Xana Wa N’wi Tiva Tata Wa Wena Wa Le Tilweni?

XANA tata wa wena u n’wi tiva kahle ku fikela kwihi? Xivutiso lexi xi nga ha ku hlamarisa loko u kulele endyangwini lowu nga ni rirhandzu. U nga ha hlamula u ku, ‘Ndzi n’wi tiva kahle!’ I ntiyiso leswaku vanhu vo tala va swi tiva leswi tata wa vona a swi rhandzaka ni leswi a nga swi rhandziki, ndlela leyi a endlaka swilo ha yona eka swiyimo swo karhi ni ndlela leyi a wu khathalelaka ha yona ndyangu wakwe.

Hambiswiritano, ku nga ha va ni minkarhi leyi u hlamaleke loko u vona tata wa wena a endla swilo hi ndlela leyi a wu nga yi langutelanga. Hi xikombiso, n’wana wa jaha a nga ha tiva tata wakwe a ri munhu wo miyela ni la rhuleke—kukondza loko ku humelela xiyimo xa xihatla. Hi xitshuketa a nga vona tata wakwe a ri ni xivindzi ni vurhena leswaku a sirhelela ndyangu wakwe.

Xana Muvumbi wa hina u n’wi tiva kahle ku fikela kwihi? Malunghana na yena hi byeriwa leswi: “Ha [yena] hi ni vutomi, ha famba hi tlhela hi va kona.” (Mintirho 17:28) Xikwembu hi xona xi hi nyikeke vutomi; hi ndlela yoleyo i Tatana wa hinkwavo lava hanyaka. (Esaya 64:8) Kumbexana yoleyo i ndlela leyi u titwaka ha yona hi Xikwembu naswona sweswo i swinene hikuva hi yona ndlela leyi hi faneleke hi titwa ha yona. Kambe ku ni swilo swo tala leswi hi nga swi tivaka ni leswi hi nga swi dyondzaka ha xona—leswi hi vuyerisaka ni ku hi endla hi va ni ntsako.

Ndlela leyi u titwaka ha yona hi tata wa wena ni ndlela leyi u n’wi xiximaka ha yona yi titshege hileswaku u n’wi tiva kahle ku fikela kwihi. Hilaha ku fanaka, loko u xi tiva kahle Xikwembu, vuxaka bya wena na xona byi ta ya byi tiya swinene. Xikwembu xi nga ku pfuna leswaku u tiyisela maxangu lawa u vaka na wona evuton’wini loko u ya u xi tiva kahle ni loko u dyondza ku endla ku rhandza ka xona.

Xana Xikwembu i munhu wa njhani? Xana timfanelo ta xona ti fanele ti yi khumba njhani ndlela leyi u xi langutaka ha yona? Xana ku xi tiva swi vula leswaku u ni vutihlamuleri byo endla swo karhi? U ta kuma tinhlamulo ta swivutiso leswi eka xihloko lexi landzelaka.

[Marito lama tshahiweke exihlokweni lama nga eka tluka 3]

Ndlela leyi u va tivaka ha yona vanhu van’wana yi khumba ndlela leyi u va langutaka ha yona