I Mani La Nga Tivaka Leswaku Vumundzuku Byi Ta Va Njhani?

“Hi mina Loyi a nga ni Vukwembu . . . , Loyi a vulaka ka ha ri eku sunguleni leswi nga ta humelela emakumu, ku sukela khale swinene a vula leswi nga si tshamaka swi endliwa.”—Esaya 46:9, 10.

EMINKARHINI leyi leyi cinca-cincaka, vativi va tipolitiki, va timali ni va ntshamisano va dyondza hi matimu ni mikhuva ya manguva lawa ya vanhu leswaku va ringeta ku vhumbha leswi vumundzuku bya vanhu byi nga ta va xiswona. Leswi vanhu van’wana va swi lavaka swinene ku tiva leswaku vumundzuku bya vona byi va khomele yini, va ya eka tin’anga kumbe vangoma va swilo swa le mpfhukeni leswaku va ta kuma tinhlamulo ta swivutiso leswi va nga na swona. Hakanyingi leswi va byeriwaka swona swi va heta matimba. Xana a swi koteki nikatsongo ku tiva leswi nga ta humelela eka misava leyi, mindyangu ya hina ni le ka un’wana ni un’wana wa hina? Xana u kona hakunene munhu la nga vonaka leswi vumundzuku byi nga ta va xiswona?

Eka marito lama tshahiweke laha henhla lawa Yehovha, Xikwembu xa Matimba Hinkwawo, a ma byeleke muprofeta Esaya, u vulavule hi vuswikoti byakwe byo kota ku profeta leswi nga ta humelela enkarhini lowu taka. Hi ku tirhisa Esaya, Xikwembu xi profete hi ta ku ntshunxiwa ka Vaisrayele va khale evuhlongeni le Babilona leswaku va tlhelela eka rikwavo va ya pfuxeta muti wa Yerusalema ni tempele. Vuprofeta lebyi byi hetiseke njhani hi ndlela leyi pakanisaka? Ka ha sele malembe ya kwalomu ka 200 leswaku vuprofeta lebyi byi hetiseka, Esaya u vule hi ku kongoma vito ra loyi a a ta hlula muti wa Babilona ku nga Korexe. Ku tlula kwalaho, Esaya u hlamusele hi ndlela leyi pakanisaka kungu leri Korexe a a ta ri tirhisa, ku nga ku hambukisa Nambu wa Yufrata, lowu a wu sirhelela muti wolowo. U tlhele a profeta leswaku Korexe a a ta kuma tinyangwa timbirhi letikulu ta muti ti siyiwe ti nga pfariwanga, leswi endleke leswaku Korexe a hlula muti wolowo handle ko dzuka nyuku.—Esaya 44:24–45:7.

Ku hambana ni Xikwembu, munhu a nga swi koti hambi ku ri ku hlometela leswi vumundzuku byi nga ta va xiswona. Hosi Solomoni wo tlhariha u tsale a ku: “U nga tibumi hi siku leri tlhandlamaka, hikuva a wu swi tivi leswi siku ri nga ta swi veleka.” (Swivuriso 27:1) Mhaka yoleyo ya ha ri ntiyiso ninamuntlha. Ku hava munhu loyi a nga kotaka ku tiva leswi vumundzuku byakwe byi nga ta va xiswona. I yini leswi endlaka leswaku Xikwembu xi swi kota? Xi swi twisisa hi ku helela swilo hinkwaswo leswi xi swi tumbuluxeke, ku katsa ni timfanelo ni mboyamelo wa munhu. Loko Xikwembu xi swi lava, xi nga swi kota ku vona ka ha ri emahlweni vumundzuku bya munhu ha un’we kumbe bya vanhu hinkwavo. Ku tlula kwalaho, Yehovha u ni vuswikoti lebyikulu swinene byo lawula vuyelo bya swiendlakalo swin’wana. Loko A tirhise muprofeta wakwe ku profeta leswaku a ku ta humelela nchumu wo karhi, U ve “Loyi a endlaka rito ra nandza wakwe ri va ntiyiso, Loyi a hetisisaka xikongomelo xa varhumiwa vakwe.” (Esaya 44:26) I Yehovha Xikwembu ntsena loyi a nga vulaka marito wolawo.

Esaya u hanye emalembeni lama tlulaka 700 Yesu la nga Mesiya a nga si velekiwa. Kambe Esaya u profete hi ta ku ta ka Mesiya. Hambiswiritano, ku sukela hi lembe-xidzana ra vu-18, vaxopaxopi va Bibele va sungule ku hehla buku ya Esaya va vula leswaku a yi fanelanga yi tshembiwa. Va vule leswaku vuprofeta bya Esaya a hi timhaka leti profetiweke kambe ti tsariwe hi munhu endzhaku ka loko se ti endlekile. Xana sweswo i ntiyiso? Hi 1947 ku tshuburiwe kopi ya buku ya Esaya swin’we ni tibuku-nsongwa tin’wana ta khale ebakweni rin’wana leri nga ekusuhi ni Lwandle leri Feke. Valavisisi va kume leswaku kopi leyi yi tsariwe ka ha sele madzana ya malembe  Mesiya kumbe Kreste loyi ku profetiweke ha yena a nga si velekiwa. Hakunene Bibele yi hi byela leswi vumundzuku byi nga ta va xiswona!

Esaya swin’we ni vatsari van’wana va Bibele a va ta va va nga swi kotanga ku profeta hi ta swiendlakalo swa nkarhi lowu taka hi vutlhari bya vona. Kambe a va “vulavula leswi humaka eka Xikwembu va ri karhi va susumetiwa hi moya lowo kwetsima.” (2 Petro 1:21) Eka swihloko leswi landzelaka hi ta dzika eka vuxokoxoko byin’wana bya vutomi bya Yesu lebyi profetiweke hi Esaya. Kutani hi ta kambisisa swiendlakalo leswi Yesu ni vadyondzisiwa vakwe va profeteke leswaku a swi ta humelela eminkarhini ya hina ni leyi taka.