Xana Makungu Ya Wena Ma Fambisana Ni Xikongomelo Xa Xikwembu?

XINYENYANA xa muvala wo kwalala lexi vuriwaka Clark nutcracker lexi rhandzaka ku yimbelela, u nga ha xi vona xi ri karhi xi haha-haha emakhwatini ya le vupela-dyambu bya Amerika N’walungu. Xi hlengeleta tinyungu to ringana 33 000 lembe ni lembe kutani xi ti celela etindhawini ta kwalomu ka 2 500 leswaku xi ta ti dya hi nguva ya xixika lexi vuyisaka ni n’wana evukatini. Hakunene ndlela leyi xinyenyana lexi xi tihlengeletelaka ha yona swakudya leswi xi nga ta swi dya enkarhini lowu taka yi kombisa leswaku xi ‘tlharihile hi ntumbuluko.’—Swivuriso 30:24.

Vanhu va ni vuswikoti byo hlamarisa. Eka swivumbiwa hinkwaswo swa Yehovha swa laha misaveni, vanhu va ni vuswikoti lebyikulu bya ku dyondza eka swilo leswi hundzeke naswona va tirhisa tidyondzo teto ku lawula makungu ya vona ya nkarhi lowu taka. Hosi Solomoni u te: “Ma tele makungu embilwini ya munhu.”—Swivuriso 19:21.

Hambiswiritano, vanhu hi ntolovelo va boheka ku endla makungu ya vona hi ku ya hi leswi va ehleketaka leswaku vumundzuku byi ta va byi ri xiswona. Hi xikombiso, u hlela mintirho leyi u nga ta yi endla mundzuku hileswi u tshembaka leswaku ri ta xa ni leswaku u ta va wa ha hanya. Ntshembo wo sungula i ntiyiso; ntshembo wa vumbirhi a hi tiyiseki ha wona. Yakobo mutsari wa Bibele u tsale marito lawa lama nga ntiyiso: “A mi swi tivi leswaku vutomi bya n’wina byi ta va yini mundzuku.”—Yakobo 4:13, 14.

Yehovha Xikwembu u tiva swilo hinkwaswo. U tiva “ka ha ri eku sunguleni leswi nga ta humelela emakumu.” Xikongomelo xakwe xi ta hetiseka hambi ko ba lexi dumaka. U te: “Xikongomelo xa mina xi ta tiya, naswona hinkwaswo leswi ndzi swi tsakelaka ndzi ta swi endla.” (Esaya 46:10) Kutani ku nga endleka yini loko vanhu va endla makungu va nga anakanyi hi xikongomelo xa Xikwembu?

Loko Makungu Ya Vanhu Ma Nga Fambisani Ni Xikongomelo Xa Xikwembu

Kwalomu ka malembe ya 4 000 lama hundzeke, vaaki va Xihondzo xa Babele va endle kungu ro sivela vanhu leswaku va nga hangalaki emisaveni. Va te: “Tanani! A hi tiakeleni muti ni xihondzo lexi  nhlohlorhi ya xona yi nga ta fika ematilweni, naswona a hi tiendleleni vito ra ndhuma, hikuva hi nga tshuka hi hangalasiwa ehenhla ka vuandlalo bya misava hinkwayo.”—Genesa 11:4.

Hambiswiritano, xexo a ku nga ri xona xikongomelo xa Xikwembu hi misava. Xi lerise Nowa ni vana vakwe xi ku: “Tswalanani mi andza mi tata misava.” (Genesa 9:1) Xana Xikwembu xi endle yini hi makungu ya vaxandzuki va le Babele? Xi pfilunganye ririmi ra vona leswaku va nga ha swi koti ku vulavurisana. Vuyelo bya kona byi ve byihi? “Ku suka kwalaho Yehovha a va hangalasela ehenhla ka vuandlalo bya misava hinkwayo.” (Genesa 11:5-8) Vaaki va xihondzo xa Babele va boheke ku dyondza dyondzo ya nkoka. Loko makungu ya vanhu ni xikongomelo xa Xikwembu swi nga fambisani, “i xitsundzuxo xa Yehovha lexi nga ta tshama xi ri kona.” (Swivuriso 19:21) Xana wa ti tirhisa tidyondzo toleto ta le nkarhini lowu hundzeke leswaku ti lawula vutomi bya wena?

Xiendlo Xa Vuhunguki Xa Mufuwi

U nga ha va u nga kunguhati ku aka xihondzo, kambe vanhu vo tala namuntlha va endla makungu yo veka mali yo tala ebangi ni ku va ni swilo swo tala leswi vonakaka leswaku va ta hanya emafurheni loko se va tshike ku tirha. I swa ntumbuluko ku va munhu a lava ku tiphina hi vuyelo bya nyuku wakwe. Solomoni u tsale a ku: “Munhu un’wana ni un’wana u fanele a dya, kunene a nwa, a kuma leswinene entirhweni wakwe hinkwawo wa matimba. I nyiko leyi humaka eka Xikwembu.”—Eklesiasta 3:13.

Hi ta tihlamulela eka Yehovha malunghana ni ndlela leyi hi yi tirhisaka ha yona nyiko leyi. Kwalomu ka malembe ya 2 000 lama hundzeke, Yesu u kandziyise mhaka leyi eka vadyondzisiwa vakwe hi ku tirhisa xifaniso. U te: “Nsimu ya munhu un’wana la fuweke a yi veka ngopfu. Hikwalaho a sungula ku anakanya, a ku, ‘Xana ndzi ta endla yini, leswi ndzi nga ha riki na ndhawu yo hlengeletela ntshovelo wa mina?’ Kutani a ku, ‘Ndzi ta endla leswi: Ndzi ta hirimuxa switlati swa mina, ndzi aka leswikulunyana, kutani ndzi ta hlengeletela eka swona ntshovelo wa mina hinkwawo ni swilo swa mina hinkwaswo leswinene; kutani ndzi ta byela moya-xiviri wa mina ndzi ku: “Wena moya-xiviri, u ni swilo swo tala leswinene leswi hlayisiweke malembe yo tala; humula, u dya, u nwa, u tiphina.”’” (Luka 12:16-19) Makungu ya wanuna la fuweke ma vonaka ma ri lamanene, a swi tano ke? Ku fana ni xinyenyana lexi vuriwaka Clark nutcracker lexi ku vulavuriweke ha xona eku sunguleni ka xihloko lexi, wanuna wa le xifanisweni a a lunghiselela swilaveko swakwe swa nkarhi lowu taka.

Kambe ndlela leyi wanuna loyi a a ehleketa ha yona a yi hoxile. Yesu u ye emahlweni a ku: “Kambe Xikwembu xi ku eka yena, ‘Wena loyi a nga anakanyiki, vusiku byolebyi va lava moya-xiviri wa wena eka wena. Kutani, i mani loyi a nga ta kuma swilo leswi u swi hlayiseke?’” (Luka 12:20) Xana Yesu a a kaneta marito ya Solomoni ya leswaku ntirho ni swilo leswinene leswi kumiwaka hikwalaho ko tirha i tinyiko leti humaka eka Xikwembu? Doo! Xana Yesu a a vula yini? Yesu u te: “Swi tano hi munhu loyi a tihlengeletelaka  xuma kambe a nga fuwanga eka Xikwembu.”—Luka 12:21.

Yesu a a dyondzisa vayingiseri vakwe leswaku Yehovha u lava leswaku hi anakanya hi Yena swin’we ni swikongomelo Swakwe loko hi endla makungu yo karhi. Wanuna la fuweke a a ta fuwa eka Xikwembu hi ku lava tindlela to tiyisa vuxaka byakwe na xona ni ku lava vutlhari ni rirhandzu. Leswi a swi vuleke swi kombisa leswaku a a nga ri na mhaka ni sweswo, hambi ku ri ku siyela swisiwana ntshovelo leswaku swi khwaja kumbe ku nyikela tinyiko eka Yehovha. Wanuna la fuweke a ku nga ri mukhuva wakwe ku endla swiendlo sweswo leswi fambisanaka ni ku rhandza ka Xikwembu. Makungu yakwe a ku ri ku enerisa ku navela kakwe.

Xana u tshame u swi xiya leswaku swilo leswi vanhu vo tala namuntlha va swi rhangisaka evuton’wini bya vona swi fana ni swa wanuna loyi Yesu a vulavuleke ha yena? Ku nga khathariseki leswaku hi fuwile kumbe hi swisiwana, swa olova swinene ku wela entlhan’wini wo rhandza swilo leswi vonakaka kutani hi honisa vuxaka bya hina ni Xikwembu hikwalaho ko kavanyetiwa hi swilaveko swa vutomi swa siku ni siku. U nga endla yini leswaku u papalata xirimbana xo tano?

Ku Hlela Ku Hanya Vutomi Lebyi Vuriwaka Lebyi Tolovelekeke

Ku hambana ni wanuna la fuweke wa le xifanisweni xa Yesu, u nga ha va u ri ni swiphiqo swa timali. Nilokoswiritano, loko u nghenele vukati, a swi kanakanisi leswaku u hlela ku kumela ndyangu wa wena swilaveko swa wona naswona u navela onge vana va wena va nga kuma dyondzo leyinene. Loko u nga si nghenela vukati, makungu ya wena ma nga ha katsa ku kuma ntirho ni ku hlayisa ntirho lowu u nga na wona leswaku u nga vi ndzhwalo eka van’wana. Teto i tipakani ta nkoka.—2 Vatesalonika 3:10-12; 1 Timotiya 5:8.

Hambiswiritano, ku tirha, ku dya ni ku nwa—ku nga vutomi lebyi tekiwaka byi ri lebyi tolovelekeke—swi nga endla leswaku munhu a hanya vutomi lebyi nga fambisaniki ni ku rhandza ka Xikwembu. Swi nga endlekisa ku yini sweswo? Yesu u te: “Hilaha masiku ya Nowa a ma ri hakona, ni masiku ya vukona bya N’wana wa munhu ma ta va tano. Hikuva kukota leswi a va ri xiswona emasikwini wolawo ya le mahlweni ka ndhambi, va dya, va nwa, vavanuna va teka ni vavasati va hlomisiwa, ku fikela siku leri Nowa a ngheneke ha rona engalaveni; nileswi va nga lemukangiki nchumu ku fikela loko ndhambi yi fika yi va kukula hinkwavo, swi ta va tano ni hi vukona bya N’wana wa munhu.”—Matewu 24:37-39.

Loko Ndhambi yi nga si fika, hi ntolovelo vanhu a va tiphina hi leswi a va swi teka ku ri vutomi lebyi tolovelekeke. Hambiswiritano, xiphiqo xa vona a ku ri leswaku a va ‘lemukanga nchumu’ hi xikongomelo xa Xikwembu xo herisa misava leyo homboloka hi ndhambi. A va tiyiseka leswaku ndlela leyi Nowa a a hanya ha yona a yi nga tolovelekanga. Hambiswiritano, loko Ndhambi yi fika, ndlela leyi Nowa ni ndyangu wakwe a va hanya ha yona hi yona leyi vonakeke yi ri ya vutlhari hakunene.

Namuntlha, swilo leswi endlekaka swi kombisa leswaku hi hanya eminkarhini ya makumu. (Matewu 24:3-12; 2 Timotiya 3:1-5) Ku nga ri khale Mfumo wa Xikwembu wu ta “pfotlosa kutani wu herisa” mafambiselo ya swilo lawa ma nga kona sweswi. (Daniyele 2:44) Mfumo wolowo wu ta hundzula misava yi va paradeyisi. Wu ta herisa vuvabyi ni rifu. (Esaya 33:24; Nhlavutelo 21:3-5) Swivumbiwa hinkwaswo emisaveni swi ta hanya hi ku rhula naswona a swi nge he siki hi ndlala.—Pisalema 72:16; Esaya 11:6-9.

Kambe loko Yehovha a nga si teka goza, xikongomelo xakwe hileswaku mahungu lamanene ya Mfumo wakwe ma “chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14) Hi ku pfumelelana ni xikongomelo xa Xikwembu, Timbhoni ta Yehovha ta kwalomu ka timiliyoni ta nkombo ti chumayela mahungu lawa lamanene ematikweni ya 236 hi tindzimi leti tlulaka mune wa madzana.

Eka vanhu va misava, ndlela leyi Timbhoni ta Yehovha ti hanyaka ha yona yi nga ha vonaka yi nga tolovelekanga hi ndlela yo karhi kumbe yi vonaka yi ri ya vuhunguki. (2 Petro 3:3, 4) Ku fana ni vanhu lava a va hanya emahlweni ka Ndhambi, vanhu vo tala namuntlha va khomekile hi vutomi bya siku ni siku. Mani na mani loyi a nga hanyiki hi ndlela leyi vanhu vo tala va yi tekaka yi ri ndlela leyi tolovelekeke va nga ha n’wi teka a ri loyi a nga ringaniseliki. Kambe hi ku ya hi langutelo ra vanhu lava nga ni ripfumelo eka switshembiso swa Xikwembu, vutomi lebyi titshegeke hi ku tirhela Xikwembu hi byona lebyinene.

Hikokwalaho, hambi loko u fuwile kumbe u ri xisiwana kumbe u ri exikarhi, i vutlhari ku kambisisa makungu ya wena ya nkarhi lowu taka. Loko u ri karhi u endla tano, tivutise, ‘Xana makungu ya mina ma fambisana ni xikongomelo xa Xikwembu?’

[Xifaniso lexi nga eka tluka 11]

Loko makungu ya vanhu ni xikongomelo xa Xikwembu swi nga fambisani, i xitsundzuxo xa Yehovha lexi nga ta tshama xi ri kona

[Xifaniso lexi nga eka tluka 12]

Loko wanuna la fuweke wa le xifanisweni xa Yesu a endla makungu yakwe, u tsandzeke ku anakanyisisa hi xikongomelo xa Xikwembu