Lexi “Nga Riki Kule Ngopfu Ni Un’wana Ni Un’wana Wa Hina”
Tshinela Eka Xikwembu
Lexi “Nga Riki Kule Ngopfu Ni Un’wana Ni Un’wana Wa Hina”
LOKO vanhu va ringanisiwa ni vuako hinkwabyo, a va nyawuli. Kumbexana u tshame u tivutisa, ‘Xana vanhu va nga swi kota hakunene ku va ni vuxaka ni Xikwembu xa Matimba Hinkwawo?’ Sweswo swi nga koteka ntsena loko Xikwembu, lexi vito ra xona ku nga Yehovha, xi lava leswaku hi tshinela eka xona. Xana xa swi lava? Nhlamulo leyi chavelelaka yi nga kumiwa eka marito ya Pawulo lama khutazaka lama a ma byeleke swidyondzeki swa le Atena, hilaha ma tsariweke hakona eka Mintirho 17:24-27. Xiya swilo swa mune leswi Pawulo a swi vuleke hi Yehovha.
Xo sungula, Pawulo u vula leswaku Xikwembu xi “[endle] misava ni swilo hinkwaswo leswi nga eka yona.” (Ndzimana 24) Swilo swo hambana-hambana leswi sasekeke leswi endlaka leswaku vutomi byi tsakisa swinene, swi nyikela vumbhoni bya leswaku Muvumbi wa hina wa anakanyela naswona u ni rirhandzu. (Varhoma 1:20) A swi nga ta twala ku ehleketa leswaku Xikwembu xo tano xi nga hlawula ku va ekule ni vanhu lava xi va rhandzaka.
Xa vumbirhi, Yehovha u “nyika vanhu hinkwavo vutomi ni ku hefemula ni swilo hinkwaswo.” (Ndzimana 25) Yehovha i Munyiki wa vutomi. (Pisalema 36:9) Moya, mati ni swakudya leswi nga swa nkoka evuton’wini, hinkwaswo ka swona i tinyiko leti humaka eka Muvumbi wa hina. (Yakobo 1:17) Xana swa twisiseka ku pfumela leswaku Xikwembu xa hina lexi hananaka xi nga tihambanisa na hina, xisweswo xi hi tsona lunghelo ro tiva leswaku hi xona mani ni ra ku tshinela eka xona?
Xa vunharhu, “hi munhu un’we [Xikwembu] xi endle matiko hinkwawo ya vanhu.” (Ndzimana 26) Yehovha a nga na xihlawuhlawu nikatsongo. (Mintirho 10:34) Ha yini hi vula tano? Hikuva u vumbe “munhu un’we,” Adamu, loyi ha yena matiko ni tinxaka hinkwato ta vanhu ti humaka eka yena. Ku rhandza ka Xikwembu hileswaku “vanhu va mixaka hinkwayo va ponisiwa.” (1 Timotiya 2:4) Kutani hinkwerhu hi pfulekeriwe hi lunghelo ro tshinela eka xona ku nga khathariseki muvala wa nhlonge ya hina, tiko leri hi humaka eka rona kumbe ndhavuko wa hina.
Xo hetelela, Pawulo u vule mhaka leyi hi tiyisekisaka: Yehovha a nga le “kule ngopfu ni un’wana ni un’wana wa hina.” (Ndzimana 27) Hambileswi Yehovha a tlakukeke swinene, u endla leswaku un’wana ni un’wana la swi lavaka hi mbilu hinkwayo ku tshinela eka yena a n’wi kuma minkarhi hinkwayo. Rito rakwe ri hi tiyisekisa leswaku a nga le kule, kambe “u le kusuhi ni hinkwavo lava n’wi vitanaka.”—Pisalema 145:18.
Marito ya Pawulo ma swi veka erivaleni leswaku Xikwembu xi lava leswaku hi tshinela eka xona. Hambiswiritano, hilaha Pawulo a hlamuselaka hakona, xi pfumelela vanhu lava tiyimiseleke ku xi “lava” ni ku “xi ambamba” leswaku ku va vona ntsena lava tshinelaka eka xona. (Ndzimana 27) Buku yin’wana ya tinhlamuselo leyi endleriweke vahundzuluxeri va Bibele yi vula leswaku “maendli lawa mambirhi ma nga ha vula leswaku swa koteka ku xi kuma . . . kumbe ku navela koloko ku nga enerisiwa.” Hi xikombiso: Ekamareni leri nga ni munyama kambe leri u ri toloveleke, u nga ha ambamba xo lumeka rivoni ra gezi kumbe u ambamba laha ku nga ni nyangwa, hambiswiritano wa swi tiva leswaku u ta hetelela u swi kumile. Kutani na hina loko hi lava Xikwembu hi mbilu ya hina hinkwayo ni ku xi ambamba, hi nga tiyiseka leswaku hi ta vuyeriwa hileswi hi endleke matshalatshala yo tala. Pawulo wa hi tiyisekisa leswaku hi ta “xi kuma hakunene.”—Ndzimana 27.
Xana wa swi navela ku tshinela eka Xikwembu? Loko ripfumelo ra wena ri ku susumetela ku “lava Xikwembu” ni ku “xi ambamba,” a wu nge khomisiwi ribye. Swa olova ku kuma Yehovha hikuva a nga le “kule ngopfu ni un’wana ni un’wana wa hina.”