Xikwembu Xi Tirhise Mariya Eka Swikongomelo Swa Xona

HI NKARHI wa ntirho wa Yesu wa ku chumayela, wansati un’wana u tshame a huwelela hi rito leri tlakukeke exikarhi ka ntshungu a ku: “Ra tsaka khwiri leri ku rhwaleke ni mavele lawa u ma an’weke!” Loko Yesu a a lava leswaku mana wakwe a gandzeriwa, a a ta va a tirhise nkarhi wolowo ku byela vanhu leswaku va endla tano. Kambe u hlamule a ku: “E-e, ematshan’weni ya sweswo, Va tsaka lava twaka rito ra Xikwembu va tlhela va ri hlayisa!”—Luka 11:27, 28.

Yesu a nga xiximanga mana wakwe hi ndlela yo karhi yo hlawuka; naswona a nga kalanga a byela valandzeri vakwe leswaku va endla tano. Xana leswi swi fambisana njhani ni ndlela leyi vapfumeri vo tala lava hisekaka va n’wi gandzelaka ha yona Mariya? A hi kambisiseni leswi Matsalwa yo Kwetsima ma swi vulaka hi tidyondzo leti dumeke malunghana ni mana wa Yesu.

‘La Kombisiweke Tintswalo,’ “U Katekile Exikarhi Ka Vavasati”

Ntsumi Gabriyele yi byele Mariya ndlela leyi Xikwembu a xi ta n’wi tirhisa ha yona eka xikongomelo xa xona. Hi nkarhi wolowo, yi n’wi xewete yi ku: “Xewani, wena loyi a tsakeriweke swinene, Yehovha u na wena.” (Luka 1:28) Bibele yin’wana yi hundzuluxela marito lawa hi ndlela leyi: ‘La kombisiweke tintswalo, Hosi yi na wena.’ Endzhakunyana ka sweswo, Elizabeta u xewete Mariya hi ndlela leyi: “U katekile exikarhi ka vavasati, naswona mbhandzu wa khwiri ra wena wu katekile!” (Luka 1:42) Xana marito lawa a ma swi kombisi leswaku Mariya u fanele a gandzeriwa?

Nikatsongo. Hambileswi marito lawa ma vuriwaka hi Makhatoliki loko ma khongela eka Mariya, Bibele hi yoxe a yi nyikeli swivangelo swa leswaku vanhu va fanele va khongela eka yena. Gabriyele na Elizabeta a va swi  tiva leswaku Mariya a a ri ni lunghelo ra nkoka ra ku veleka Mesiya, kambe Matsalwa a ma vuli leswaku vanhu va fanele va khongela eka yena. Ematshan’weni ya sweswo, loko vadyondzisiwa va Yesu va n’wi kombele leswaku a va dyondzisa ndlela yo khongela ha yona, u kombise leswaku a va fanele va khongela eka Tata wakwe. Entiyisweni, xikhongelo xa Yesu lexi dumeke lexi nga xikombiso, xi sungula hi marito lama nge: “Tata wa hina la nge matilweni.”—Matewu 6:9.

U Ta Va Un’wana Wa Vafumi

Dyondzo yin’wana leyi dumeke hi Mariya i ya leswaku sweswi i “Hosi ya xisati ya le tilweni.” Bibele a yi si tshama yi n’wi nyika xithopo xolexo. Hambiswiritano, yi kombisa leswaku u ni ntirho wo hlawuleka emfun’weni wa Xikwembu wa le tilweni. Hi wihi ntirho wolowo?

Yesu u vule leswaku van’wana va vadyondzisiwa vakwe vo tshembeka va ta fuma na yena eMfun’weni wakwe. (Luka 22:28-30) Yesu u ta va nyika vulawuri vanhu volavo lava hlawuriweke leswaku va va ‘vaprista eka Xikwembu xa hina, ni ku va tihosi va fuma misava.’ (Nhlavutelo 5:10) Bibele yi hi pfuna ku gimeta hileswaku Mariya i un’wana wa lava nyikiweke lunghelo leri leri tlakukeke. Ha yini hi vula tano?

U ta tsundzuka leswaku endzhaku ka rifu ra Yesu, Mariya a a “phikelela exikhongelweni” swin’we ni vadyondzisiwa va Yesu ni vamakwavo. Vanhu van’wana va kwalomu ka 120 va hlanganile hi xikongomelo lexi, ku katsa ni “vavasati van’wana.” (Mintirho 1:12-15) Bibele yi vula leswaku loko “nkhuvo wa Pentekosta [wu] ya emahlweni, hinkwavo a va hlangane endhawini yin’we,” hiloko moya lowo kwetsima wa Xikwembu wu chuluriwa ehenhla ka vona, wu endla leswaku va vulavula hi tindzimi timbe.—Mintirho 2:1-4.

Leswi Mariya a a ri un’wana wa lava moya lowo kwetsima wu chuluriweke ehenhla ka vona, i vumbhoni bya leswaku yena ni vavasati van’wana va hlawuriwe ku va vafumi-kulobye swin’we na Yesu eMfun’weni wakwe wa le tilweni. Kutani lebyi i vumbhoni bya leswaku sweswi Mariya u na Yesu etilweni. (Varhoma 8:14-17) Ehleketa hi ntirho wa nkoka lowu yena swin’we ni vafumi-kulobye van’wana na Yesu va nga ta va na wona loko va hetisisa swikongomelo swa Xikwembu.

Va Ta Tisela Vanhu Mikateko Leyi Hlamarisaka

Buku ya Bibele ya Nhlavutelo yi vula leswaku lava 144 000 va ta pfuxeriwa etilweni leswaku va ya va vaprista, vaavanyisi ni tihosi swin’we na Yesu. (Nhlavutelo 14:1, 4; 20:4, 6) Leswi va nga vaprista va ta tirhisa matimba ya gandzelo ra Yesu eka vanhu hinkwavo lava yingisaka, va va endla va va lava hetisekeke emahanyelweni, enyameni ni le ka vuxaka bya vona na Yehovha. (Nhlavutelo 21:1-4) Hakunene ku ta va nchumu lowu tsakisaka eka vagandzeri hinkwavo lava tshembekaka va Yehovha ku vona nkarhi wolowo wo hlamarisa! *

Yehovha u tirhise Mariya eku hetisiseni ka swikongomelo swakwe naswona wa ha n’wi tirhisa ni sweswi. U fanele a tekeleriwa hikwalaho ka leswi a a titsongahata, a a ri ni ripfumelo, a a yingisa, a a ri manana la gingiritekaka ni leswi ngopfu-ngopfu a a tiyisela loko a hlangavetana ni miringo. U fanele a xiximiwa swinene hikwalaho ka leswi a velekeke Mesiya ni leswi a nga ta hoxa xandla loko vanhu va tiseriwa mikateko leyi nga heriki.

Hambiswiritano, dyondzo ya nkoka swinene leyi hi yi dyondzaka eka Mariya hileswaku yena swin’we ni malandza man’wana yo tshembeka ya Yehovha Xikwembu, va gandzela Yena ku nga ri xikwembu xin’wana. Mariya swin’we ni vafumi-kulobye na Kreste, va huwelela va ri etilweni va ku: “Ku dzuneka ni ku xiximiwa ni ku vangama ni matimba a swi ve eka Loyi a tshameke exiluvelweni [Yehovha Xikwembu] ni le ka Xinyimpfana [Yesu Kreste] hi masiku ni masiku.”—Nhlavutelo 5:13; 19:10.

[Nhlamuselo ya le hansi]

[Marito lama tshahiweke exihlokweni lama nga eka tluka 10]

Vanhu va fanele va tekelela ku titsongahata, ripfumelo ni ku yingisa ka Mariya