Yesu—Leswi Vanhu Va Swi Vulaka Ha Yena

“Yesu wa Nazareta . . . a swi kanakanisi leswaku ku vulavuriwa ngopfu ha yena ematin’wini.”—H. G. Wells, n’wamatimu wa Munghezi.

“Kreste . . . u hlawulekile eka matimu hinkwawo ya vanhu.”—Philip Schaff, n’wamatimu tlhelo mutivi wa ta vukhongeri la velekiweke eSwitzerland.

XANA i mani loyi a faneriwaka hi ku vuriwa wanuna wa nkoka la tshameke a hanya laha misaveni? Yi nga voniwa njhani ndlela leyi munhu a nga wa nkoka ha yona? Hi ku va ntlharhi enyimpini? Matimba ya yena? Hileswi a nga ni mabyongo? Kumbe, xana yi fanele yi voniwa hi ndlela leyi marito ni swiendlo swakwe swi khumbaka vanhu ha yona ni hi xikombiso lexi a va vekelaka xona?

Xiya leswi van’wamatimu, vativi va sayense, vakambisisi, vatsari, varhangeri va swa tipolitiki ni van’wana—lava hanyeke enkarhini lowu hundzeke ni lava nga kona sweswi—va swi vuleke hi wanuna wa le Nazareta, Yesu Kreste:

“Swi nga lava leswaku u soholota ntiyiso ku va u kota ku kaneta mhaka ya leswaku munhu la susumeteleke vanhu swinene—ku nga ri eka malembe ya 2 000 lama hundzeke ntsena kambe ematin’wini hinkwawo ya vanhu—ku ve Yesu wa le Nazareta.”—Reynolds Price, mutsari wa Muamerika tlhelo mukambisisi wa Bibele.

“Wanuna loyi a a nga ri na nandzu nikatsongo u tinyikele ku va gandzelo leswaku van’wana va vuyeriwa, ku katsa ni valala vakwe kutani a va nkutsulo wa vanhu hinkwavo. Xexo a ku ri xiendlo lexi hetisekeke.”—Mohandas K. Gandhi, murhangeri wa swa tipolitiki tlhelo murhangeri wa swa vukhongeri wa le Indiya.

“Ku sukela loko ndza ha ri ntsongo ndzi dyondzisiwe Bibele ni milawu ya Vayuda. Ndzi Muyuda, kambe ndzi tsakisiwa hi vumunhu lebyi hlamarisaka bya Yesu.”—Albert Einstein, mutivi wa sayense la velekiweke eJarimani.

“Hi ku ya hi mina, Yesu Kreste i munhu loyi a nga ta tshama a ri wa nkoka swinene minkarhi hinkwayo ni le matin’wini hinkwawo, tanihi N’wana wa Xikwembu tlhelo N’wana wa Munhu. Hinkwaswo leswi A swi vuleke kumbe ku swi endla i swa nkoka eka hina namuntlha kutani ku hava munhu la hanyaka kumbe la feke loyi ku nga vuriwaka sweswo ha yena.”—Sho·lem Asch, mutsari wa switsalwana la velekiweke ePoland hilaha swi tshahiweke hakona eka Christian Herald; marito lawa va lo voyamisa.

“Ku ringana malembe ya 35 ya vutomi bya mina, a ndzi nga pfumeli eka nchumu. Eka malembe ya ntlhanu lama hundzeke ndzi sungule ku pfumela leswaku Yesu a a ri munhu wa xiviri. Ndzi pfumele eka tidyondzo ta Yesu Kreste naswona vutomi bya mina byi cince hi xitshuketa.”—Count Leo Tolstoy, mutsari wa tinovhele tlhelo mutivi wa filosofi wa Murhaxiya.

“Ku hava munhu ni un’we loyi a susumeteleke vanhu vo tala ematin’wini ku tlula [Yesu], loyi a ha hambetaka a va susumetela ni sweswi.”—Kenneth Scott Latourette, n’wamatimu tlhelo mutsari wa Muamerika.

“Xana hi fanele hi ehleketa leswaku matimu ya vutomi bya Yesu i ntsheketo? A swi tano nikatsongo. Ematshan’weni ya sweswo, matimu ya Socrates lawa vanhu hinkwavo va pfumelaka eka wona a ku na vumbhoni lebyi tiyisekisaka leswaku i ya ntiyiso ku fana ni ya Yesu Kreste.”—Jean-Jacques Rousseau, mutivi wa filosofi wa Mufurwa.

Kutani swi le rivaleni leswaku Yesu Kreste hi yena loyi hi faneleke hi n’wi tekelela. Pawulo, wanuna la dyondzekeke wa hi lembe-xidzana ro sungula la hlawuriweke hi Yesu leswaku a va mulandzeri Wakwe ni ku vulavula ha Yena eka matiko, u hi khutaza ku “languta swinene-nene” eka Yesu. (Vaheveru 12:2; Mintirho 9:3) I yini leswi Yesu a nga hi dyondzisaka swona malunghana ni ndlela leyi hi nga hanyaka ha yona? Xana vutomi byakwe byi nga ku vuyerisa njhani?