Mihloti eGuleni Ra Dzovo

JAHA rin’wana a ri ri mubaleki. Leswi jaha leri a ri karhatekile naswona ri ri ni nhlomulo, mahlo ya rona ma tenga-tenga mihloti, ri khongele eka Yehovha, Xikwembu xa rona lexi nga ni musa ri ku: “Chela mihloti ya mina eguleni ra wena ra dzovo.” (Pisalema 56:8) Jaha rero a ku ri Davhida, loyi endzhakunyana a veke hosi ya le Israyele. Kambe a ku ri yini gula ra dzovo leri a vulavuleke ha rona, naswona Xikwembu xi nga yi chela njhani mihloti ya hina eka rona?

Davhida a a ri toloverile gula ra dzovo. A ku ri nchumu lowu a ku cheriwa mati, mafurha, vhinyo hambi ku ri botere eka wona. Vafambi va le ndhawini ya le Sahara, vo tanihi Vatuareg, va ha ma tirhisa ni sweswi magula ya dzovo lama endliweke hi dzovo leri heleleke ra mbuti kumbe nyimpfu. Emaguleni wolawo a ku cheriwa tilitara to tala ta mati, swi ya hileswaku xiharhi xa kona a xi kule ku fikela kwihi. Magula ya dzovo a ma dume hi ku endla leswaku mati ma tshama ma ri karhi ma titimela hambiloko ku hisa ka dyambu ra le kwandzasini ku dlaya ni vusokoti. Eminkarhini ya khale, magula ya dzovo a ma tala ku rhwariwa hi timbhongolo kumbe tikamela. Namuntlha u nga ha vona magula ya dzovo ma kotletiwe emahlweni ka timovha leti endleriweke ku famba etintshaveni, emakwandzasini ni le nhoveni!

Marito ya Davhida lama khutazaka lama vulavulaka hi gula ra dzovo ma nga ha vula swo karhi ni le ka hina. Hi ndlela yihi? Bibele yi vula leswaku Sathana u lawula misava leyi naswona u ‘hlundzuke swinene’ sweswi. Hikwalaho ka sweswo, misava yi langutana ni makhombo yo chavisa. (Nhlavutelo 12:12) Kutani ku fana na Davhida, ku ni vanhu vo tala lava xanisekaka enyameni ni le mianakanyweni—ngopfu-ngopfu lava ringetaka ku tsakisa Xikwembu. Xana na wena u langutana ni swiphiqo sweswo? Vanhu volavo vo tshembeka a va tshiki ku ringeta ku hanya hi ndlela yo tshembeka hikwalaho ka xivindzi lexi va nga na xona, hambileswi ‘va nga eku rileni.’ (Pisalema 126:6) Va nga tiyiseka leswaku Tata wa vona wa le tilweni wa ma vona maxangu lawa va langutanaka na wona ni ndlela leyi va titwaka ha yona hikwalaho ka wona. Hakunene wa ku twisisa ku vava loku malandza yakwe ma ku twaka naswona wa yi tsundzuka swinene mihloti ya wona ni ku xaniseka ka wona, kutani u yi chela eguleni ra dzovo hi ndlela yo fanekisela.