Swivutiso Swa Vahlayi

Ha Yini Timbhoni Ta Yehovha Ti Nga Yi eNyimpini?

Kun’wana ni kun’wana laha Timbhoni ta Yehovha ti tshamaka kona, ti ni matimu ya ku nga hlanganyeli etinyimpini exikarhi ka matiko kumbe exikarhi ka vanhu lava tshamaka etikweni rin’we. Buku yin’wana yi vule leswi eka malembe ya 50 lama hundzeke: “Loko ku tlhekeka tinyimpi, Timbhoni ta Yehovha a ti hlanganyeli nikatsongo eka tona.”—Australian Encyclopædia.

Xivangelo-nkulu lexi endlaka leswaku Timbhoni ti nga yi etinyimpini hileswaku loko to hlanganyela eka tona swi nga lwisana ni ripfalo ra tona tanihi leswi ti nga Vakreste. Ripfalo ra tona ri leteriwe hi swileriso ni hi xikombiso xa Hosi Yesu Kreste. U lerise valandzeri vakwe leswaku va rhandza vaakelani va vona. Nakambe u va lerise a ku: “Hambetani mi rhandza valala va n’wina, mi endla leswinene eka lava va mi vengaka.” (Luka 6:27; Matewu 22:39) Loko un’wana wa vadyondzisiwa vakwe a ringete ku n’wi sirhelela hi ku tirhisa banga, Yesu u n’wi byele leswi: “Vuyisela banga ra wena endhawini ya rona, hikuva hinkwavo lava khomaka banga va ta lova hi banga.” (Matewu 26:52) Xisweswo, hi ku tirhisa rito ni ku va vekela xikombiso, u swi kombise kahle leswaku vadyondzisiwa vakwe a va fanelanga va tirhisa matlhari ya tinyimpi.

Xivangelo xin’wana lexi endlaka leswaku Timbhoni ta Yehovha ti nga hlanganyeli etinyimpini hileswi vukhongeri bya tona byi nga ni swirho emisaveni hinkwayo. Nyimpi yi nga endla leswaku vamakwavo va lwa kutani sweswo swi nga lwisana ni xileriso xa Yesu xa leswaku ‘va rhandzana.’—Yohane 13:35.

Timbhoni ta Yehovha a to vulavula ntsena hi misinya ya milawu leyi nga laha henhla, leyi khutazaka vanhu ku rhandzana kambe ti hanya ha yona. Hi xikombiso, kambisisa leswi ti swi endleke hi nkarhi wa Nyimpi ya Vumbirhi ya Misava, leyi veke kona hi 1939-1945. Le United States, Timbhoni ta Yehovha to tlula 4 300 ti khotsiwile hikwalaho ko ala ku ya enyimpini. Le Britain Timbhoni leti tlulaka 1 500 ku katsa ni vavasati lava tlulaka 300, va khotsiwile hikwalaho ko ala ku endla mintirho leyi fambisanaka ni tinyimpi. Le Jarimani hi nkarhi wa mfumo wa Manazi, Timbhoni leti tlulaka 270 ti dlayiwile hi ku ya hi xileriso xa Tiko hikwalaho ko ala ku ya enyimpini. Hi nkarhi wa mfumo wa Manazi, Timbhoni to tlula 10 000 ti pfaleriwe emakhotsweni kumbe etinkampeni ta nxaniso. Timbhoni ta le Japani na tona ti xanisiwe swinene. Munhu wihi na wihi loyi a feriweke hi munhu loyi a n’wi rhandzaka hi nkarhi wa Nyimpi ya Vumbirhi ya Misava—kumbe etinyimpini tihi na tihi leti veke kona endzhaku ka leyi—a nga tiyiseka leswaku ku hava Mbhoni ni yin’we ya Yehovha leyi nga ni nandzu wa mafu wolawo.

Langutelo ra Timbhoni ta Yehovha malunghana ni nyimpi ri hlamuseriwe hi ku kongoma eka marito yo hetelela ya Wolfgang Kusserow. Hi 1942 swirho swa mfumo wa Manazi swi tseme nhloko ya jaha leri ra Mujarimani ra malembe ya 20 hileswi ri aleke ku ya enyimpini. (Esaya 2:4) Ri vule leswi ehubyeni ya masocha: “Ndzi kurisiwe ndzi ri Mbhoni ya Yehovha hi ku ya hi milawu ya Xikwembu leyi tsariweke eka Matsalwa yo Kwetsima. Nawu lowukulu ni lowu kwetsimaka swinene lowu xi wu nyikeke vanhu wu ri: ‘U fanele u rhandza Xikwembu xa wena ku tlula swilo hinkwaswo naswona u fanele u rhandza muakelani wa wena kukota loko u tirhandza.’ Milawu yin’wana yi hlayekisa xileswi: “U nga tshuki u dlaya.” Xana Muvumbi wa hina a a nga tsalanga milawu leyi hinkwayo leswaku vanhu va hanya ha yona?”—Marka 12:29-31; Eksoda 20:13.

Timbhoni ta Yehovha ti pfumela leswaku i Yehovha ntsena, Xikwembu xa matimba hinkwawo, loyi a nga ta tisa ku rhula loku nga heriki emisaveni hinkwayo. Ti tshembe yena leswaku a hetisisa xitshembiso xakwe xa leswaku u ta “herisa tinyimpi ku ya fika emakumu ya misava.”—Pisalema 46:9.