Xana Swi Hoxile Ku Tirhisa Vito Ra Xikwembu?

EKA Matsalwa ya Xiheveru, lawa hakanyingi ma vuriwaka “Testamente ya Khale,” vito ra Xikwembu ri humelela minkarhi ya kwalomu ka 7 000, ri tsariwe hi ndlela leyi יהוה (ri hlayiwa ku sukela exineneni ku ya eximatsini). Hi marito man’wana, vito ra Xikwembu ri yimeriwa hi maletere ya mune ya Xiheveru Yohdh, He, Waw, na He, lawa hakanyingi loko ma hundzuluxeriwa hi ku ya hi mpfumawulo wa rito ma vulaka YHWH.

Khale ka khaleni Vayuda va sungule ku pfumela mhaka leyi nga vukholwa-hava ya leswaku swi hoxile ku tirhisa vito ra Xikwembu. Hikwalaho ka sweswo, va ale ku ri vitana naswona va sungule ku ri siva hi mavito man’wana eka matsalwa ya vona. Hambiswiritano, vahundzuluxeri vo tala va Bibele va tirhise vito leri nge “Yahweh,” kumbe “Yehovha.” Yin’wana ya Tibibele leti tirhiseke vito leri i Jerusalem Bible ya Makhatoliki. Hi ku ya hi Bibele leyi, loko Muxe a vutise Xikwembu ndlela leyi a a ta hlamula ha yona loko Vaisrayele va tshuka va n’wi vutisa leswaku i mani loyi a n’wi rhumeke eka vona, Xikwembu xi hlamule xi ku: “U ta byela vana va Israyele u ku: ‘Yahweh, Xikwembu xa vatata wa n’wina, Xikwembu xa Abrahama, Xikwembu xa Isaka ni Xikwembu xa Yakobe u ndzi rhume eka n’wina.’ Leri i vito ra mina ra minkarhi hinkwayo; naswona ndzi ta vitaniwa hi vito leri eka switukulwana hinkwaswo leswi nga ta ta.”—Eksoda 3:15.

Loko Yesu a ri karhi a khongela, u vule leswi malunghana ni ndlela leyi a ri tirhiseke ha yona vito ra Xikwembu: “Ndzi va tivise vito ra wena naswona ndzi ta hambeta ndzi ri tivisa.” Naswona eka xikhongelo lexi hi ntolovelo xi vuriwaka Xikhongelo xa Hosi, Yesu u te: “Tata wa hina la nge tilweni, onge vito ra wena ri nga tekiwa ri ri leri kwetsimaka.”—Yohane 17:26; Matewu 6:9, JB.

Kutani swi nga ku hlamarisa ku tiva leswaku buku ya sweswinyana ya Mupapa Benedict wa vu-16, yi vule leswi malunghana ni ku tirhisa vito ra Xikwembu: “Vaisrayele va endle . . . kahle swinene hi ku ala ku vitana vito leri leri Xikwembu xi tivitanaka ha rona, leri nge YHWH, leswaku xi papalata ku va ri tekeriwa ehansi ku fana ni mavito ya swikwembu swa vahedeni. Hi ndlela leyi fanaka, vahundzuluxeri va manguva lawa va Bibele va hoxile hi ku tirhisa vito leri—leri minkarhi hinkwayo Vaisrayele a va ri teka ri ri xihundla ni leri nga vuriwiki—onge hiloko ku ri vito rihi na rihi ra khale ntsena.”—Jesus of Nazareth.

Xana wena u ri yini hi mhaka leyi? Xana swi lulamile kumbe swi hoxile ku tirhisa vito ra Xikwembu? Loko Yehovha hi byakwe a ku: “Leri i vito ra mina ra minkarhi hinkwayo; naswona ndzi ta vitaniwa hi vito leri eka switukulwana hinkwaswo leswi nga ta ta,” xana u kona munhu un’wana la nga ni mfanelo yo kaneta leswi A swi vuleke?

[Xifaniso lexi nga eka tluka 30]

Yesu u tirhise vito ra Xikwembu loko a khongela