Xana A Wu Swi Tiva?

Xana Pontiyo Pilato a a ri na xona xivangelo xo chava Khezari?

Leswaku varhangeri va Vayuda va sindzisa Pontiyo Pilato, Ndhuna-nkulu ya Murhoma, ku avanyisa Yesu va te: “Loko u ntshunxa munhu loyi, a wu nakulobye wa Khezari.” (Yohane 19:12) “Khezari” loyi ku vulavuriwaka ha yena laha a ku ri Tiberiyo, Mufumi wa Rhoma. Xana Pilato a a ri na xona xivangelo xo chava Khezari yoloye?

Khezari Tiberiyo a a ri munhu wa njhani? Buku yin’wana yi vula leswaku loko ka ha sele malembe yo tala leswaku Yesu a tengisiwa, Tiberiyo ana se a a tiviwa hi ku va “wanuna loyi a a tikomba a rhandza ku enerisa swilaveko swa yena n’wini ntsena naswona a a tirhisa tindlela tin’wana to biha swinene leswaku a endla tano.” (The New Encyclopeadia Britannica) Leswi a a nga tshembi munhu nikatsongo swi n’wi endle leswaku a xanisa ni ku dlaya munhu wihi na wihi loyi a a ehleketa leswaku i muxengi. Buku yoleyo yi ri: “Loko ku ri leswaku van’wamatimu lava hanyeke enkarhini wolowo va fanele va tshembiwa, swi vula leswaku vuhungasi lebyi a a byi rhandza a byi ri ni nsele ni madzolonga. Hambiloko leswi va swi vuleke ku nga ri ntiyiso, kambe yena a a dlaya munhu un’wana ni un’wana hi ndlela ya tihanyi nkarhi wun’wana ni wun’wana.”

Hikokwalaho, ndhuma leyi Tiberiyo a a ri na yona yi nga ha va yi endle leswaku Pilato a chavisiwa hi marito ya varhangeri va Vayuda lerova a lerisa leswaku Yesu a dlayiwa.—Yohane 19:13-16.

Ha yini Yesu a hlambise vaapostola vakwe milenge?

Le Israyele wa khale, vanhu vo tala a va endla mintirho ya vona ya siku ni siku va nga ambalanga tintangu. Tintangu leti vanhu a va ti ambala a ku ri maphaxani lawa a ma ri ni tintambu leti a ti bohelela nkondzo. Leswi magondzo ni masimu ya kona a swi ri ni ritshuri kumbe ndzhope, a swi nga endleki leswaku mikondzo ya vanhu yi nga thyaki.

Hikokwalaho a ku ri mukhuva wa vona ku va munhu a hluvula maphaxani yakwe loko a nghena endlwini. Munhu loyi a nga ni malwandla a a fanele a hlambisa muendzi wakwe milenge. Ntirho lowu a wu endliwa hi n’wini wa muti kumbe nandza wakwe. Bibele yi vulavula ko hlayanyana hi mukhuva lowu lowu tolovelekeke. Hi xikombiso, Abrahama u byele vaendzi lava a va n’wi endzerile a ku: “Ndzi kombela ku tisiwa matinyana, mi hlambisiwa milenge. Kutani mi vurhama ehansi ka murhi. Ndzi ta ta ni xipandzwa xa xinkwa mi ta phyuphyisa timbilu ta n’wina.”—Genesa 18:4, 5; 24:32; 1 Samuwele 25:41; Luka 7:37, 38, 44.

Mhaka leyi yi hi pfuna ku twisisa leswaku ha yini Yesu a hlambise vadyondzisiwa vakwe milenge hi siku ra Paseka yo hetelela leyi a yi tlangeleke na vona. Hi nkarhi wolowo, a ku ri hava n’wini wa muti kumbe nandza loyi a a ta va hlambisa milenge naswona ku hava ni un’we wa vadyondzisiwa loyi a tinyikeleke ku endla tano. Kutani leswi Yesu a tekeke xibya ni thawula leswaku a hlambisa milenge ya vaapostola vakwe a tlhela a yi sula, u va dyondzise leswaku va rhandzana ni ku titsongahata.—Yohane 13:5-17.