“XANA u lunghekile?” Xana u tshame u vutisiwa xivutiso xexo?— Munhu loyi a ku vutiseke xivutiso xexo a a lava ku tiva loko se u tiyimiserile ku endla swo karhi. Hi xikombiso, munhu yoloye a nga ha va a vula leswaku: ‘Xana u na tona tibuku ta wena to hlaya? Xana se u tihlayile?’ Hilaha hi nga ta swi vona hakona, Timotiya a a lunghekile.

Nakambe Timotiya a a tiyimisele ku tirha. Xana wa swi tiva leswaku sweswo swi vula yini?— Loko Timotiya a rhambiwa ku tirhela Xikwembu, a a ri ni langutelo ro fana ni ra un’wana wa malandza ya Xikwembu, loyi a nga te: “Hi mina loyi! Ndzi rhume.” (Esaya 6:8) Leswi Timotiya a a tiyimisele ku tirha, u ve ni vutomi lebyi tsakisaka. Xana wa swi tsakela ku hlaya hi vutomi bya yena?—

Timotiya u velekiwile emutini wa Listra lowu a wu ri ekule swinene ni muti wa Yerusalema. Kokwa wakwe Luwisa ni mana wakwe Yunisi, a va ma tiva kahle Matsalwa. Loko Timotiya a ha ri ricece, va sungule ku n’wi dyondzisa Rito ra Xikwembu.—2 Timotiya 1:5; 3:15.

Swi nga ha endleka leswaku loko Timotiya a ha ri jaha, muapostola Pawulo swin’we na Barnaba va endzele eListra eka riendzo rakwe ro sungula ro chumayela. Swi nga ha endleka leswaku hi nkarhi wolowo mana wa Timotiya swin’we ni kokwa wakwe va ve Vakreste. Xana u nga swi tsakela ku tiva swiphiqo leswi Pawulo na Barnaba va hlangavetaneke na swona?— Vanhu lava vengaka Vakreste va khandle Pawulo hi maribye kutani va n’wi kokela ehandle ka muti. A va anakanya leswaku u file.

Lava a va pfumela eka leswi Pawulo a a swi dyondzisa va n’wi rhendzerile, hiloko a pfuka. Hi siku leri landzelaka, Pawulo na Barnaba va sukile eListra, kambe endzhakunyana va tlhele va tlhelela emutini wolowo. Loko va tlhelerile, Pawulo u nyikele nkulumo kutani a byela vadyondzisiwa a ku: “Hi fanele ku nghena emfun’weni wa Xikwembu hi mahlomulo yo tala.” (Mintirho 14:8-22) Xana wa swi tiva leswaku Pawulo a a vula yini hi marito wolawo?— A a vula leswaku van’wana va ta xanisa lava tirhelaka Xikwembu. Endzhakunyana Pawulo u tsalele Timotiya a ku: ‘Hinkwavo lava navelaka ku hanya vutomi lebyi tsakisaka Xikwembu va ta xanisiwa.’—2 Timotiya 3:12; Yohane 15:20.

 Endzhaku ka loko Pawulo na Barnaba va suke eListra, va tlhelele ekaya. Endzhaku ka tin’hweti to hlayanyana, Pawulo u teke Silasi a famba na yena, va tlhelela emitini leyi Pawulo a yi endzeleke leswaku va ya khutaza vadyondzisiwa lavantshwa. Loko va fika eListra a swi kanakanisi leswaku Timotiya u fanele a tsake swinene ku tlhela a vona Pawulo! Timotiya u tsake ni swikunwana loko Pawulo na Silasi va n’wi rhamba leswaku a famba na vona. Timotiya u amukele xirhambo xexo hi mandla mambirhi. A a tiyimisele ku famba na vona.—Mintirho 15:40–16:5.

Hi vunharhu bya vona va teke riendzo laha va fambeke tikhilomitara to tala hi milenge, va tlhela va famba hi xikepe. Loko va chika exikepeni, va ye eTesalonika le Grikiya. Vanhu vo tala va kwalaho va ve Vakreste. Van’wana va hlundzukile kutani va vumba ntshungu wa vapfukeri. Pawulo, Silasi na Timotiya va sukile kwalaho va ya eBeriya hileswi vutomi bya vona a byi ri ekhombyeni.—Mintirho 17:1-10.

Pawulo a a karhatekile hi vapfumeri lava a va ha ku hundzuka le Tesalonika, kutani u rhume Timotiya leswaku a tlhelela emutini wolowo. Xana wa swi tiva leswaku ha yini Pawulo a a karhatekile?— Endzhakunyana ka sweswo Pawulo u byele Vakreste va le Tesalonika a ku: ‘Leswaku a mi tiyisa ni ku mi chavelela leswaku ku nga vi na munhu la helaka matimba.’ Xana wa swi tiva leswaku ha yini Pawulo a rhume Timotiya loyi a a ha ri muntshwa eka xiavelo xexo lexi nga ni khombo?— Vakaneti a va nga n’wi tivi ngopfu Timotiya, naswona yena a a tiyimisele ku famba. Sweswo a swi lava leswaku Timotiya a va ni xivindzi! Xana u fambe njhani? Loko Timotiya a vuyile u vikele Pawulo ndlela leyi vanhu va le Tesalonika a va tshembeke ha yona. Kutani Pawulo u va tsalerile a ku: ‘Hi chaveleriwile ha n’wina.’—1 Vatesalonika 3:2-7.

Timotiya u tirhe na Pawulo ku ringana malembe ya khume lama landzeleke. Kutani Pawulo u khotsiwile eRhoma, kutani Timotiya loyi a ha ku ntshunxiwa ekhotsweni, u ye eRhoma leswaku a ya va swin’we na yena. Loko Pawulo a ha ri ekhotsweni, u tsalele vanhu va le Filipiya papila, kumbexana u tirhise Timotiya ku va matsalana wakwe. Pawulo u te: ‘Ndzi ni ntshembo leswaku ndzi ta rhuma Timotiya eka n’wina, hikuva a ndzi na un’wana la tshembekaka ku fana na yena loyi a nga ta mi tirhela ku antswa.’—Vafilipiya 2:19-22; Vaheveru 13:23.

Hakunene marito wolawo ma fanele ma n’wi tsakisile Timotiya! Pawulo u rhandze Timotiya swinene hileswi a a tiyimisele ku tirha. Hi tshemba leswaku na wena u ta va tano.