XANA u pfa u chava?— * Vo tala va hina hi pfa hi chava minkarhi yin’wana. Xana u nga endla yini loko u chava?— U nga ya eka munhu un’wana loyi a nga nkulu eka wena naswona a nga ni matimba ku ku tlula. Kumbexana tata wa wena kumbe mana wa wena a nga ku pfuna. Hi nga dyondza swo tala eka Davhida malunghana ni laha hi nga yaka kona loko hi lava mpfuno. U yimbelelele Xikwembu a ku: “Loko ku ri mina, . . . ndzi ta tshemba wena. . . . Ndzi veke ntshembo wa mina eka Xikwembu; a ndzi nge chavi.”—Pisalema 56:3, 4.

Xana u ehleketa leswaku Davhida u dyondze eka mani ku va a nga chavi? Xana u dyondze eka vatswari va yena?— A swi kanakanisi leswaku u dyondze eka vona. Tata wakwe Yese, a a ri kokwana wo tshembeka wa Yesu Kreste, “Hosana ya Ku Rhula” leyi tshembisiweke hi Xikwembu. (Esaya 9:6; 11:1-3, 10) Tata wa Yese, ku nga kokwa wa Davhida, a ku ri Obede. Buku yin’wana ya Bibele yi thyiwe vito ra mana wa Obede. Xana wa ri tiva vito rakwe?— I Rhuti, wansati wo tshembeka loyi nuna wakwe a ku ri Bowasi.—Rhuti 4:21, 22.

Rhuti na Bowasi va fe khale swinene Davhida a nga si velekiwa. U nga ha va u tiva vito ra mana wa Bowasi, kokwa wa kokwana wa Davhida. A a tshama eYeriko naswona u ponise tinhlori tin’wana ta Vaisrayele. Loko marhangu ya Yeriko ma wile, u sirhelele ndyangu wakwe hi ku hayeka ngoti ya xivunguvungu efasitereni rakwe. Vito rakwe i mani?— I Rahava, loyi a veke mugandzeri wa Yehovha naswona Vakreste va nga n’wi tekelelaka hileswi a veke ni xivindzi.—Yoxuwa 2:1-21; 6:22-25; Vaheveru 11:30, 31.

Hi nga tiyiseka leswaku tata wa Davhida ni mana wakwe va n’wi dyondzise swilo hinkwaswo malunghana ni malandza wolawo yo tshembeka ya Yehovha, hikuva vatswari a va lerisiwe ku dyondzisa vana va vona swilo swo tano. (Deteronoma 6:4-9) Ku fike nkarhi lowu Samuwele, muprofeta wa Xikwembu, a lerisiweke ku ya hlawula Davhida, xifanyetana xa Yese, leswaku a va hosi ya Israyele ya nkarhi lowu taka.—1 Samuwele 16:4-13.

Siku rin’wana Yese u rhume Davhida leswaku a yisela vamakwavo vakwe vanharhu swakudya lava a va ri enyimpini yo lwa ni valala va Xikwembu, ku nga Vafilista. Loko Davhida a fika, u tsutsumele enxaxamelweni wa nyimpi kutani a twa Goliyadi loyi a a ri xihontlovila a ri karhi a tlhontlha “nxaxamelo wa nyimpi ya Xikwembu lexi hanyaka.”  Hinkwavo a va chava ku lwa na Goliyadi. Hosi Sawulo u twe leswaku Davhida u lava ku lwa na Goliyadi, hiloko a n’wi vitana. Kambe loko Sawulo a vona Davhida, u te: “Wa ha ri mufana.”

Davhida u hlamusele Sawulo leswaku u tshame a dlaya nghala ni bere leswi a swi lava ku dya tinyimpfu ta ndyangu wa ka vona. Davhida u vule leswaku Goliyadi “u fanele a fana ni xin’wana xa swona.” Sawulo u hlamule a ku: “Famba, onge Yehovha a nga va na wena.” Davhida u kume maribye ya ntlhanu yo tswulungeka, a ma hoxa enkwameni wakwe wa varisi, a teka xipelupelu xakwe kutani a famba a ya lwa ni xihontlovila. Loko Goliyadi a vona Davhida loyi a ha ri xifanyetana a ri eku teni, u huwelele a ku: “Tana eka mina, ndzi ta nyiketa nyama ya wena eka tinyenyana.” Davhida u hlamule a ku: “Mina ndzi ta eka wena hi vito ra Yehovha,” hiloko a huwelela a ku: “Kunene ndzi ta ku dlaya.”

Xisweswo Davhida u tsutsumele eka Goliyadi, a humesa ribye enkwameni wakwe, a ri veka eka xipelupelu xakwe kutani a ri hoxa ri kongoma mombo wa Goliyadi. Loko Vafilista va vona leswaku xihontlovila xi file, va chave ngopfu kutani va baleka. Vaisrayele va va hlongorisile kutani va hlula nyimpi yoleyo. Hi kombela u hlaya ni ndyangu wa wena mhaka leyi hinkwayo leyi nga eka 1 Samuwele 17:12-54.

Minkarhi yin’wana u nga ha chava ku yingisa swileriso swa Xikwembu tanihi leswi wa ha riki muntshwa. Loko Yeremiya a ha ri muntshwa a a chava, kambe Xikwembu xi te eka yena: “U nga [chavi] . . . hikuva ‘ndzi na wena.’” Yeremiya u ve ni xivindzi kutani a chumayela hilaha Xikwembu xi n’wi leriseke hakona. Ku fana na Davhida na Yeremiya, loko u tshembela eka Yehovha, na wena u nga dyondza ku ka u nga chavi.—Yeremiya 1:6-8.