlaya hi mpimo lowukulu swinene. Loko nyimpi ya vumbirhi ya misava yi ya eku heleni, varhangeri hinkwavo va misava va xiye leswaku tinyimpi a ti ta hambeta ti va kona hi mpimo lowukulu swinene.

Hi 1945 Douglas MacArthur, Ndhuna-nkulu ya le Amerika u te: “Hi saleriwe hi nkarhi wutsongo wo herisa tinyimpi. Loko hi nga sunguli tindlela tin’wana to antswa, Armagedoni yi ta fika.”

Ndhuna-nkulu MacArthur a a swi tiva leswi tibomo timbirhi ta nyutliya ti swi endleke edorobeni ra Nagasaki ni ra Hiroshima emasikwini yo hetelela ya nyimpi ya vumbirhi ya misava. Ndlela leyi chavisaka leyi madoroba lawa mambirhi ya le Japani ma lovisiweke ha yona, ma n’wi endle a ehleketa hi nhlamuselo yin’wana ya rito leri nge “Armagedoni,” a vula leswaku i nyimpi leyi chavisaka ya matlhari  ya nyutliya leyi nga ta yayarhela vanhu hinkwavo eka pulanete ya hina.

Mhaka ya leswaku ku nga ha va ni nyimpi ya matlhari ya nyutliya yi ya emahlweni yi karhata vanhu swinene. Hi va-1960, matiko lama nga ni matlhari ya nyutliya emisaveni ma endle rhengu “leri ma tiyisekiseke leswaku matlhari ya nyutliya ma ni matimba ya ku lovisa hi mpimo lowukulu.” Xikongomelo xa wona a ku ri ku va ni matlhari lama ringaneke lama copiwaka kumbe tindlela to copa matlhari wolawo leswaku ma kota ku lovisa vaaka-tiko lava endlaka tiphesente ta 25 ni ku lovisa madoroba lama endlaka tiphesente ta 50 ya tiko leri hlaseriwaka, ku nga khathariseki leswaku hi rihi tiko leri sunguleke nyimpi. A va tati ni xandla vanhu lava va chaveleriwaka hi rhengu leri, leri ku vuriwaka leswaku ri ta kondletela ku rhula emisaveni.

Namuntlha matlhari ya nyutliya ma hambeta ma andza naswona tinyimpi leti vaka kona emisaveni ti ya emahlweni ti dlaya vanhu vo tala swinene. Mhaka ya leswaku ku nga ha va ni nyimpi ya matlhari ya nyutliya ya ha endla leswaku vanhu va nga dyi byi rhelela. Hambileswi vanhu va navelaka leswaku tinyimpi ti hela, a hi vangani lava pfumelaka leswaku nyimpi kumbe endlelo rin’wana ri nga swi kota ku fikelela pakani yoleyo.

Nilokoswiritano, Bibele yi hlamusela nyimpi yo hlawuleka leyi nga ta herisa tinyimpi hinkwato. Nyimpi yoleyo yi yi vitana “Armagedoni”—ku nga rito leri vanhu hakanyingi va ri tirhisaka loko va vulavula hi nyimpi ya matlhari ya nyutliya. Nyimpi ya Armagedoni yi ta ti herisa njhani tinyimpi? Xihloko lexi landzelaka xi ta tlhuvutsa xivutiso lexi.

[Mfungho wa Vini va Xifaniso eka tluka 3]

DTRA Photo

[Mfungho wa Vini va Xifaniso eka tluka 4]

Nagasaki, Japan, 1945: USAF photo