Tshinela Eka Xikwembu

Xikwembu Lexi Tiyimiseleke Ku Rivalela

Yohane 21:15-17

“OHO Yehovha, u lonene naswona u lunghekele ku rivalela.” (Pisalema 86:5) Hi marito wolawo lama tsakisaka, Bibele ya hi tiyisekisa leswaku Yehovha Xikwembu u rivalela hi mbilu leyi baseke. Xiendlakalo lexi endlekeke evuton’wini bya muapostola Petro xi swi kombisa kahle leswaku Yehovha u rivalela “hi ndlela leyikulu.”—Esaya 55:7.

Petro a a ri un’wana wa vanghana lavakulu va Yesu. Kambe evusikwini byo hetelela bya vutomi bya Yesu laha misaveni, Petro u hluriwe hi ku chava kutani a endla xidyoho lexikulu. Exivaveni lexi nga ekusuhi ni laha Yesu a a tengisiwa kona hi ndlela leyi nga riki enawini, Petro u landzule Yesu erivaleni a vula leswaku a nga n’wi tivi—ku nga ri kan’we ntsena kambe kanharhu. Endzhaku ka loko Petro a n’wi landzule ra vunharhu hi xivindzi, Yesu u ‘hundzuluke a languta Petro.’ (Luka 22:55-61) Xana u ehleketa leswaku Petro u titwe njhani loko Yesu a n’wi languta? Loko Petro a xiye ndlela leyi xidyoho xakwe a xi ri xikulu ha yona, u “hel[e] matimba, a rila.” (Marka 14:72) Muapostola loyi se a a hundzukile, loyi a landzuleke Yesu kanharhu, swi nga ha endleka leswaku u tivutisile loko Xikwembu xi ta n’wi rivalela.

Endzhaku ka loko Yesu a pfuxiwile, u vulavurisane na Petro naswona swi le rivaleni leswaku ku vulavurisana koloko ku suse ku kanakana loku Petro a a ri na kona ka loko Xikwembu xi n’wi rivalerile. Yesu a nga vulanga marito lama tlhavaka hambi ku ri ku n’wi gweva. Ematshan’weni ya sweswo, u vutise Petro a ku: “Xana wa ndzi rhandza?” Petro u hlamule a ku: “Ina, Hosi, wa swi tiva leswaku ndzi ni xinakulobye eka wena.” Kutani Yesu u hlamule a ku: “Phamela swinyimpfana swa mina.” Yesu u phindhe xivutiso xexo ra vumbirhi, naswona Petro u hlamule ku fana ni le ku sunguleni, kumbexana hi ku hiseka swinene. Yesu u te: “Risa tinyimpfu ta mina letitsongo.” Kutani Yesu a vutisa xivutiso lexi fanaka ra vunharhu: “Xana u ni xinakulobye eka mina?” Hiloko “Petro a va ni gome” kutani a ku: “Hosi, u tiva swilo hinkwaswo; wa swi lemuka leswaku ndzi ni xinakulobye eka wena.” Yesu a hlamula a ku: “Phamela tinyimpfu ta mina letitsongo.”—Yohane 21:15-17.

Ha yini Yesu a vutise swivutiso leswi se a a ti tiva tinhlamulo ta swona? Yesu a a kota ku vona leswi nga etimbilwini ta vanhu, xisweswo a a swi tiva leswaku Petro a a n’wi rhandza. (Marka 2:8) Hi ku vutisa swivutiso sweswo, Yesu u nyike Petro lunghelo ro n’wi tiyisekisa kanharhu leswaku a a n’wi rhandza. Nhlamulo ya Yesu leyi nge: “Phamela swinyimpfana swa mina. . . . Risa tinyimpfu ta mina letitsongo. . . . Phamela tinyimpfu ta mina letitsongo,” yi tiyisekise muapostola la hundzukeke leswaku Yesu a ha n’wi tshemba. Ku tlula kwalaho, Yesu a a lerisa Petro leswaku a pfuna hi ku khathalela nchumu wa nkoka swinene, ku nga valandzeri lava rhandzekaka va Yesu lava fanaka ni tinyimpfu. (Yohane 10:14, 15) A swi kanakanisi leswaku Petro u fanele a ntshunxeke ngopfu ku tiva leswaku Yesu a a ha n’wi tshemba!

Swi le rivaleni leswaku Yesu u rivalele muapostola wakwe la hundzukeke. Leswi Yesu a tikombiseke hi ndlela leyi hetisekeke timfanelo ni tindlela ta Tata wakwe, hi nga gimeta hileswaku na Yehovha u n’wi rivalerile Petro. (Yohane 5:19) Yehovha a nga kanakani ku rivalela, i Xikwembu xa tintswalo lexi ‘lunghekeleke ku rivalela’ mudyohi la hundzukaka. Xana leyi a hi mhaka leyi chavelelaka?